ᑐᓴᕋᑦᓴᓕᕆᔩᑦ

ᐊᓗᑭ ᑰᑦᑎᖅ, ᐊᖓᔪᖅᑳᖅ, ᑐᓐᖓᕕᒃ ᒪᑐᐃᕈᑏᑦ ᑲᑎᒪᔨᕋᓛᖑᑲᐃᓐᓇᖅᑐᓄᑦ ᒪᓕᒐᑦᓴᒧᑦ ᐱᖁᔭᒃᓴᖅ 25 – ᑐᒃᓯᕋᐅᑦ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᖅ ᐋᖅᑭᒋᐊᕈᑎᒃᓴᓄᑦ

ᐊᓗᑭ ᑰᑦᑎᖅ, ᐊᖓᔪᖅᑳᖅ, ᑐᓐᖓᕕᒃ
ᒪᑐᐃᕈᑏᑦ ᑲᑎᒪᔨᕋᓛᖑᑲᐃᓐᓇᖅᑐᓄᑦ ᒪᓕᒐᑦᓴᒧᑦ
ᐱᖁᔭᒃᓴᖅ 25 – ᑐᒃᓯᕋᐅᑦ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᖅ ᐋᖅᑭᒋᐊᕈᑎᒃᓴᓄᑦ
ᓇᒡᒐᔾᔭᐅ, ᓅᕙᐃᒻᕙ 25, 2019 ᖃᐅᔨᓴᐅᑦ 10:30 ᐅᓪᓗᒃᑯᑦ

ᑐᑭᓯᑎᑦᓯᕐᖓᐅᑏᑦ
ᖁᔭᓐᓇᒦᒃ, ᐃᒃᓯᕙᐅᑕᖅ ᐊᒻᒪᓗ ᐃᓚᒋᔭᐅᔪᑦ, ᐱᕕᒃᓴᖃᖅᑎᑕᐅᒐᒪ ᐅᓂᒃᑳᓂᕐᒥᒃ ᑲᑎᒪᔨᕋᓛᖑᑲᐃᓐᓇᖅᑐᓄᑦ ᐅᓪᓗᒥ ᐱᖁᔭᒃᓴᖅ 25-ᒧᑦ.

ᐊᓗᑭ ᑰᑦᑎᐅᔪᖓ. ᓄᓇᕗᑦ ᑐᓐᖓᕕᒃ ᑎᒥᖓᓂ ᐊᖓᔪᖅᑳᖑᔪᖓ.

ᐅᓂᒃᑳᕐᓂᕆᓂᐊᖅᑕᕋ ᑲᑐᔾᔨᓂᒃᑯᑦ ᑭᒡᒐᑐᐃᓪᓗᖓ ᑐᓐᖓᕕᒃᑯᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ, ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᑦ ᐊᒻᒪᓗ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᑦ (ᑖᒃᑯᐊ ᐃᓄᐃᑦ ᑲᑐᔾᔨᖃᑎᒌᖏᑦ) ᐊᒻᒪᓗ ᑐᓴᐅᒪᑎᑕᐅᓂᒃᑯᑦ ᐅᖃᐅᓯᐅᖃᑦᑕᕐᓯᒪᔪᓂᒃ ᓄᓇᕗᒻᒥᐅᓄᑦ.

ᐅᓪᓗᒥ ᐅᖃᓕᒪᕕᒋᔭᑦᓯ ᑭᒡᒐᑐᐃᓪᓗᖓ ᓄᓇᕗᒻᒥ ᐃᓄᓐᓂᒃ.
ᒐᕙᒪᒃᑯᑦ ᓴᒃᑯᐃᖁᒐᑦᑎᒍ ᐱᖁᔭᒃᓴᖅ 25-ᒥᒃ.

ᐱᔪᓐᓇᐅᑎᖃᕋᓗᐊᖅᑎᓪᓗᑕ, ᐃᓚᒋᔭᐅᓪᓗᓂ ᐃᓛᒃᑯᑦ 32 ᓄᓇᕗᒻᒥ ᐊᖏᕈᑎᓂ, ᐊᒻᒪᓗ ᐱᓕᕆᐊᒃᓴᑎᓐᓂᒃ ᐱᓇᓱᐊᖏᓐᓇᕋᓗᐊᖅᑎᓪᓗᑕ, ᑐᓐᖓᕕᒃᑯᑦ ᐃᓚᒋᔭᐅᓚᐅᕐᓯᒪᓐᖏᒻᒪᑕ ᐱᕙᓪᓕᐊᑎᑕᐅᓂᖏᓐᓂ ᑐᒃᓯᕋᐅᑕᐅᔪᒧᑦ ᒪᓕᒐᑦᓴᒧᑦ.

ᑕᒪᓐᓇ ᐃᓱᒫᓗᓐᓇᕐᒪᑦ, ᐱᓗᐊᖅᑐᒥ ᖁᑉᕙᐸᓪᓕᐊᑐᐃᓐᓇᑎᓪᓗᒍ ᓯᕗᓪᓕᐅᔾᔭᐅᔭᕆᐊᖃᖅᑎᑕᐅᔪᑦ ᐃᓄᐃᑦ ᑐᕌᖓᔪᑦ ᓴᖅᑮᓂᕐᒥᒃ ᐃᓕᓐᓂᐊᓂᕐᒧᑦ ᐊᐅᓚᑦᓯᒍᑕᐅᔪᓄᑦ ᐱᕚᓪᓕᕈᑎᒃᓴᓄᓪᓗ ᐃᓄᐃᑦ ᓯᕗᓪᓕᐅᔾᔭᐅᖁᔭᖏᓐᓄᑦ ᐊᒻᒪᓗ ᐃᓄᐃᑦ ᐃᓕᖅᑯᓯᖓᓄᑦ.

ᐃᓄᐃᑦ ᑐᒃᓯᕋᓐᖏᑦᑐᑦ ᓄᑖᒥᒃ, ᐊᒻᒪᓗ ᕿᓄᔪᒍᑦ ᒐᕙᒪᑦᑎᓐᓄᑦ ᓈᖕᒪᑦᑐᒥᒃ, ᑕᑉᕙᖔᕐᓯᒪᔪᒥᒃ ᒫᓐᓇ ᒪᓕᒐᕆᔭᐅᔪᒥᒃ.

ᑐᓴᕆᐊᖃᑦᑕᑎᓪᓗᒋᑦ ᐋᖅᑭᒋᐊᕈᑕᐅᓇᓱᐊᖅᑐᒧᑦ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᒧᑦ ᐊᒻᒪᓗ ᐃᓄᐃᑦ ᐅᖃᐅᓯᖓᑕ ᓴᐳᑎᔭᐅᓯᒪᓂᖓᓄᑦ ᐱᖁᔭᒧᑦ ᐅᑭᐊᑦᓵᖑᓚᐅᖅᑐᖅ ᐅᑭᐅᖑᓚᐅᖅᑐᕐᓗ, ᑕᖅᑲᒃᑯᐊ ᐊᒻᒪᓗ ᑕᒫᓂ ᓯᕗᓕᖅᑎᖏᑦ ᓄᓇᓕᓐᓂ ᐃᓕᓐᓂᐊᕐᓂᓕᕆᔨᒃᑯᑦ ᑲᑎᒪᔨᖏᓐᓄᑦ (DEA) ᑲᒪᖃᑦᑕᓚᐅᖅᑐᑦ ᐱᓇᓱᐊᖅᑐᑎᓪᓗ ᑐᓂᓂᐊᖅᑕᒥᓂᒃ ᐅᖃᐅᓯᒃᓴᓂᒃ ᐃᑲᔫᑎᖃᕈᒪᓪᓗᑎᒃ ᒪᑭᒪᒍᑎᒃᓴᓂᒃ ᐃᓕᓐᓂᐊᕐᓂᓕᕆᓂᕐᒧᑦ ᐋᖅᑭᒋᐊᕆᓂᕐᒧᑦ ᓄᓇᑦᑎᓐᓂ.

ᐃᓄᐃᑦ ᐅᖃᐅᓯᖃᐃᓐᓇᖃᑦᑕᕐᓯᒪᔪᑦ ᐊᖅᑯᑎᒋᔪᒪᔭᒥᓂᒃ ᓯᕗᒧᐊᒍᑎᒃᓴᒥᒃ ᐊᕙᖕᒧᓕᖓᔪᒥ ᐃᓕᓐᓂᐊᓂᕐᒨᖓᔪᓂᒃ. ᑕᒪᒃᑯᐊ ᐃᓱᒫᓗᓐᓇᖅᑐᑦ ᐅᖃᐅᓯᕆᔭᐅᖏᓐᓇᖃᑦᑕᕐᓯᒪᔪᑦ ᐃᓕᓐᓄᑦ (ᐊᒻᒪᓗ ᓯᕗᓪᓕᐅᓚᐅᖅᑐᓄᑦ) − ᑎᑎᖅᑲᒃᑯᑦ ᐊᒻᒪᓗ ᐃᓕᓴᕆᔭᐅᓯᒪᔪᒃᑯᑦ ᑐᓂᔭᐅᖃᑦᑕᕐᓯᒪᔪᒃᑯᑦ, ᑐᕋᐃᓐᓇᕐᕕᐅᓪᓗᑎᒃ ᒪᓕᒐᓕᐅᖅᑏᑦ ᐊᒻᒪᓗ ᐊᓯᖏᑎᒍᑦ.

ᐃᓱᒫᓘᑎᒋᓂᐹᕗᑦ ᐱᖓᓲᕗᑦ:

1. ᐃᓄᒃᑐᑦ ᐅᖃᐅᓯᖅ ᐃᓕᓴᐃᔾᔪᑕᐅᓂᖓ ᐃᓕᓐᓂᐊᕐᓂᓕᓕᒫᓄᑦ ᐊᒻᒪᓗ ᐃᓕᓐᓂᐊᕈᑎᓕᒫᓄᑦ, ᐅᖃᐅᓯᕐᒧᑐᐃᓐᓇᐅᖏᑦᑐᖅ. ᐃᓄᐃᑦ ᐃᓕᖅᑯᓯᖓ ᐋᖅᑭᑦᓯᒪᒋᐊᓕᒃ ᐊᔾᔨᐅᑎᑕᐅᓗᓂ ᐃᓕᓐᓂᐊᕐᓂᕐᒧᑦ ᐊᐅᓚᑦᓯᒍᑕᐅᔪᓂ.

2019 ᓇᓗᓇᐃᕐᓯᒍᑕᐅᔪᖅ ᓄᓇᕐᔪᐊᓕᒫᒥ ᐊᕐᕌᒍᖓᓂᒃ ᓄᓇᖃᖅᑳᕐᓯᒪᔪᓄᑦ ᐅᖃᐅᓯᕐᓂᒃ − ᐅᔾᔨᕈᓲᑎᒃᓴᐅᔪᖅ ᓄᓇᖃᖅᑳᕐᓯᒪᔪᑦ ᐅᖃᐅᓯᖏᓐᓂᒃ ᐊᒻᒪᓗ ᑐᐊᕕᕐᓇᕐᓂᖓᓂᒃ ᓴᕐᖓᑦᑎᑕᐅᒋᐊᕆᐊᖃᕐᓂᖓ, ᐅᑎᖅᑎᑕᐅᓗᓂ ᐊᒻᒪᓗ ᐱᕚᓪᓕᕈᑎᒃᓴᖓᓂᒃ.

ᑕᒫᓂ ᓄᓇᕗᒻᒥ, ᐃᓱᒫᓘᑎᒋᒐᑦᑎᒍ ᓯᕗᓂᒃᓴᖓ ᐃᓄᒃᑐᑦ. ᑐᕌᒐᑦ ᓴᐳᔾᔨᓂᕐᒧᑦ, ᔭᒐᔾᔭᐃᑎᑦᓯᓂᕐᒧᑦ ᐊᒻᒪᓗ ᐱᕚᓪᓕᕈᑎᒃᓴᖓᓂᒃ ᐃᓄᒃᑐᑦ, ᑕᑯᓐᓇᒐᐅᓯᒪᔪᒥᒃ ᑕᑯᓐᓇᖑᐊᖅᑕᐅᑎᓪᓗᒍ ᓄᓇᕗᑦ ᒫᓐᓇ ᑲᔪᓯᑎᑕᐅᕙᓪᓕᐊᖏᑦᑐᑦ.

ᒫᓐᓇ ᐃᓕᓐᓂᐊᓂᕐᒧᑦ ᐊᐅᓚᑦᓯᒍᑕᐅᔪᖅ ᓄᓇᕗᒻᒥ ᐊᑐᖅᑕᐅᖏᑦᑐᖅ ᐊᑐᖅᑕᐅᒋᐊᖃᕐᓂᖓᒍᑦ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᖅ ᐊᒻᒪᓗ ᐃᓄᐃᑦ ᐅᖃᐅᓯᖓᑕ ᓴᐳᑎᔭᐅᓯᒪᓂᖓᓄᑦ ᐱᖁᔭᖅ.ᑭᓯᐊᓂᓕ ᐊᐅᓚᑦᓯᒍᑕᐅᑐᐃᓐᓇᖅᑐᖅ ᑭᒡᒍᑕᐅᒐᓂ ᓈᖕᒪᖏᔾᔪᑕᐅᔪᓂᒃ ᐊᑐᕋᑦᓴᓕᐊᖑᔪᓂᓪᓗ ᐊᑐᖅᑕᐅᒋᐊᓕᑦᑎᒍᑦ, ᒐᕙᒪᕗᑦ ᖃᒥᑦᓯᓇᓱᐊᑐᐃᓐᓇᕐᓂᖓ ᓇᓗᓇᐃᕐᓯᒪᔪᖅ ᒫᓐᓇ ᐅᖃᐅᓯᕐᒧᑦ ᐱᔪᓐᓇᐅᑎᓂᒃ ᐱᖁᔭᒃᓴᖅ 25-ᑯᑦ.

ᑐᐊᕕᕐᓇᕐᓂᖓ ᓴᕐᖓᖅᑎᑕᐅᒋᐊᕆᐊᖃᕐᓂᖓᓄᑦ ᐅᑎᖅᑎᑕᐅᓇᓱᐊᕐᓗᓂᓗ ᐃᓄᒃᑐᑦ, ᐱᓗᐊᖅᑐᒥ ᐊᒥᓲᓂᕐᓴᕐᔪᐊᓄᑦ ᒪᒃᑯᑦᑐᓄᑦ ᓄᓇᕗᒻᒥ. ᑭᒡᓕᓯᓂᐊᖅᑎᕐᔪᐊᒃᑯᑦ ᑲᓇᑕᒥ 2016 ᑲᓇᑕᒥ ᓈᓴᐃᓂᕐᔪᐊᖃᖅᑎᓪᓗᒋᑦ, ᒪᒃᑯᑦᑐᑦ ᓄᓇᕗᒻᒥᐅᑦ ᒥᑦᓯᑎᓐᓂ ᐅᑭᐅᓖᑦ 25 49.7%-ᕆᔭᖏᑦ ᐃᓄᖏᑕ. 89% ᐃᓅᓪᓗᑎᒃ ᐅᖃᖃᑎᖃᕈᓐᓇᖅᑐᑦ ᐃᓄᒃᑐᑦ, ᓈᓴᐃᓂᕐᔪᐊᒥ ᖃᐅᔨᓴᕈᑕᐅᓚᐅᖅᑐᑦ ᓴᖅᑭᔮᖅᑎᑦᓯᓐᖏᒍᓐᓇᖅᑐᑦ ᐊᔪᓐᖏᑐᕐᔪᐊᖑᓂᖏᓐᓂᒃ.

ᖃᓪᓗᓈᑎᑐᑦ ᓴᓐᖏᓂᕐᓴᐅᖏᓐᓇᕐᐸᑦ ᐅᖃᐅᓯᖅ ᐃᓕᓴᐃᔾᔪᑕᐅᔪᖅ ᓄᓇᕗᒻᒥ ᐃᓕᓐᓂᐊᕐᕕᖏᓐᓄᑦ ᐊᐅᓚᑕᐅᔪᓂ, ᖃᓄᕐᓕ ᑕᒪᓐᓇ ᐊᐅᓚᑕᐅᓂᖓ ᐃᑲᔪᕐᓲᑕᐅᕙ ᕿᑐᕐᖓᓕᓐᓂᒃ ᐃᓚᖏᓐᓄᓪᓗ ᑎᒍᓯᓇᓱᐊᖅᑎᓪᓗᒋᑦ ᐃᓕᖅᑯᓯᑦᑎᓐᓂᒃ ᐊᒻᒪᓗ ᐅᖃᐅᓯᕐᒧᑦ ᐱᔪᓐᓇᐅᑎᖏᑦ ᐱᔪᒪᔭᐅᔪᓂᓪᓗ?

ᐱᑕᖃᕆᐊᖃᒻᒪᕆᒻᒪᑦ ᐃᓄᒃᑐᑦ ᐃᓕᓴᐃᔾᔪᑕᐅᓗᓂ ᐃᓕᓐᓂᐊᕆᐊᓕᕋᑖᓂᒃ ᐃᓕᓐᓂᐊᕐᓂᓕᓐᓄᑦ 12-ᒧᑦ ᐃᓄᒃᑐᑦ ᐃᑉᐱᒍᓲᑕᐅᒻᒪᑦ.

ᑕᐃᒪᓐᖓᓂᒃ ᐱᓐᖑᖅᑎᑕᐅᓚᐅᖅᑎᓪᓗᒍ 1999−ᒥ, ᓄᓇᕗᑦ ᒐᕙᒪᒃᑯᖏᑦ ᐅᖃᐅᓯᕐᒥᒃ ᓴᒃᑯᐃᓯᒪᐃᓐᓇᕐᐳᖅ ᐃᓄᒃᑐᑦ ᖃᓪᓗᓈᑎᑐᑦ ᐱᕕᒃᓴᖃᕐᓂᕐᓴᐅᑎᑦᓯᓗᑎᒃ ᐊᒻᒪᓗ ᖃᓪᓗᓈᓂ ᑲᓇᑕᒥᐅᑦ (ᐅᖃᐅᓯᐅᓲᑦ ‘ᖃᓪᓗᓈᑦ’) ᐊᑐᖃᑦᑕᓲᖏᑦ ᐃᑲᔫᑎᒃᓴᐅᓂᖏᓐᓂᒃ ᓄᓇᕗᑦ ᐅᑭᐅᖅᑕᖅᑐᒥ ᐊᒻᒪᓗ ᐃᓄᐃᑦ ᐃᓕᓐᓂᐊᓂᕐᒧᑦ ᐊᐅᓚᑦᓯᒍᑕᐅᔪᑦ. ᑕᒪᓐᓇ ᐅᖃᐅᓯᖅ ᐊᒻᒪᓗ ᐃᓕᖅᑯᓯᕐᒧᑦ ᐅᓗᕆᐊᓇᖅᑐᖅ ᐊᑐᖅᑕᐅᑎᑕᐅᔪᖅ ᐃᓄᓐᓄᑦ ᓱᕈᓯᕐᓄᑦ ᐃᓚᖏᓐᓄᓪᓗ, ᐊᑐᖅᑕᐅᖃᑦᑕᕐᓯᒪᔪᖅ ᐊᒻᒪᓗ ᒫᓐᓇ, ᐃᑲᔫᑎᔪᖅ ᐃᓕᓐᓂᐊᓂᕐᒧᑦ ᐊᐅᓚᑦᓯᒍᑕᐅᔪᒧᑦ ᑐᓐᖓᕕᖃᖅᑐᒧᑦ ᐃᓕᖅᑯᓯᕆᓐᖏᑕᒥᓂᒃ ᐃᓕᖅᑯᓯᖅᑖᖅᑎᑕᐅᓯᒪᔪᓄᑦ.

ᐅᓪᓗᒥ ᓄᓇᕗᒻᒥ, UN−ᑯᓐᓂᒃ ᐊᕐᕌᒍᕆᔭᐅᑎᑕᐅᑎᓪᓗᒍ ᓄᓇᖃᖅᑳᕐᓯᒪᔪᑦ ᐅᖃᐅᓯᖏᓐᓄᑦ, ᐱᐅᓐᖏᑦᑐᓂᒃ ᑕᑯᐃᓐᓇᖅᑐᒍᑦ ᐃᓕᓐᓂᐊᓂᕐᒨᖓᔪᓂᒃ ᐊᓯᖅᑯᑉᕕᖃᖅᑎᑕᐅᓐᖏᑦᑐᒥᒃ ᐊᔾᔨᒋᔭᐅᑎᑕᐅᒐᓱᐊᕐᓂᒃᑯᑦ ᐊᒻᒪᓗ ᑲᑉᐱᐊᓇᖅᑐᒃᑯᑦ ᐅᓗᕆᐊᓇᖅᑐᒨᖅᑕᐅᓂᕐᒧᑦ, ᐃᓕᓐᓂᐊᕆᐊᖅᑎᑕᐅᕙᓚᐅᕐᓯᒪᔪᓅᓐᖏᑦᑐᖅ, ᑭᓯᐊᓂᓕ ᐊᓯᖏᓐᓄᑦ ᒐᕙᒪᓕᕆᓂᕐᒧᑦ ᐊᒻᒪᓗ ᐃᓕᓐᓂᐊᑎᑦᓯᒍᑕᐅᔪᓅᖓᔪᓂᒃ.

ᐃᓕᓐᓂᐊᓂᕐᒧᑦ ᐊᐅᓚᓂᖓ ᒥᑭᓪᓕᑎᑦᓯᓯᒪᐃᓐᓇᖅᑐᖅ ᑲᑕᑦᑎᓯᓯᒪᒍᑕᐃᓪᓗᓂᓗ ᐃᓕᖅᑯᓯᕐᒥᒃ, ᒪᑭᒪᔾᔪᑎᓂᒃ ᐊᒻᒪᓗ ᐊᕙᑎᑦᑎᓐᓂ ᐊᑐᖅᑕᐅᒋᐊᓕᒻᒥᒃ ᐃᓄᒃᑐᑦ ᐃᓄᓐᓄᑦ ᐃᓕᓐᓂᐊᖅᑎᓄᑦ ᐃᓚᖏᓐᓄᓪᓗ.

ᓄᓇᕗᑦ ᒐᕙᒪᒃᑯᓐᓂᒃ−ᑐᕌᒐᓕᐊᖑᓯᒪᔪᖅ ᐃᓕᓐᓂᐊᕈᑎᒃᓴᓕᕆᓂᕐᒧᑦ ᐅᖁᒪᐃᑦᑐᓂᒃ ᐊᑲᐅᓐᖏᓪᓕᐅᕈᑎᖃᕐᐳᖅ ᖃᓪᓗᓈᓃᓐᖔᖅᑐᓂᒃ ᓈᖕᒪᖏᑦᑐᓂᒃ ᐊᑐᖅᑕᐅᖃᑦᑕᖅᑐᓂᒃ ᖃᓪᓗᓈᓂᒃ ᐊᒻᒪᓗ ᖃᓪᓗᓈᑦ ᐱᖕᒪᕆᐅᔪᖁᑎᖏᓐᓂᒃ ᐊᐅᓚᑦᓯᒍᑕᐅᔪᓂᒃ, ᑲᑕᑦᑎᑦᓯᒍᑕᐅᓯᖃᑦᑕᕐᓱᓂᓗ ᐊᓯᖏᓐᓂᒃ − ᓄᓇᕗᒻᒨᖓᔪᒥᒃ − ᐃᓄᒃᑐᑦ ᐊᒻᒪᓗ ᐃᓄᐃᑦ ᖃᐅᔨᒪᔾᔪᓯᖏᓐᓂᒃ, ᐃᓅᓂᖏᓐᓂᒃ ᑐᑭᓯᐊᓂᖏᓐᓂᓪᓗ.

ᑕᒪᓐᓇ ᐱᕚᓪᓕᑎᑦᓯᒍᑕᐅᓯᒪᔪᖅ ᐅᖃᐅᓯᕐᒧᑦ ᓯᖁᒥᑦᓯᒍᑕᐅᓪᓗᓂ ᐊᔾᔨᐅᓐᖏᑎᑕᐅᓂᕐᒧᑦ. ᑕᒪᒃᑯᐊᖑᒐᓗᐊᖅᑎᓪᓗᒋᑦ ᒪᑭᒋᐊᕈᑎᒃᓴᐅᓇᓱᐊᖅᑐᑦ, ᓴᖅᑭᕐᓯᒪᔪᖅ ᐃᓕᓐᓂᐊᓂᕐᒧᑦ ᐊᐅᓚᑦᓯᒍᑕᐅᔪᖅ ᐃᓚᐃᓐᓈᓂᕐᒥᒃ ᐱᕋᔭᐃᓯᒪᓂᕐᒥᒃ ᐊᔾᔨᐅᓐᖏᑦᑎᑕᐅᓂᖏᓐᓄᑦ ᐃᓄᐃᑦ ᓱᕈᓰᑦ ᒪᒃᑯᑦᑐᓪᓗ (ᐃᓚᖏᓪᓗ) ᑐᓐᖓᕕᒋᔭᐅᓪᓗᓂ ᐅᖃᐅᓯᖓ ᐊᒻᒪᓗ ᖃᒥᑦᓯᒍᑕᐅᓪᓗᓂ ᐅᖃᐅᓯᕐᒧᑦ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓂᒃ:

1. ᐃᓇᖏᖅᑕᐅᓂᖓᓄᑦ ᐃᓄᒃᑐᑦ ᖃᓪᓗᓈᑎᑑᕐᓂᕐᒧᑦ;

2. ᐋᖅᑭᐅᒪᑦᓯᓂᖅ ᐅᐃᒍᔭᐅᖃᑦᑕᕐᓂᖓᓗ ᖃᓪᓗᓈᑎᑐᑦ ᐅᖃᐅᓯᖅ ᐃᓕᓴᐃᔾᔪᑕᐅᓪᓗᓂ; ᐊᒻᒪᓗ

3. ᑭᖑᕙᕆᐊᖅᑎᑦᓯᓂᕐᒧᑦ ᐋᖅᑭᑦᑕᐅᒌᕐᓯᒪᔪᒥᒃ ᑲᔪᓯᑎᑐᐃᓐᓇᕆᐊᓕᒻᒥᒃ ᐃᓄᒃᑐᑦ ᐅᖃᐅᓯᖅ ᐃᓕᓴᐃᔾᔪᑕᐅᒍᑎᒃᓴᖓᓂᒃ 2039−ᒧᑦ:

I. ᐱᖁᔭᑦᓴᖅ 25 ᖁᐊᖅᓵᓇᖅᑐᖅ ᑲᑕᑎᑦᓯᒋᐊᕈᑕᐅᒻᒥᔪᖅ ᐱᔪᓐᓇᐅᑎᖏᓐᓄᑦ ᐃᓄᐃᑦ ᐅᖃᐅᓯᖓ ᐃᓕᓴᐃᔾᔪᑎᒃᓴᐅᓂᖓᓄᑦ ᐃᓄᐃᑦ ᐅᖃᐅᓯᖓᑕ ᐊᑐᖅᑕᐅᖃᑦᑕᕐᓂᖏᑎᒍᑦ. 2039−ᒥᒃ ᐃᓄᒃᑐᑦ ᐅᖃᐅᓯᖓ ᐊᑐᖅᑕᐅᓕᑕᐃᓐᓇᕋᔭᖅᑐᖅ ᐃᓕᓐᓂᐊᕈᑕᐅᓗᓂ ᐃᓕᓐᓂᐊᕐᓂᓕᓐᓄᑦ 4-ᒥᒃ 12-ᒧᑦ ᐊᑐᐃᓐᓇᐅᓕᕐᓗᓂ. ᐃᓄᒃᑐᑦ ᐅᖃᐅᓯᖅ ᐃᓕᓴᐃᔾᔪᑕᐅᓂᖓᓄᑦ ᐱᕕᒃᓴᓕᐊᖑᓯᒪᔪᑦ ᑕᒪᐃᓐᓄᑦ ᐊᓯᖏᓐᓄᑦ ᐃᓕᓐᓂᐊᕈᑎᓄᑦ ᕿᒪᒃᑕᐅᓯᒪᔪᑦ ᐋᖅᑭᑦᑕᐅᓯᒪᓪᓗᑎᒃ ᓯᕗᓂᑦᑎᓐᓂ ᐅᑉᕙᓘᓐᓃᑦ ᐊᑐᖅᑕᐅᓚᐅᕐᓯᒪᓐᖏᓯᐊᒻᒪᕆᓕᕐᓗᓂ. ᑕᒪᓐᓇ ᓈᖕᒪᖏᑦᑐᖅ ᐸᕐᓇᐅᑦ ᐊᖏᕈᓐᓇᖏᑦᑕᕗᑦ ᐊᒻᒪᓗ ᑲᑎᒪᔨᕋᓛᖑᑲᐃᓐᓇᖅᑐᑦ ᐊᖏᕆᐊᖃᓐᖏᒻᒪᕆᑦᑕᖓᑦᑕᐅᖅ.

II. ᐃᓄᒃᑐᑦ ᐅᖃᐅᓯᖅ ᐃᓕᓴᐃᔾᔪᑕᐅᓂᖓ ᐃᓕᓐᓂᐊᕐᓂᓕᓕᒫᓄᑦ ᐊᒻᒪᓗ ᐃᓕᓐᓂᐊᕈᑎᓕᒫᓄᑦ, ᐅᖃᐅᓯᕐᒧᑐᐃᓐᓇᐅᖏᑦᑐᖅ. ᐃᓄᐃᑦ ᐃᓕᖅᑯᓯᖓ ᐋᖅᑭᑦᓯᒪᒋᐊᓕᒃ ᐊᔾᔨᐅᑎᑕᐅᓗᓂ ᐃᓕᓐᓂᐊᕐᓂᕐᒧᑦ ᐊᐅᓚᑦᓯᒍᑕᐅᔪᓂ.

ᒐᕙᒪᒃᑯᑦ ᐋᖅᑭᐅᒪᑦᓯᒻᒪᑕ ᐱᕚᓪᓕᑎᑦᓯᖃᑦᑕᕐᓱᑎᓪᓗ ᐅᖃᐅᓯᖅ ᐱᕋᔭᒍᑕᐅᒻᒪᑦ ᐊᔾᔨᐅᑎᑕᐅᓐᖏᓂᕐᒧᑦ ᐊᑐᐊᒐᖏᓐᓂ ᐊᒻᒪᓗ ᐊᑐᖅᑕᐅᖃᑦᑕᖅᑐᓂ ᐋᖅᑭᑦᓯᒪᔭᐅᓪᓗᓂ ᐊᒻᒪᓗ ᐃᓕᖅᑯᓯᖓᒍᑦ ᐊᐅᓚᑕᐅᔾᔪᓯᐅᓲᓂ, ᐊᒻᒪᓗ ᑕᒪᓐᓇ ᐱᕋᔭᑕᐅᓂᖓ ᐊᔾᔨᐅᓐᖏᑎᑕᐅᓂᖏᓐᓄᑦ ᐃᓄᐃᑦ ᓄᖅᑲᕆᐊᓕᒃ. ᐊᕙᑎᓂᒃ 40-ᓄᑦ ᐊᕐᕌᒎᓛᖅᑐᓂᐅᓐᖏᑦᑐᖅ ᐅᓪᓗᒥᒥᒃ. ᑕᒪᓐᓇ ᐋᖅᑭᑦᓯᒪᓂᖓ ᐱᕋᔭᒍᑕᐅᔪᖅ ᐊᔾᔨᐅᓐᖏᑦᑎᑕᐅᓂᖏᓐᓄᑦ ᐃᓄᐃᑦ ᓄᖅᑲᕆᐊᓕᒃ ᒫᓐᓇ.

ᕿᒪᑦᓯᒪᑐᐃᓐᓇᓐᖏᓚᐅᕐᓚᕗᑦ ᓱᕈᓯᖁᑎᑦᑕ ᐱᔪᓐᓇᐅᑎᖏᑦ ᐱᐅᓂᕐᐹᒥ ᐃᓄᐃᑦ ᐃᓕᓐᓂᐊᕐᓂᖓᓄᑦ ᐊᑦᓱᕈᕐᓇᕐᒪᑦ ᐊᐅᓚᑦᓯᔨᓄᑦ.

ᑲᑐᔾᔨᓂᒃᑯᑦ ᐱᓕᕆᐊᒃᓴᕆᒐᑦᑎᒍ ᐊᐅᓚᔾᔭᒋᐊᕆᐊᖃᓕᖅᑕᕗᑦ ᒫᓐᓇ.

2. DEA ᐊᐅᓚᑦᓯᒍᓐᓇᕐᓂᖏ
ᐱᕕᒃᓴᖃᒃᑲᓐᓂᖁᓪᓗᒋᑦ ᓄᓇᕗᒻᒥ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᐊᒻᒪᓗ DEA ᐊᖏᓪᓕᒋᐊᖅᑕᐅᖁᓪᓗᒍ ᐊᒻᒪᓗ ᐱᒋᐊᒃᑲᓐᓂᕈᑕᐅᓗᓂ ᐊᐅᓚᑦᓯᓂᕐᒥᒃ ᐊᒻᒪᓗ ᐃᑲᔫᑎᒍᓐᓇᕐᓗᓂ ᐊᐅᓚᑕᐅᓂᖓ ᐃᓄᐃᑦ ᐅᖃᐅᓯᖓᓄᑦ, ᐃᓕᓐᓂᐊᕈᑎᒃᓴᓕᐅᕐᓂᕐᒧᑦ ᐊᒻᒪᓗ ᐃᓚᓕᐅᔾᔭᐅᓂᖓᓄᑦ ᐃᓄᐃᑦ ᖃᐅᔨᒪᔭᑐᖃᖏᑦ ᐃᓕᓐᓂᐊᕐᓂᕐᒧᑦ ᐊᐅᓚᓂᓕᒫᖓᒍᑦ.
ᒫᓐᓇ ᐊᑕᐅᓯᕐᒨᖓᒻᒪᑦ (CSFN), ᑭᓯᐊᓂᓕ ᐃᓕᓐᓂᐊᕐᓂᓕᕆᓂᕐᒧᑦ ᐊᐅᓚᑦᓯᔪᓕᒫᓅᖓᓐᖏᒻᒪᑦ.

ᐊᐅᓚᑦᓯᒍᑕᐅᔪᖅ ᐃᑉᐱᓇᕐᒪᑦ
ᐊᔪᐃᓐᓈᖑᔪᖅ ᓇᓕᒧᒌᒋᐊᖃᕐᓂᖓ ᓇᓗᓇᐃᕐᓯᒪᔭᐅᑦᓯᐊᕐᓗᓂᓗ ᐱᓕᕆᐊᖃᕐᓂᐊᖅᑐᑦ ᐱᓕᕆᐊᒃᓴᖏᓐᓂᓪᓗ ᐊᒻᒪᓗ ᑮᓇᐅᔭᓕᑕᐅᓯᒪᓂᕐᒧᑦ ᓵᑕᒃᓴᐅᓯᕐᒧᓪᓗ, ᐱᔾᔪᑎᒋᓪᓗᒍ ᐃᓕᓐᓂᐊᓂᕐᒧᑦ ᐊᐅᓚᑦᓯᒍᑕᐅᔪᖅ ᐃᑉᐱᓇᕐᒪᑦ.

ᐱᖁᔭᓴᖅ ᐊᒃᑐᐃᓂᖃᕐᒪᑦ ᑐᓐᖓᕕᒋᔭᐅᔪᓄᑦ ᓱᒃᑯᒍᑕᐅᓯᒪᓪᓗᓂ ᓴᖅᑭᖅᑕᐅᓚᐅᖅᑐᒥᒃ 2008 ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᒃᑯᑦ ᒥᓂᔅᑕ ᐊᐅᓚᑦᓯᒍᓐᓇᕆᐊᖃᕐᓂᖓᒍᑦ ᑐᓐᖓᕕᒋᔭᐅᔪᓂᒃ ᐱᓇᓱᐊᒐᑦᓴᓂᒃ ᐊᒻᒪᓗ ᐃᓕᖅᑮᓪᓕᑲᓐᓂᕈᑕᐅᒻᒪᑦ ᑲᒪᒋᔭᖃᕐᓂᐊᖅᑐᓂᒃ ᐊᒻᒪᓗ ᑮᓇᐅᔭᖅᑑᑎᒃᓴᓂᒃ DEA−ᓄᑦ.

ᓄᓇᕗᑦ ᒐᕙᒪᖓᑕ ᑲᒪᒋᔭᖓ ᐊᐅᓚᑦᓯᒍᑕᐅᔪᓂᒃ ᐃᓕᓐᓂᐊᓂᕐᒧᑦ ᐱᓗᐊᖅᑎᓯᒻᒪ DEA ᐊᐅᓚᑦᓯᒍᓐᓇᕐᓂᖏᓐᓂᒃ ᐊᑦᓱᕈᕐᓇᑐᒃᑰᑎᑦᓯᓂᐊᕐᓂᖓᓂᒃ (ᐊᒻᒪᓗ ᐃᑉᐱᒍᓱᒐᓂ ᑲᔪᓯᓐᖏᔾᔪᑕᐅᔪᓂᒃ ᐃᓕᓐᓂᐊᕐᓂᓕᕆᔨᒃᑯᑎᒎᖓᔪᓂᒃ, ᒫᓐᓇ ᑲᒪᒋᔭᖃᖅᑐᓂᒃ ᑎᑎᕋᕐᓯᒪᓂᖏᓐᓂᒃ ᒪᓕᒐᑦᓴᓂ ᐊᑐᖅᑕᐅᒋᐊᓕᓐᓂᒃ ᐃᑲᔫᑎᓂᒃ).

DEA ᐊᐅᓚᑦᓯᒍᓐᓇᐃᓪᓕᑎᑕᐅᒋᐊᕐᓂᖓ ᒥᓂᔅᑕ ᐃᓕᓐᓂᐊᕐᓂᓕᕆᔨᒃᑯᓐᓂ ᐊᑐᖅᑕᐅᖃᑦᑕᓂᐊᖅᑐᓂᒃ ᐃᓕᓐᓂᐊᓂᕐᒧᑦ ᐊᐅᓚᑦᓯᒍᑎᓂᒃ ᐱᔪᓐᓇᓂᕐᓴᐅᑎᑕᐅᓗᓂ ᐋᖅᑭᒍᑕᐅᔾᔮᖏᒻᒪᑦ.

ᓄᓇᕗᒻᒥ ᐃᓕᓐᓂᐊᕐᓂᓕᕆᓂᕐᒧᑦ ᐋᖅᑭᒋᐊᕈᑎ ᐱᖁᔭᖅ ᑐᒃᓯᕋᐅᑕᐅᒻᒪᑦ ᐱᕚᓪᓕᕈᑎᒃᓴᒧᑦ ᐃᓕᓐᓂᐊᓂᕐᒧᑦ ᐱᕕᒃᓴᖃᒃᑲᓐᓂᖁᓪᓗᒋᑦ ᓄᓇᕗᒻᒥ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᐊᒻᒪᓗ DEA ᐊᖏᓪᓕᒋᐊᖅᑕᐅᖁᓪᓗᒍ ᐊᒻᒪᓗ ᐱᒋᐊᒃᑲᓐᓂᕈᑕᐅᓗᓂ ᐊᐅᓚᑦᓯᓂᕐᒥᒃ ᐊᒻᒪᓗ ᐃᑲᔫᑎᒍᓐᓇᕐᓗᓂ ᐊᐅᓚᑕᐅᓂᖓ ᐃᓄᐃᑦ ᐅᖃᐅᓯᖓᓄᑦ, ᐃᓕᓐᓂᐊᕈᑎᒃᓴᓕᐅᕐᓂᕐᒧᑦ ᐊᒻᒪᓗ ᐃᓚᓕᐅᔾᔭᐅᓂᖓᓄᑦ ᐃᓄᐃᑦ ᖃᐅᔨᒪᔭᑐᖃᖏᑦ ᐃᓕᓐᓂᐊᕐᓂᕐᒧᑦ ᐊᐅᓚᓂᓕᒫᖓᒍᑦ. ᒫᓐᓇ ᐊᑕᐅᓯᕐᒨᖓᒻᒪᑦ, ᑭᓯᐊᓂᓕ ᐃᓕᓐᓂᐊᕐᓂᓕᕆᓂᕐᒧᑦ ᐊᐅᓚᑦᓯᔪᓕᒫᓅᖓᓐᖏᒻᒪᑦ.

NERA ᓴᖅᑮᔪᖅ ᑐᑭᓯᓇᑦᓯᐊᖅᑐᓂᒃ ᐊᐅᓚᑦᓯᒍᑎᒃᓴᖏᓐᓂᒃ ᐃᓕᓐᓂᐊᖅᑐᓕᕆᔨᒃᑯᓐᓂ ᐱᓕᕆᒡᕕᒻᒧᑦ ᐊᒻᒪᓗ ᓄᓇᓕᓐᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ, ᐊᒻᒪᓗ ᑎᒍᓯᒃᑲᓐᓂᕈᑕᐅᓂᐊᖅᑐᖅ ᓴᓐᖏᓂᐅᔪᓂᒃ, ᐱᓕᕆᐊᒃᓴᓂᒃ ᐊᒻᒪᓗ ᐊᐅᓚᑦᓯᒥᓂᖏᓐᓂᒃ ᐊᖓᔪᖅᑳᕐᔪᐊᕆᔭᐅᔪᑦ ᐊᒻᒪᓗ ᐅᓄᕐᓯᒋᐊᕈᑕᐅᓗᓂ ᐃᓄᓐᓄᑦ ᐃᓕᓴᐃᔨᓄᑦ.

NERA ᐃᓚᒋᐊᕈᑕᐅᓂᐊᖅᑐᖅ ᒫᓐᓇ ᐊᑐᖅᑕᐅᔪᓂᒃ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᓄᑦ. ᑲᑐᔾᔨᖃᑎᒌᒍᑕᐅᓗᓂ ᐊᐅᓚᑦᓯᒍᑕᐅᓂᐊᖅᑐᖅ ᐃᓕᓐᓂᐊᖅᑐᓕᕆᔨᒃᑯᑦ ᐱᓕᕆᑉᕕᐊᓄᑦ, ᓄᓇᕗᒻᒥ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ ᐊᒻᒪᓗ ᑐᓐᖓᕕᒃᑯᓐᓄᑦ ᐋᖅᑭᒋᐊᒃᑲᓐᓂᕈᑕᐅᒋᐊᓕᓐᓄᑦ ᒪᓕᒐᑦᓴᒧᑦ ᐊᐅᓚᑦᓯᔾᔪᑎᓄᓪᓗ.

NERA ᐱᕕᒃᓴᖃᖅᑎᑦᓯᓂᐊᖅᑐᖅ ᐃᓄᐃᑦ ᐊᐅᓚᑦᓯᓪᓗᐊᑕᕐᓗᑎᒃ ᑲᒪᔨᒋᔭᐅᓂᕐᒧᑦ ᐃᓕᓐᓂᐊᕐᓂᓕᕆᓂᕐᒧᑦ ᐃᓱᒪᓕᐅᕈᑕᐅᒋᐊᓕᓐᓂᒃ ᑖᒃᑯᑎᒎᓇ ᓄᓇᕗᒻᒥ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑎᒍᑦ ᐊᒻᒪᓗ ᓄᓇᓕᓐᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑎᒍᑦ, ᐊᒻᒪᓗ ᐋᖅᑭᑦᓯᓯᒪᓗᑎᒃ ᐊᐅᓚᑦᓯᒍᑎᒃᓴᓂᒃ ᑖᓐᓇ ᐋᖅᑭᒋᐊᕆᓂᐅᔪᖅ ᐊᐅᓚᓂᖃᑦᓯᐊᖁᓪᓗᒍ.

3. ᐊᑕᖐᔪᒥᒃ ᐃᓕᓐᓂᐊᑎᑦᓯᓂᖅ
ᓄᓇᕗᑦ ᒐᕙᒪᒃᑯᖏᑦ ᖃᐅᔨᒪᒋᐊᕆᐊᓖᑦ ᓄᓇᕗᒻᒥ ᐃᓕᓐᓂᐊᖅᑎᓕᒫᑦ ᐊᔾᔨᒌᓐᖏᑦᑐᓂᒃ ᐊᔪᕈᑎᖃᐅᕐᓂᖏᑎᒍᑦ ᐃᓚᓕᐅᔾᔭᐅᓯᒪᑦᓯᐊᕆᐊᖃᕐᓂᖏᓐᓂᒃ ᑕᐃᒪᐃᒃᑯᐊᒥᓂᒃ
ᐃᓕᓐᓂᐊᕐᕕᐊᕈᓯᐅᕙᑦᑐᓂ − ᕿᓚᒥᐅᔪᒃᑯᑦ ᐋᓐᓂᐊᖏᑦ ᓇᓗᓇᐃᖅᑕᐅᓵᓕᖃᑦᑕᕐᓗᑎᒃ ᐊᔪᓐᖏᔾᔪᑎᓕᓐᓄᑦ ᐃᖢᐊᕐᓴᐃᔨᓄᑦ, ᓈᖕᒪᑦᑐᒥᒃ ᐃᑲᔪᖅᑕᐅᔾᔪᑎᖃᖁᓪᓗᖏᑦ ᐃᓂᒃᓴᖃᑦᓯᐊᕐᓗᑎᓪᓗ, ᖃᐅᔨᓴᖅᑕᐅᖏᓐᓇᕐᓗᑎᒃ ᐊᒻᒪᓗ ᑎᑎᕋᖅᑕᐅᓯᒪᐃᓐᓇᕐᓗᑎᒃ, ᒪᑐᐃᖓᖃᑎᒌᓪᓗᑎᒃ ᐃᓕᓐᓂᐊᕐᕖᑦ ᐃᓚᒋᔭᐅᔪᓪᓗ, ᐊᒻᒪᓗ ᓈᖕᒪᑦᑐᒥᒃ ᐃᓕᓐᓂᐊᖅᑎᑕᐅᓯᒪᓗᑎᒃ ᐃᓕᓴᐃᔨᒋᔭᖏᑦ.

ᐊᑕᖐᔪᒥᒃ ᐃᓕᓐᓂᐊᑎᑦᓯᓂᖅ ᐃᑉᐱᓇᕐᒪᑦ
ᑐᐊᕕᕐᓇᕐᒪᑦ ᐃᓕᓴᕆᔭᐅᒋᐊᖃᕐᓂᖓ ᐱᖕᒪᕆᐅᓂᖓᓂᒃ ᓱᕈᓯᓕᒫᑦ, ᐊᑐᕆᐊᓕᖏᑦ ᖃᓄᐃᑦᑑᒐᓗᐊᕐᐸᑕ, ᓱᕈᓰᑦ ᐃᑉᐱᓇᕐᓂᖏᓐᓄᑦ ᐊᑕᖏᖅᑕᐅᒋᐊᓖᑦ ᐃᓕᓐᓂᐊᕕᓐᓂ ᐊᒻᒪᓗ ᐃᓕᓐᓂᐊᕐᕕᐊᕈᓯᕐᓂ ᓄᓇᕗᒻᒥ.

ᑕᑯᓐᓇᖅᑕᐅᒍᓐᓇᖅᑐᖅ ᐃᓄᐃᑦ ᒪᒃᑯᑦᑐᑦ ᐊᓂᑎᑕᐅᖃᑦᑕᕐᓂᖏᑦ ᑭᓯᐊᓂᓕ ᓇᖕᒥᓂᖅ ᓄᖅᑲᖅᑐᒥᓂᐅᓂᖏᓐᓂᒃ ᐃᓕᓐᓂᐊᕕᓐᓂ. ᓄᓇᕗᒻᒥ ᐃᓕᓴᕆᔭᐅᓯᒪᔪᒥ ᐃᓕᓐᓂᐊᕈᑎᓄᑦ ᐊᐅᓚᑕᐅᓪᓗᐊᑕᕐᒪᑦ ᐊᑯᓐᓈᕿᔪᒥᒃ ᖃᓪᓗᓈᑎᑐᑦ ᐃᓄᒃᑑᓐᖏᖔᖅᑐᖅ, ᐃᑉᐱᒋᔭᐅᒍᑕᐅᓯᒪᓐᖏᒻᒪᑦ ᐱᑕᖃᕆᐊᓕᓐᓂ, ᐃᓄᐃᑦ ᐊᑐᕆᐊᓕᖏᓐᓂ.
ᓄᓇᕗᒻᒥ ᒫᓐᓇ ᐃᓕᓐᓂᐊᓂᕐᒧᑦ ᐊᐅᓚᑕᐅᔪᖅ ᓇᓕᖅᑯᑦᓯᓯᒪᓐᖏᒻᒪᑦ ᐃᓄᐃᑦ ᓱᕈᓯᖁᑎᖏᓐᓄᑦ ᒪᒃᑯᑦᑐᓄᓪᓗ.

ᐱᖕᒪᕆᐊᓘᒻᒪᑦ ᐃᓕᓐᓂᐊᖅᑐᓕᕆᔨᒃᑯᑦ ᐱᓕᕆᑉᕕᐊ ᐃᓕᓴᕐᓯᓯᒪᒋᐊᖃᕐᓂᖓᓂᒃ ᐃᓕᓐᓂᐊᖅᑎᓂᒃ ᐊᔾᔨᒌᓐᖏᑦᑐᓂᒃ ᐊᔪᕈᑎᓕᓐᓂᒃ ᐅᔾᔨᓇᖅᑐᒥᒃ ᐊᒥᓲᒻᒪᑕ ᐃᓕᓐᓂᐊᖅᑏᑦ ᓄᓇᕗᒻᒥ ᐃᓕᓐᓂᐊᕐᕕᐊᕈᓯᖏᓐᓂ. ᐃᓕᓐᓂᐊᕐᕖᑦ, ᐃᓂᒋᔭᐅᒋᐊᖃᖅᑎᓪᓗᒋᑦ ᐊᑦᑕᓇᓐᖏᓪᓗᑎᒃ ᐃᓕᓐᓂᐊᖅᑎᓕᒪᓄᑦ, ᐱᑕᓕᕐᔪᐊᒻᒪᕆᐊᓘᒋᐊᖃᕐᒥᔪᑦ ᐃᓕᓐᓂᐊᕈᑎᓂᒃ ᐊᒻᒪᓗ ᐃᓕᓴᐃᒍᑎᓂᒃ ᐃᓘᓐᓇᖏᓐᓄᑦ. ᒫᓐᓇ, ᐅᓄᖅᑐᑦ ᐃᓄᐃᑦ ᓱᕈᓯᖁᑎᖏᑦ ᒪᒃᑯᑦᑐᓪᓗ ᐃᓚᐅᑎᑕᐅᖃᑦᑕᖏᑦᑐᑦ ᐃᓕᓐᓂᐊᖕᕕᓐᓂ.

ᐊᓯᔾᔨᖅᑕᐅᓂᖓ ᑲᑐᔾᔨᖃᑎᒌᑦ ᐊᑕᖐᔪᒥᒃ ᐃᓕᓐᓂᐊᓂᕐᒧᑦ ᐱᖕᒪᕆᐅᔪᖅ ᐋᖅᑭᓱᖅᑕᐅᔪᒧᑦ ᓄᖅᑲᖅᑎᑕᐅᒋᐊᖃᕐᓂᖓ ᐊᔾᔨᐅᑎᑕᐅᖃᑦᑕᖏᓐᓂᖏᓐᓂᒃ ᐃᓄᐃᑦ ᓱᕈᓯᖁᑎᖏᑦ ᐊᒻᒪᓗ ᒪᒃᑯᑦᑐᑦ ᐊᔾᔨᒌᓐᖏᑦᑐᓂᒃ ᐊᔪᕈᑎᓖᑦ. ᐊᔭᐅᖅᑐᕐᐸᕗᑦ ᓄᓇᕗᑦ ᒐᕙᒪᒃᑯᖏᑦ ᐃᓕᓐᓂᐊᕕᓐᓂᒃ ᐊᑕᖐᔪᒥᒃ ᐃᓕᓐᓂᐊᑎᑦᓯᒍᓐᓇᖁᓪᓗᒋᑦ ᒫᓐᓇ.

ᓄᓇᕗᑦ ᒐᕙᒪᒃᑯᖏᑦ ᖃᐅᔨᒪᒋᐊᕆᐊᓖᑦ ᓄᓇᕗᒻᒥ ᐃᓕᓐᓂᐊᖅᑎᓕᒫᑦ ᐊᔾᔨᒌᓐᖏᑦᑐᓂᒃ ᐊᔪᕈᑎᖃᐅᕐᓂᖏᑎᒍᑦ ᐃᓚᓕᐅᔾᔭᐅᓯᒪᑦᓯᐊᕆᐊᖃᕐᓂᖏᓐᓂᒃ ᑕᐃᒪᐃᒃᑯᐊᒥᓂᒃ ᐃᓕᓐᓂᐊᕐᕕᐊᕈᓯᐅᕙᑦᑐᓂ − ᕿᓚᒥᐅᔪᒃᑯᑦ ᐋᓐᓂᐊᖏᑦ ᓇᓗᓇᐃᖅᑕᐅᓵᓕᖃᑦᑕᕐᓗᑎᒃ ᐊᔪᓐᖏᔾᔪᑎᓕᓐᓄᑦ ᐃᖢᐊᕐᓴᐃᔨᓄᑦ, ᓈᖕᒪᑦᑐᒥᒃ ᐃᑲᔪᖅᑕᐅᔾᔪᑎᖃᖁᓪᓗᖏᑦ ᐃᓂᒃᓴᖃᑦᓯᐊᕐᓗᑎᓪᓗ, ᖃᐅᔨᓴᖅᑕᐅᖏᓐᓇᕐᓗᑎᒃ ᐊᒻᒪᓗ ᑎᑎᕋᖅᑕᐅᓯᒪᐃᓐᓇᕐᓗᑎᒃ, ᒪᑐᐃᖓᖃᑎᒌᓪᓗᑎᒃ ᐃᓕᓐᓂᐊᕐᕖᑦ ᐃᓚᒋᔭᐅᔪᓪᓗ, ᐊᒻᒪᓗ ᓈᖕᒪᑦᑐᒥᒃ ᐃᓕᓐᓂᐊᖅᑎᑕᐅᓯᒪᓗᑎᒃ ᐃᓕᓴᐃᔨᒋᔭᖏᑦ.

ᐱᑕᖃᖅᑎᓐᓇᒋᑦ ᑕᒪᒃᑯᐊ ᐃᑲᔫᑎᒍᓐᓇᖅᑐᑦ ᐊᑕᖐᔪᒥᒃ ᐊᐅᓚᑕᐅᔾᔪᑎᒃᓴᖏᓐᓂᒃ ᐊᒻᒪᓗ ᑮᓇᐅᔭᓕᑕᐅᒍᑕᐅᓗᑎᒃ ᐊᑐᕆᐊᓕᖕᓂᒃ ᑲᔪᓯᑎᑕᐅᒍᑎᒃᓴᖏᓐᓂᒃ ᐃᑲᔪᖅᑕᐅᒍᑎᒃᓴᖏᓐᓂᓪᓗ, ᓄᓇᕗᒻᒥ ᐃᓕᓐᓂᐊᓂᕐᒧᑦ ᐊᐅᓚᑦᓯᔾᔪᓯᖓ ᑲᑕᑦᑎᑦᓯᓯᒪᐃᓐᓇᓂᐊᖅᑐᖅ ᐅᓄᕐᓂᕐᓴᓂᒃ ᐃᓄᓐᓂᒃ ᐃᓕᓐᓂᐊᖅᑎᓂᒃ ᐊᒻᒪᓗ ᓱᖅᑯᐃᖅᑕᐅᓯᒪᓐᖏᑦᑐᑦ ᐋᓐᓂᐊᓂᐅᔪᑦ ᓇᖕᒥᓂᖅ ᑕᐃᒪᐃᒍᒪᒐᒥᐅᓐᖏᑦᑐᖅ.

ᐃᓄᐃᑦ ᓱᕈᓯᖁᑎᖏᑦ ᐃᑉᐱᓇᕐᒪᑕ ᐊᑕᖐᔪᒥᒃ ᐃᓕᓐᓂᐊᕕᒻᒥ ᐃᓕᓐᓂᐊᕐᕕᐊᕈᓯᕐᒥᓪᓗ ᓄᓇᓕᖁᑎᓕᒫᑦᑎᓐᓂ, ᓄᓇᕗᑦ ᐃᓄᐃᑦ ᐊᖏᓐᖏᓚᑦ ᐱᖁᔭᒃᓴᖅ 25-ᒥᒃ.

ᐃᒪᓐᓇᐃᖁᔨᒐᓗᐊᕐᐳᒍᑦ ᐃᓕᑦᓯᓐᓂᒃ ᐃᓕᓐᓂᐊᕐᑏᑦ ᑲᒪᒋᐊᕈᓯᖓᓂᒃ ᐊᑐᖔᕐᓗᓂ ᐊᐅᓚᑦᓯᔨᐅᓂᕐᒥᐅᖏᖔᖅᑐᖅ.

ᐅᖃᕐᓂᕐᓗᒋᐊᖅᑐᑐᐃᓐᓇᕐᓯᒪᓐᖏᑦᑐᖓ. ᑕᑯᓐᓇᖅᑕᕗᑦ ᑐᓐᖓᕕᒃᑯᑦ ᐊᒻᒪᓗ ᐃᓄᐃᑦ ᐊᐅᓚᑦᓯᒍᓐᓇᑦᓯᐊᕐᓂᖏᓐᓂᒃ ᐊᒻᒪᓗ ᐊᐅᓚᑦᓯᒍᑕᐅᔪᓂᒃ ᒪᑭᒪᑎᑦᓯᒍᓐᓇᕐᓂᖏᓐᓂᒃ.

ᓄᓇᕗᒻᒥ ᐃᓕᓐᓂᐊᕐᓂᓕᕆᓂᕐᒧᑦ ᐋᖅᑭᒋᐊᕈᑎᓄᑦ ᐱᖁᔭᖅ
ᑐᓐᖓᕕᒃᑯᑦ ᖃᐅᔨᓇᓱᐊᕐᓯᒪᔭᖓ ᐊᒻᒪᓗ ᐃᓱᒪᒋᓯᒪᔭᖓ ᐱᕚᓪᓕᕈᑎᒃᓴᓂᒃ ᐃᓕᓐᓂᐊᓂᕐᒧᑦ ᐊᐅᓚᑦᓯᒍᑕᐅᔪᑦ. ᐅᔾᔨᕆᒋᐊᑦᓯᐊᕐᓯᒪᔭᕗᑦ ᐅᖃᐅᓯᐅᓯᒪᔪᑦ ᐱᑕᖃᕆᐊᓕᒃ ᐊᒻᒪᓗ ᐱᔪᒪᔭᖏᑦ ᓄᓇᕗᒻᒥᐅᑦ ᐊᒻᒪᓗ ᐋᖅᑭᓱᖅᑕᐅᓗᑎᒃ ᑐᓴᖅᑕᐅᓯᒪᑦᓯᐊᕐᓗᑎᒃ ᑐᒃᓯᕋᐅᑏᑦ ᐋᖅᑭᒋᐊᕈᑎᒃᓴᓄᑦ ᐃᓕᓐᓂᐊᓂᕐᒧᑦ ᐊᐅᓚᑦᓯᒍᑕᐅᔪᒧᑦ ᓄᓇᕗᒻᒥ.

ᓄᓇᕗᒻᒥ ᐃᓕᓐᓂᐊᓂᕐᒧᑦ ᐋᖅᑭᒋᐊᕈᑎᒃᓴᑦᓄ ᐱᖁᔭᖅ (NERA), ᐅᖃᐅᓯᕆᖃᑦᑕᕐᓯᒪᔭᕗᑦ ᐃᓕᑦᓯᓐᓄᑦ ᕿᒥᕐᕈᖁᓪᓗᒋᑦ ᐊᒻᒪᓗ ᓂᓪᓕᕈᓐᓇᕐᕕᐅᓗᑎᒃ, ᐃᓕᓴᕐᓯᓯᒪᔪᑦ ᐃᓄᐃᑦ ᑐᓐᖓᕕᖃᕐᒪᑕ ᐱᔪᓐᓇᐅᑎᒥᒃ ᐊᐅᓚᑦᓯᓂᕐᒥᒃ ᓱᕈᓯᖁᑎᑦᑕ ᐃᓕᓐᓂᐊᕐᓂᖏᓐᓂᒃ ᑐᓐᖓᕕᓕᐊᖑᓯᒪᔪᒃᑯᑦ ᑲᔪᓯᑎᑦᓯᒍᑎᒃᓴᒥᒃ ᐃᓄᐃᑦ ᐃᓕᖅᑯᓯᖓᓂᒃ.

ᐱᓗᐊᖅᑐᒥ, NERA ᐃᓄᒃᑐᑦ ᐅᖃᐅᓯᕐᒥᒃ ᐃᓕᓴᐃᔾᔪᑎᓪᓗᐊᑕᐅᒍᑎᒃᓴᖅ ᒥᑭᓂᓐᓂ ᓄᑕᖅᑲᑦ ᐃᓕᓐᓂᐊᕈᑎᖏᓐᓄᑦ ᐊᒻᒪᓗ ᐃᓕᓐᓂᐊᕆᐊᓕᓵᖅᑐᓂᒃ ᐃᓕᓐᓂᐊᕐᓂᓕᓐᓄᑦ 12−ᒧᑦ, ᐃᓕᓐᓂᐊᕐᕕᐊᕈᓯᓕᒫᓂ ᐃᓕᓐᓂᐊᕈᑕᐅᔪᓂᓗ, ᓈᖕᒪᑐᒥᒃ ᐊᔪᕐᓇᖏᑦᑐᒥᓪᓗ ᑎᑭᑕᑦᓴᒥᒃ ᐱᕕᒃᓴᓕᐅᖅᑕᐅᓯᒪᓗᓂ, ᐃᓕᓐᓂᐊᕌᓂᑦᑐᑦ ᐊᔪᓐᖏᑦᓯᐊᖁᓪᓗᒋᑦ ᐃᓄᒃᑐᑦ ᖃᓪᓗᓈᑎᑐᓪᓗ ᐅᐃᕖᑎᑐᓪᓘᓐᓃᑦ.

ᓱᕈᓯᓕᒫᑦ ᐃᑉᐱᒋᔭᐅᒋᐊᖃᕐᒪᑕ, ᐃᓕᖅᑯᓯᕐᒨᖓᔪᓂᒃ ᐃᓕᓐᓂᐊᕈᑎᖃᕐᓗᑎᒃ ᐃᓕᓐᓂᐊᕕᓐᓂ ᑐᓐᖓᕕᓕᓐᓂᒃ ᒪᕐᕉᓐᓂᒃ ᐅᖃᐅᓯᖃᕈᓐᓇᕐᓗᑎᒃ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ, ᓄᓇᕗᒻᒥ ᐃᓄᐃᑦ ᓈᖕᒪᓴᓐᖏᓚᑦ ᐱᖁᔭᒃᓴᖅ 25-ᒥ. ᑐᓐᖓᕕᒃᑯᑦ ᓄᓇᕗᒻᒥ ᒪᓕᒐᓕᐅᕐᕕᒻᒧᑦ ᐃᓱᒪᒃᓴᕐᓯᐅᕈᑕᐅᖁᔭᖓ, ᐋᖅᑭᒋᐊᖅᑕᐅᓗᓂ ᐊᒻᒪᓗ ᐊᑐᓕᖅᑎᑕᐅᓗᓂ NERA ᑲᔪᓯᑎᑕᐅᓐᖏᖔᕐᓗᓂ ᐱᖁᔭᒃᓴᖅ 25.

ᓄᓇᕗᒻᒥ ᐃᓕᓐᓂᐊᕐᓂᓕᕆᓂᕐᒧᑦ ᐋᖅᑭᒋᐊᕈᑎ ᐱᖁᔭᖅ ᑐᒃᓯᕋᐅᑕᐅᒻᒪᑦ ᐱᕚᓪᓕᕈᑎᒃᓴᒧᑦ ᐃᓕᓐᓂᐊᓂᕐᒧᑦ ᐱᕕᒃᓴᖃᒃᑲᓐᓂᖁᓪᓗᒋᑦ ᓄᓇᕗᒻᒥ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᐊᒻᒪᓗ
DEA ᐊᖏᓪᓕᒋᐊᖅᑕᐅᖁᓪᓗᒍ ᐊᒻᒪᓗ ᐱᒋᐊᒃᑲᓐᓂᕈᑕᐅᓗᓂ ᐊᐅᓚᑦᓯᓂᕐᒥᒃ ᐊᒻᒪᓗ ᐃᑲᔫᑎᒍᓐᓇᕐᓗᓂ ᐊᐅᓚᑕᐅᓂᖓ ᐃᓄᐃᑦ ᐅᖃᐅᓯᖓᓄᑦ, ᐃᓕᓐᓂᐊᕈᑎᒃᓴᓕᐅᕐᓂᕐᒧᑦ ᐊᒻᒪᓗ ᐃᓚᓕᐅᔾᔭᐅᓂᖓᓄᑦ ᐃᓄᐃᑦ ᖃᐅᔨᒪᔭᑐᖃᖏᑦ ᐃᓕᓐᓂᐊᕐᓂᕐᒧᑦ ᐊᐅᓚᓂᓕᒫᖓᒍᑦ.

ᒫᓐᓇ ᐊᑕᐅᓯᕐᒨᖓᒻᒪᑦ, ᑭᓯᐊᓂᓕ ᐃᓕᓐᓂᐊᕐᓂᓕᕆᓂᕐᒧᑦ ᐊᐅᓚᑦᓯᔪᓕᒫᓅᖓᓐᖏᒻᒪᑦ.

NERA ᓴᖅᑮᔪᖅ ᑐᑭᓯᓇᑦᓯᐊᖅᑐᓂᒃ ᐊᐅᓚᑦᓯᒍᑎᒃᓴᖏᓐᓂᒃ ᐃᓕᓐᓂᐊᖅᑐᓕᕆᔨᒃᑯᓐᓂ ᐱᓕᕆᒡᕕᒻᒧᑦ ᐊᒻᒪᓗ ᓄᓇᓕᓐᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ, ᐊᒻᒪᓗ ᑎᒍᓯᒃᑲᓐᓂᕈᑕᐅᓂᐊᖅᑐᖅ ᓴᓐᖏᓂᐅᔪᓂᒃ, ᐱᓕᕆᐊᒃᓴᓂᒃ ᐊᒻᒪᓗ ᐊᐅᓚᑦᓯᒥᓂᖏᓐᓂᒃ ᐊᖓᔪᖅᑳᕐᔪᐊᕆᔭᐅᔪᑦ ᐊᒻᒪᓗ ᐅᓄᕐᓯᒋᐊᕈᑕᐅᓗᓂ ᐃᓄᓐᓄᑦ ᐃᓕᓴᐃᔨᓄᑦ.

NERA ᐃᓚᒋᐊᕈᑕᐅᓂᐊᖅᑐᖅ ᒫᓐᓇ ᐊᑐᖅᑕᐅᔪᓂᒃ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᓄᑦ. ᑲᑐᔾᔨᖃᑎᒌᒍᑕᐅᓗᓂ ᐊᐅᓚᑦᓯᒍᑕᐅᓂᐊᖅᑐᖅ ᐃᓕᓐᓂᐊᖅᑐᓕᕆᔨᒃᑯᑦ ᐱᓕᕆᑉᕕᐊᓄᑦ, ᓄᓇᕗᒻᒥ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ ᐊᒻᒪᓗ ᑐᓐᖓᕕᒃᑯᓐᓄᑦ ᐋᖅᑭᒋᐊᒃᑲᓐᓂᕈᑕᐅᒋᐊᓕᓐᓄᑦ ᒪᓕᒐᑦᓴᒧᑦ ᐊᐅᓚᑦᓯᔾᔪᑎᓄᓪᓗ.

NERA ᐱᕕᒃᓴᖃᖅᑎᑦᓯᓂᐊᖅᑐᖅ ᐃᓄᐃᑦ ᐊᐅᓚᑦᓯᓪᓗᐊᑕᕐᓗᑎᒃ ᑲᒪᔨᒋᔭᐅᓂᕐᒧᑦ ᐃᓕᓐᓂᐊᕐᓂᓕᕆᓂᕐᒧᑦ ᐃᓱᒪᓕᐅᕈᑕᐅᒋᐊᓕᓐᓂᒃ ᑖᒃᑯᑎᒎᓇ ᓄᓇᕗᒻᒥ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑎᒍᑦ ᐊᒻᒪᓗ ᓄᓇᓕᓐᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑎᒍᑦ, ᐊᒻᒪᓗ ᐋᖅᑭᑦᓯᓯᒪᓗᑎᒃ ᐊᐅᓚᑦᓯᒍᑎᒃᓴᓂᒃ ᑖᓐᓇ ᐋᖅᑭᒋᐊᕆᓂᐅᔪᖅ ᐊᐅᓚᓂᖃᑦᓯᐊᖁᓪᓗᒍ.

ᐅᑉᐱᕈᓱᒃᑲᒪ, ᐋᖅᑭᒃᓱᐃᖃᑎᒌᑦᑎᐊᕈᓐᓇᕋᑦᑕ ᐱᔭᓐᓂᖏᑦᑑᒐᓗᐊᓂᒃ ᐊᔾᔨᒌᒥᒃ ᑐᕌᓐᓂᖃᖅᑎᓪᓗᑕ ᐱᕚᓪᓕᕈᓐᓇᖁᓪᓗᒋᑦ ᐃᓕᓐᓂᐊᕐᓂᓕᕆᔾᔪᓰᑦ ᐃᑲᔪᕈᓐᓇᖁᓪᓗᒋᑦ ᒪᒃᑯᑐᑎᓐᓄᑦ.

ᑭᖑᓪᓕᕐᐹᕆᓕᕐᓗᒍ, ᐳᐃᒍᖁᙱᓚᑦᓯ ᐅᖃᐅᓯᕆᓚᐅᕐᓯᒪᔭᖏᓐᓂᒃ ᑖᒪᔅ ᐴᔫᑉ ᑎᑎᖅᑲᒥᒍᑦ 2006-ᖑᑎᓪᓗᒍ ᐊᓐᓈᕐᑐᕋᐅᑎᔾᔪᑎᓄᑦ ᓈᓚᑦᑎᐅᑉ ᐅᓂᒃᑳᖏᓐᓂ ᑭᓪᓕᓯᓂᐊᕐᑕᐅᔪᑎᓪᓗᒋᑦ ᑕᒪᒃᑮᓐᓂᒃ ᐅᖃᐅᓰᓐᓂᒃ ᐊᑑᑎᖃᖅᑎᑦᑎᓂᕐᒧᑦ ᓄᖑᖏᓐᓂ 1960. ᑭᖑᓂᐊᒍᑦ ᑭᓪᓕᓯᓂᐊᕐᓂᐅᑉ ᐅᓂᒃᑳᓕᐊᕆᔭᐅᓚᐅᕐᑎᓪᓗᒋᑦ, ᒐᕙᒪᑐᖃᒃᑯᑦ ᓱᓕᔪᕐᓴᓚᐅᕐᒪᑕ ᑲᒪᒋᒐᒥᔾᔪᒃ ᐅᐃᕖᑎᑐᑦ ᐅᖃᐅᓯᓕᕆᓂᖅ. ᐊᓪᓛᑦ, ᑲᓇᑕᐅᑉ ᐊᖓᔪᖅᑳᕐᔪᐊᖓ ᑕᐃᑦᓱᒪᓂᐅᑎᓪᓗᒍ, ᑲᓇᑕᐅᑉ ᐊᖓᔪᖅᑳᕐᔪᐊᖓ ᐱᐅᓴᓐ, ᐅᖃᓚᐅᕐᓯᒪᔪᖅ, ᐅᐃᕖᑦ ᑐᙵᓱᒋᐊᖃᕐᒪᑕ ᐊᖏᕋᒥᓐᓂ ᓄᓇᒥᓐᓂ.

ᑕᐃᒪᓕ, ᑕᐃᒪᓐᓇ ᐃᓱᒪᒋᔭᐅᔪᑎᓪᓗᒍ ᓂᐱᒋᔭᐅᔭᕆᐊᖃᖅᑐᒍᑦ ᐃᓄᐃᑦ ᐃᓄᒋᐊᓐᓂᓴᐅᖕᒪᓴᑕ ᓄᓇᕘᒥ?

ᐃᓄᐃᑦ ᓄᓇᒥᓐᓂ ᑐᙵᓱᒋᐊᓖᑦ ᓄᓇᕗᖕᒥ.
ᐃᓄᐃᑦ ᐅᕙᑦᑎᓐᓂᒃ ᓈᓚᒃᑐᑦ ᐅᓪᓛᒪᓐᓇ ᐃᓕᑦᓯᓐᓂᒃ ᑕᑎᖃᖅᑐᑦ ᐊᒻᒪᓗ ᓂᕆᐅᒃᑐᑎᒃ ᓈᖕᒪᒋᔭᖃᓐᓂᐊᓂᑦᓯᓐᓂᒃ ᒪᓕᒐᓐᓂᒃ ᖁᓚᓐᓇᐃᕐᓯᒍᑕᐅᓂᐊᕐᑐᓂᒃ ᑐᙵᓱᒃᑎᑕᐅᒍᑎᒋᓂᐊᕐᑕᒥᓂᒃ ᓄᓇᕗᖕᒥ.

Download (PDF, 508KB)