ᓅᕙᐃᒻᕙ 28 – ᐋᑐᕚ, ᐊᓐᑎᕆᐅ – ᐊᓪᓚᕝᕕᖓ ᒐᕙᒪᑐᖃᒃᑯᑦ ᐃᓪᓗᓕᕆᓂᕐᒧᑦ ᐊᔭᐅᖅᑐᐃᔨ
ᐃᑉᐸᑦᓴᖅ, ᐃᓄᐃᑦ ᓯᕗᓕᖅᑎᖏᑦ ᓄᓇᑦᓯᐊᕗᑦ ᐊᒻᒪᓗ ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᐊᒻᒪᓗ ᒐᕙᒪᑐᖃᒃᑯᑦ ᐃᓪᓗᓕᕆᓂᕐᒧᑦ ᐊᔭᐅᖅᑐᐃᔨ ᑲᑎᒪᖃᑎᖃᓚᐅᖅᑐᑦ ᒐᕙᒪᑐᖃᒃᑯᑦ ᐊᖓᔪᖅᑲᐅᑎᖏᓐᓂᒃ ᐋᔩᕋᕈᑎᖃᖅᑐᑎᒃ ᐋᖅᑭᒍᑎᑦᓴᖅᓯᐅᕆᐊᖃᒻᒪᕆᓐᓂᕐᒥᒃ ᐃᓪᓗᑭᑦᓴᓂᕐᒧᑦ ᖁᐊᖅᓵᓇᖅᑐᒦᓐᓂᖏᓐᓄᑦ ᐃᓄᐃᑦ ᓄᓇᓕᖏᓐᓂ.
ᑲᑎᒪᖃᑦᑕᖅᑐᑦ ᑲᑐᔾᔨᖃᑎᒌᑦ ᓴᖅᑮᓚᐅᖅᑎᓪᓗᒋᑦ ᐅᓂᒃᑳᓂᒃ ᐃᓪᓗᐃᑦ ᖃᓄᐃᓐᓂᖏᓐᓂᒃ ᐅᑭᐅᖅᑕᖅᑐᒥ, ᓱᖅᑯᐃᖅᓯᒍᑕᐅᔪᒥᒃ ᐅᖃᐅᓯᐅᖃᑦᑕᖅᓯᒪᔪᒥᒃ ᐃᓄᓐᓄᑦ ᐊᕐᕌᒍᕋᓵᓗᓐᓂᒃ: ᐱᔪᓐᓇᐅᑎᖏᑦ ᐃᓄᐃᑦ ᓈᖕᒪᑦᑐᓂᒃ ᐃᓪᓗᖃᕆᐊᖃᕐᓂᖏᓐᓄᑦ ᓯᖁᒥᑕᐅᓯᒪᒻᒪᑦ.
ᒐᕙᒪᑐᖃᒃᑯᑦ ᐊᔭᐅᖅᑎᖓ ᐳᓛᕆᐊᓚᐅᖅᑐᖅ ᓇᐃᓂᒧᑦ ᕼᐅᑉᑎᐊᓕᒧᓪᓗ ᓄᓇᑦᓯᐊᕗᒻᒥ, ᐊᒻᒪᓗ ᐸᓐᓂᖅᑑᒧᑦ, ᑲᖏᕐᖠᓂᕐᒧᑦ, ᐊᒻᒪᓗ ᐃᖃᓗᓐᓄᑦ ᓄᓇᕗᒻᒥ ᐆᑦᑑᑉᐱᕆ 17-ᒥᒃ 29-ᒧᑦ, 2022, ᐃᓚᖃᖅᑐᑎᒃ ᓄᓇᑦᓯᐊᕗᑦ ᒐᕙᒪᖓᓂᒃ ᐊᒻᒪᓗ ᑐᙵᕕᒃᑯᓐᓂᒃ, ᑕᑯᓂᐊᖅᑐᑎᒃ ᐃᓪᓗᐃᑦ ᖃᓄᐃᓐᓂᖏᓐᓂᒃ ᑖᒃᑯᓇᓂ ᓄᓇᓕᓐᓂ ᐊᒻᒪᓗ ᓴᖅᑭᔮᖅᑎᑦᓯᒍᑎᑦᓴᒥᒃ ᑐᐊᕕᕐᓇᕐᓂᖓᓂᒃ ᐊᓯᔾᔨᕆᐊᖃᕐᓂᖓ.
ᒐᕙᒪᑐᖃᒃᑯᑦ ᐃᓪᓗᓕᕆᓂᕐᒧᑦ ᐊᔭᐅᖅᑎᖓ ᑕᑯᓚᐅᖅᑐᖅ ᑕᑯᓪᓚᑖᖅᓱᓂ ᑐᓴᕐᕕᖃᖅᑐᓂᓗ ᑖᒃᑯᓇᙵᓚᑦᑖᖅ ᐃᓄᐃᑦ ᓄᓇᖏᑕ ᐃᓄᖏᓐᓂᒃ ᐱᔭᕆᐊᖃᒻᒪᕆᓐᓂᕐᒥᒃ ᐃᓪᓗᑭᑦᓴᓂᕐᒧᑦ ᐊᑐᖃᑦᑕᖅᑕᖏᓐᓂᒃ ᑕᕝᕙᙶᖅᓯᒪᔪᒥᒃ ᖃᓪᓗᓈᕈᖅᑎᑕᐅᒐᓱᐊᖅᓯᒪᓂᖏᓐᓂᒃ ᐊᒻᒪᓗ ᖁᐊᖅᓵᓇᖅᑐᒃᑯᑦ ᐱᔪᓐᓇᖅᑎᑕᐅᙱᒍᑎᖃᖃᑦᑕᖅᓯᒪᓪᓗᑎᒃ ᒐᕙᒪᑎᒍᑦ ᑭᓱᑐᐃᓐᓇᕐᓄᑦ ᐊᕐᕌᒍᕋᓵᓗᓐᓂᒃ ᑮᓇᐅᔭᓕᑕᐅᓂᕐᒧᑦ ᐊᒻᒪᓗ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓄᑦ ᐃᓄᐃᑦ. ᐅᖃᐅᓯᖃᓕᖅᑭᑦᑖᖃᑦᑕᖅᓯᒪᒐᓗᐊᖅᓱᑎᒃ ᐱᓛᕐᓂᐊᕐᓂᕋᐃᓪᓗᑎᒃ ᒐᕙᒪᑎᒍᑦ ᓇᐅᒃᑯᑐᐃᓐᓇᖅ, ᐃᓚᒋᑦ ᐊᖏᕐᕋᖃᐃᓐᓇᖅᑐᑦ ᐱᐅᙱᑦᑐᓂ ᓱᒃᑯᓂ.
ᑕᒪᓐᓇ ᑕᐃᒪᐃᖏᓐᓇᖅᑐᖅ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓂᒃ ᓱᕋᐃᓂᖅ ᑐᐊᕕᕐᓇᖅᑎᑕᐅᒋᐊᖃᒻᒪᕆᑦᑐᖅ.
ᑐᙵᓱᑦᑎᑕᕗᑦ ᐃᓚᐅᓵᓕᑎᑕᐅᓯᒪᓂᕗᑦ ᒐᕙᒪᑐᖃᒃᑯᓐᓄᑦ ᑕᕝᕗᖓ, ᐊᒻᒪᓗ ᓂᕆᐅᒋᔭᕗᑦ ᐋᖅᑭᑦᓱᐃᓂᕐᒧᑦ ᐋᔩᕋᖃᑎᖃᐃᓐᓇᓂᐊᕐᓂᕐᒥᒃ ᑲᑎᒪᖃᑎᒋᓯᒪᓪᓗᒍ ᐃᑦᑑᑎᓄᑦ ᑲᑎᒪᔨᐅᖃᑕᐅᔪᖅ ᐹᑐᓴᓐ ᐊᒻᒪᓗ MP ᓘᕆ ᐃᓪᓚᐅᑦ. ᐃᑦᑑᑏᑦ ᑲᑎᒪᔨᖏᓐᓄᑦ ᑲᑎᒪᔨᕋᓛᕆᔭᐅᔪᑦ ᓄᓇᖃᖅᑳᖅᓯᒪᔪᓄᑦ ᓂᕆᐅᒋᔭᓖᑦ ᒪᑭᑉᐸᓪᓕᐊᒍᑎᖃᕐᓂᐊᓂᕐᒥᒃ ᐅᓂᒃᑳᓃᙶ*ᑐᓂᒃ ᐊᒻᒪᓗ ᐱᖁᔭᓕᐅᕐᕕᔾᔪᐊᒥ ᐊᓪᓚᑦᑎᖓ ᒥᓂᔅᑕᖓᓄᑦ ᐃᓪᓗᓕᕆᓂᕐᒧᑦ ᐱᖁᑎᕐᔪᐊᓕᕆᓂᕐᒧᑦ ᐊᒻᒪᓗ ᓄᓇᓕᓐᓄᑦ ᐲᑕ ᕗᕌᒋᔅᑲᑑᔅ, ᓂᕆᐅᓇᖅᑐᒥᒃ ᐊᖏᕈᑎᖃᓚᐅᖅᑐᖅ ᖃᐅᔨᓇᓱᐊᕐᓂᐊᓂᕐᒥᒃ ᐅᓂᒃᑳᓂ ᐊᑐᓕᖁᔨᔾᔪᑎᓕᐊᖑᓯᒪᔪᓂᒃ ᓇᓗᓇᐃᔭᖅᓯᒪᓪᓗᑎᒃ ᓄᓇᑦᓯᐊᕗᑦ ᒐᕙᒪᖓᓄᑦ ᐊᒻᒪᓗ ᑐᙵᕕᒃᑯᓐᓄᑦ.
ᒐᕙᒪᓕᒫᑦ ᐅᔾᔨᕆᔭᐅᑎᑦᓯᒋᐊᓖᑦ ᑖᑦᓱᒥᖓ ᖃᐅᔨᒃᑲᐃᔾᔪᑎᒥᒃ ᑐᙵᕕᖃᕐᓗᑎᒃ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓂᒃ ᓈᖕᒪᑦᑐᒥᒃ ᐃᓪᓗᖃᕆᐊᖃᕐᓂᕐᒧᑦ ᓄᓇᑦᓯᐊᕗᒻᒥ ᓄᓇᕗᒻᒥᓗ.
– 30 –
ᐅᖃᐅᓯᐅᖃᑦᑕᖅᓯᒪᔪᑦ:
“ᐃᓪᓗᐃᑦ ᖃᓄᐃᓐᓂᖏᑦ ᐃᓄᐃᑦ ᐃᓂᒋᖃᑦᑕᖅᑕᖏᑦ ᑕᕝᕙᙶᖅᓯᒪᓪᓚᑖᖅᑐᑦ ᖃᓪᓗᓈᕈᖅᑎᑕᐅᓇᓱᐊᕐᓂᕐᒥᒃ ᐊᒻᒪᓗ ᑭᓱᑐᐃᓐᓇᕐᓄᑦ ᐱᔪᓐᓇᖅᑎᑕᐅᙱᒍᑎᖃᖃᑦᑕᖅᓯᒪᓪᓗᑎᒃ ᑭᖑᕝᕕᐅᑎᔪᓄᑦ ᒐᕙᒪᑐᖃᒃᑯᓐᓄᑦ, ᐊᕕᑦᑐᖅᓯᒪᓂᖏᓐᓂ ᑲᓇᑕ, ᐊᒻᒪᓗ ᐅᑭᐅᖅᑕᖅᑐᒥ ᒐᕙᒪᖏᓐᓄᑦ ᐊᕐᕌᒍᕋᓵᓗᓐᓂᒃ ᑮᓇᐅᔭᓕᑕᐅᓂᕐᒧᑦ ᐊᒻᒪᓗ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓄᑦ ᓈᖕᒪᑦᑐᒥᒃ ᐃᓪᓗᖃᕆᐊᖃᕐᓂᖏᓐᓄᑦ ᐃᓄᐃᑦ. ᑐᓴᓚᐅᖅᑕᒃᑲ ᑕᖃᓂᖏᑦ ᐊᒻᒪᓗ ᑐᐊᕕᕐᓇᕐᓂᖓ ᐊᓯᔾᔨᖅᑕᐅᒋᐊᖃᕐᓂᖓᓄᑦ ᑕᒪᒃᑮᓐᓄᑦ ᐃᓄᖏᓐᓄᑦ ᐊᖏᕐᕋᖃᙱᑦᑐᓄᑦ ᐊᒻᒪᓗ ᑕᐃᒃᑯᓄᖓ ᐊᑦᓱᕉᓐᓂᖓᔪᓄᑦ ᐊᒻᒪᓗ ᓱᒃᑯᓃᑦᑐᓄᑦ ᐱᐅᙱᑦᑐᓂ ᐃᓪᓗᓂ. ᐃᓄᓐᓄᑦ ᐱᔪᓐᓇᐅᑎᖓ ᐃᓪᓗᖃᕐᓂᕐᒧᑦ ᐊᑯᓂᐅᓗᐊᖅᓯᒪᔪᖅ ᑎᑭᐅᑎᒐᑦᓴᐅᒍᓐᓃᕋᑕᖅᓱᓂ. ᐊᐱᕆᔭᒃᑲ ᒐᕙᒪᓕᒫᑦ ᐃᓱᒪᑦᓴᖅᓯᐅᕈᑎᖃᑦᓯᐊᖁᓪᓗᒋᑦ ᐊᒻᒪᓗ ᑐᐊᕕᐊᖃᕐᓗᑎᒃ ᑲᔪᓯᑎᑦᓯᓂᕐᒥᒃ ᐊᑐᓕᖁᔨᔾᔪᑎᓕᐊᖑᓯᒪᔪᓂᒃ ᑖᒃᑯᓇᓃᑦᑐᓂ ᐅᓂᒃᑳᓂ.”
− ᒪᕇ−ᕼᐅᓴᐃ ᕼᐅᓕ, ᒐᕙᒪᑐᖃᒃᑯᓐᓄᑦ ᐃᓪᓗᓕᕆᓂᕐᒧᑦ ᐊᔭᐅᖅᑎ
“ᐊᓯᓕᒫᖏᓐᓂ ᑲᓇᑕᒥ ᓴᖅᑭᔮᖅᑐᖅᑕᖃᙱᑦᑐᖅ ᐃᓪᓗᑭᑦᓴᓂᕐᒧᑦ ᖁᐊᖅᓵᓇᖅᑐᒦᑦᑐᓂᒃ ᐃᓄᐃᑦ ᓄᓇᖓᑐᑦ. ᐃᓄᐃᑦ ᓯᑕᒪᓂ ᐊᕕᑦᑐᖅᓯᒪᓂᕐᓂ ᐊᖏᕐᕋᓖᑦ ᐃᓪᓗᓂᒃ ᐃᓱᒪᒋᔭᒃᑯᑦ ᐱᔭᕆᐊᑐᔪᒃᑰᕈᑕᐅᒐᔭᖅᑐᓂᒃ ᓇᓗᓇᐃᕋᓱᐊᕆᐊᖏᑦ ᖃᓪᓗᓈᓃᑦᑐᓄᑦ ᑲᓇᑕᒥ. ᑐᙵᓱᑦᑏᓇᕐᓂᐊᖅᑕᕗᑦ ᐳᓚᕆᐊᖃᑦᑕᖅᑐᑦ ᑲᓇᑕᒦᙶᖅᑐᑦ ᖃᐅᔨᔪᒪᔪᑦ ᑕᑯᓪᓚᑖᕐᓗᑎᒃ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓂᒃ ᖁᐊᖅᓵᓇᖅᑐᒦᑦᑐᓂᒃ ᓄᓇᒋᔭᑦᑎᓐᓂ. ᓄᓇᓕᕗᑦ ᑲᑉᐱᐊᓱᐊᔪᑦ ᖃᐅᑕᒫᑦ, ᐊᒻᒪᓗ ᑭᖑᕚᕇᓂ, ᐱᔾᔪᑕᐅᓪᓗᑎᒃ ᐃᓪᓗᑭᑦᓴᕐᓃᑦ ᐊᒻᒪᓗ ᒥᑭᓪᓕᑎᖅᑕᐅᓯᒪᓃᑦ. ᓴᐃᒻᒪᖃᑎᖃᕐᓂᖅ ᑲᓇᑕᒥᒃ ᐊᒻᒪᓗ ᓅᕕᓐᓛᓐ ᐊᒻᒪᓗ ᓛᐸᑐᐊ, ᓄᓇᑦᓯᐊᕗᒻᒧᑦ ᐱᓗᐊᖅᑐᒥ, ᑐᑭᓕᐅᖅᑕᐅᓯᒪᑦᓯᐊᕈᑎᑦᓴᖃᙱᑦᑐᑦ ᑕᒪᕐᒥᑦᓯᐊᖅ ᐃᓄᐃᑦ ᐃᓅᓯᖃᓕᖅᑳᑎᓐᓇᒋᑦ ᓇᓗᖅᑯᑎᙱᓪᓗᑎᒃ ᐃᓅᓐᓇᔮᕈᓐᓇᓯᑉᐸᑕ. ᖃᓂᑦᓴᑲᓵᙱᑦᑐᒍᑦ ᑖᑦᓱᒥᖓ ᑐᕌᒐᕐᒥᒃ.”
– ᔪᕼᐊᓂᔅ ᓛᒻᑉ, ᐊᖓᔪᖅᑳᖓ ᓄᓇᑦᓯᐊᕗᑦ
“ᐋᖅᑭᒋᐊᕆᐊᖃᓕᖅᑐᖅ ᐱᐅᓯᒋᐊᕈᑎᑦᓴᒥᒃ ᐊᖏᕐᕋᕆᔭᐅᕙᑦᑐᓄᑦ ᓄᓇᕗᒻᒥ ᐃᓄᓐᓄᑦ. ᑲᔪᓯᔪᓐᓇᖁᓪᓗᒍ ᒪᑭᒪᒋᐊᕆᐊᖃᖅᑐᒍᑦ ᐅᖓᑖᓄᑦ ᒫᓐᓇᐃᓇᕐᒧᑦ−ᐃᓕᖓᔪᑦ ᐃᓪᓗᓕᐅᕐᓂᕐᒧᑦ ᐊᔭᐅᖅᑐᑏᑦ ᑐᕌᖓᔪᑦ ᖁᐊᖅᓵᓇᖅᑐᒦᓐᓂᕐᒧᑦ ᐃᑲᔫᑎᑦ. ᐊᑐᖅᑕᐅᓗᓂ ᓯᕗᓪᓕᐅᔾᔭᐅᓯᒪᐃᓐᓇᕐᓗᑎᒃ ᐃᓄᐃᑦ ᐱᖕᒪᕆᐅᔪᖁᑎᖏᑦ ᐱᖅᑯᓯᖏᓪᓗ ᐊᒻᒪᓗ ᐊᐅᓚᔾᔪᑕᐅᓗᑎᒃ ᐃᓄᐃᑦ ᖃᐅᔨᒪᓂᖏᑦ ᐊᐅᓚᑦᓯᒍᓐᓇᕐᓂᖏᓪᓗ ᑐᓂᓯᒍᑎᑦᓴᓂᒃ ᐊᑦᑕᓇᐃᖅᓯᒪᔪᒥᒃ, ᓈᖕᒪᑦᑐᒥᒃ, ᐊᑐᐃᓐᓇᖃᕐᓂᕐᒥᒃ, ᐅᓇᒻᒥᓇᖅᑐᒥᒃ ᐊᒻᒪᓗ ᑕᑉᐲᓯᒪᓂᖃᙱᑦᑐᒥᒃ ᓈᖕᒪᑦᓯᐊᖅᑐᓂᒃ ᐃᓪᓗᖃᖅᑐᐃᓐᓇᐅᖁᓪᓗᒋᑦ. ᒐᕙᒪᑎᒍᑦ ᐱᓇᓱᐊᖃᑎᖃᕐᓂᖅ ᒪᑐᐃᖅᓯᒍᑎ ᐋᖅᑭᒋᐊᕈᑎᑦᓴᓂᒃ ᐃᓄᐃᑦ ᓄᓇᓕᖏᓐᓄᑦ, ᐃᓚᒌᓄᑦ, ᐊᒻᒪᓗ ᑭᒃᑯᑐᐃᓐᓇᕐᓄᑦ ᑕᒪᒃᑯᓇᓂᓕᒫᖅ ᐃᓄᐃᑦ ᓄᓇᖏᓐᓂ. ᑐᙵᕕᒃᑯᑦ ᓂᕆᐅᒋᔭᓖᑦ ᑖᓐᓇ ᐅᓂᑦᑳᖅ ᐊᐅᒪᓖᓂᐊᕐᓂᖓᓂᒃ ᐊᐅᓚᔾᔭᐃᓕᕐᓗᑎᒃ ᒐᕙᒪᓃᑦᑐᓕᒫᑦ ᓇᓗᓇᐃᕈᑎᓂᒃ ᐃᓄᐃᑦ ᓇᓂᓕᒫᖅᑐᑦ ᐊᑦᑕᓇᙱᑦᑐᒥᒃ, ᖃᓄᐃᓐᓇᖏᑦᑐᒥᒃ, ᐊᒻᒪᓗ ᐅᓇᒻᒥᓇᖅᑐᓂᒃ ᐊᖏᕐᕋᖃᖁᓪᓗᒋᑦ ᑎᑭᐅᑎᓯᒪᔪᓂᒃ ᐊᑐᕆᐊᓕᑦᑎᓐᓂᒃ ᐊᔾᔨᐅᖏᑦᑐᒦᓐᓂᑎᓐᓄᑦ. ᑕᒪᓐᓇ ᑭᒃᑯᑐᐃᓐᓇᕐᓄᑦ ᐱᔪᓐᓇᐅᑎᕗᑦ.”
– ᐊᓗᑭ ᑰᑦᑎᖅ, ᐊᖓᔪᖅᑳᖅ, ᓄᓇᕗᑦ ᑐᙵᕕᒃ ᑎᒥᖓ
ᐊᑦᑐᐊᔪᓄᑦ ᑲᓱᕈᑎᑦ
- https://www.housingchrc.ca/sites/housing/files/2023-11/observational-report-inuit-housing-112723.pdf
- https://www.housingchrc.ca/en/publications/federal-housing-advocates-observational-report-inuit-housing
ᑐᓴᕋᑦᓴᓕᕆᔩᑦ ᖃᐅᔨᒋᐊᕐᕕᑦᓴᑦ:
ᐊᓪᓚᕝᕕᖓ ᒐᕙᒪᑐᖃᒃᑯᓐᓄᑦ ᐃᓪᓗᓕᕆᓂᕐᒧᑦ ᐊᔭᐅᖅᑎ
ᑐᓴᕋᑦᓴᓕᕆᔩᑦ
ᓄᓇᑦᓯᐊᕗᑦ ᑲᕙᒪᖓ
ᕗᑉ ᐹᒥᕈᐃ, ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᔨᒃᑯᓐᓄᑦ
(709) 899-0004
ᓄᓇᕗᑦ ᑐᙵᕕᒃ ᑎᒥᖓ
ᑐᓴᐅᒪᔾᔪᑎᓕᕆᔨᒃᑯᑦ
(867) 975-4941
