ᑐᒃᓯᕋᐅᓯᐅᖁᔨᔾᔪᑎ:
ᑐᙵᕕᒃᑯᑦ ᓄᓇᓕᓐᓂᒃ ᐃᑲᔫᑎᒃᓴᓂᒃ ᑮᓇᐅᔭᖃᖅᑎᑦᓯᒍᑎᖏᑦ −
ᓄᓇᕗᒻᒥ ᐊᖏᕐᕋᕕᒃᓴᒥᒃ ᐱᔨᑦᓯᕈᑏᑦ
ᐱᒋᐊᕐᕕᒃᓴᖓ: ᑏᓰᒻᐱᕆ 7, 2020
ᐃᓱᓕᕝᕕᑦᓴᖓ: ᔭᓐᓄᐊᓕ 4, 2021
ᑭᒃᑯᓐᓅᖓᓂᖓ: ᓄᓇᕗᓕᒫᒧᑦ
(ᑏᓰᒻᐱᕆ 7, 2020-ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ), ᓄᓇᕗᒻᒥ ᓄᓇᑖᕐᓂᕐᒧᑦ ᑲᑐᔾᔨᖃᑎᒌᑦ ᑭᒡᒐᖅᑐᐃᔪᑦ ᐃᓄᓐᓂᒃ, ᑐᓂᓯᓚᐅᖅᑐᑦ ᑮᓇᐅᔭᖅᑑᑎᒃᓴᓂᒃ $1−ᒥᓕᔭᓂᒃ ($1,000,000) ᓄᓇᓕᓐᓄᑦ ᐃᑲᔫᑎᒃᓴᓕᕆᔨᖏᑎᒍᑦ − ᓄᓇᕗᒻᒥ ᐊᖏᕐᕋᕕᒃᓴᒥᒃ ᐱᔨᑦᓯᕈᑎᓄᑦ ᐱᓕᕆᐊᒥᒃ ᐃᑲᔫᑎᒃᓴᒥᒃ ᑎᑎᕋᖅᑕᐅᓯᒪᔪᓄᑦ ᑮᓇᐅᔭᓕᐅᕋᓱᐊᖅᑎᐅᖏᑦᑐᓄᑦ ᑲᑐᔾᔨᖃᑎᒌᓄᑦ ᐊᒻᒪᓗ ᓄᓇᓖᑦ ᒐᕙᒪᖏᓐᓄᑦ ᓄᓇᕗᑦ ᓄᓇᖓᑕ ᓇᓗᓇᐃᖅᑕᐅᓯᒪᓂᖓᓂ ᕿᓂᖅᑐᓄᑦ ᐃᓂᒃᓴᐅᓇᔭᖅᑐᓂᒃ, ᐅᕝᕙᓘᓐᓃᑦ ᐱᐅᓯᒋᐊᕈᑎᒃᓴᓂᒃ ᐊᑐᖅᑕᐅᕙᑦᑐᓄᑦ ᐊᖏᕐᕋᕕᒃᓴᒥᒃ/ᐃᓪᓗᓕᕆᓂᕐᒧᑦ ᐱᔨᑦᓯᕈᑎᓄᑦ ᑲᔪᓯᑎᑕᐅᒍᑎᒃᓴᖓᓂᒃ ᓄᕙᔾᔪᐊᕐᓇᖅ−19 ᑲᒪᒍᑎᒃᓴᒧᑦ ᐊᑐᕋᑦᓴᓂᒃ.
ᓄᓇᓕᓐᓃᑦᑐᑦ, ᑮᓇᐅᔭᓕᐅᕋᓱᐊᖅᑎᐅᖏᑦᑐᑦ ᑲᑐᔾᔨᖃᑎᒌᑦ, ᓄᓇᓕᓐᓂ ᑯᐊᐳᕇᓴᑦ ᐅᕝᕙᓘᓐᓃᑦ ᑭᒃᑯᑐᐃᓐᓇᐃᑦ ᐱᓕᕆᐊᒥᓄᑦ ᐃᑲᔪᖅᑕᐅᔾᔪᑎᒃᓴᓯᐅᖅᑐᑦ ᑐᒃᓯᕋᕈᓐᓇᖅᑐᑦ ᑮᓇᐅᔭᓕᑕᐅᒍᑎᒃᓴᓂᒃ ᐱᖠᕆᐊᓄᑦ ᐅᑯᑎᒎᓇ:
- ᓴᖅᑭᔮᑦᓯᐊᕐᓗᓂ ᐃᑲᔪᖃᑦᑕᖅᓯᓂᖏᓐᓄᑦ ᐃᓘᓐᓈᓄᑦ ᓄᓇᓕᓐᓂ ᐱᓇᓱᐊᒐᐅᔪᓄᑦ ᑲᒪᒋᐊᕈᑎᒃᓴᒥᒃ ᓄᕙᔾᔪᐊᕐᓇᖅ−19−ᒥᒃ.
- ᐱᓕᕆᐊᖑᔪᑦ ᓇᓕᐊᓐᓅᖓᒍᓐᓇᖅᑐᑦ ᐊᑭᑐᔫᑎᓄᑦ ᐅᕝᕙᓘᓐᓃᑦ ᐊᐅᓚᔾᔪᑎᓄᑦ.
- ᓇᓕᐊᓐᓂᑐᐃᓐᓇᖅ ᐊᑭᑐᔫᑎᑎᒍᑦ ᐊᐅᓚᑦᓯᔾᔪᑎᑎᒍᓪᓘᓐᓃᑦ ᐊᐅᓚᓂᓖᑦ ᐊᒻᒪᓗ ᓴᖅᑭᔮᖅᑎᑦᓯᓯᒪᑦᓯᐊᕐᓗᑎᒃ ᐃᑲᔫᑎᓂᖏᓐᓂᒃ ᐱᐅᓯᒋᐊᕈᑎᓂᒃ ᑐᒃᓯᕋᖅᑑᑉ ᑲᑐᔾᔨᖃᑎᒌᒥᑎᒍᑦ ᐃᓘᓐᓈᒍᑦ ᐃᑲᔫᑎᖃᕈᓐᓇᕐᓂᖓᓂᒃ ᐃᓪᓗᓕᕆᓂᕐᒧᑦ ᐊᖏᕐᕋᕕᑦᓴᓂᓪᓘᓐᓃᑦ ᐱᔨᑦᓯᕈᑎᓂᒃ ᐃᑲᔪᖃᑦᑕᖅᑕᒥᓂᒃ ᐊᒻᒪᓗ ᐃᑲᔫᑎᖃᕐᓗᓂ ᓄᓇᓕᓐᓂ ᓄᕙᔾᔪᐊᕐᓇᖅ−19 ᑲᒪᒋᐊᕈᑎᒃᓴᓂᒃ. ᑲᔪᓯᑎᑕᐅᒍᓐᓇᖅᑐᑦ ᐅᑯᑎᒎᓇ:
- ᐊᑭᑐᔫᑎᓄᑦ ᐱᓕᕆᐊᑦ ᑐᕌᖓᓗᑎᒃ, ᐊᓯᖏᓐᓅᒐᓗᐊᖅᑕᐅᖅ:
- ᓂᐅᕕᕐᓂᖅ ᐱᖁᑎᓂᒃ
- ᐃᑲᔫᑏᑦ ᑐᕌᖓᔪᑦ ᐊᑭᑐᔪᒧᑦ ᐱᓕᕆᐊᒧᑦ
- ᐸᕐᓇᓐᓂᖅ ᐊᑭᑐᔪᒧᑦ ᐱᓕᕆᐊᒧᑦ
- ᐊᐅᓚᔾᔪᑎᓄᑦ ᐱᓕᕆᐊᑦ ᑐᕌᖓᓗᑎᒃ, ᐊᓯᖏᓐᓅᒐᓗᐊᖅᑕᐅᖅ:
- ᐱᕚᓪᓕᕈᑎᒃᓴᓂᒃ ᐊᐅᓚᔾᔪᑎᓄᑦ ᐱᔨᑦᓯᕈᑎᓄᑦ ᐱᓕᕆᐊᒃᓴᓄᓪᓘᓐᓃᑦ, ᓲᕐᓗ ᐃᓱᒪᒃᑯᑦ ᖃᓄᐃᙱᑦᓯᐊᕈᑎᒃᓴᑦ, ᓂᕿᖃᑦᓯᐊᕈᑎᒃᓴᑦ, ᐃᓕᖅᑯᓯᕐᒧᑦ ᐊᓯᖏᓐᓄᓘᓐᓃᑦ ᐱᓕᕆᐊᓄᑦ.
ᑐᒃᓯᕋᖅᑐᓄᑦ ᐊᑐᐊᖅᓯᔾᔪᑏᑦ ᐊᑐᐃᓐᓇᐅᔪᑦ ᑐᙵᕕᒃᑯᑦ ᐃᑭᐊᖅᑭᕕᖓᓂ: www.tunngavik.com
ᐊᐱᖅᑯᑎᒃᓴᖃᕈᕕᑦ ᐃᑲᔪᖅᑕᐅᔪᒪᒍᕕᓪᓘᓐᓃᑦ ᑕᑕᑎᕆᓂᕐᒧᑦ ᑐᒃᓯᕋᐅᑎᓐᓂᒃ, ᖃᐅᔨᒋᐊᕐᕕᒋᒍᓐᓇᖅᑕᐃᑦ:
ᑎᒻ ᕙᕋᐅᓐ
ᑐᑭᒧᐊᒃᑎᑦᑎᔨᒧᑦ ᐃᑲᔪᖅᑎ, ᐊᑐᐊᒐᓕᕆᓂᕐᒧᑦ ᐸᕐᓇᓂᕐᒧᓪᓗ
(867) 975-4926
ᐊᑭᖃᙱᑦᑐᖅ: 888-646-0006
ᑐᒃᓯᕋᐅᓯᐅᕆᑦ ᐅᓪᓗᒥ! ᐃᓱᓕᕝᕕᑦᓴᓕᒃ ᔭᓐᓄᐊᓕ 4, 2021, ᖃᐅᔨᓴᐅᑦ 5-ᒥ ᑲᓇᓐᓇᕐᒥ.
