ᓴᖅᑭᖅᑕᐅᑦᓴᐅᑎᒋᒋᐊᓕᒃ
(ᕕᕝᕗᐊᓕ 28, 2025 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᖁᕕᐊᓱᑉᐳᑦ ᑐᓴᖅᑎᑦᓯᒋᐊᑦᓴᖅ ᐱᐊᓂᒃᑕᐅᓂᖏᓐᓂᒃ ᓄᓇᕗᒻᒥ ᐃᖃᓗᓕᕆᓂᕐᒧᑦ ᐱᔾᔪᑕᐅᔪᒧᑦ ᑎᑎᕋᖅᓯᒪᔪᓂᒃ, ᐊᑐᐊᒐᕐᓄᑦ ᐊᐅᓚᑦᓯᔾᔪᑎᓄᓪᓗ ᐱᓇᓱᐊᖅᑕᐅᔪᒪᔪᓂᒃ ᓯᕗᓂᑦᑎᓐᓂ ᓄᓇᕗᒻᒥ ᐃᖃᓗᓕᕆᓂᕐᒧᑦ ᐊᐅᓚᑦᓯᔾᔪᑎᓂᒃ (NFR).
ᐊᑐᐊᒐᑦ ᐱᔾᔪᑕᐅᔪᒧᑦ ᑎᑎᕋᖃᑎᒌᓚᐅᖅᑐᑦ NFR ᐱᔭᕆᐊᑭᓪᓕᑎᕆᔩᑦ, ᑖᒃᑯᓇᙶᖅᑐᓂᒃ ᐃᓚᐅᔪᓂᒃ DFO, NTI, ᓄᓇᕗᑦ ᒐᕙᒪᑦ, ᒪᑭᕕᒃ, ᐊᒻᒪᓗ ᐃᖅᑭᓖᑦ ᒐᕙᒪᖏᓐᓂᒃ, ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐊᒻᒪᓗ ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᒪᔨᖏᑦ ᑐᓵᔭᖅᑐᖅᓯᒪᑎᓪᓗᒋᑦ ᑎᑎᕋᖅᑕᐅᕙᓪᓕᐊᑎᓪᓗᒋᑦ.
“ᑐᙵᕕᒃᑯᑦ ᖁᕕᐊᓱᑦᑐᑦ ᑖᓐᓇ ᑲᔪᓯᔭᕆᐅᖅᑐᖅ ᐱᕙᓪᓕᐊᑎᑦᓯᓂᖅ ᐱᑕᖃᕆᐊᓕᖕᒪᕆᒻᒥᒃ ᓄᓇᕗᒻᒥ ᐃᖃᓗᓕᕆᓂᕐᒧᑦ ᐊᐅᓚᑦᓯᔾᔪᑎᓂᒃ,” ᐅᖃᓚᐅᖅᑐᖅ ᑐᙵᕕᒃᑯᑦ ᐊᖓᔪᖅᑳᖓ, ᔩᕆᒥ ᑑᕐᖔᓗᒃ. “ᐃᓄᐃᑦ ᓄᓇᓖᑦ ᓱᖏᖅᓲᑎᖃᖃᑦᑕᕐᒪᑕ ᐃᖃᓗᖕᓂᒃ ᐊᒻᒪᓗ ᑕᕆᐅᕐᒥᐅᑕᓂᒃ ᐆᒪᔪᓂᒃ ᐃᓕᖅᑯᓯᒃᑯᑦ, ᐃᓅᓯᒃᑯᑦ ᐱᕙᓪᓕᐊᔪᓕᕆᓂᒃᑯᑦ ᖃᓄᐃᙱᑦᓯᐊᕈᑎᒃᓴᓂᒃ. ᓴᖅᑮᓂᖅ ᐃᖃᓗᓕᕆᓂᕐᒧᑦ ᐊᐅᓚᑦᓯᔾᔪᑎᓂᒃ ᐋᖅᑭᑦᓯᒪᓂᖓᓂᒃ ᐃᑉᐱᒋᔭᓕᖕᓂᒃ ᐃᓄᐃᑦ ᐱᖕᒪᕆᐅᔪᖁᑎᖏᓐᓂᒃ ᐊᒻᒪᓗ ᓴᕐᖓᑎᑦᓯᒋᐊᕐᓂᕐᒥᒃ ᓄᓇᓕᖕᓂᒃ ᑎᒍᓯᓂᒃ ᓯᕗᓕᕐᓂᕐᒥᒃ ᐃᓱᒪᓕᐅᕈᑕᐅᒋᐊᓕᖕᓄᑦ ᐱᑕᖃᕆᐊᓕᖕᒪᕆᒃ ᓯᕗᒧᐊᖁᓪᓗᒋᑦ ᐃᖃᓗᓕᕆᓂᕐᒧᑦ ᑐᑭᓯᒪᖃᑎᒌᓐᓂᕐᒥᒃ ᐊᒻᒪᓗ ᐃᑲᔫᑎᒥᒃ ᐃᓄᐃᑦ ᓂᕿᖃᑦᓯᐊᕈᑎᒃᓴᖏᓐᓂᒃ ᐊᒻᒪᓗ ᐃᓐᓃᓯᒪᒍᑎᒃᓴᖏᓐᓂᒃ.”
ᑭᒃᑯᑐᐃᓐᓇᕐᓂᒃ ᐃᓚᐅᑎᑦᓯᓂᖅ ᐊᑐᐊᒐᕐᓂᒃ ᐱᔾᔪᑕᐅᔪᓂᒃ ᐸᐃᑉᐹᖅ ᐱᒋᐊᓚᐅᖅᑐᖅ ᐱᒋᐊᓕᓵᖅᑎᓪᓗᒍ 2025, ᐱᕕᒃᓴᖃᖅᑎᑦᓯᓪᓗᑎᒃ ᐊᒃᑐᖅᑕᐅᓯᒪᔪᑦ ᐱᔪᓐᓇᐅᑎᓂᒃ−ᑎᒍᒥᐊᖅᑏᑦ ᐊᒻᒪᓗ ᐱᓇᓱᐊᖃᑕᐅᔪᑦ ᐅᖃᐅᓯᖃᕐᕕᖃᖁᓪᓗᒋᑦ ᐊᑐᐊᒐᓕᐊᖑᒍᒪᔪᓂᒃ ᐊᒻᒪᓗ ᐊᐅᓚᑦᓯᔾᔪᑎᓂᒃ ᑐᑦᓯᕋᐅᑎᒥᒃ. ᐱᐊᓂᒃᑕᐅᑉᐸᑦ, ᐱᔭᕆᐊᑭᓪᓕᑎᕆᔩᑦ ᐱᒋᐊᕐᓂᐊᖅᑕᖓ ᑎᑎᕋᕆᐊᙵᐅᑎᓕᐅᕐᓂᖅ ᓄᑖᒥᒃ ᐊᐅᓚᑦᓯᔾᔪᑎᓂᒃ, ᓴᖅᑭᖅᑕᐅᓕᕐᓗᓂ ᑎᑎᕋᕆᐊᙵᐅᑎ ᑲᓇᑕᒥ ᑎᑎᕋᖅᓯᒪᔪᓄᑦ ᑐᓴᕋᑦᓴᓄᑦ I. ᓂᓪᓕᕐᕕᐅᑲᓐᓂᕈᓐᓇᓂᐊᖅᑐᑦ ᓄᐊᑕᐅᓗᑎᒃ ᑭᒃᑯᑐᐃᓐᓇᕐᓂᒃ ᐊᐅᓚᑦᓯᔾᔪᑏᑦ ᐱᐊᓂᖏᓐᓂᖏᓐᓂ, ᓴᖅᑭᖅᑕᐅᓂᐊᖅᑐᓂᒃ ᑲᓇᑕᒥ ᑐᓴᕈᑏᑦ II ᐊᒻᒪᓗ ᑲᔪᓯᓕᕐᓗᑎᒃ.
-30-
ᑐᓴᕆᐊᒃᑲᓂᕐᕕᒃᓴᖅ:
ᐃᕙᓗᐊᕐᔪᒃ ᒦᕆᑦ
ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᔨᒃᑯᓐᓂ
ᓄᓇᕗᑦ ᑐᙵᕕᒃ ᑎᒥᖓ
