ᑐᓴᕋᑦᓴᓕᕆᔩᑦ

ᐊᖓᔪᖅᑳᖅ ᑰᑦᑎᖅ ᖁᕕᐊᒃᑯᔾᔨᕗᖅ ᑲᓇᑕᐅᑉ ᒐᕙᒪᖓᓂ ᓄᑖᓂᒃ ᐅᑎᖅᑐᓂᓪᓗ ᒥᓂᔅᑕᐅᑏᑦ ᑲᑎᒪᔨᖏᓐᓂᒃ

ᐃᕐᖐᓐᓈᖅ ᓴᖅᑭᖅᑕᐅᒋᐊᓕᒃ

ᐊᖓᔪᖅᑳᖅ ᑰᑦᑎᖅ ᖁᕕᐊᒃᑯᔾᔨᕗᖅ ᑲᓇᑕᐅᑉ ᒐᕙᒪᖓᓂ ᓄᑖᓂᒃ ᐅᑎᖅᑐᓂᓪᓗ ᒥᓂᔅᑕᐅᑏᑦ ᑲᑎᒪᔨᖏᓐᓂᒃ

(ᓅᕙᐃᒻᕙ 21, 2019- ᐃᖃᓗᑦᑑᑦᑎᐊᖅ) ᓄᓇᕗᑦ ᑐᓐᖓᕕᒃ ᑎᒥᖓᑕ (ᑐᓐᖓᕕᒃ) ᐊᖓᔪᖅᑳᖓ ᐊᓗᑭ ᑰᑦᑎᖅ ᖁᕕᐊᒃᑯᔾᔨᕗᖅ ᑲᓇᑕᐅᑉ ᒐᕙᒪᖓᓂ ᓄᑖᓂᒃ ᐅᑎᖅᑐᓂᓪᓗ ᒥᓂᔅᑕᐅᑏᑦ ᑲᑎᓯᒪᔨᖏᓐᓂᒃ ᐊᖏᖅᑎᑕᐅᓚᐅᖅᑐᓂᒃ ᐃᑉᐸᑦᓴᖅ ᐋᑐᕚᒥ.

ᑐᓐᖓᕕᒃᑯᑦ ᑐᓂᓯᒪᕗᑦ ᐃᖅᑲᓇᐃᔭᖃᑎᖃᕐᓂᐊᓂᕐᒥᒃ ᓄᑖᓂᒃ ᒥᓂᔅᑕᐅᑏᑦ ᑲᑎᒪᔨᖏᓐᓂᒃ ᓱᖅᑯᐃᖅᑕᐅᓯᒪᖁᓪᓗᒋᑦ ᐱᔪᓐᓇᐅᑎᖏᑦ ᐊᒻᒪᓗ ᐊᖏᕈᑕᐅᓯᒪᔪᑦ ᐃᑉᐱᔭᐅᑦᓯᐊᖁᓪᓗᒋᑦ. ᐊᑕᖏᕐᓗᑎᒃ ᐊᒻᒪᓗ ᓈᖕᒪᑐᒃᑯᑦ ᐊᑐᓕᖅᑎᑕᐅᖁᓪᓗᒋᑦ ᓄᓇᕗᑦ ᐊᖏᕈᑎᖏᑦ ᑐᓐᖓᕕᒋᔭᐅᒻᒪᑕ ᐱᓕᕆᐊᖏᓐᓄᑦ ᑐᓐᖓᕕᒃᑯᑦ ᐱᓗᐊᖅᑐᒥ.

“ᖃᐅᔨᒪᔪᖓ ᓈᖕᒪᓂᕐᐹᒃᑯᑦ ᐋᖅᑭᑦᓯᒪᒋᐊᖅᑎᑦᓯᒍᓐᓇᕋᑦᑕ ᐃᓅᓯᖏᓐᓂᒃ ᐃᓄᐃᑦ ᓄᓇᕗᒻᒥ ᐃᖅᑲᓇᐃᔭᖃᑎᖃᕐᓗᑕ ᓄᑖᓂᒃ ᒥᓂᔅᑕᐅᑏᑦ ᑲᑎᒪᔨᖏᓐᓂᒃ ᑲᓇᑕᐅᑉ ᒐᕙᒪᒃᑯᖏᓐᓂ,” ᐅᖃᖅᑐᖅ ᑐᓐᖓᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ.

ᑐᓐᖓᕕᒃᑯᑦ ᑐᑭᒧᐊᒍᑎᒃᓴᓕᐊᕆᓯᒪᔭᖏᓐᓄᑦ ᓯᕗᓪᓕᐅᔾᔭᐅᔭᕆᐊᓕᓐᓃᖃᑕᐅᔪᑦ ᐱᕚᓪᓕᓇᖅᑐᒻᒪᕆᒻᒥᒃ ᐱᕙᓪᓕᐊᑎᑦᓯᓂᕐᒥᒃ ᐃᓄᐃᑦ ᐃᖅᑲᓇᐃᔮᖏᓐᓂᒃ, ᓴᓐᖓᑎᑦᓯᐊᕐᓂᕐᒥᒃ ᐃᓄᒃᑐᑦ ᓄᓇᕗᒻᒥ ᐃᓅᓯᓕᒫᓄᑦ, ᓴᖅᑮᓂᖅ ᐃᓕᓐᓂᐊᓂᕐᒧᑦ ᐊᐅᓚᑦᓯᔾᔪᑎᒃᓴᓂᒃ ᑕᑉᕗᓐᖓᖓᔪᓂᒃ ᐊᒻᒪᓗ ᐱᕚᓪᓕᕈᑎᒃᓴᓂᒃ ᐃᓄᐃᑦ ᓯᕗᓪᓕᐅᔾᔭᐅᔭᕆᐊᓕᖁᑎᖏᓐᓄᑦ ᐃᓕᖅᑯᓯᖓᓄᓪᓗ, ᐊᒻᒪᓗ ᓴᖅᑮᓂᕐᒥᒃ ᐱᖁᑎᕐᔪᐊᖑᔭᕆᐊᓖᑦ ᓄᓇᕗᒻᒥ ᑲᓇᑕᓕᒫᒧᑦ ᐊᓐᖑᑎᓯᒪᓗᑎᒃ ᐊᒻᒪᓗ ᐃᓚᒋᔭᐅᑦᓯᐊᖃᑦᑕᕐᓗᑎᒃ ᐃᓄᐃᑦ ᒐᕙᒪᒃᑯᑦ ᐊᑐᐊᒐᖏᓐᓄᑦ ᐱᓕᕆᐊᒃᓴᓄᓪᓗ ᐋᖅᑭᑦᓯᒪᓂᖏᓐᓄᑦ ᐱᕙᓪᓕᐊᑎᑕᐅᓂᖏᓐᓄᓪᓗ.

“ᐱᕙᓪᓕᐊᓂᖅᑕᖃᕋᑖᓚᐅᖅᑐᖅ, ᑕᑉᕗᓐᖓᖓᔪᒥᒃ ᐃᓄᐃᑦ ᑯᐃᓐ ᐱᓇᓱᐊᖃᑎᒌᓐᓂᖏᓐᓄᑦ ᑲᑎᒪᔨᕋᓛᑎᒍᑦ, ᐊᒻᒪᓗ ᕿᓚᓈᕆᔭᕗᑦ ᐱᓕᕆᐊᕆᓚᐅᖅᑕᑎᓐᓄᑦ ᐅᑎᕐᕕᖃᕐᓂᐊᕐᓂᕗᑦ,” ᐅᖃᓚᐅᖅᑐᖅ ᐊᖓᔪᖅᑳᖅ ᑰᑦᑎᖅ. “ᑕᑉᕗᖓ ᐃᓚᒋᔭᐅᔪᖅ ᐱᐊᓂᒃᑕᐅᓂᖏᑦ ᐸᕐᓇᐅᑏᑦ ᐃᓄᒃᑐᑦ ᐃᓕᓴᐃᔨᒃᓴᓂᒃ ᐃᓕᓐᓂᐊᕈᑎᒃᓴᑦ ᐊᒻᒪᓗ ᑎᑎᕋᕆᐊᓐᖓᐅᑏᑦ ᓄᓇᕗᒻᒥ ᐃᖃᓗᓕᕆᓂᕐᒧᑦ ᐊᐅᓚᑦᓯᔾᔪᑎᓄᑦ.”

-30-

ᑐᑭᓯᒋᐊᒃᑲᓂᕐᕕᒃᓴᖅ, ᖃᐅᔨᒋᐊᕐᕕᒋᓗᒍ:
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨᒧᑦ ᐃᑲᔪᖅᑎ ᑐᓴᐅᒪᔾᔪᑎᓕᕆᔨᒃᑯᓐᓂ
ᓄᓇᕗᑦ ᑐᓐᖓᕕᒃ ᑎᒥᖓ
ᐅᖄᓚᐅᑖ: (867) 975-4900 ᐊᑭᖃᓐᖏᑦᑐᖅ: 1-888-646-0006

www.tunngavik.com

ᖃᔮᖅ ᐃᐊᔅᕗᐊᑦ,
ᑐᓴᐅᒪᔾᔪᑎᓕᕆᓂᕐᒧᑦ ᖃᐅᔨᒪᔨᑕᖅ
ᐊᖓᔪᖅᑳᖅ ᐊᓗᑭ ᑰᑦᑎᖅ ᐊᓪᓚᑉᕕᖓᓂ
ᐅᖄᓚᐅᑖ: (867) 975-4900 ᐊᑭᖃᓐᖏᑦᑐᖅ: 1-888-646-0006

www.tunngavik.com

Download (PDF, 129KB)