(ᓯᑎᐱᕆ 24, 2020, ᐃᖃᓗᐃᑦ) ᓄᓇᕗᑦ ᑐᙵᕕᒃ ᑎᒥᖓ ᖁᓚᙱᓗᐊᕐᑐᐊᓘᓗᐊᕐᑕᐃᓕᒪᕗᑦ ᒐᕙᒪᒃᑯᑦ ᐱᓕᕆᐊᒃᓴᒥᓐᓂᒃ ᑲᓇᑕᐅᑉ ᑲᑎᒪᕕᕐᔪᐊᖓᓂ ᑯᐃᑉ ᑭᒡᒐᑐᖅᑎᖓ ᔫᓕ ᐸᐃᐊᑦ, ᑐᓴᖅᑎᑦᑎᓚᐅᕐᑎᓪᓗᒍ ᐃᑉᐸᒃᓴᖅ.
ᑐᙵᕕᒃᑯᑦ ᐱᓕᕆᖃᑕᐅᓯᒪᒻᒪᑦ ᐱᓪᓗᒍ ᓯᕗᓂᑦᑎᓐᓂ ᐊᑦᑕᓇᕐᓂᕆᑐᐃᓐᓇᕆᐊᖃᖅᑕᖓᓂᒃ ᐊᒻᒪ ᐊᑦᑐᐃᔪᓐᓇᕐᓂᖓᓂᒃ ᓄᕙᒡᔪᐊᕐᓇᖅ−19, ᐊᒻᒪ ᐱᕚᓪᓕᕐᑕᐅᔭᕆᐊᖃᓪᓚᕆᓐᓂᖓᓂᒃ ᐋᓐᓂᐊᖃᓐᓇᖏᑦᑐᓕᕆᓂᒃ, ᐃᓅᓯᒋᑦᓯᐊᓐᓂᖏᑦ ᐊᒻᒪ ᐃᖕᒥᒃᑯᑦ ᐊᐅᓚᑦᑎᔪᓐᓇᕐᓂᖏᑦ ᐃᓄᖏᑦ ᓄᓇᕗᖕᒥ. ᓄᕙᒡᔪᐊᕐᓇᖅ−19 ᓇᓗᓇᕈᓐᓃᑎᑦᑎᓯᒪᒻᒪ ᒪᕐᕉᓐᓂᒃ ᐱᔭᐅᔭᕆᐊᖃᓪᓚᕆᒃᑐᓂᒃ ᓄᓇᕗᖕᒥ ᐊᒥᒐᕐᓯᒍᑕᐅᓗᐊᕐᑐᑦ ᐃᓅᖃᑎᒌᓄᑦ ᑮᓇᐅᔾᔭᒃᓴᕕᒃᓴᑦ ᐊᒻᒪ ᐃᖅᑲᓇᐃᔭᕐᑎᖃᕆᐊᖃᓐᓂᖅ.
ᑐᙵᕕᒃᑯᑦ ᕿᓚᓈᖅᐳᑦ ᐃᖅᑲᓇᐃᔭᖃᑎᖃᓐᓂᐊᓂᕐᒥᓂᒃ ᑲᓇᑕᐅ ᒐᕙᒪᒃᑯᖏᓐᓂᒃ ᐱᓕᕆᒋᐊᕈᑎᖃᓐᓂᐊᕐᓗᑎᒃ ᒐᕙᒪᒃᑯᑦ ᐱᓕᕆᐊᒃᓴᒥᓐᓂᒃ ᑲᓇᑕᐅᑉ ᑲᑎᒪᕕᕐᔪᐊᖓᓂ ᐅᖃᐅᓯᐅᖃᐅᔪᓂᒃ ᓇᓗᓇᐃᕆᖃᐅᒻᒪᑕ ᑲᑐᔾᔨᓗᑎᒃ ᐱᓕᕆᐊᕆᔪᒪᔭᕐᒥᓐᓂᒃ, ᓱᓕᔪᒃᑯᑦ ᐱᓕᕆᖃᑎᒌᓐᓂᒃᑯᑦ ᐊᓯᔾᔩᕙᓪᓕᐊᒍᑕᐅᔪᓐᓇᕐᑐᓂᒃ. ᑐᙵᕕᒃᑯᑦ ᑲᒪᒋᔭᖃᐃᓐᓇᓂᐊᕐᐳᑦ ᐃᖕᒥᒃᑯᑦ ᐊᐅᓚᑦᑎᔪᓐᓇᓂᕐᒥ ᐊᖅᑯᑎᖃᓪᓗᑎᒃ ᓄᓇᕗᖕᒥ ᓴᖅᑭᑕᐅᓯᒪᔪᓂᒃ ᐃᖅᑲᓇᐃᔭᕐᑎᖃᓐᓂᕐᒥᒃ ᐋᖅᑭᒃᓯᓗᑎᒃ ᑲᑐᔾᔨᓂᒃᑯᑦ ᐃᖅᑲᓇᐃᔮᖅᑖᓚᐅᕋᑎᒃ ᐃᖅᑲᓇᐃᔭᒃᑎᒃᓴᑦ ᐃᓕᓐᓂᐊᕐᑎᑕᐅᒍᑎᒃᓴᖏᓐᓄᑦ ᐅᐸᓗᖓᐃᔭᐅᑎᑦ ᐊᒻᒪ ᐸᕐᓇᒍᑎᑦ. ᑐᙵᕕᒃᑯᑦ ᐃᖅᑲᓇᐃᔭᖃᑎᖃᓐᓂᐊᕐᐳᑦ ᑲᓇᑕᐅᑉ ᒐᕙᒪᒃᑯᖏᓐᓂᒃ ᖃᓄᖅᑑᕈᑎᖃᕆᐊᕈᑎᖃᓪᓗᑎᒃ ᖃᓄᐃᑦᑐᒦᓐᓂᖏᓐᓄᑦ ᐊᒻᒪ ᐊᔪᕐᓴᓗᐊᓂᖏᓐᓄᑦ ᐃᒡᓗᖃᑦᑎᐊᙱᓗᐊᕐᓂᖏᓐᓄᑦ ᐳᕙᓪᓗᓇᕐᑐᖅᑖᐸᒻᒪᑦ ᐊᐃᑦᑐᐃᒍᑕᐅᓗᓂ ᐊᒻᒪ ᐱᓕᐅᒥᑎᑦᑎᓯᒪᕙᒻᒪᑦ ᐅᓄᕐᓂᖏᓐᓂᒃ ᐳᕙᓪᓗᓇᕐᑐᖃᓕᕐᑐᑦ ᐃᓄᐃᑦ ᓄᓇᖏᓐᓂ ᑕᐃᒫᒃᓴᐃᓐᓇᐅᒐᔭᕐᒥᒻᒪᑦ ᐊᑦᑐᐃᔾᔪᑕᐅᔪᓐᓇᕐᒪ ᓄᕙᒡᔪᐊᕐᓇᖅ−19 ᐊᒻᒪ ᐊᓯᖏᓐᓄᑦ ᐊᐃᑦᑑᑕᐅᔪᓐᓇᕐᑐᓄᑦ ᐋᓐᓂᐊᑖᓐᓇᕐᑐᓄᑦ; ᐃᒡᓗᒥ ᐃᓄᒋᐊᓗᐊᖅᐸᒃᑐᑦ ᐊᒻᒪᓗ ᐃᒡᓗᑦ ᕿᖓᖃᙱᓐᓂᖏᓐᓄᑦ .
ᑐᙵᕕᒃᑯᑦ ᓈᖕᒪᓴᕈᑎᖃᖅᐳᑦ ᐃᒃᐱᒋᔭᒃᑲᓂᕐᓯᒪᒻᒪᑦ ᐋᓐᓂᐊᖃᑦᑕᐃᓕᒪᓂᕐᒧᑦ ᑲᒪᔾᔪᑕᐅᔪᓐᓇᕐᑐᓂᒃ, ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ, ᓂᕿᒃᓴᖃᑦᑎᐊᕆᐊᖃᓐᓂᕐᒥᒃ ᐊᒻᒪ ᐃᒪᕕᖕᒥ ᐃᒪᕐᒥᐅᑕᓂᓪᓗ ᐸᐸᑦᑎᔨᐅᑦᑎᐊᕆᐊᖃᓐᓂᕐᒥᒃ.
-30-
ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᐅᔨᒃᑲᕈᓐᓇᕐᑕᐃᑦ:
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᓂᕐᒧᑦ ᐃᓕᓐᓂᐊᖅᑐᖅ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900 ᐊᑭᓕᕆᐊᖃᙱᑦᑐᖅ: 1-888-646-0006
