ᑐᓴᕋᑦᓴᓕᕆᔩᑦ

ᓄᓇᕗᑦ ᑐᓐᖓᕕᒃ ᑎᒥᖓᑦ ᑐᖓᓱᒃᑎᑦᑎᔪᑦ ᓄᓇᕗᒻ ᓇᖕᒥᓂᖅᓱᕐᓂᕐᒧᑦ ᐋᔩᖃᑎᒌᒍᑎᑎᒍᑦ ᐊᐃᕙᓂᒃᑯᑦ

ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᐊᖓᔪᖅᑳᖓᑦ ᑳᑎ ᑕᐅᑐᖏ ᐅᑉᓗᒥ ᑐᖓᓱᒃᑎᑦᑎᔪᖅ ᐅᖃᖅᑕᐅᓂᐊᒃ ᓄᑖᖅ ᐱᖓᓱᐃᓕᖓᔪᑦ ᐋᔩᖃᑎᒌᒃᓂᑦ ᐱᒋᐊᕐᓂᐅᓚᐅᖅᓯᒪᔪᑦ ᐃᒪᓐᓴ ᑐᓂᓯᓗᑎᒃ ᓄᒃᑎᖅᓯᓂᕐᒥᑦ ᑲᓇᑕᐅᑉ ᒐᕙᒪᒃᑯᖏᑦᑕ ᓄᓇᖁᑎᖏᓐᓂᒃ ᐊᒻᒪᓗ ᐱᔾᔪᑎᒃᓴᓂᒃ ᐊᑐᖅᑕᐅᓂᐊᖅᑐᓄᑦ ᐅᑯᓇᖓᑦ ᑲᓇᑕᐅᑉ ᒐᕙᒪᒃᑯᖏᓐᓂᒃ ᓄᓇᕗᒧᑦ ᑐᕌᕐᓗᑎᒃ.

ᑕᐅᑐᖏ ᐅᖃᖅᑐᖅ ᓯᕙᑖᕐᕕᖕᒥ ᓴᐅᖃᐅᓯᒃᑯᑦ ᓴᖅᑭᑦᑎᓂᒃᑯᑦ ᐅᑯᓄᖓ ᐃᓄᓕᕆᔨᑐᖃᒃᑯᑦ ᒥᓂᔅᓴᖓᑦ ᑭᐅᕋᓐ ᐱᓂᑦ ᐅᓇ ᕗᕆᑦ ᑲᕌᓐ ᐱᔨᑦᑎᕐᓂᐊᓕᕐᓂᐊᓂᒃ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐋᔩᖃᑎᖃᕐᓂᕐᒧᑦ ᐱᓕᕆᓂᐊᖅᑎᓪᓗᒋᑦ ᓄᓇᕗᑦ ᓇᖕᒥᓂᖅᓱᕐᓂᐊᕐᓂᖏᓐᓄᑦ ᐱᓕᕆᓂᕐᒥᑦ.

ᓄᓇᕗᑦ ᑐᓐᖓᕕᒃ ᑎᒥᖓᑦ ᐱᓕᕆᖃᑎᖃᑎᖃᓚᐅᖅᑐᖅ ᑲᓇᑕᐅᑉ ᒐᕙᒪᑭᑯᖏᓐᓂᒃ ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓂᒃ ᑐᕌᖅᑐᓂᒃ ᑕᒪᒃᓱᒧᖓ ᓇᖕᒥᓂᖅᓱᕐᓂᕐᒧᑦ ᐊᖏᕈᑎᓂᒃ ᐅᑭᐅᓄᑦ ᐅᓄᖅᑐᓄᑦ ᐊᒥᓱᓄᑦ. ᐊᖅᑭᐅᒪᒻᒪᕆᒃᑐᒥᑦ ᓇᖕᒥᓂᖅᓱᕐᓂᕐᒧᑦ ᐋᔩᖃᑎᒌᒍᑎᑦ ᓯᕗᓂᐊᓂ ᒐᕙᒪᐅᓚᐅᖅᑐᓂᑦ ᐱᒋᐊᓚᐅᖅᓯᒪᔪᑦ ᐅᑭᐅᑦ 2014 ᐊᒻᒪᓗ 2015. ᓯᕗᒻᒧᑦ ᑲᔪᓯᓂᖏᑦ ᐊᖅᑭᒃᑕᐅᓚᐅᖅᓯᒪᔪᑦ ᐊᒥᓱᒐᓚᐅᑦ ᐅᓄᖅᑐᒐᓚᐃᑦ ᑕᒪᑦᓱᒧᖓ ᐱᔪᑦ ᓇᖕᒥᓂᖅᓱᕐᓂᕐᒧᑦ ᐱᔾᔪᑎᐅᔪᓂᒃ, ᐃᓚᒋᓪᓗᒋᑦ ᐃᓕᑕᖅᓯᓂᐅᔪᑦ ᐱᒻᒪᕆᐅᓂᖏᓐᓄᑦ ᐊᑐᓕᖅᑎᑦᑎᔭᓪᓕᐊᓂᑦ ᐃᓗᐊᓂ ᐅᑯᐊ ᓄᓇᕗᑦ ᐊᖏᕈᑎᖏᓐᓂ ᐃᓛᒃᑰᖅᑐᐊᓂ 23 (ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᒃᓴᖏᓐᓄᑦ) ᐃᓚᒋᓪᓗᒋᑦ ᓇᓪᓕᐊᑐᐃᓐᓇᖅ ᓇᖕᒥᓂᕐᓱᕐᓂᕐᒧᑦ ᐊᖏᕈᑏᑦ. ᑭᓯᐊᓂ, ᓯᕗᓂᐊᓂ ᒐᕙᒪᐅᓚᐅᖅᑐᑦ ᐊᑐᓕᓚᐅᖅᓯᒪᔪᑦ ᑎᒍᓯᓗᑎᒃ ᐅᕝᕙᓘᓐᓃᑦ ᑲᓴᖏᓪᓗᒋᑦ ᐱᒋᐊᖅᑕᐅᔪᓄᑦ ᐊᒃᑐᐊᔪᑦ ᐋᔩᖃᑎᒌᓂᕐᒧᑦ ᐊᒻᒪᓗ ᓴᖅᑯᓯᔪᖅ ᐱᔪᒪᓂᖃᖏᓐᓂᕐᒥᑦ ᐃᓱᒪᒋᓗᒋᑦ ᓴᖅᑭᑦᑎᓂᕐᒥᑦ ᐱᒋᐊᖅᓯᓂᒃᑯᑦ ᑕᒪᒃᑯᓄᖓ ᐱᔾᔪᑎᐅᔪᓄᑦ ᓲᕐᓗ ᒪᑯᐊ ᐳᐃᔨᓕᕆᓂᕐᒧᑦ ᓄᓇᐃᐃᑦ ᐊᒻᒪᓗ ᑮᓇᐅᔭᓂᒃ ᐊᒥᖅᑲᕈᑎᖃᕐᓂᕐᒥᑦ.

“ᓂᕆᐅᑦᑎᐊᖅᑐᖓ ᐋᔩᖃᑎᒌᒃᓂᐅᓂᐊᖅᑐᓄᑦ ᐅᖓᑖᓄᑦ ᓂᕆᐅᒋᔭᑦᑕ ᐱᓂᐊᓂᕐᓂᕐᒥᑦ ᐅᑯᐊ ᓄᓇᕗᑦ ᓇᖕᒥᓂᖅᓱᕐᓂᕐᒧᑦ ᐊᖏᕈᑎᖏᑦ ᓲᕐᓗ ᑕᕐᕋᖃᕐᓂᐊᕐᒪᑕ ᐃᔾᔪᐊᒐᒃᓴᐅᓗᑎᒃ ᐃᓕᖓᓂᐊ ᔫᑳᓐᒥ ᐅᕝᕙᓘᓐᓃᑦ ᓄᓇᑦᑎᐊᕐᒥᑦ. ᐱᑕᖃᕆᐊᖃᖅᑐᒍᑦ ᓄᓇᕗᒥ ᑭᐅᔾᔪᑎᓂᒃ ᓴᖅᑭᓐᓂᐊᖅᑐᓂᒃ ᓄᓇᕗᒧᑦ ᐱᔾᔪᑎᐅᔪᓄᑦ,” ᐅᖃᖅᑐᖅ ᑕᐅᑐᖏ.

ᓄᓇᕗᑦ ᑐᓐᖓᕕᒃ ᑎᒥᖓᑦ ᐱᓕᕆᓯᒪᔪᑦ ᐃᓚᒋᓪᓗᒋᑦ ᓄᑖᖅ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐋᔩᖃᑎᖃᖃᑦᑕᓚᖓᔪᒥᑦ ᐊᓯᖏᓐᓂᒃ ᐱᔪᓂᒃ, ᐃᓚᒋᓪᓗᒋᑦ ᓯᓚᑖᓂ ᐃᖅᑲᖅᑐᐃᕕᖕᒥᖅ ᐊᖅᑭᒃᓯᖃᑎᒌᒃᓂᕐᒧᑦ ᐊᑐᓕᖅᑎᑦᑎᕙᓪᓕᐊᓂᕐᒧᑦ ᐃᓕᓯᓂᐅᓚᐅᖅᑐᑦ ᒪᐃ 2015-ᒥ. ᑕᐅᑐᖏ ᐊᖅᑭᒃᑐᒃᑯᑦ ᓇᓗᓇᐃᖅᓯᔪᖅ ᐅᓇ ᐅᓪᓗᕆᐊᖅ ᕼᐋᓐᓴᓐ ᑲᔪᓯᓂᐊᕐᓂᐊᓂᒃ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ ᐊᐃᕙᔨᐅᓗᓂ ᐋᔩᑲᑎᒌᒃᑐᓕᕆᓂᕐᒧᑦ ᑕᒪᑦᓱᒧᖓ ᓇᖕᒥᓂᖅᓱᕐᓂᕐᒧᑦ ᐊᒃᑐᐊᔪᓄᑦ.
-30-

ᑐᑭᓯᒃᑲᓐᓂᕈᒪᒍᕕᑦ ᐅᖃᕐᕕᒋᒍᒃ:

ᑭᐅᕆ ᒪᑲᓪᔅᑭ
ᑐᑭᒧᐊᒃᑎᑦᑎᔨ ᑐᓴᐅᒪᖃᑕᐅᑎᓕᕆᔨᒃᑯᓐᓄᑦ
ᓄᓇᕗᑦ ᑐᓐᖓᕕᒃ ᑎᒥᖓᑦ
ᐅᖃᓘᑎᐊ: (867) 975-4914 ᐊᑭᖃᖏᑦᑐᖅ 1-888-646-0006
ᑎᒍᒥᐊᒐᖓ: (867) 222-2893

www.tunngavik.com

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: