ᐃᕐᖐᓐᓇᖅ ᓴᖅᑭᖅᑕᐅᒋᐊᓕᒃ
ᐸᓖᓯᒃᑯᑦ RCMP V ᐸᓖᓯᖃᕐᕕᖓᓂ ᓄᓇᕗᒻᒥ ᐃᖅᑲᖅᑐᕋᑦᓴᙳᖅᑎᑦᓯᔪᑦ ᐱᖓᓱᓂᒃ ᐊᕐᓇᓂᒃ ᓯᓚᐃᕐᕆᑦᓯᔪᒥᓂᕐᓂᒃ ᐊᑎᖃᖃᑕᐅᓂᕐᒧᑦ ᓄᓇᕗᑦ ᑐᙵᕕᒃ ᑎᒥᖓᓂ
(ᓯᑉᑎᒻᐱᕆ 21, 2023, ᐃᖃᓗᐃᑦ, ᓄᓇᕗᑦ) ᐸᓖᓯᒃᑯᑦ ᕈᐃᔪᓪ ᑲᓇᑕᒥ ᐸᓖᓯᖏᑦ (RCMP) ᐸᓖᓯᖃᕐᕕᖓ V ᓄᓇᕗᒻᒥ ᐃᖅᑲᖅᑐᕋᑦᓴᙳᖅᑎᑦᑎᓚᐅᖅᑐᖅ ᐱᖓᓱᓂᒃ ᐊᕐᓇᓂᒃ ᓯᓚᐃᕐᕆᔭᐃᓯᒪᔪᓂᒃ ᐊᑎᖃᖃᑕᐅᓂᕐᒧᑦ ᓄᓇᕗᑦ ᑐᙵᕕᒃ ᑎᒥᖓᓂ (ᑐᙵᕕᒃ). ᐃᖅᑲᖅᑐᕋᑦᓴᙳᖅᑎᑕᐅᒍᑎᖏᑦ ᖃᐅᔨᓴᖅᑕᐅᓚᐅᖅᑎᓪᓗᒋᑦ ᐊᑎᖃᖃᑕᐅᔪᓃᓐᓂᕋᖅᓯᒪᑎᓪᓗᒋᑦ ᓯᓚᐃᕐᕆᓯᓪᓗᑎᒃ ᑐᙵᕕᒃᑯᓐᓂᒃ ᐅᖃᐅᓯᐅᓚᐅᖅᑐᑦ ᐸᓖᓯᒃᑯᓐᓄᑦ RCMP ᐊᕐᕌᒍᑦᑎᓐᓂ ᐱᒋᐊᓕᓵᕐᓂᐸᓗᐊᓂ. ᐸᓯᔭᑦᓴᙳᖅᑎᑕᐅᓂᖓ ᓴᖅᑭᕆᐊᒃᑲᓂᖅᑐᖅ ᓴᐳᔾᔭᐅᓯᒪᓗᑎᒃ ᑕᑎᒋᔭᐅᒋᐊᖃᕐᓂᖏᓐᓂᒃ ᐃᓄᐃᑦ ᐊᑎᖃᖃᑕᐅᔪᑦ ᐊᒻᒪᓗ ᓇᓗᓇᐃᒃᑲᓐᓂᕈᑕᐅᓪᓗᓂ ᐊᖏᕈᑕᐅᓯᒪᔪᖅ ᐊᔭᐅᖅᑑᑕᐅᓗᑎᒃ ᑐᙵᕕᓕᐊᖑᓯᒪᔪᑦ ᓄᓇᕗᑦ ᐊᖏᕈᑎᖏᓐᓂ, ᐃᓛᒃᑯᑦ 35.
ᓄᓇᕗᒻᒥ ᐊᖏᕈᑎᑦ, ᐃᓛᒃᑯᑦ 35, ᓇᓗᓇᐃᖅᓯᒪᔪᑦ ᓴᖅᑭᖅᑕᐅᓯᒪᔪᓂᒃ ᐊᐅᓚᓂᐅᒋᐊᓕᓐᓂᒃ ᐊᑎᖃᖃᑕᐅᓂᕐᒧᑦ ᐊᒻᒪᓗ ᓇᓗᓇᐃᕆᐊᓪᓚᒍᑏᑦ ᐱᔪᓐᓇᐅᑎᖏᓐᓂᒃ ᐃᓄᐃᑦ ᐊᑎᖃᖃᑕᐅᔪᑦ ᒪᓕᓪᓗᒋᑦ ᓇᖕᒥᓂᖅ ᐱᖅᑯᓯᖏᑦ ᐊᒻᒪᓗ ᐱᖅᑯᓯᑐᖃᖏᑦ. ᐃᓕᓴᖅᓯᓯᒪᔪᖅ ᐱᖕᒪᕆᐅᓂᖓᓂᒃ ᐊᒻᒪᓗ ᓇᖕᒥᓂᖅ−ᐊᐅᓚᑦᓯᓂᖏᓐᓂᒃ ᓄᓇᓖᑦ ᐊᑎᖃᖃᑕᐅᔪᓕᕆᔩᑦ ᑲᑎᒪᔨᕋᓛᑦ (CEC) ᖃᐅᔨᓴᕐᓂᕐᒧᑦ ᐊᑎᓕᐅᖅᑕᐅᖃᑕᐅᔪᒪᔪᓄᑦ ᑐᑦᓯᕋᐅᑎᓂᒃ, ᒪᓕᓪᓗᒍ ᐃᓛᒃᑯᑦ 35 ᐊᒻᒪᓗ ᐊᑎᖃᖃᑕᐅᔪᓕᕆᔩᑦ ᐊᑐᐊᕋᑦᓴᖏᑦ.
“ᐃᓄᐃᑦ ᓇᑭᙶᖅᓯᒪᓂᖏᑦ ᓴᙱᓂᖃᒻᒪᕆᑦᑐᖅ ᐃᓕᖅᑯᓯᕐᒧᑦ ᐅᔾᔨᓇᕐᓂᖓᓂᒃ, ᐃᑎᓂᖓ ᐃᓚᓕᐅᑎᓯᒪᓂᖓᑕ ᐃᕕᖅᑎᓯᒪᓂᖏᓐᓂᒃ ᐃᓄᐃᑦ ᐃᓕᖅᑯᓯᖓᓄᑦ, ᐊᑐᖅᓯᒪᔭᖏᓐᓄᑦ, ᐊᒻᒪᓗ ᐃᓅᓯᖏᓐᓄᑦ. ᐅᖓᑖᓃᑦᑐᖅ ᐸᐃᑉᐹᓕᕆᓂᑐᐃᓐᓇᐅᑉ ᐅᕝᕙᓘᓐᓃᑦ ᓇᓗᓇᐃᖅᓯᒪᒃᑯᑦ ᑎᑎᕋᖅᓯᒪᓂᐅᑉ ᐊᒻᒪᓗ ᑕᕝᕙᙶᖅᓯᒪᔪᖅ ᑕᒪᐃᓐᓅᖓᔪᒥᒃ ᐊᑐᖅᑕᐅᔪᒥᒃ ᐱᖅᑯᓯᕐᒥᓂᒃ, ᐅᖃᐅᓯᕐᓂᒃ, ᐊᒻᒪᓗ ᐱᖅᑯᓯᕆᓯᒪᔭᖏᓐᓂᒃ ᓯᕗᓕᖏᑕ,” ᐅᖃᖅᑐᖅ ᐊᓗᑭ ᑰᑦᑎᑦ, ᑐᙵᕕᒃᑯᑦ ᐊᖓᔪᖅᑳᖓ. “ᐃᓄᐃᑦ ᓇᑭᙶᖅᓯᒪᓂᖏᑦ ᑲᓲᒪᔪᒻᒪᕆᐅᔪᖅ ᓄᓇᒧᑦ, ᐅᓂᒃᑳᕆᔭᐅᖃᑦᑕᖅᓯᒪᓂᖏᓐᓂᒃ ᑭᖑᕚᕆᔭᐅᔪᓂᒃ ᑐᓵᑎᑦᓯᒍᑕᐅᖃᑦᑕᖅᓯᒪᔪᓂᒃ, ᐊᒻᒪᓗ ᐱᖅᑯᓯᕐᓂᒃ ᓇᓗᓇᐃᖅᓯᒪᒍᑕᐅᔪᖅ ᐱᖅᑯᓯᕐᒥᒍᑦ ᐃᓅᓯᖓ. ᐃᓚᖃᖅᑐᓂ ᖃᐅᔨᒪᓂᕐᒥᒃ ᐱᖅᑯᓯᑐᖃᕐᓂᒃ, ᐊᑐᕐᓂᕐᒥᒃ ᐅᖃᐅᓯᕐᓂᒃ, ᐊᒻᒪᓗ ᐅᐱᒍᓱᓐᓂᕐᒥᓂᒃ ᐱᖅᑯᓯᕆᔭᒥᓂᒃ ᓱᓕᔪᒥᒃ ᓇᓗᓇᐃᕈᑕᐅᓯᒪᒧᖅ ᐃᓅᓂᖏᓐᓂᒃ ᑭᒃᑯᑐᐃᓐᓇᐃᑦ.”
ᓯᓚᐃᕐᕆᓯᔾᔪᑕᐅᒐᔪᐃᓯᒪᒍᑎᓕᒃ ᐃᓄᐃᑦ ᓄᓇᓕᖏᓐᓂ ᐃᑲᔪᖅᓯᒪᓂᖃᕐᓂᖓᓂᒃ ᖃᓂᒌᑦᑐᒻᒪᕆᐅᓂᖏᓐᓄᑦ−ᐃᓚᒌᑦ ᓄᓇᓕᓐᓂ. ᐃᓄᐃᑦ ᖃᐅᔨᒪᔮᖑᑐᐃᓐᓇᖏᑦᑐᑦ ᐊᑎᖏᑎᒍᑦ ᑭᓯᐊᓂ ᐊᑐᖅᓯᒪᔭᖏᑎᒍᑦ, ᐃᓚᒌᑦ ᐅᖓᒋᐅᑎᔪᑦ, ᐊᒻᒪᓗ ᓄᓇᓖᑦ ᖃᐅᔨᒪᐅᑎᑦᓯᐊᖅᑐᑦ. ᑖᓐᓇ ᐃᑎᔪᒻᒪᕆᒃ ᖃᐅᔨᒪᐅᑎᑦᓯᐊᓂᖅ ᓄᓇᓕᓐᓂ ᐊᑦᑕᓇᐃᖅᓯᒪᒍᑕᐅᔪᖅ ᓯᓚᐃᕐᕆᔭᐅᒐᓱᐊᖃᑦᑕᖅᑐᓄᑦ ᐃᓅᓂᕋᖅᑐᓂᒃ. ᑲᓲᒪᒍᑎᖓ ᓄᓇᕗᑦ ᐊᒻᒪᓗ ᓄᓇ ᓴᕐᖓᑎᑦᓯᑲᓐᓂᕈᑕᐅᒻᒥᔪᖅ ᑐᑭᖓᓂᒃ “ᓄᓇᖃᖅᑲᑎᒌᑦᑐᑦ” ᐃᓛᒃᑯᑦ 35-ᒥ, ᑐᑦᓯᕋᐅᓯᐅᕆᐊᖃᕐᓂᖓᓂᒃ ᑐᑦᓯᕋᐅᓯᐅᖅᑐᖅ ᐊᑎᖃᖃᑕᐅᒍᒪᓂᕐᒧᑦ ᓄᓇᒋᔭᐅᓯᒪᔪᑐᖃᕐᒥᒃ ᐊᖓᔪᖅᑳᖏᓐᓄᑦ ᐊᒻᒪᓗ ᐊᓈᓇᑦᓯᐊᒃᑯᖏᓐᓄᑦ/ᐊᑖᑕᑦᓯᐊᒃᑯᖏᓐᓄᑦ.
ᑖᓐᓇ ᑖᓐᓇᑑᓂᕋᖅᑕᐅᒐᓗᐊᖅᑎᓪᓗᒍ, ᑐᙵᕕᒃᑯᑦ ᑲᒪᒋᓯᒪᓕᖅᑕᖓ ᓴᕐᖓᑎᑦᓯᑲᓐᓂᕈᑎᑦᓴᖅ ᑲᒪᒋᔭᐅᓂᖓᓂᒃ ᐊᑎᖃᖃᑕᐅᔪᓕᕆᓂᕐᒥᒃ. ᑐᙵᕕᒃᑯᑦ ᐋᖅᑭᒋᐊᕆᖁᔨᓯᒪᓕᖅᑐᑦ CEC−ᑯᓐᓂᒃ, ᐃᓚᒋᔭᐅᓪᓗᑎᒃ ᐅᑯᓄᖓ:
- ᑐᑦᓯᕋᐅᓯᐅᖅᑐᓕᒫᑦ ᑐᓂᓯᒋᐊᖃᖅᑎᑕᐅᓕᖅᑐᑦ ᓇᓕᖅᑲᖓᓂᒃ ᑕᑭᔪᒥᒃ ᐃᓅᓕᕐᕕᑦᓯᐅᑎᖃᕐᕕᖓᓂᒃ. ᐃᓚᖏᓐᓄᑦ ᐊᑐᖅᑕᐅᒋᐊᑐᔾᔮᖏᑦᑐᖅ ᓄᑕᖅᑲᓄᑦ ᑐᑦᓯᕋᖅᑐᓄᑦ ᐊᑎᖃᖃᑕᐅᓂᕐᒧᑦ ᓄᓇᕗᑦ ᓄᓇᓕᖏᓐᓃᑦᑐᓄᑦ ᐊᐃᑉᐸᐃᓐᓇᖓ ᕿᑐᕐᖓᓚᑦᑖᓕᒃ ᑕᒫᓂᒥᐅᑕᐅᑐᐊᖅᐸᑦ.
- ᐃᓅᓕᕐᕕᑦᓯᐅᑎ ᓇᓗᓇᐃᒃᑯᑕᖅ ᐃᑲᔫᑎᓪᓗᐊᑕᐅᓂᐊᖅᑐᖅ ᓱᖅᑯᐃᖅᑕᐅᓂᖓᓄᑦ CEC ᐃᓱᒪᓕᐅᕈᑎᖏᓐᓄᑦ, ᐱᓗᐊᖅᑐᒥᒃ ᐊᐃᑉᐹ ᑕᒪᒃᑮᓘᓐᓃᑦ ᕿᑐᕐᖓᓚᑦᑖᓖᒃ ᐊᑎᖃᖃᑕᐅᑉᐸᑎᒃ ᑕᒫᓂ. ᑐᓂᓯᔪᓐᓇᖏᑦᑐᖃᖅᐸᑦ, ᑐᑦᓯᕋᖅᑐᑦ ᑐᓂᓯᔭᕆᐊᓖᑦ ᒪᕐᕉᓐᓂᒃ ᓇᓗᓇᐃᒃᑯᑖᓐᓂᒃ ᓱᖅᑯᐃᖅᓯᒍᑎᑦᓴᓐᓂᒃ, ᓲᕐᓗ ᐋᓐᓂᐊᕕᒻᒥ/ ᐃᓅᓕᕐᓂᖓᓄᑦ ᓇᓗᓇᐃᒃᑯᑕᕐᓂᒃ, ᐃᖅᑲᖅᑐᐃᕕᒃᑯᑦ ᓇᓗᓇᐃᒃᑯᑕᕐᓂᒃ, ᑎᒍᐊᕐᓂᕐᒧᑦ ᓇᓗᓇᐃᒃᑯᑕᕐᓂᒃ, ᐅᕝᕙᓘᓐᓃᑦ ᓱᖅᑯᐃᖅᑕᐅᓯᒪᓂᖓᓄᑦ ᓇᓗᓇᐃᖅᑕᐅᔾᔪᑎᒥᒃ ᑭᓇᑐᐃᓐᓇᕐᒥᒃ ᖃᐅᔨᒪᔭᖃᓪᓚᑖᖅᑐᒥᒃ ᑖᒃᑯᓂᖓ.
ᑐᙵᕕᒃᑯᑦ ᐊᖏᕈᑎᖃᖅᓯᒪᐃᓐᓇᖅᑐᑦ ᓴᐳᔾᔨᓯᒪᓂᕐᒥᒃ ᓱᓕᔪᒥᒃ ᐃᓄᓐᓃᙶᖅᑐᓂᒃ ᐊᒻᒪᓗ ᓇᓗᓇᐃᕈᑎᒥᒃ ᑖᒃᑯᑐᐊᑦ ᓱᓕᔪᒥᒃ ᒪᓕᒋᐊᓕᓐᓂᒃ ᒪᓕᑦᓯᐊᖅᑐᑦ ᐊᑎᖃᖃᑕᐅᔪᓅᖃᑕᐅᓂᐊᖅᑐᑦ. ᑕᒪᒃᑯᐊ ᐋᖅᑭᒋᐊᕈᑏᑦ ᐊᑐᕆᐊᖃᓪᓚᑖᖅᑐᑦ ᐋᖅᑭᐅᒪᑦᓯᐊᕈᑎᑦᓴᐅᒻᒪᑕ ᐃᓕᖅᑯᓯᒃᑯᑦ ᐱᖅᑯᓯᕐᒧᑦ ᐊᒻᒪᓗ ᑭᒃᑰᓂᖏᓐᓂᒃ ᓄᓇᕗᒻᒥ ᐃᓄᐃᑦ.
-30-
ᑐᑭᓯᒋᐊᒃᑲᓂᕐᕕᒃᓴᖅ:
ᑭᐊᕙᓐ ᑲᑉᓗᑦᓯᐊᒃ
ᑐᓴᐅᒪᔾᔪᑎᓕᕆᔨᒃᑯᓐᓂ ᑐᑭᒧᐊᒃᑎᑦᑎᔨ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006
