(ᕕᐳᐊᕆ 24, 2023, ᐃᖃᓗᐃᑦ, ᓄᓇᕗᑦ) ᑐᙵᕕᒃᑯᑦ ᒑᓴᓖᒥᒃ ᓂᐅᕕᕈᓐᓇᐅᑏᑦ ᓴᖅᑭᖅᑕᐅᓚᐅᖅᑐᑦ ᕕᕝᕗᐊᓕ 23, 2023 ᐊᑕᐅᓯᐊᕐᓗᑎᒃ $750 ᒑᓴᓖᑖᕈᑎᒃᓴᓂᒃ ᐊᖑᓇᓱᑦᑎᓕᖕᓄᑦ ᐃᓪᓗᒥᐅᖃᑎᒌᓄᑦ ᓄᓇᕗᑦ ᓄᓇᓕᓕᒫᖏᓐᓂ. ᒑᓴᓖᑖᕈᑎᒃᓴᖅ ᐋᖅᑭᑦᑕᐅᓚᐅᖅᑐᖅ ᑐᙵᕕᒃᑯᓐᓄᑦ ᐃᑯᓪᓚᕈᑎᒃᓴᐅᑎᑕᐅᓪᓗᓂ ᐃᓚᖏᓐᓄᑦ ᐊᑭᑦᑐᐸᓪᓕᐊᔪᓄᑦ ᐊᑭᓕᖅᑕᐅᒋᐊᖃᖃᑦᑕᖅᑐᓄᑦ ᐊᖑᓇᓱᑦᑎᓄᑦ.
ᑖᓐᓇ ᐃᑲᔫᑎ ᐊᑐᕆᐊᓕᒃ ᒑᓴᓖᒧᑦ ᐊᓯᐊᓅᙱᑦᑐᖅ. ᐊᑐᖅᑕᐅᒋᐊᖃᙱᑦᑐᖅ ᐊᖏᕐᕋᒥ ᐅᖅᑰᓴᐅᑎᓯᐅᑎᓄᑦ, ᖁᓪᓕᖅᓯᐅᑏᑦ/ᐊᐅᓪᓚᖅᓯᒪᓗᓂ ᐅᖅᓱᑦᓴᖅ, ᐊᒻᒪᓗ ᐅᖅᓱᐊᓗᒃ ᑖᒃᑯᓄᖓ ᒑᓴᓖᓄᑦ ᓂᐅᕕᕈᑎᒃᓴᑦ.
ᓂᐅᕕᕈᑎᒃᓴᑦ ᑮᓇᐅᔭᕈᖅᑎᑕᐅᒍᓐᓇᙱᑦᑐᑦ, ᐊᒻᒪᓗ ᑮᓇᐅᔭᓂᒃ ᐊᒥᐊᒃᑯᔾᔮᖏᑦᑐᖅ ᐊᑕᖏᖅᑕᐅᖏᑉᐸᓘᓐᓃᑦ ᐊᒥᐊᒃᑯᖓ ᐱᔭᑦᓴᐅᖏᑦᑐᖅ ᐊᑕᐅᓯᖅ $50.00 ᓂᐅᕕᕈᓐᓇᐅᑎ ᐊᑐᖅᑕᐅᖏᑉᐸᑦ ᓂᐅᕕᕐᓗᓂ.
ᓂᐅᕕᕈᓐᓇᐅᑎᑦ 15−ᖑᓪᓗᑎᒃ ᐃᖕᒥᑯᐊᖅᑎᖅᑐᑦ $50 ᓂᐅᕕᕈᑎᒃᓴᑦ. $47.00-ᒥᒃ ᐊᑐᕈᕕᑦ ᒑᓴᓖᑖᕐᓗᑎᒃ ᐊᑕᐅᓯᕐᒧᑦ ᓂᐅᕕᕈᑎᒧᑦ, ᓂᐅᕕᖅᑐᖅ ᐊᒥᐊᒃᑯᔾᔮᖏᑦᑐᖅ ᐊᒥᐊᒃᑯᖓᓂᒃ ᐅᕝᕙᓘᓐᓃᑦ ᓂᐅᕕᕈᑎ $3.00−ᒥᒃ ᐊᒥᐊᒃᑯᔾᔮᖏᑦᑐᖅ.
ᓄᓇᓕᓐᓂ ᑯᐊᐸᐃᑦ ᐊᒻᒪᓗ ᐊᓯᖏᑦ ᒑᓯᑖᕐᕕᒃ ᑕᕝᕗᓇ ᐃᑲᔫᑎᒃᑯᑦ ᖄᖏᕐᓂᑯᓕᐅᕈᑎᑖᖏᑦᑐᑦ ᐊᑐᖅᑕᐅᖏᑦᑐᓂᒃ ᓂᐅᕕᕈᑎᑦ ᐅᓄᕐᓂᖏᓐᓂᒃ, ᐊᑭᓕᕋᑦᓴᓕᐅᖔᕐᓂᐊᑐᓪᓕ ᑐᙵᕕᒃᑯᓐᓄᑦ ᐊᑭᓪᓚᑦᑖᖓᓂᒃ ᒑᓴᓖᑖᕈᑎᒥᓂᕐᓂᒃ ᐊᑐᖅᑕᐅᓯᒪᔪᓂᒃ ᑖᒃᑯᓂᖓ ᐃᑲᔫᑎᓂᒃ.
ᐸᕝᕕᓴᓐᓂᖅ, ᐅᓗᕆᐊᓵᕆᓂᖅ, ᑲᑕᑦᑎᕆᓂᕐᓗ ᖃᓄᐃᓕᔭᐅᒍᑕᐅᑦᓴᐅᑎᒋᓂᐊᖅᑐᑦ ᐊᐅᓚᓂᖓᓄᑦ ᑖᓐᓇ ᐃᑲᔫᑎ. ᒑᓴᓖᑖᕐᕕᒃ ᐱᔪᓐᓇᐅᑎᓖᑦ ᕿᐱᓗᓐᓂᕐᒥᒃ ᐱᔨᑦᓯᓂᕐᒥᒃ ᑕᒪᒃᑯᓂᖓ ᓵᖓᑦᓯᔪᓂᒃ, ᑲᑕᑦᑎᕆᔪᓂᒃ, ᐸᕝᕕᓴᑦᑐᓂᒃ, ᐅᕝᕙᓘᓐᓃᑦ ᐅᓗᕆᐊᓵᕆᔪᓂᒃ ᐃᖅᑲᓇᐃᔭᖅᑎᒥᒃ.
ᑖᓐᓇ ᑐᙵᕕᒃᑯᑦ ᐋᖅᑭᑦᓯᒪᔭᖓ ᐊᒻᒪᓗ ᐊᐅᓚᑕᖓ ᐃᑲᔫᑎ, ᑐᕌᖓᔪᖅ ᐃᑲᔫᑎᒃᓴᓂᒃ ᐊᖑᓇᓱᑦᑎᓄᑦ ᒥᓇᕋᑎᓄᓪᓗ ᓄᓇᕗᑦ ᓄᓇᓕᖏᓐᓂ. ᓄᓇᓕᓐᓂ ᒑᓴᓖᑖᕐᕕᒃ ᐊᐅᓚᑕᐅᔪᑦ ᓄᓇᓕᓐᓂ ᑯᐊᐸᒃᑯᓐᓄᑦ ᐊᒻᒪᓗ ᐊᓯᖏᑦ ᓂᐅᕕᕐᕕᑦ ᐱᖕᒪᕆᐅᒻᒪᑕ ᐃᑲᔪᖃᑦᑕᕐᓂᖏᑦ ᐊᐅᓚᑕᐅᓂᖏᓐᓂᒃ ᑖᒃᑯᐊ ᐃᑲᔫᑎᑦ. ᓂᐅᕕᕐᕖᑦ ᐃᑲᔪᖅᑎᓐᓇᒋᑦ ᐊᒻᒪᓗ ᐃᓚᓕᐅᔾᔭᐅᓯᒪᑎᓐᓇᒋᑦ ᑖᑦᓱᒧᖓ ᐃᑲᔫᑎᒧᑦ, ᐊᐅᓚᒐᔭᙱᑦᑐᑦ.
ᐊᑲᐅᙱᓪᓕᐅᕈᑏᑦ ᐅᓐᓂᕐᓘᑏᓪᓘᓐᓃᑦ ᑖᑦᓱᒧᖓ ᐃᑲᔫᑎᒧᑦ ᑐᕌᖅᑎᑕᐅᒍᓐᓇᖅᑐᑦ ᐃᓄᓐᓄᑦ ᐃᑲᔫᑎᒃᓴᑦ ᐱᔨᑦᓯᕈᑏᓪᓗ ᐱᓕᕆᕝᕕᐊᓄᑦ ᑐᙵᕕᒃᑯᓐᓂ ᑲᖏᕐᖠᓂᕐᒥ ᐅᖄᓚᐅᑖ: 1-888-236-5400.
