(ᔫᓂ 15, 2023, ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᑲᑎᒪᑐᐃᓐᓇᓂᕐᒥᓂᒃ ᐱᔭᕇᖅᓯᕋᑖᓚᐅᖅᑐᑦ ᑕᒫᓂ ᐱᓇᓱᐊᕈᓯᕐᒥ ᐃᖃᓗᓐᓂ. ᑲᑎᒪᔩᑦ ᐅᖃᐅᓯᖃᓚᐅᖅᑐᑦ ᐊᔾᔨᒌᙱᑦᑐᓂᑦ ᐱᔾᔪᑎᓂᑦ ᐱᖃᓯᐅᑎᓪᓗᒋᑦ ᓄᑕᖅᑲᑦ ᐊᒻᒪᓗ ᒪᒃᑯᒃᑐᑦ ᖃᓄᐃᑦᑕᐃᓕᑎᑕᐅᓂᖏᑦ, ᐃᓄᐃᑦ ᐃᒡᓗᒃᓴᖏᑦ, ᐊᒻᒪᓗ ᖃᓄᐃᑉᐱᑖ? ᑲᓇᑕᒥ ᐃᓄᐃᑦ ᐋᓐᓂᐊᖅᑕᐃᓕᓂᖏᖕᓄᑦ ᖃᐅᔨᓵᖅ.
ᓄᓇᕗᑦ ᑐᙵᕕᒃ ᑎᒥᖓᑕ ᐃᓅᓯᓕᕆᓂᕐᒧᑦ ᐊᒻᒪᓗ ᐃᓕᖅᑯᓯᓕᕆᓂᕐᒧᑦ ᐱᓕᕆᕝᕕᐊ ᖃᐅᔨᓴᖅᑐᑦ ᓇᓖᕌᕋᒃᓴᓂᒃ ᐃᓄᖕᓄᑦ ᐋᖅᑭᓱᖅᑕᐅᓯᒪᔪᓂᑦ ᐊᒻᒪᓗ ᓯᕗᒃᑲᖅᑕᖅᑕᐅᓗᓂ ᐱᔨᑦᑎᕋᕈᓐᓇᕋᔭᕐᓂᖏᖕᓂᒃ ᓄᑕᖅᑲᑦ ᐊᒻᒪᓗ ᒪᒃᑯᒃᑐᑦ ᖃᓄᐃᑦᑕᐃᓕᒪᑎᑕᐅᕙᓐᓂᖏᑦᑕ ᓄᓇᕗᒻᒥ. ᐃᓅᓯᓕᕆᔨᒃᑯᑦ ᐊᒻᒪᓗ ᐃᓕᖅᑯᓯᓕᕆᔨᒃᑯᑦ ᐱᓕᕆᕝᕕᐊ ᐊᑐᓕᖁᔨᓯᒪᔪᖅ ᐊᓯᔾᔨᕐᓗᓂ ᑲᒪᒋᔭᐅᕙᓐᓂᖓᑦ ᐱᔨᑦᑎᕋᕈᑕᐅᓂᖏᑦᑕ ᓯᕗᓂᐊᒍᖔᑦ ᖃᓄᐃᑦᑐᖃᓚᐅᙱᓐᓂᖓᓂᒃ ᑲᒪᖔᖃᑦᑕᕋᔭᕐᓗᑎᑦ ᐋᖅᑭᓱᖅᓯᒪᓂᖃᕐᓗᓂ ᑕᐃᒫᒃ, ᐅᑉᐱᕈᓱᒻᒪᑕ ᐋᖅᑭᒋᐊᖅᑎᑦᑎᒍᑕᐅᑦᑎᐊᓂᖅᓴᐅᓂᐊᕐᒪᑦ ᐃᓄᖕᓄᑦ. ᑕᒻᒪᖅᓯᒪᔪᕐᓂᐊᖅᑎᒻᒪᕆᒃ ᑲᓇᑕᒥ ᐅᓂᒃᑳᓕᐅᕋᑖᓚᐅᕐᒪᑦ ᓄᓇᕗᑦ ᒐᕙᒪᖏᒡᒎᖅ ᐃᓄᓕᕆᔨᖏᑦ ᐃᓚᒌᑦᑐᓄᑦ ᐱᔨᑦᑎᕋᖅᑏᑦ ᑲᒪᒋᔭᕆᐊᓕᒻᒥᖕᓂᒃ ᑲᒪᒍᓐᓇᙱᒻᒪᑕ ᓱᓕ ᓴᐳᔾᔭᐅᓗᑎᑦ ᐊᑦᑕᓇᖅᑐᒨᖅᓴᕋᐃᓲᑦ ᓄᑕᖅᑲᑦ ᐊᒻᒪᓗ ᒪᒃᑯᒃᑐᑦ ᓄᓇᕗᒻᒥ.
ᓄᓇᕗᑦ ᑐᙵᕕᒃ ᑎᒥᖓ ᐱᓕᕆᑦᑎᐊᕈᓐᓇᕐᒪᑕ ᐊᒻᒪᓗ ᐊᔾᔨᐅᙱᑦᑐᒃᑯᑦ ᐅᐸᓗᖓᐃᖅᓯᒪᓪᓗᑎᑦ ᓯᕗᓂᐊᒍᑦ ᖃᓄᐃᑦᑐᖃᓚᐅᙱᑦᑎᓪᓗᒍ ᑲᒪᒋᔭᖃᖃᑦᑕᕐᓗᑎᑦ ᓄᑕᖅᑲᑦ ᐊᒻᒪᓗ ᒪᒃᑯᒃᑐᑦ ᖃᓄᐃᑦᑕᐃᓕᒪᑎᑕᐅᓂᖏᖕᓂᒃ ᓄᓇᕗᒻᒥ ᐊᒻᒪᓗ ᐱᐅᔪᒻᒪᕆᒃᑯᑦ ᐊᑦᑐᐃᓂᖃᕈᓐᓇᖅᑐᓂᓗ ᐊᒥᓱᓂᑦ ᐃᓄᐃᑦ ᐃᓅᓯᖏᓐᓂᒃ. ᐃᓅᓯᓕᕆᔨᒃᑯᑦ ᐊᒻᒪᓗ ᐃᓕᖅᑯᓯᓕᕆᔨᒃᑯᑦ ᐱᓕᕆᕝᕕᐊ ᖃᐅᔨᓴᐃᓐᓇᕐᓂᐊᖅᐳᑦ ᐱᕕᖃᕈᑎᒃᓴᕆᒐᔭᖅᑕᖏᖕᓂᒃ ᓄᓇᕗᑦ ᑐᙵᕕᒃ ᑎᒥᖓᑕ ᐃᓚᐅᖃᑕᐅᓂᖅᓴᐅᖃᑦᑕᓕᕐᓗᑎᑦ ᓯᕗᓂᐊᒍᑦ ᖃᓄᐃᑦᑐᖃᓚᐅᙱᑦᑎᓪᓗᓕᒍ ᐱᓕᕆᐊᖃᖃᑦᑕᓕᕐᓗᑎᑦ ᐊᒻᒪᓗ ᐅᐊᑦᑎᖃᑦᑕᕐᓗᑎᑦ ᑕᒪᒃᑯᓂᖓ ᐱᔨᑦᑎᕋᕈᑎᓂᑦ ᐃᓄᐃᑦ ᓄᑕᖅᑲᖏᖕᓄᑦ ᐊᒻᒪᓗ ᐃᓚᒌᑦᑐᓄᑦ.
ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᐃᓱᒪᓕᐅᓚᐅᕆᕗᑦ ᓴᓂᕐᕙᖅᑕᐅᓯᒪᓂᐊᕐᒪᑕ $22 ᒥᓕᐊᓐ ᑮᓇᐅᔭᑦ ᐃᓄᐃᑦ ᐃᒡᓗᒃᓴᕆᒐᔭᖅᑕᖏᖕᓄᑦ ᒐᕙᒪᑐᖃᒃᑯᓐᓃᙶᖅᑐᑦ ᑮᓇᐅᔭᑦ. ᑮᓇᐅᔭᑦ ᐃᑲᔪᖅᑐᐃᕗᑦ ᓄᓇᕗᑦ ᑐᙵᕕᒃ ᑎᒥᖓᑕ ᐊᖏᕐᕋᑦᓴᓕᐅᖅᑕ − ᓄᓇᕗᒻᒥ ᐃᓄᐃᑦ ᐃᒡᓗᒃᓴᖃᑦᑎᐊᖁᓪᓗᒋᑦ ᖃᓄᐃᓕᐅᕈᑎᒋᔭᐅᓂᐊᖅᑐᖅ ᐸᕐᓇᐅᑎᒥᒃ. 67%−ᖑᔪᑦ ᑮᓇᐅᔭᑦ ᐊᑐᖅᑕᐅᒐᔭᖅᑐᑦ ᐊᑭᑐᓗᐊᙱᑦᑐᓂᑦ ᐃᒡᓗᓕᐅᕐᓗᑎᑦ ᐃᑲᔪᖅᑐᖅᑕᐅᖁᓪᓗᒍ ᐊᑭᑐᓗᐊᙱᑦᑐᒥᒃ ᐃᒡᓗᒃᓴᖃᕆᐊᖃᕐᓂᖏᑦ ᐊᑐᖅᑐᐊᕋᒃᓴᓂᑦ, ᐊᓯᔾᔨᖅᑕᙱᑦᑐᒥᒃ ᐃᒡᓗᒨᖅᑲᐃᔪᓐᓇᖃᑦᑕᕐᓗᑎᑦ, ᐊᒻᒪᓗ ᐃᖅᑲᓇᐃᔭᕐᕕᖓᓅᖓᙱᑦᑐᓂᓪᓗᑦ. 30% ᑮᓇᐅᔭᑦ ᐊᑐᖅᑕᐅᒐᔭᕐᒥᔪᑦ ᐃᑲᔪᖅᑐᐃᔾᔪᑎᓄᑦ ᐃᒡᓗᓕᕆᓂᕐᒥᒃ ᐱᖃᓯᐅᔾᔨᔪᑦ ᐃᒡᓗᒃᓴᓕᐅᕐᓗᑎᑦ, ᐊᒻᒪᓗ ᐊᓯᖏᖕᓂᒃ ᐃᒡᓗᒃᓴᓕᐅᖅᑐᖃᕐᓗᓂ ᐃᓐᓇᒻᒪᕆᖕᓄᑦ ᐊᒻᒪᓗ ᒪᒃᑯᒃᑐᓄᑦ. 3%−ᖑᔪᑦ ᑮᓇᐅᔭᑦ ᐊᑐᖅᑕᐅᒐᔭᖅᑐᑦ ᐋᖅᑭᒃᓱᐃᓗᑎᑦ ᐊᒻᒪᓗ ᓴᓇᔭᐅᓗᑎᑦ ᓇᖕᒥᓂᖅᑖᕐᓂᕐᒨᖓᔪᑦ ᐱᓕᕆᐊᓂᒃ ᐊᒻᒪᓗ ᐱᓕᒻᒪᒃᓴᐃᓂᕐᒧᑦ. ᑖᒃᑯᐊ ᐃᒡᓗᓕᐅᖅᑕᐅᔪᒪᔪᑦ ᐱᓕᕆᐊᕆᔭᑦ ᑲᒪᒋᔭᐅᔪᒫᖅᑐᑦ ᐃᒡᓗᑭᒃᓴᖅᑐᐊᓘᖃᑦᑕᕐᓂᖏᖕᓂᒃ ᖄᖓᒍᒃᑲᓐᓂᖅ ᑲᒪᒋᔭᐅᓗᑎᑦ ᓄᓇᕗᑦ ᒐᕙᒪᖏᖕᓄᑦ ᐃᒡᓗᓕᐊᕆᔭᐅᕙᑦᑐᑦ ᐊᒻᒪᓗ ᐊᓯᖏᖕᓄᑦ. ᐃᓄᐃᑦ ᐃᒡᓗᒃᓴᖃᕐᓂᖏᖕᓄᑦ ᑮᓇᐅᔭᑦ ᐊᕕᑕᐅᔪᒫᖅᑐᑦ ᓄᓇᕗᑦ ᑐᙵᕕᒃ ᑎᒥᖓᓄᑦ ᐊᒻᒪᓗ ᐱᖓᓱᑦ ᐊᕕᑦᑐᖅᓯᒪᔪᑦ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ. ᓄᓇᕗᑦ ᑐᙵᕕᒃ ᑎᒥᖓ ᐊᒻᒪᓗ ᐊᕕᑦᑐᖅᓯᒪᔪᓂᑦ ᐃᓄᐃᑦ ᑲᑐᔾᔨᖃᑎᒌᖏᑦ ᒫᓐᓇᓕ ᑕᐃᒪ ᐃᖅᑲᓇᐃᔮᖃᕐᓂᐊᖅᑐᑦ ᐃᓱᒪᓕᐅᕐᓗᑎᑦ ᖃᑦᑎᑦ ᐊᒻᒪᓗ ᖃᓄᐃᑦᑐᑦ ᐃᒡᓗᒃᓴᑦ ᓴᓇᔭᐅᒐᔭᕐᒪᖔᕐᒥᒃ ᑖᒃᑯᐊ ᑮᓇᐅᔭᑦ ᐊᑐᖅᑕᐅᓗᑎᑦ.
ᑐᒃᓯᕋᐅᑎ ᓴᒃᑯᑕᐅᓚᐅᖅᑎᓪᓗᒍ, ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᑳᓐᑐᕌᒃᑦ−ᑖᖅᑎᑦᑎᓚᐅᖅᑐᑦ ᐋᖅᑭᒃᓱᐃᔨᐅᓂᐊᖅᑐᓂᑦ ᐅᐸᓗᖓᐃᔭᐃᔨᓂᑦ ᓄᓇᕗᒻᒨᖓᔪᒥᒃ ᖃᓄᐃᑉᐱᑖ? ᑲᓇᑕᒥ ᐃᓄᐃᑦ
ᐋᓐᓂᐊᖅᑕᐃᓕᓂᖏᖕᓄᑦ ᖃᐅᔨᓵᕐᒥᒃ ᐊᕐᒐᐃᔪᓪ−ᒃᑯᓐᓄᑦ ᐊᑭᖃᖅᑎᒋᔪᖅ $7.9 ᒥᓕᐊᓐ ᑮᓇᐅᔭᓂᑦ. ᑳᓐᑐᕌᒃᑦ−ᖑᔪᖅ ᐃᑲᔪᖅᑐᐃᓂᖃᕈᑕᐅᓂᐊᖅᐳᖅ ᐃᓄᐃᑦ ᐋᓐᓂᐊᖅᑕᐃᓕᓂᖏᖕᓄᑦ ᖃᐅᔨᓵᕐᒥᒃ ᑕᒪᐃᓐᓂ ᓄᓇᕗᑉ ᓄᓇᓕᖏᖕᓄᑦ ᒪᕐᕉᒃ ᐊᕐᕌᒎᓂᐊᖅᑑᒃ ᐊᑯᓂᐅᑎᒋᔪᖅ ᑲᒪᒋᔭᐅᓗᓂ, ᐃᖅᑲᓇᐃᔭᖅᑎᑖᕐᓗᑎᑦ ᐱᓕᒻᒪᒃᓴᐃᓗᑎᓪᓗ ᐃᓄᖕᓂᒃ ᐊᕕᑦᑐᖅᓯᒪᔪᓂᑦ ᐊᒻᒪᓗ ᓄᓇᓕᖕᓂ ᐅᐸᓗᖓᐃᔭᐃᔨᓂᑦ, ᐱᓕᕆᔨᓂᑦ, ᐊᐱᖅᓱᖅᑎᐅᒐᔭᖅᑐᓂᑦ, ᐊᒻᒪᓗ ᐃᓐᓇᒻᒪᕆᖕᓂᒃ.
ᑭᖑᓪᓕᕐᒥᒃ ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᑲᑎᒪᓛᓕᕐᒥᔪᑦ ᐃᖃᓗᖕᓂ, ᐋᒡᒌᓯ 29-31, 2023.
ᖃᐅᔨᒃᑲᕋᒃᓴᖅ:
ᑭᐊᕙᓐ ᖃᑉᓗᑦᓯᐊᖅ
ᑐᑭᒧᐊᑦᑎᑦᑎᔨ, ᑐᓴᐅᒪᖃᑎᒌᓐᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑎᖓ: (867) 975-4941
ᐊᑭᖃᙱᑦᑐᖅ: 1-888-646-0006
