ᑐᓴᕋᑦᓴᓕᕆᔩᑦ

ᓄᓇᕗᑦ ᑐᓐᖓᕕᒃᑯᑦ ᐊᕐᕋᒍᑕᒫᖅ ᑲᑎᒪᕐᔪᐊᕐᓂᖓᑦ ᒪᑐᕗᖅ

(ᓄᕕᐱᕆ 23, 2009 –ᐃᖃᓗᐃᑦ, ᓄᓇᕗᑦ) ᐃᓚᒋᔭᐅᔪᑦ ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᓄᑦ ᐊᕐᕋᒍᑕᒫᖅ ᑲᑎᒪᕐᔪᐊᕐᓂᕐᒧᑦ ᑲᑎᒪᓂᕐᒥᒃ ᐃᓱᓕᑦᑎᓚᐅᖅᐳᑦ ᐃᖃᓗᖕᓂ ᐱᓇᓱᐊᕈᓯᐅᓚᐅᖅᑐᒥᒃ. ᓯᕗᓪᓕᖅᐹᕆᔭᐅᓚᐅᖅᑐᖅ ᐃᓚᒋᔭᐅᔪᑦ ᑕᒪᕐᒥᒃ ᑲᑎᒪᖃᑎᒌᖕᓂᖏᑦ ᑕᐃᒪᓐᖓᑦ ᐊᖏᖃᑎᒌᓚᐅᖅᓱᑎᒃ ᐊᒥᓱᔪᓐᓃᖅᑎᑎᕚᓪᓕᐊᕈᒪᓂᕐᒥᓂᒃ ᐃᓚᒋᔭᐅᔪᓂᒃ ᓇᑉᐸᓪᓗᐊᓄᑦ, ᑭᖑᓪᓕᕐᒥ ᐊᕐᕋᒍᒥ ᑲᑎᒪᓂᕆᓚᐅᖅᑕᖓᓐᓂ ᐃᓱᒪᓕᐊᕆᓚᐅᖅᑕᖓᓐᓂᒃ. ᑐᓐᖓᕕᒃᑯᑦ ᐊᖓᔪᖃᖓᑦ ᐸᓪ ᖃᓗᔾᔭᖅ ᐅᖃᓚᐅᖅᑐᖅ ᓄᑕᖅ ᐊᕐᕋᒍᑕᒫᖅᓯᐅᕐᓂᖓᓐᓂ ᐋᕿᐅᒪᓂᖏᑦ ᑲᑎᒪᑦᑎᐊᕐᓇᕐᓂᖅᓴᐅᓕᖅᑐᑦ.

“ᖁᕕᐊᓇᖅᑐᖅ ᐅᖃᕈᓐᓇᕐᓂᖅ ᐱᔭᕇᖅᓯᒪᒐᑦᑕ ᐱᓕᕆᐊᒃᓴᓂᒃ ᐊᔾᔨᑐᐃᓐᓇᖏᓐᓂᒃ, ᑕᒪᕐᒥᒡᓗ ᑐᖃᒐᕆᔭᕗᑦ ᐊᖑᒪᓪᓗᒋᑦ, ᐊᒥᓲᖏᓐᓂᖅᓴᐅᓪᓗᑎᒃ ᐃᓚᐅᔪᑦ, ᐊᒻᒪᓗ ᕿᒻᓚᒻᒥᐅᓂᖅᓴᒃᑯᑦ ᐱᔭᕇᖅᑕᐅᓪᓗᑎᒃ,” ᐅᖃᖃᐅᔪᖅ ᖃᓗᔾᔭᖅ, ᐅᔾᔨᕈᓱᒃᓱᓂ ᑲᑎᒪᓂᖓᑦ ᐱᔭᕆᖅᓵᓕᓂᖅᓴᐅᓚᐅᕐᓂᖓᓂᒃ ᐅᓪᓗᓂᒃ ᓇᑉᐸᓪᓕᐊᒥᒃ ᓯᕗᓂᐅᓂᖅᓴᖅ. “ᐅᓗᕆᐊᓇᖅᑐᒦᑎᑦᑎᖏᑦᑎᐊᖅᑐᒍᑦ ᐃᓄᖁᑎᑦᑎᓐᓂᒃ ᐊᒥᓲᖏᓐᓂᖅᓴᐅᓕᖅᑎᓪᓗᒋᑦ ᐃᓄᐃᑦ ᓵᒥᖃᑕᐅᔪᑦ. ᑕᒪᓐᓇ ᐋᕿᐅᒪᑦᑎᐊᕐᓂᖅᓴᐅᓂᖅ ᑭᒡᒐᖅᑐᐃᑦᑎᐊᕐᓇᕐᓂᖅᓴᐅᓕᖅᑐᖅ ᐊᒻᒪᓗ ᐅᖃᐅᓯᐅᓂᖏᓐᓄᑦ ᐱᔭᕆᐊᖃᕐᓂᖏᑦ ᐃᓄᐃᑦ, ᐱᔾᔪᑕᐅᓂᖏᓐᓄᑦ ᐱᕕᒃᓴᖃᑦᑎᐊᕐᓂᖅᓴᐅᓕᕐᓂᖅᐳᑦ ᐃᓱᒪᒃᓴᖅᓯᐅᕈᑎᖃᑦᑎᐊᕈᓐᓇᕐᓂᖅ ᐃᓱᒪᓘᑕᐅᔪᓂᒃ ᓴᕿᑕᐅᓯᒪᔪᓂᒃ ᐊᕕᒃᑐᖅᓯᒪᔪᓂᖓᖅᑐᓂᒃ ᑲᑎᒪᔭᖅᑐᓯᒪᔪᓂᒃ.”

ᑐᓐᖓᕕᒃᑯᑦ ᑲᔪᓰᓐᓇᕐᓂᐊᖅᑐᑦ ᖃᐅᔨᓴᕐᓂᕐᒥᒃ ᖃᓄᖅ ᐋᕿᒋᐊᑦᑎᐊᒃᑲᓐᓂᕈᓐᓇᕐᒪᖔᑕ ᐊᐅᓚᑕᐅᔪᑦ ᑲᑐᔾᔨᖃᑎᒌᖏᓐᓄᑦ ᐃᓄᐃᓪᓗ ᑲᑐᔾᔨᖃᑎᒌᖏᓐᓄᑦ ᐊᕕᒃᑐᖅᓯᒪᔪᓂ, ᖃᐅᔨᓴᕐᓂᖏᓐᓂ ᖃᓂᓐᓂᖅᓴᐅᓕᕐᓂᖅ ᐃᓄᖕᓄᑦ, ᑎᓕᔭᐅᓯᒪᔪᓂᒃ ᐱᒋᐊᓕᓵᓚᐅᖅᑐᒥ ᑕᒡᕙᓂ ᐊᕐᕋᒍᒥ. ᖃᐅᔨᓴᖁᔭᐅᓯᒪᔪᓂᒃ ᑐᑭᓯᓂᐊᕈᑕᐅᕗᑦ ᖃᓄᖅ ᐊᔾᔨᒌᒃᑐᐃᓐᓇᕐᓂᖅ ᐱᓕᕆᖏᓐᓂᖅᓴᐅᔪᓐᓇᕐᒪᖔᑕ, ᐊᒻᒪᓗ ᑐᑭᓕᐅᖅᑕᐅᑦᑎᐊᒃᑲᓐᓂᕐᓗᑎᒃ ᖃᓄᐃᓕᐅᖅᑎᐅᓂᖏᑦ ᑐᓐᖓᕕᒃᑯᑦ ᐊᕕᒃᑐᖅᓯᒪᔪᓂᓗ ᐃᓄᐃᑦ ᑲᑐᔾᔨᖃᑎᒌᖏᑦ.

ᐅᓂᒃᑳᓕᐊᖑᓯᒪᔪᑦ, ᐊᕐᓇᓂᒃ, ᐃᓐᓇᑐᖃᕐᓂᒃ, ᒪᒃᑯᒃᑐᓂᒡᓗ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᖁᕕᐊᒋᔭᐅᑦᑎᐊᓚᐅᕐᒥᔪᑦ. ᐃᓚᒋᔭᐅᔪᑦ ᑲᔪᓯᑎᑦᑎᓚᐅᖅᑐᑦ ᐱᖁᔨᕗᖔᕈᒻᒥᒃ ᐱᔾᔪᑎᖃᖅᑐᓂᒃ ᐃᓅᓯᓕᕆᓂᒃᑯᑦ ᐃᓱᒪᓘᑕᐅᔪᑦ ᐱᒻᒪᕆᐅᓂᖅᓴᐅᑎᑕᐅᖁᓪᓗᒋᑦ.

“ᑭᒡᒐᖅᑐᐃᔨᐅᔪᑦ ᓇᒃᓴᖃᑦᑕᕐᒪᑕ ᓄᓇᓕᖕᓂᒃ ᐃᓱᒫᓗᑕᐅᔪᓂᒃ ᓵᖓᔭᐅᓪᓚᕆᖕᓂᐊᖅᑐᓂᒃ ᑲᑎᒪᓂᑦᑎᓐᓂ. ᐅᔾᔨᖅᑐᑦᑎᐊᕆᐊᖃᖅᑐᒍᑦ ᐃᑲᔪᖅᓱᖅᑕᐅᓂᖏᓐᓂᒃ ᐱᔭᕆᐊᖃᕐᓂᖏᓐᓂᒃ ᑲᔪᓯᓗᑎᒃ, ᐊᒻᒪᓗ ᖃᓄᖅᑐᕈᑦᑎᐊᕆᐊᖃᖅᓱᑕ ᖃᓄᐃᓕᐅᕈᑕᐅᔭᕆᐊᖃᖅᑐᓂᒃ ᐱᒻᒪᕆᐊᓘᔪᓂᒃ ᐃᓅᓯᕐᒥ ᐃᓅᓯᓕᐅᕈᑎᒃᓴᓄᓪᓗ ᐃᓱᒪᓘᑕᐅᔪᓂᒃ ᐅᖃᐅᓯᕆᕙᓪᓕᐊᖃᑦᑕᖅᑕᖏᓐᓂᒃ,” ᐅᖃᖃᐅᔪᖅ ᖃᓗᔾᔭᖅ.
ᑲᑎᒪᕐᔪᐊᕐᓂᕐᒥ ᐃᓚᐅᔪᑦ ᓇᓚᓚᐅᕐᒥᔪᑦ ᐅᓂᒃᑳᓕᐊᕆᔭᐅᔪᓂᒃ ᐊᒥᓱᓂᒃ ᐊᔾᔨᒌᖏᑦᑐᓂᒃ ᑎᒥᖁᑎᒋᔭᐅᔪᓂᒃ, ᐃᓚᒋᔭᐅᓪᓗ ᓄᓇᕗᑦ ᓯᕗᓪᓕᐅᖅᑎᖓᑦ ᐄᕙ ᐋᕆᐊᖅ. ᖃᓗᔾᔭᖅ ᐅᖃᖃᐅᔪᖅ ᐱᒻᒪᕆᐊᓗᓂᖏᓐᓂᒃ ᓄᓇᕗᒻᒥ ᑲᓇᑕᒥᓗ ᒐᕙᒪᐃᑦ ᐱᓕᕆᑦᑎᐊᕆᐊᖃᕐᓂᖏᓐᓂᒃ ᐱᓕᕆᓂᐊᕐᓂᕋᖅᓯᒪᔭᒥᓂᒃ, ᑭᒡᒐᖅᑐᐃᔨᐅᓂᖏᓐᓂᒃ ᐃᓄᖕᓂᒃ.

ᐱᓕᕆᖃᑎᒌᖏᓐᓇᕆᐊᖃᖅᑐᒍᑦ ᐃᓚᒋᓗᒋᑦ ᓄᓇᕗᑦ ᒐᕙᒪᒃᑯᑦ, ᑲᓇᑕᐅᓪᓗ ᒐᕙᒪᒃᑯᖏᑦ ᖃᓄᐃᓕᐅᕆᐊᖃᕐᓂᕐᒧᑦ ᐊᒥᓱᓂᒃ ᓂᕆᐅᒋᔭᐅᔪᓂᒃ ᓄᓇᕗᒻᒥᐅᓄᑦ, ᐃᖃᐅᒪᑎᑕᐅᓗᑎᒃ ᒐᕙᒪᒃᑯᑦ ᐃᖕᒥᓂᓐᓇᖅ ᐱᓕᕆᔪᓐᓇᖏᓐᓂᒃ ᐃᓚᖃᖏᓪᓗᑎᒃ ᐃᓄᖕᓂᒃ,” ᐅᖃᖃᐅᔪᖅ ᖃᓗᔾᔭᖅ.

ᐃᓚᒋᔭᐅᔪᑦᑕᐅᖅ ᓈᒻᒪᒃᓴᓚᐅᖅᑐᑦ ᑮᓇᐅᔭᓂᒃ ᐊᑐᖅᑐᒃᓴᓂᒃ 2010/11−ᒧᑦ ᑮᓇᐅᔭᓕᕆᓂᕐᒧᑦ ᐊᕐᕋᒍᒧᑦ. ᑕᐃᑯᐊ $41ᒥᓕᔭᓐᓂᖑᔪᑦ ᑮᓇᐅᔭᓂᒃ ᑐᓂᓯᔾᔪᑕᐅᕗᑦ ᑐᓐᖓᕕᒃᑯᓐᓄᑦ, ᐃᓄᐃᑦ ᑲᑐᔾᔨᖃᑎᒌᖏᓐᓄᑦ, ᐃᓄᐃᑦ ᐱᕕᓂᑐᖃᖏᓐᓂᒃ ᐸᐸᑦᑎᔨᒃᑯᖏᓐᓄᓪᓗ ᐱᓕᕆᐊᒃᓴᓄᑦ ᐊᑐᕐᓂᐊᖅᑐᓄᑦ 2010/11−ᒥ.

ᑐᓐᖓᕕᒃᑯᑦ ᐊᐅᓚᑦᑎᔾᔪᑎᒃᓴᓄᑦ
ᑮᓇᐅᔭᓕᕆᓂᕐᒧᑦ ᐊᕐᕋᒍᒥᒃ 2010-2011 $ 20,771,447

ᕿᑎᖅᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ $ 4,479,276

ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖏᑦ $ 3,926,106

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ $ 5,086,476

ᐱᓄᐃᑦ ᐱᖁᑎᑐᖃᕐᒥᓂᒃ ᐸᐸ ᑎᔨᒃᑯᑦ $ 1,071,547

ᓄᓇᑕᖃᑕᐅᓯᒪᔪᑦ ᐃᑲᔫᓯᐊᓴᖏᓐᓄᑦ ᐸᕐᓇᐅᑎᑦ $ 900,000

ᓄᓇᓕᖕᓂ ᑐᓐᖓᕕᒃᑯᑦ ᐃᑲᔪᖅᑎᖏᑦ − ᕿᕿᖅᑕᓂ $ 1,390,461
– ᑭᕙᓪᓕᕐᒥ $ 707,430
– ᕿᑎᖅᒥᐅᓂ $ 456,335

ᖄᖓᒍᑦ ᑐᒃᓯᕋᖅᑕᐅᓯᒪᔪᑦ ᐊᑐᒃᑲᓐᓂᒐᒃᓴᐃᑦ $ 2,579,572
____________________________________________________________________
ᑲᑎᓪᓗᒋᑦ ᑮᓇᐅᔭᐃᑦ ᑐᒃᓯᕋᖅᑕᐅᓯᒪᔪᑦ ᓄᓇᕗᑦ ᐸᐸᑦᑎᔨᒃᑯᖏᓐᓂᒃ $ 41,368,649

ᐊᕐᕋᒍᑕᒫᖅ ᑲᑎᒪᓂᕐᒧᑦ ᐃᓚᒋᔭᐅᔪᑦ ᐊᖏᕈᑎᖃᓚᐅᖅᑐᑦ ᖃᐅᔨᓴᖅᑕᐅᓯᒪᔪᓂᒃ ᑮᓇᐅᔭᐃᑦ ᐊᐅᓪᓚᓂᖏᓐᓂᒃ ᐅᓂᒃᑳᓕᐊᕕᕐᓂᒃ ᓯᕗᓂᐊᓄᑦ ᑮᓇᐅᔭᓕᕆᓂᕐᒧᑦ ᐊᕐᕋᒎᓚᐅᖅᑐᒧᑦ, ᐊᑐᐃᓐᓇᐅᓪᓗᑎᒃ 2009−ᒥ ᑐᓐᖓᕕᒃᑯᑦ ᐊᕐᕋᒍᑕᒫᖅ ᐅᓂᒃᑳᓕᐊᖏᓐᓂᒃ ᐅᕙᓐᖓᑦ www.tunngavik.com.

ᑐᑭᓯᒋᐊᒃᑲᓐᓂᕈᒪᔪᑦ: