ᐃᖃᓗᐃᑦ, ᓄᓇᕗᑦ (ᓄᕕᐱᕆ 20, 2012) ᓄᓇᕗᑦ ᒐᕙᒪᒃᑯᖏᑦ, ᓄᓇᕗᑦ ᑐᙵᕕᒃᑯᑦ ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ ᐊᓕᐊᓇᐃᒍᓱᒃᐳᑦ ᐅᓪᓗᒥ ᐱᕙᓪᓕᐊᓂᖏᓐᓂᒃ ᖁᑦᓯᓂᖅᓴᒧᑦ ᐅᓐᓂᕐᓗᓂᖏ ᐃᓄᒃᒧᑦ ᓯᕗᒧᐊᖅᑕᐅᔪᒥ ᐊᑭᓴᖅᑐᕐᓂᖏᓐᓂᒃ ᐃᖅᑲᖅᑐᐃᕕᒃᑯᑦ ᔫᕈᑉ ᑲᑐᔾᔨᖃᑎᒌᖏᑦᑕ ᓇᑏᑦ ᓄᖅᑲᖅᑎᑕᐅᓯᒪᓂᖏᓐᓂ.
ᑭᒡᒐᖅᑐᐃᔩᑦ ᑖᒃᑯᓄᖓ ᐱᖓᓱᓄᑦ ᑲᑐᔾᔨᖃᑎᒌᓄᑦ, ᐃᓚᖃᕐᖢᑎᑦ ᐊᓯᖏᓐᓂᒃ ᐃᖅᑲᖅᑐᐃᕕᖕᒨᖅᑎᑦᓯᔪᓂᑦ, ᓚᒃᓴᒻᐴᒃᒦᖅᑲᐅᖕᒪᑕ ᐅᓪᓗᒥ ᐅᐸᒋᐊᖅᑐᖅᓯᒪᓪᓗᑎᒃ ᖃᐅᔨᓇᓱᒃᑕᖃᕐᓂᕐᒧᑦ ᖁᑦᓯᓂᖅᓴᒧᑦ ᐅᓐᓂᕐᓗᒍᑎᒋᓚᐅᕐᓯᒪᔭᑎᑦ ᓯᑎᐱᕆ 2012-ᒥᑦ ᐋᖅᑭᒃᑕᕕᓂᖕᒧᑦ ᔫᕉᑉ ᑲᑐᔾᔨᖃᑎᒌᖏᑦᑕ ᐃᖅᑲᖅᑐᐃᕕᐊᓂᑦ. ᓯᑎᐱᕆᒥᑦ ᐋᖅᑭᒃᑕᐅᓚᐅᕐᑐᖅ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪᓗ ᐊᓯᖏᑦ ᖁᑦᓯᓂᖅᓴᒧᑦ ᐅᓐᓂᕐᓗᒐᓱᐊᖅᑐᑦ ᐊᒃᑐᕐᑕᐅᖏᒻᒪᑕ ᔫᕈᑉ ᑲᑐᔾᔨᖃᑎᒌᖏᓐᓂᑦ ᓇᑦᑏᑦ ᓄᖅᑲᖅᑎᑕᐅᓯᒪᓂᖏᑦ ᒪᓕᒃᖢᒋᑦ ᔫᕈᑉ ᑲᑐᔾᔨᖃᑎᒌᖏᑦᑕ ᒪᓕᒐᖏᑦ, ᐊᒻᒪᓗ ᑕᐃᒪᐃᓐᓂᖓᓄ ᐊᑭᓴᖅᑐᐃᔪᓐᓇᙱᓚᑦ ᓄᖅᑲᖅᑎᑕᐅᓯᒪᓂᖓᓂ. ᑭᒡᒐᖅᑐᐃᔩ ᑖᒃᑯᓄᖓ ᐱᖓᓱᓄᑦ ᑲᑎᒪᖃᑕᐅᒋᕗᑦ ᓇᑦᑎᓕᕆᔨᓂᑦ ᐱᖃᖃᑕᐅᔪᓂᑦ ᓯᓚᕐᔪᐊᓕᒫᒥᑦ.
“ᓄᓇᕗᑦ ᒐᕙᒪᒃᑯᖏᑦ ᐊᒃᓱᕈᐃᓐᓇᖕᓂᐊᕐᐳᑦ ᑭᒡᒐᖅᑐᐃᓂᖕᒥᑦ ᓇᑦᑎᕋᓱᖕᓂᖕᒧᑦ,” ᐅᖃᖅᑐᕕᓂᖅ ᓄᓇᕗᑦ ᒐᕙᒪᒃᑯᖏᑦᑕ ᐊᕙᑎᓕᕆᔨᒃᑯᑦ ᒥᓂᔅᑕᖓᑦ ᔭᐃᒥᓯ ᐋᕆᐊᖅ. “ᓂᕈᐅᒃᐳᒍᑦ ᐅᓪᓗᒥ ᑐᓴᖅᑲᐅᔭᕗᑦ ᑲᔪᓯᔾᔪᑎᒋᓕᕈᓐᖁᓪᓗᑕ ᐱᓇᓱᐊᖕᓂᑦᑎᓐᓂ ᓄᐃᓱᓕᑎᑕᐅᔾᔪᑎᒃᓴᖓᓂ ᔫᕈᑉ ᑲᑐᔾᔨᖃᑎᒌᖏᑦᑕ ᓇᑦᑏᑦ ᓄᖅᑲᖅᑎᑕᐅᓯᒪᓂᖏᑦ. ᓇᑦᑎᕋᓱᐊᖕᓂᖅ ᓄᓇᕗᒻᒥᑦ ᑕᒪᐃᓐᓂᒃ ᓱᒃᑯᔨᐊᖃᖅᐸᙱᑦᑐᑦ ᐊᒻᒪᓗ ᓄᖑᕋᐃᓗᐊᕋᑎᒃ. ᐃᓄᐃᑦ ᑲᓇᑕᓕᒫᒥᑦ ᓱᓕ ᓇᑦᑎᖕᓂᑦ ᓂᕿᖃᕐᐳᑦ ᐊᒻᒪᓗ ᑮᓇᐅᔭᓕᐅᕈᑕᐅᕙᒃᖢᓂ ᐃᓚᐅᓂᒃᑯᑦ ᓄᓇᕐᔪᐊᒥᑦ ᐊᒥᕐᓂᒃ ᑕᐅᓰᖃᑦᑕᕐᓂᒃᑯᑦ. ᓂᕆᐅᒃᐳᒍᑦ ᐱᓕᕆᖃᑎᖃᕆᐊᒃᓴᖅ ᓯᓚᕐᔪᐊᒥᐅᓂᑦ ᓇᑦᑎᕋᓱᓲᓂᒃᑕᐅᖅ ᐊᒻᒪᓗ ᐃᓚᒋᔭᐅᔪᓂᑦ ᑐᓵᔭᐅᑦᑎᐊᕐᓂᑦᑎᓐᓂᒃ ᐅᖃᕋᓱᒃᑕᑦᑎᓐᓂᒃ ᓯᓚᕐᔪᐊᒧᑦ ᑐᑭᓯᓇᖅᑐᒃᑯᑦ, ᓈᒻᒪᒃᑐᒃᑯᑦ ᐊᒻᒪᓗ ᐊᑲᐅᔪᒃᑯᑦ.”
“ᓇᑏᑦ ᓄᖅᑲᖅᑎᑕᐅᓂᖏᑦ ᐃᓄᖕᓄᑦ ᐊᒃᑐᐃᓂᖃᓚᐅᕐᐳᑦ ᑕᒡᕙᙵᑲᐅᑎᒋ, ᓱᒃᑲᓕᔪᒥ ᐊᒻᒪᓗ ᐊᒃᓱᕈᓐᓇᖅᖢᓂ. ᓄᓇᕗᑦ ᑐᙵᕕᖏᑦ ᓂᕆᐅᒃᐳᑦ ᑖᒃᑯᐊ ᑕᒻᒪᕐᓂᖏᑦ ᐃᓕᓴᕆᔭᐅᖁᓪᓗᒋᑦ ᔫᕈᑉᒥ ᐃᖅᑲᖅᑐᐃᕕᖏᓐᓂᑦ ᑯᑦᓯᓂᖅᓴᒧᑦ ᐅᓐᓂᕐᓗᖕᓂᖏᑦ, ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ ᐊᓯᖏᓪᓗ ᐱᓇᔪᒃᑐᑦ ᐱᔪᓐᓇᕐᑎᑕᐅᔪᓐᓇᕐᓂᐊᕐᐳᑦ ᔫᕈᑉ ᑲᑐᔾᔨᖃᑎᒌᖏᑦᑕ ᐃᖅᑲᖅᑐᐃᕕᖏᓐᓄᑦ ᑖᓐᓇ ᐱᓕᕆᐊᖑᖁᓪᓗᒍ ᑐᙵᕝᕕᖃᑦᑎᐊᕐᑐᖅ,” ᐅᖃᖅᑐᕕᓂᖅ ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᙳᐊᖓᑦ ᔭᐃᒥᓯ ᐃᑦᑐᓗᒃ.
“ᓄᖅᑲᖔᖅᑎᑦᑎᓃᑦ ᒪᖓᑦᑎᖕᒪᑦᑕ ᖃᐅᔨᓴᙱᓐᓂᖏᑦ ᐱᔪᕆᓂᖏᑦ ᔫᕈᑉ ᑲᑐᔾᔨᖃᑎᒌᖏᑦ ᐃᖅᑲᖅᑐᐃᓇᓱᐊᖕᓂᖏᑦ ᐊᑯᓂᒻᒪᕆᐊᓗᒃ ᐊᕐᕌᒍᒐᓵᓘᖕᓄᑦ ᐃᓕᖅᑯᓯᑐᖃᖕᒥᑦ ᓇᓗᓇᕈᓐᓃᕋᓗᐊᖅᑎᓪᓗᒍ ᑖᒃᑯᐊ ᖃᓄᐃᓕᐅᕋᓱᐊᖕᓂᖏᑦ ᐊᖏᕐᑕᐅᓯᒪᓇᑎᒃ, ᐃᓕᖅᑯᓯᖃᕋᓂ ᐊᒻᒪᓗ ᐊᑲᐅᓇᓂ,” ᐅᖃᖅᑐᕕᓂᖅ ᐃᓄᖕᓄᑦ ᐊᖓᔪᖅᑳᕆᔭᖅ, ᑎᐅᕆ ᐊᐅᑦᓚ, ᐊᖓᔪᖅᑳᕆᔭᖅ ᐃᓄᐃᑦ ᑕᐱᕇᑦ ᑲᓇᑕᒥᑦ. “ᑖᓐᓇ ᖃᐅᔨᓇᓱᒃᑕᖃᕐᓂᖅ ᐊᑕᐅᓯᖕᒥᑦ ᐊᓪᓗᖕᓂᐅᕗᑦ ᐊᖏᓂᕐᓴᒧᑦ ᐱᕙᓪᓕᐊᓂᐊᕐᓂᖓᓄ ᐊᒻᒪᓗ ᐊᓕᐊᓇᐃᒍᓱᒃᐳᒍᑦ ᐱᕕᖃᖅᑎᑕᐅᓂᑦᑎᓐᓂ ᐃᓄᖕᓂᑦ ᑭᒡᒐᖅᑐᐃᒋᐊᖅᓴᖅ ᑕᒪᑐᒪ ᒥᒃᓵᓄᑦ ᐊᒻᒪᓗ ᓴᖅᑭᓪᓗᑎᒍᑦ ᐃᓂᕗᑦ.”
ᓇᑦᑎᕋᓱᓲᑦ ᓂᕿᑦᑎᐊᕙᐅᓂᖓᓄᑦ ᐃᓄᐃᑦ ᓄᓇᓕᖏᓐᓂᑦ ᓂᖀᑦ ᐊᑭᑐᑎᓪᓗᒋᑦ ᐅᕝᕙᓘᓐᓃᑦ ᐊᑐᐃᓐᓇᐅᓇᑎᒃ. ᐃᓇᖏᖅᑕᐅᓇᓱᒃᓗᓂ ᓇᑦᑎᐅᑉ ᓂᕿᖓ ᓂᕿᒋᓂᐊᕐᓗᒍ ᒥᒃᓯᖓᓃᑉᐳᖅ $5 ᒥᓕᐊᓐᓂᑦ ᐊᕐᕌᒍᒧᑦ. ᕿᓯᖏᑦ, ᐊᑑᑎᓖᑦ ᐊᖑᓇᓱᐊᖅᑕᑦ, ᓂᐅᕕᐊᕆᔭᐅᕙᒃᐳᑦ ᐊᑭᓴᖅᑐᕋᓱᐊᖅᖢᒋᑦ ᐊᖑᓇᓱᖕᓂᖏᑦ ᐊᒻᒪᓗ ᐊᑭᑐᓂᖏ ᐅᑭᐅᖅᑕᕐᑐᒥᐅᑕᐅᓪᓗᓂ. ᓇᑦᑎᓕᒫᑦ ᓇᓂᔭᑦ ᐊᒻᒪᓗ ᐊᖑᓇᓱᒃᑕᐅᕙᒃᑐᑦ ᐅᑭᐅᕐᑕᕐᑑᑉ ᐃᒪᖏᓐᓂᑦ ᖃᓄᐃᙱᑦᑎᐊᕐᐳᑦ ᐊᒥᓲᓪᓗᑎᒃᓗ.
ᑉᕋᓱᔅᒥ ᑲᑎᒪᓂᐅᔪᖅ ᒫᓐᓇ ᐃᓱᒪᒃᓴᕐᓯᐅᕈᓐᓇᕐᓯᕗᑦ ᑐᓴᐅᒪᖃᑦᑕᐅᑎᓂᖕᒥᑦ ᐋᖅᑭᐅᒪᔾᔪᑎ ᓇᑦᑎᕋᓱᐊᖕᓂᖕᒧᑦ ᐃᓚᐅᓪᓗᑎᒃ ᓇᑦᑎᕋᓱᐊᖅᐸᒃᑐᑦ ᓯᓚᕐᔪᐊᓕᒫᒥᑦ. ᐃᓚᖏᑦᑕᐅ ᑕᐃᔭᐅᔭᕆᐊᓕᑦ ᐃᓚᐅᔪᑦ ᐊᑯᑭᑦᑐᒥ ᑲᑐᔾᔨᖃᑎᒌᖏᑦ ᐃᖃᓗᒐᓱᐊᖅᑎᖏᑦ ᐊᒻᒪᓗ ᐊᖑᓇᓱᒃᑎᖏᑦ, ᓄᓇᕐᔪᐊᒥ ᐊᒥᕐᓂᒃ ᑕᐅᖅᓰᖃᑦᑕᕐᓂᖕᒧᑦ ᑲᑐᔾᔨᖃᑎᒌᖏᑦ, ᕿᓯᓕᕆᔨᑦ ᑲᓇᑕᒥ ᐊᒻᒪᓗ ᐊᔾᔨᒌᖏᑦᑑᑏᑦ ᓯᓚᕐᔪᐊᒥ ᓇᑦᑎᕋᓱᐊᓲᓄᑦ ᑭᒡᒐᖅᑐᐃᔨᓂᑦ.
###
ᐱᕙᓪᓕᐊᔪᓄᑦ ᑐᑭᓯᒋᐊᕐᕖᑦ:
ᐲᔭᐃ ᐊᕿᐊᕈᖅ
ᑐᓴᐅᒪᔪᓕᕆᓂᖕᒧᑦ ᑐᑭᒧᐊᒃᑎᐅᑉ ᑐᒡᓕᖓ
ᓄᓇᕗᑦ ᑐᙵᕕᒃᑯᑦ
(867) 975-4939
www.tunngavik.com
