Nunavut qauhitilik ilitturinnaqtunik Kanatami niuviqnikkut Katimayiit Akikinniit Makpiraaq, aviktuqhimayumik ilitturinnaqtumik inighaqattiaqtuq Kanatam niuviqnikkut nunaptingniklu-hanayut havaaghainit
TORONTO, ON – Apitilirvia 14, 2026 – Nunavut hivuliqtiit qarritjihimayut aviktuqhimayumut angiyunik ikluqpaghanik irinigiyainik Bay Apqutaanut uplumi, qauhitiyut taimaa niuviqniq Ukiuqtaqtumi ilitturinnaqtunik ikayuutiqaqniat hanayunik atauhiqmik Kanatamiutat manighiurutainik.
Nunavut Tunngavikkut Timingat (NTI) Kavamatkullu Nunavunmi (GN) katimapkaihimayut talvuuna Nunavut: Hanayut Kanatam Ukiuqtaqtuanit Hivunighaanik, katimapkaiplutik Hivuliqti John Main, NTI-kut Tuklia-Angayuqqaam Paul Irngaut, havaaghanut kivgaqtuiyut, niuviqtiit, hannavingnit hivuliqtiit ikluqpaghanullu ikayuqtigiingnik ihumagilluaqhugit unipkaaqhugit havaaghait taapkua ikayuqtigiit ihariagiyaita hivumuuqtittiyaamik Nunavunmi angiyut ikluqpaghanut irinigiyauyut.
Katimahimayut ahiagut taapkua Kanatami Niuviqnikkut Katimaviat, talvani Nunavut qauhitihimayuq Akikinniit Makpiraanik inighaqattiaqhutik Kanatam angitqiyaanik niuviqnikkut nunaptingniklu-hanayunik katimatjutighainik.
Uqauhiit Nunavunmit qauhittiarnaqtut: niuviqtut angiyunik Ukiuqtaqtumi ikluqpaghanik hanayut Kanatam manighiurutainik. Hakugighaivaktuq Kanatamiutat hunaqutainut niuvigaghanik, angmaqtirivaktuq nutaanik ingilranikkut himmiqtuinikkullu inighanik, aulapkaivaktuq amirnaqtunik-uyaraghiuqtunut hanavalliayunik nutaaniklu manighiurnikkut havaaghaliuqpaktuq Nunavunmi ikayuutauvaktut nunaptingni aklivaalliutainut.
Kanata ihumagilluaqtait hanayut hakugitqiyamik hakugingniqatqiyamik manighiurutinik, taimaalu Nunavut aghuurnaqtumik havaaghaqattiaqtuq,” uqaqhimayuq Hivuliqti John Main. “Ahiittunik havaaghaqattiaqtuq aviktuqhimayumi ilittuqhitiyavut nunaqyuamut havangnaqtumi. Nunavut Kavamait tunngavighamik ikluqpaghaqanik hanaquiyut ikayuutighait nunallaarmiut uplumi hivunighamullu. Hapkua Inuit-hivuliqtuqtait havaaghait niuvigauhimayut Nunavunmi, kihimilu niuvigauhimayut Kanatami manighiurnikkut hivunighaanut.”
Nunavunmi Havaaghait Kanatami Ihumagiyauyunik tamatkiumavagait halumayut huanngautit, tuhaqtittiniq, ingilratjutit taryumiutaniklu hanayaghanik. Atauttikkut, amirnaitqiyanik qulliqtuutiqarniat tuhaqtittiyiniklu, ihuaqhivaalliqlugit atuqtitauniit tullakvingnik niuviqvingniklu, ikayuqlugit nutaat pivighanik hanavalliayut hakugighailugulu ikluqpaghat havauhilgit pingahuuyukkut: nunallaarnut, hannavingnut Kanataplu anguyaktunut amirnaiyautinullu ihariagiyainut.
“Nunavut manighiurutigilaaqtait taimaittuq Kanatam manighiurutigilaaqtait,” uqaqtuq NTI-kut Tuklia-Angayuqqaaq Paul Irngaut. “Kihimi hananiaqhimayut nanminiptingnit aviktuqhimayumi iniqtauhimayut Inuinnaillu. Inuit pilaarutilgit, nunanik nanminilgit, nanminiuyut, havaktiuyut ikayuqtigiinguplutik. Kanata hananiaqhimagumi manighiurutinik Ukiuqtaqtukkut, Inuit ikayuqtughat hanayunik aklivaalliutinik ikayuqtigiiklutiklu havaaghanit havaaghaliuqhimayait”
Havaaghaillu hivumuuqtittivagait inirumayait Nunavunmi Ukiuqtaqtumi Ataniqtuqtuiyunik Amirnaiyautinullu Havauhighanik, ilitariplugu Kanatam inighait Ukiuqtaqtumi ihumaliuqtauvaktuq nakuuyunik ikluqpaghanik, hakugiktunik nunallaarnik aulattiaqtuniklu manighiurnikkut havaaghanik.
Kanata ikkuaqtuivaghuni inungnit nanminiqnillu niuviqtunik angiyunut havaaghanut Kanatami ihumagiyauyunik, NTI-kut GN-kullu tughiraiyut taimaa Nunavunmi tamatkiumayunik ikluqpaghanut havaaghait ilauluni taapkununnga havaaghainut.
Hanayut atauhiqmik Kanatamiutat manighiurutainik taimaittuq niuviqtarniq ikluqpaghanut taimaa tamangnik aviktuqhimayut nunaptingnit iliuraivigilugu.
-30-
Naunaiyautit
Nunavunmi hitamauyut Havaaghait Kanatami Ihumagiyauyunik taapkuanguyut:
- Kivalliq Hydro-Fibre Link (Imaqmit Huanngutilgit Alruyaqtuqtunut Atatarutait);
- Iqaluit Nukkiksautiit Hydro Project (Imaqnit Huanngautilglit Havaaghait);
- Qurluqtualum Apqutighaat Tullakvighaallu, ihuaqutighalluaq Ukiuqtaqtumi Manighiurnikkut Amirnaiyautinullu Inighaanit; taamnalu
- Qikiqtaryuaq Itinnangmi-Taryuqmi Tullakvighaq.
Tuhaqtittiyiit Titiraqaqviit:
Kavamanut Nunavunmi
Joanna Awa
Tuhaqtittinikkut Titiraliqiyi
Havakvianit Hivuliqti John Main
867 975
Taapkununnga Nunavut Tunngavikkut Timingat
Annie Thomlinson
Aulapkaiyiryuaq, Tuhaqtittiyiit
Nunavut Tunngavikkut Timingat
