ᓄᓇᕗᑦ ᓴᖅᑭᔮᑦᑎᐊᖅᑐᒻᒪᕆᐅᕗᖅ ᑲᓇᑕᒥ ᑮᓇᐅᔭᓂᒃ ᐊᑐᓲᑦ ᐱᓕᕆᐊᕐᓄᑦ ᑲᑎᒪᕕᔾᔪᐊᕐᓂᖃᖅᑎᓪᓗᒋᑦ ᐊᑐᕋᔭᖅᑐᓂᒃ, ᓄᓇᕗᒻᒥ ᑲᓇᑕᑉ ᑮᓇᐅᔭᓂᒃ ᐊᑐᓲᑦ ᐱᓕᕆᐊᕐᓄᑦ ᐱᖃᑕᐅᔪᒻᒪᕆᐅᓕᖅᑐᓂ ᐊᒻᒪᓗ ᑲᓇᑕᓕᐅᖅᐸᓪᓕᐊᔪᑦ ᐊᑕᐅᓯᕐᒥᒃ ᐱᓕᕆᐊᕐᓂᒃ ᑲᒪᒋᔭᐅᑎᓪᓗᒍ.
ᑐᕌᓐᑐ, ᐋᓐᑎᐅᕆᔪ − ᓯᑏᕝᕙ 14, 2026 − ᓄᓇᕗᒻᒥ ᓯᕗᓕᖅᑎᖏᑦ ᓄᓇᕗᒻᒥ ᐱᖁᑎᕐᔪᐊᓕᐅᖁᔨᓂᖏᑦ ᓯᕗᓪᓕᐅᑎᑦᑎᓯᒪᔪᑦ ᑮᓇᐅᔭᓕᕆᕈᓘᔭᓲᕐᓂᒃ ᐱᓕᕆᐊᖃᖅᐸᑦᑐᓄᑦ ᐅᓪᓗᒥ, ᐊᐃᕙᐅᑎᓂᖃᖅᑐᑎᑦ ᑮᓇᐅᔭᓂᒃ ᐊᑐᕐᓗᓂ ᐅᑭᐅᖅᑕᖅᑐᒥ ᐊᖏᔪᐊᓗᒻᒥᒃ ᐃᑲᔪᕐᓂᖃᖅᑎᑦᑎᒐᔭᖅᑐᖅ ᑲᓇᑕᒥ ᐊᑕᐅᓯᕐᒥᒃ ᐱᕙᓪᓕᐊᔪᓕᕆᕙᓪᓕᐊᓇᓱᐊᖅᑎᓪᓗᒋᑦ.
ᓄᓇᕗᑦ ᑐᙵᕕᒃ ᑎᒥᖓ ᐊᒻᒪᓗ ᓄᓇᕗᑦ ᒐᕙᒪᖏᑕ ᑲᑎᒪᑎᑦᑎᓚᖅᑑᒃ ᓄᓇᕗᑦ: ᑲᓇᑕᑉ ᐅᑭᐅᖅᑕᖅᑐᖓᓄᑦ ᓯᕗᓂᒃᓴᓕᐅᖅᑐᑦ, ᑲᑎᒪᖃᑕᐅᓪᓗᑎᑦ ᓯᕗᓕᖅᑎ ᐋᕐᓗᒃ ᒪᐃᓐ, ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᑉ ᑐᖏᓕᐊ ᐹᓪ ᐃᕐᖓᐅᑦ, ᐱᓕᕆᐊᖃᕈᒪᒐᔭᖅᑐᑦ, ᑮᓇᐅᔭᓂᒃ ᐊᑐᓲᑦ ᐱᓕᕆᐊᒻᒪᕆᖕᓄᑦ, ᓴᓇᕝᕕᓕᕆᓂᕐᒥᒃ ᓯᕗᓕᖅᑎᖏᑦ ᐊᒻᒪᓗ ᐱᖁᑎᕐᔪᐊᓕᐅᖅᑐᑦ ᐱᓕᕆᖃᑎᒋᔭᐅᓲᑦ ᐅᖃᐅᓯᖃᖅᑐᑎᑦ ᐱᓕᕆᐊᕐᓂᒃ ᐊᒻᒪᓗ ᐱᓕᕆᖃᑎᒌᒃᑲᔭᖅᑐᓂᒃ ᓄᓇᕗᑦ ᐊᖏᔪᓂᒃ ᐱᖁᑎᕐᔪᐊᓕᐅᖅᑕᐅᖅᑳᖁᔭᖏᑦ ᓯᕗᒧᐊᑦᑎᑕᐅᒋᐊᖅᑐᑎᑦ.
ᑲᑎᒪᓂᖃᓚᐅᖅᑐᑦ ᓴᓂᕌᒎᖓᓪᓗᑎᑦ ᑲᓇᑕ ᑮᓇᐅᔭᓂᒃ ᐊᑐᓲᑦ ᐱᓕᕆᐊᒻᒪᕆᖕᓄᑦ ᑲᑎᒪᕕᔾᔪᐊᕐᓂᕐᒥᒃ, ᓄᓇᕗᑦ ᓴᖅᑭᔮᖅᑐᒻᒪᕆᐅᓚᐅᖅᑐᓂ ᑮᓇᐅᔭᓂᒃ ᐊᑐᕐᓂᐊᖅᑐᑦ ᐱᓕᕆᐊᒻᒪᕆᖕᓄᑦ ᐊᒻᒪᓗ ᑲᓇᑕᒥ ᐊᖏᓂᖅᓴᒥ ᑮᓇᐅᔭᓂᒃ ᐊᑐᓲᑦ ᐊᒻᒪᓗ ᑲᓇᑕᓕᐅᖅᑐᑦ ᑲᒪᒋᔭᐅᑎᓪᓗᒋᑦ ᐱᖃᑕᐅᒻᒪᕆᓚᐅᖅᑐᓂ.
ᑐᓴᖅᑕᐅᖁᔭᖓ ᓄᓇᕗᑦ ᓱᖅᑯᐃᓐᓇᑦᑎᐊᖅᑐᑯᓘᓚᐅᖅᑐᖅ: ᑮᓇᐅᔭᓂᒃ ᐊᑐᕐᓗᓂ ᐊᖏᔫᑎᓄᑦ ᐅᑭᐅᖅᑕᖅᑐᒥ ᐱᖁᑎᕐᔪᐊᓄᑦ ᓴᓇᕙᓪᓕᐊᒋᕗᖅ ᑲᓇᑕᒥ ᐱᕙᓪᓕᐊᔪᓕᕆᓂᖓᓂᒃ. ᓴᙵᑎᑦᑎᔪᖅ ᑲᓇᑕᒥ ᓂᐅᕕᐊᒃᓴᐅᔪᑦ ᓄᑦᑎᖅᑕᐅᖃᑦᑕᕐᓂᖏᓐᓂᒃ, ᒪᑐᐃᖅᓯᓪᓗᓂ ᓄᑖᕐᒥᒃ ᐃᖏᕐᕋᔾᔪᑎᓕᕆᓂᕐᒥᒃ ᐊᒻᒪᓗ ᑕᐅᖅᓰᓂᕐᒧᑦ ᐊᖅᑯᑎᒋᓂᐊᖅᑕᖏᓐᓂᒃ, ᐱᕐᔪᐊᕌᓗᓐᓂᒃ ᐅᔭᕋᓐᓂᐊᕋᒃᓴᓂᒃ ᒪᑐᐃᖅᓯᑎᑦᑎᒍᓐᓇᖅᑐᓂ ᐊᒻᒪᓗ ᓄᑖᕐᒥᒃ ᐱᕙᓪᓕᐊᔪᓕᕆᓂᕐᒧᑦ ᖃᓄᐃᓕᐅᕐᓂᖃᓕᖅᑎᑦᑎᒐᔭᖅᑐᓂ ᓄᓇᕗᒻᒥ ᐃᑲᔪᕐᓂᖃᓪᓚᑦᑖᕋᔭᖅᑐᑦ ᑲᓇᑕ ᐱᕈᖅᐸᓪᓕᐊᓗᓂ.
ᑲᓇᑕ ᑲᒪᒋᔭᖃᕐᓂᖅᓴᐅᒻᒪᑦ ᓴᓇᓗᑎᑦ ᓴᙱᓂᖅᓴᒥᒃ ᐊᒻᒪᓗ ᒪᑭᑉᐹᓪᓕᒃᑲᓐᓂᕈᓐᓇᖅᑐᒥᒃ ᐱᕙᓪᓕᐊᓂᕐᒥᒃ, ᐊᒻᒪᓗ ᓄᓇᕗᑦ ᐱᒻᒪᕆᐊᓗᒻᒥᒃ ᐱᓕᕆᐊᖃᕈᓐᓇᖅᑑᓪᓗᓂ,” ᐅᖃᖅᖢᓂ ᓯᕗᓕᖅᑎ ᐋᕐᓗᒃ ᒪᐃᓐ. “ᑲᒪᓇᒻᒪᕆᑦᑐᒥᒃ ᐱᕕᖃᕈᓐᓇᕐᒪᑕ ᓄᓇᕗᒻᒥ ᑲᑐᑎᔭᑉᑎᒻᓂ ᓄᓇᕐᔪᐊᕐᒧᑦ ᑕᒫᓂ ᐱᓇᓱᐊᕈᓯᕐᒥᒃ. ᓄᓇᕗᑦ ᒐᕙᒪᖏᑦ ᑐᙵᕕᒋᔭᐅᒐᔭᖅᑐᓂᒃ ᐱᖁᑎᕐᔪᐊᓕᐅᕐᕕᐅᔪᒪᔪᑦ ᐃᑲᔪᖅᑕᐅᖁᓪᓗᒋᓪᓗ ᓄᓇᕗᒻᒥᐅᑦ ᒫᓐᓇ ᓯᕗᓂᒃᓴᒧᓪᓗ. ᑕᒪᒃᑯᐊ ᐃᓄᒻᒪᕆᖕᓄᑦ−ᓯᕗᒃᑲᖅᑖᕆᔭᐅᔪᑦ ᐱᓕᕆᐊᑦ ᑮᓇᐅᔭᑦ ᐊᑐᖅᑕᐅᔪᑦ ᐱᓕᕆᐊᕐᓄᑦ ᐃᑲᔫᑕᐅᒐᔭᖅᖢᑎᑦ ᓄᓇᕗᒻᒥ, ᑭᓯᐊᓂᓗ ᑮᓇᐅᔭᑦ ᐊᑐᖅᑕᐅᒋᕗᑦ ᐃᑲᔫᑕᐅᒐᔭᖅᖢᑎᑦ ᑲᓇᑕᑉ ᐱᕙᓪᓕᐊᔪᓕᕆᓂᕆᓛᖅᑕᖓᓄᑦ ᓯᕗᓂᒃᓴᒥ.”
ᓄᓇᕗᒻᒥ ᐱᓕᕆᐊᑦ ᑲᓇᑕᒧᑦ ᑲᒪᒋᔭᐅᔪᒪᔪᑦ ᐅᑯᐊᖑᕗᑦ ᓴᓗᒪᔪᒥᒃ ᐆᒻᒪᖅᑯᑎᓕᐅᕐᓂᖅ, ᑐᓴᐅᒪᖃᑦᑕᐅᑎᔾᔪᑏᑦ, ᐃᖏᕐᕋᔾᔪᑎᓕᕆᓂᕐᒧᑦ ᐃᒪᕐᒥᓗ ᐱᖁᑎᕐᔪᐊᑦ, ᑕᒪᐃᑕ, ᑕᑎᒋᔭᒃᓴᐅᑦᑎᐊᕐᓂᖅᓴᒥᒃ ᐆᒻᒪᖅᑯᑎᓕᐅᕈᑕᐅᔪᓐᓇᕋᔭᖅᑐᑦ ᐊᒻᒪᓗ ᑐᓴᐅᒪᔾᔪᑎᓕᐅᕐᓗᑎᑦ, ᐱᐅᓯᕚᓪᓕᕐᓗᑎᑦ ᑐᓚᒃᑕᕐᕖᑦ ᐊᒻᒪᓗ ᓂᐅᕕᐊᕆᔭᐅᓲᑦ, ᐃᑲᔪᖅᑐᐃᓗᑎᑦ ᓄᑖᕐᒥᒃ ᓄᓇᒦᙶᖅᑐᑦ ᐊᑐᖅᑕᐅᓗᑎᑦ ᐱᕙᓪᓕᐊᒍᑎᒋᔭᐅᒐᔭᕐᓂᖏᓐᓂᒃ ᐊᒻᒪᓗ ᓴᙵᑦᑎᑕᐅᒋᐊᕐᓗᑎᑦ ᐱᖁᑎᕐᔪᐊᑦ ᐊᑐᖅᑕᐅᒍᓐᓇᕋᔭᖅᑐᑦ ᐱᖓᓱᑎᒍᑦ: ᓄᓇᓕᐅᔪᓄᑦ, ᓴᓇᕝᕕᓕᕆᓂᕐᒧᑦ ᐊᒻᒪᓗ ᑲᓇᑕᑉ ᓴᐳᓐᓂᐊᖅᑎᖏᖕᓄᑦ ᐊᒻᒪᓗ ᓴᐳᒻᒥᐅᓯᖅᑕᐅᓯᒪᔭᕆᐊᖃᕐᓂᖓᓄᑦ ᑭᙴᒪᒋᔭᐅᔪᑦ ᐊᑐᖅᑕᐅᔭᕆᐊᖃᕋᔭᖅᑐᓂᒃ.
“ᓄᓇᕗᑉ ᐱᕙᓪᓕᐊᔪᓕᕆᔪᓐᓇᕐᓂᖓ ᑲᓇᑕᑉ ᐱᕙᓪᓕᐊᔪᓕᕆᓂᖓᓄᑦ ᐊᑐᕋᒃᓴᐅᒍᓐᓇᕋᔭᖅᑐᖅ,” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᑉ ᑐᖏᓕᐊ ᐹᓪ ᐃᕐᖓᐅᑦ. “ᑭᓯᐊᓂᓕ ᐱᕙᓪᓕᐊᔪᓕᕆᓂᖅ ᓄᓇᕗᒻᒥ ᑲᒪᒋᔭᐅᔭᕆᐊᖃᕐᒪᑦ ᐱᖃᑎᒋᔭᐅᓗᑎᑦ ᐃᓄᒻᒪᕇᑦ. ᐃᓄᒻᒪᕇᑦ ᐱᔪᓐᓇᐅᑎᓂᒃ ᑎᒍᒥᐊᖅᑎᐅᖕᒪᑕ, ᓄᓇᖁᑎᖃᖅᑎᐅᓪᓗᑎᑦ, ᓇᖕᒥᓂᖁᑎᖃᐅᖅᑐᑦ, ᐃᖅᑲᓇᐃᔭᖅᑎᐅᓪᓗᑎᑦ ᐊᒻᒪᓗ ᐱᓕᕆᖃᑎᒋᔭᐅᕙᖦᖢᑎᑦ. ᑲᓇᑕ ᐱᕙᓪᓕᐊᔪᓕᕆᓂᖓᓂᒃ ᐱᕈᖅᐸᓪᓕᐊᑎᑦᑎᓂᐊᕈᓂ ᐅᑭᐅᖅᑕᖅᑐᖅᑎᒍᑦ, ᐃᓄᒻᒪᕇᑦ ᐃᑲᔪᕆᐊᓖᑦ ᐋᖅᑮᖃᑕᐅᓗᑎᑦ ᐱᕈᖅᐸᓪᓕᐊᓂᕐᒥᒃ ᐱᕙᓪᓕᐊᔪᓕᕆᓂᕐᒥᒃ ᐊᒻᒪᓗ ᑲᑐᔾᔭᐅᓗᑎᑦ ᐱᕕᖃᕈᑎᑖᖅᑎᑦᑎᓂᕆᒐᔭᖅᑕᖓᓂᒃ.”
ᐱᓕᕆᐊᑦ ᓯᕗᒧᐊᑦᑎᑦᑎᓂᖃᕆᕗᑦ ᐱᓇᓱᐊᒐᖏᖕᓂᒃ ᓄᓇᕗᒻᒥ ᐅᑭᐅᖅᑕᖅᑐᖅ ᓇᖕᒥᓂᕆᔭᐅᓂᕋᕐᓂᖓᓄᑦ ᐊᒻᒪᓗ ᓴᐳᒻᒥᐅᓯᖅᑕᐅᓯᒪᓂᖓᓄᑦ ᖃᓄᖅᑑᕈᑎᒥᒃ, ᐃᓕᓴᖅᓯᓯᒪᔪᖅ ᑲᓇᑕ ᐅᑭᐅᖅᑕᖅᑐᒦᓐᓂᖓ ᑐᙵᕕᖃᕆᐊᖃᕐᒪᑦ ᑕᑎᒋᔭᒃᓴᓂᒃ ᐱᖁᑎᕐᔪᐊᓂᒃ, ᓴᙱᔪᓂᒃ ᓄᓇᓕᖃᐅᕐᓗᑎᑦ ᐊᒻᒪᓗ ᒪᑭᒪᔪᓐᓇᖅᑐᒥᒃ ᐱᕙᓪᓕᐊᔪᓕᕆᓂᕐᒧᑦ ᖃᓄᐃᓕᐅᖅᑐᖃᖃᑦᑕᕐᓗᓂ. ᑲᓇᑕ ᐃᓄᓐᓄᑦ ᑭᒃᑯᑐᐃᓐᓇᕐᓄᑦ ᐊᒻᒪᓗ ᓇᒻᒥᓂᖁᑎᖃᖅᑐᑦ ᑮᓇᐅᔭᓂᒃ ᐊᑐᕈᓐᓇᖅᓯᑎᑦᑎᓂᕋᓕᖅᑎᓪᓗᒍ ᐊᖏᔪᓄᑦ ᐱᓕᕆᐊᕐᓄᑦ ᑲᓇᑕᑉ ᑲᒪᒋᔪᒪᒐᔭᖅᑕᖏᓐᓂᒃ, ᓄᓇᕗᑦ ᑐᙵᕕᒃ ᑎᒥᖓ ᐊᒻᒪᓗ ᓄᓇᕗᑦ ᒐᕙᒪᖏᑦ ᓄᓇᕗᒻᒥ ᐱᖁᑎᕐᔪᐊᓕᐅᕈᒪᓂᖓ ᑕᒪᐃᓐᓄᑦ ᐃᓚᒋᔭᐅᔭᕆᐊᖃᖅᐳᖅ ᑲᒪᒋᔭᐅᓇᓱᐊᖅᑐᓄᑦ.
ᓴᓇᓗᓂ ᐊᑕᐅᓯᕐᒥᒃ ᑲᓇᑕᒥ ᐱᕙᓪᓕᐊᔪᓕᕆᓂᕐᒥᒃ ᑐᑭᓕᒃ ᑮᓇᐅᔭᓂᒃ ᐊᑐᖅᑕᐅᔭᕆᐊᖃᖅᑐᑦ ᐱᖁᑎᕐᔪᐊᓄᑦ ᑕᒪᐃᓐᓂ ᐊᕕᑦᑐᖅᓯᒪᔪᑦ ᑲᓇᑕᒥ ᐃᑲᔪᕈᓐᓇᕐᓗᑎᑦ ᑖᔅᓱᒧᖓ.
-30-
ᖃᓄᐃᓕᐅᕈᑕᐅᓯᒪᓂᑯᑦ
ᓄᓇᕗᒻᒥ ᑎᓴᒪᑦ ᐱᓕᕆᐊᑦ ᑲᓇᑕᒧᑦ ᑲᒪᒋᔭᐅᔪᒪᒐᔭᖅᑐᑦ ᐅᑯᐊᖑᖕᒪᑕ:
- ᑭᕙᓪᓕᕐᒥ ᐃᒪᒃᑯᑦ ᐃᑭᐊᖅᑭᔾᔪᑏᑦ ᑲᓱᕈᑎᖏᑦ;
- ᐃᖃᓗᐃᑦ ᓄᒃᑭᒃᓴᐅᑏᑦ ᑰᒃ ᐊᑐᖅᑕᐅᓗᓂ ᐱᓕᕆᐊᖅ;
- ᖁᕐᓗᖅᑐᐊᕐᔪᒻᒥ ᐊᖅᑯᑎᖓ ᐊᒻᒪᓗ ᑐᓚᒃᑕᕐᕕᖓ, ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᓂᕐᒧᑦ ᓴᐳᒻᒥᐅᓯᖅᓯᒪᓂᕐᒧᓪᓗ ᐊᖅᑯᑎᒻᒪᕆᖓ; ᐊᒻᒪᓗ
- ᕿᑭᖅᑕᕐᔪᐊᕐᒥ ᐃᒪᕐᒥ ᐃᑎᔪᒥᒃ ᑐᓚᒃᑕᕐᕕᒃ.
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ:
ᓄᓇᕗᑦ ᒐᕙᒪᖓᓄᑦ
ᔪᐊᓇ ᐊᕝᕙ
ᐱᕙᓪᓕᐊᔪᓕᕆᓂᕐᒧᑦ ᐊᓪᓚᑦᑎ
ᓯᕗᓕᖅᑎ ᐋᕐᓗᒃ ᒪᐃᓐ ᐊᓪᓚᕝᕕᖓ
867 975
ᓄᓇᕗᑦ ᑐᙵᕕᒃ ᑎᒥᖓᓄᑦ
ᐋᓂ ᑕᒻᓕᓐᓴᓐ
ᑐᑭᒧᐊᑦᑎᑦᑎᔨ, ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
