(ᒫᑦᓯ 9, 2017 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃ ᑎᒥᖓᑕ (ᑐᓐᖓᕕᒃ) ᐊᖓᔪᖅᑳᖓ ᐊᓗᑭ ᑰᑦᑎᖅ ᐅᖃᖅᑲᐅᔪᖅ ᐅᓪᓗᒥ ᓴᖅᑭᖅᑕᐅᕌᑖᖅᑐᖅ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᖅ ᐊᒻᒪᓗ ᐃᓄᐃᑦ ᐅᖃᐅᓯᖓᓄᑦ ᓴᐳᑎᔭᐅᓯᒪᔾᔪᑎᓄᑦ ᐱᖁᔭᓄᑦ ᐋᖅᑭᒋᐊᕆᖁᔨᔾᔪᑎ ᐋᖅᑭᒍᑕᐅᔾᔮᖏᑦᑐᖅ ᒫᓐᓇ ᖁᐊᕐᓵᓇᖅᑐᒦᒍᑕᐅᔪᒧᑦ ᐃᓕᓐᓂᐊᕐᓂᓕᕆᓂᕐᒧᑦ ᐊᐅᓚᓂᖓᓄᑦ.

“ᑐᒃᓯᕋᐅᑦ ᐋᖅᑭᒋᐊᕆᐅᔨᔾᔪᑎ ᑕᑯᒥᓇᕐᓴᐅᑎᑐᐃᓐᓇᐃᑦ ᐱᐅᓂᕐᐹᒥᒃ ᐊᒻᒪᓗ ᐊᑉᐸᕈᑕᐅᔪᖅ ᐱᔪᓐᓇᐅᑎᓄᑦ ᐃᓄᒃᑎᑐᑦ ᐅᖃᐅᓯᖅ ᐃᓕᓴᐃᔾᔪᑕᐅᓂᖓᓂᒃ. ᐊᓯᔾᔨᖁᔨᔾᔪᑕᐅᔪᑦ ᒪᓂᒪᑎᑦᓯᔫᔮᑐᐃᓐᓇᕐᒪᑕ ᐊᕕᑦᑐᕐᓯᒪᓂᕐᓂ ᐃᓕᓐᓂᐊᕐᓂᓕᕆᔨᒃᑯᑦ ᑲᑎᒪᔨᖏᓐᓄᑦ (DEA) ᓂᕈᐊᕈᓐᓇᕐᓂᖏᓐᓂᒃ ᐃᓚᓕᐅᔾᔨᒍᒪᓂᕐᒥᒃ ᐃᓄᒃᑎᑐᑦ ᐅᖃᐅᓯᖅ ᐃᓕᓴᐃᒍᑕᐅᒍᓐᓇᕐᓂᖓᓂᒃ ᐃᓕᓐᓂᐊᕕᖕᓂ, ᑭᓯᐊᓂ ᐅᔾᔨᓇᖅᑐᖅ ᐅᓄᕐᓯᒋᐊᕈᑕᐅᔾᔮᖏᑦᑐᖅ ᐃᓄᒃᑎᑐᑦ−ᐅᖃᐅᓯᓕᓐᓂᒃ ᐃᓕᓴᐃᔨᓂᒃ, DEA ᒪᓂᒪᑎᑦᓯᒍᓐᓇᔾᔮᖏᑦᑐᑦ ᑖᑦᓱᒥᖓ ᓂᕈᐊᖔᕐᓗᑎᒃ ᐃᓕᓐᓂᐊᖅᑎᓄᑦ,” ᐅᖃᖅᑐᖅ ᑰᑦᑎᖅ. “ ᐃᓄᐃᑦ ᓇᖕᒥᓂᕐᓱᕈᒪᓪᓗᑎᒃ ᐊᐅᓚᑦᓯᓂᕐᒥᒃ ᑕᑉᕙᓂ ᐊᖏᕈᑎᒋᓯᒪᔭᑦᑎᓐᓂ ᓄᓇᕗᑦ ᐊᖏᕈᑎᖓᓂ ᑲᔪᓯᑎᑕᐅᓇᔭᖅᑐᖅ ᐃᓄᐃᑦ ᓄᑕᖅᑲᑦ ᐃᓕᓴᖅᑕᐅᓕᕐᐸᑕ ᐃᓄᒃᑎᑐᑦ ᐊᒻᒪᓗ ᐃᓕᓐᓂᐊᕌᓂᓪᓗᑎᒃ ᐃᓕᓐᓂᐊᕐᕕᐊᓗᖕᒥᒃ.”

1996−ᒥᓂᒃ, ᓄᓇᕗᑦ ᒐᕙᒪᖓ ᓱᕋᐃᖃᑦᑕᕐᓯᒪᔪᖅ ᐱᓂᐊᕐᓂᕋᐅᑎᓂᒃ ᐋᖅᑭᑦᓱᐃᓂᕐᒥᒃ ᐊᒻᒪᓗ ᑲᔪᓯᑎᑦᓯᓂᕐᒥᒃ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᓐᓄᑦ ᐸᕐᓇᐅᑎᓂᒃ ᐅᓄᕐᓯᑲᓐᓂᖁᓪᓗᒋᑦ ᐃᓄᐃᑦ ᐃᓕᓴᐃᔩᑦ ᐊᒻᒪᓗ ᐃᓕᓐᓂᐊᕕᖕᒥ ᐃᖅᑲᓇᐃᔭᖅᑐᑦ 85%−ᒧᑦ.

ᐱᓇᓱᐊᕈᓯᐅᕋᑖᑦᓯᐊᖅ, ᑰᑦᑎᖅ ᐅᖃᓚᐅᖅᑐᖅ ᐃᓱᒫᓘᑎᒋᔭᒥᓂᒃ ᑐᒃᓯᕋᐅᑏᑦ ᒐᕙᒪᒃᑯᑦ ᑮᓇᐅᔭᖅᑑᑎᒃᓴᖏᓐᓄᑦ ᑕᑉᕙᓃᖃᑕᐅᓐᖏᓐᓂᖓᓂᒃ ᓄᑖᓂᒃ ᐊᑐᕋᑦᓴᓂᒃ ᑎᑭᐅᑎᒍᑎᒃᓴᓂᒃ ᑖᑦᓱᒧᖓ ᑐᕌᒐᕐᒧᑦ. ᑮᓇᐅᔭᕐᔪᐊᑦ ᐊᖏᕈᑕᐅᒋᐊᖃᕐᓂᐊᕐᒪᑕ ᒫᓐᓇᑦᓴᐅᑎᒋ ᑲᔪᓯᑎᑕᐅᖁᓪᓗᒍ ᑖᓐᓇ ᐱᓇᓱᐊᒐᑦᓴᖅ.

ᑐᑭᓯᒋᐊᒃᑲᓂᕐᕕᒃᓴᖅ:

ᑭᐅᕆᓐ ᕙᓚᐅᕋᑎ
ᑐᓴᐅᒪᔾᔪᑎᓕᕆᔨᒃᑯᑦ ᑐᑭᒧᐊᒃᑎᑦᑎᔨᐅᑲᐃᓐᓇᖅᑐ
ᓄᓇᕗᑦ ᑐᓐᖓᕕᒃ ᑎᒥᖓ
ᐅᖄᓚᐅᑖ: (867) 975-4941 ᐊᑭᖃᓐᖏᑦᑐᖅ 1-888-646-0006
ᐃᑉᐱᐊᔪᒻᒥᒐᖅ: (867) 222-2393