(ᕕᕗᐊᕆ 20, 2019 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑮᓇᐅᔭᓕᕆᓂᕐᒧᑦ ᒥᓂᔅᑕᖓᑦ ᐅᓂᒃᑳᖃᐅᖕᒪᑦ ᑮᓇᐅᔭᖃᕈᑎᒃᓴᓂᒃ ᐊᔾᔨᐸᓗᑐᐃᓐᓇᕆᓪᓗᓂᔾᔪᒃ ᐅᑭᐅᓂ ᖄᖏᑦᑐᓂ, ᓇᓗᓇᕈᓐᓃᕈᑕᐅᖕᒥᔪᖅ ᑲᓇᑕᐅᑉ ᒐᕙᒪᒃᑯᖏᑦ ᐊᒥᒐᓗᐊᕐᑐᓂᒃ ᑮᓇᐅᔭᖃᖅᑎᑦᑎᓂᕆᔭᖏᑦ ᓄᓇᕗᖕᒥ.
ᔮᔾᔨ ᕼᐃᒃᔅ ᐅᓂᒃᑳᖅᑲᐅᔪᑦ ᓄᓇᕗᖕᒥ ᑭᓇᐅᔭᓕᐅᕈᑎᒃᓴᑲᓐᓃᑦ ᐊᖏᓪᓕᕚᓪᓕᕐᓯᒪᑎᓪᓗᒋᑦ ᖃᓂᒋᔮᓂ 5% ᐊᕐᕌᒍᑕᒫᑦ 1999-ᒥᓂᑦ ᐊᒻᒪᓗ ᐱᕚᓪᓕᕐᓯᒪᑎᓪᓗᒋᑦ ᑮᓇᐅᔭᓕᐅᒃᑲᓐᓂᕈᑕᐅᔪᓐᓇᕐᑐᑦ ᓂᕆᐅᒋᔭᐅᕗᖅ ᐊᖏᓪᓕᕙᓪᓕᐊᖏᓐᓇᕐᓂᐊᕆᐊᖓᓂᑦ 2026 ᑎᑭᓪᓗᒍ.
ᓄᓇᕘᑉ ᑮᓇᐅᔭᓕᐅᒃᑲᓐᓂᕈᑕᐅᔪᓐᓇᕐᑐᓂᒃ ᐊᖏᓪᓕᕙᓪᓕᐊᓯᒪᑎᓪᓗᒋᑦ ᑕᑯᐃᓐᓇᐸᑉᐳᒍᑦ ᓈᓴᐃᒍᑕᐅᓯᒪᔪᓂᒃ ᓇᓗᓇᕈᓐᓃᕐᓯᒪᕗᑦ ᓄᓇᕗᖕᒥᐅᑦ ᐃᓄᐃᑦ ᐋᓐᓂᐊᖃᓕᕐᐸᓪᓕᐊᓯᒪᓂᖏᓐᓂᒃ. ᐅᓄᕐᓯᕚᓪᓕᕐᓯᒪᓪᓗᑎᒃ ᐃᓄᓕᕆᔨᒃᑯᓐᓂᑦ ᐃᑲᔪᕐᑕᐅᔪᑦ ᓄᓇᓕᖕᓂ ᒐᕙᒪᒃᑯᓐᓄᑦ ᓴᓇᕕᑕᖃᙱᑦᑐᓂ ᐸᕐᓇᒍᑎᓕᕐᓯᒪᒍᑕᐅᒐᑎᓪᓗ ᖃᓄᖅ ᓯᐊᒻᒪᕐᑕᐅᒐᔭᕐᒪᖔᑕ ᑮᓇᐅᔭᓕᕐᕕᒃᓴᑦ ᓄᓇᕘᓕᒫᕐᒥ.
ᑕᐃᒪᙵᓂᒃ 1999-ᒥᓂᑦ ᖃᓂᒋᔮᓃᒃᑐᑦ 190 ᐃᒡᓗᑦ ᓴᓇᔭᐅᓯᒪᕗᑦ ᐊᕐᕌᒍᑕᒫᑦ. ᓇᓴᐃᒍᑕᐅᓯᒪᔪᑎᒍᑦ ᓇᓗᓇᕈᓐᓃᕐᓯᒪᕗᖅ 250−ᓂᒃ ᐃᒡᓗᓕᐅᖃᑦᑕᕆᐊᖃᓐᓂᖏᓐᓂᒃ ᐊᕐᕌᒍᑕᒫᑦ ᐊᖏᕐᕋᖃᙱᑦᑐᖅᑕᖃᕈᓐᓃᖁᓪᓗᒍ ᐊᒻᒪᓗ ᐃᓄᒋᐊᓗᐊᖃᑦᑕᑎᓪᓗᒋᑦ ᐃᒡᓗᒥᐅᖃᑎᒌᑦ ᓄᓇᕗᖕᒥ. ᒥᓂᔅᑕ ᐅᓂᒃᑳᖃᐅᔪᖅ 100-ᓂᒃ ᑭᓇᒃᑯᑐᐃᓐᓇᕐᓄᑦ ᐃᒡᓗᒋᔭᐅᔪᓐᓇᕐᑐᓂᒃ ᓴᓇᔭᐅᔪᖃᓛᕐᒪᑦ ᓇᓗᓇᐃᔭᕋᓂ ᓱᖕᒪᑦ ᖃᑦᑎᓐᓇᐅᓂᕐᓴᓂᒃ ᐃᒡᓗᓕᐅᖅᑐᖃᖅᐸᒻᒪᖔᑦ.
“ᐃᓛᒃ ᖁᕕᐊᓇᑦᑎᐊᕐᑑᒐᓗᐊᖅ ᑕᑯᓪᓗᓂ ᑮᓇᐅᔭᒃᑲᓂᕐᓂᒃ ᓄᓇᒥ ᐊᐅᓪᓛᕐᓯᒪᓗᑎᒃ ᒪᒥᓴᐃᒍᑎᒃᓴᓂᒃ ᐅᐃᕆᓯᒪᔾᔪᑎᓕᓐᓄᑦ ᐊᒻᒪ ᐊᒃᓱᕈᓗᐊᖅᓯᒪᔪᓄᑦ, ᓇᓗᓇᖅᑑᔮᕈᓐᓂᕐᒪᑦ ᓄᓇᕗᑦ ᒐᕙᒪᒃᑯᖏᑕ ᑮᓇᔭᕐᑐᕈᑎᒃᓴᖏᑦ ᐊᑐᓗᐊᕐᑕᐃᓕᒪᓂᕐᒥᒃ ᐃᒃᐱᒋᔭᖃᓐᓂᕐᓴᐅᔫᔭᕐᒪᑕ ᐃᓄᐃᑦ ᐱᔭᕆᐊᖃᖅᑕᖏᑦ ᐱᔭᐅᙱᖔᖅᑐᑎᒃ ᐅᑯᓇᓂ ᐃᓕᓐᓂᐊᕐᓂᓕᕆᓂᖅ, ᐱᓕᒻᒪᒃᓴᐃᓂᖅ, ᐋᓐᓂᐊᖃᓐᓇᖏᑦᑐᓕᕆᓂᖅ ᐊᒻᒪᓗ ᐃᒡᓗᓕᕆᓂᕐᒥᒃ. ᑕᑯᔭᕆᐊᖃᕋᑦᑕ ᑲᒪᔾᔪᓯᓂᒃ ᓵᖅᑭᓗᑎᒃ ᐃᓄᖕᓂᒃ ᐃᑲᔪᕐᓯᓂᖃᖅᑐᓂᒃ ᐅᕙᙶᕐᑐᓂᒃ ᑮᓇᐅᔭᓕᐅᒃᑲᓐᓂᕈᑎᒃᓴᑦ ᐊᖏᓪᓕᕙᓪᓕᐊᖃᑦᑕᓯᒪᓂᖏᓐᓂᒃ ᓄᓇᕗᖕᒥ ᐊᒻᒪᓗ ᐱᕈᖅᐸᓪᓕᐊᖏᓐᓇᓂᐊᕐᑐᑎᓪᓗ. ᓯᐊᒻᒪᖅᑕᐅᓂᖏᑦ ᑮᓇᐅᔭᓕᐅᕐᕕᒃᓴᑦ ᓄᓇᕗᖕᒥ ᑲᒪᒋᐊᕈᑕᐅᔭᕆᐊᓖᑦ. ᐊᓯᔾᔨᓂᐊᖅᑐᓂᒃ ᓂᕆᐅᒋᔭᖃᕈᓐᓇᔾᔮᙱᓇᑦᑕ ᓄᓇᕗᖕᒥ ᑖᒃᑯᓂᖓᑦᓴᐃᓐᓇᖅ ᑮᓇᐅᔭᕐᑐᕈᑎᒃᓴᓂᒃ ᓴᖅᑭᒃᑐᖃᖃᑦᑕᑎᓪᓗᒍ ᐊᕐᕌᒍᑕᒪᑦ,” ᐅᖃᖅᑐᖅ ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ.
“ᖁᔭᓕᓇᕐᑐᖅ ᓄᓇᕗᖕᒥ ᐊᖏᕈᑎᖃᕋᑦᑕ ᓴᐳᑎᔭᐅᓯᒪᒍᑎᖃᖅᑐᑎᒃ ᐃᓄᐃᑦ ᐱᔪᓐᓇᐅᑎᖏᑦ ᓄᓇᕗᖕᒥ ᐃᒪᓐᓇᐃᓐᓂᖓᓄᑦ ᐅᑭᐅᑦ 25 ᐊᓂᒍᖅᑎᓪᓗᒋᑦ ᓄᓇᕗᑦ ᒐᕙᒪᒃᑯᖏᑕ ᓯᕗᓪᓕᖅᐹᑦ ᑮᓇᐅᔭᕐᑐᕈᑎᒃᓴᖏᑦ ᓇᓗᓇᕈᓐᓃᕐᒪᑦ ᑲᓇᑕᐅᑉ ᒐᕙᒪᒃᑯᖏᑦ ᐃᒪᓐᓇᐃᑦᑕᕆᐊᖃᓐᓂᖏᓐᓂᒃ ᑲᓇᑕᓕᒫᕐᒥ ᐱᕙᓪᓕᐊᓂᖃᕈᑕᐅᔪᓐᓇᕐᑐᓂᒃ ᑮᓇᐅᔭᖃᑦᑎᑦᑎᔭᕆᐊᖃᓕᕐᓂᖏᓐᓂ ᓄᓇᕗᖕᒥ. ᐱᓚᐅᙱᓂᑦᑎᓂᒃ ᑖᒃᑯᓂᖓ ᑮᓇᐅᔭᕆᔭᐅᔭᕆᐊᓕᖕᓂᒃ ᑲᓇᑕᐅᑉ ᒐᕙᒪᒃᑯᖏᑦ ᒥᓂᔅᑕᒥᒃ ᑮᓇᐅᔭᓂᒃ ᐊᑐᓗᐊᖅᑕᐃᓕᒪᑎᑦᑎᖔᕐᒪᑦ ᑮᓇᐅᔭᕐᑐᕈᑎᒃᓴᑎᒍᑦ ᐃᓄᖕᓂᒃ ᖃᓄᐃᙱᑦᑕᕆᐊᓕᖕᓂᖔᖅ ᐃᓱᒪᓇᑎᒃ. ᑕᕝᕙᓂ ᐅᓪᓗᕐᒥ ᑕᒪᑦᑕ ᐸᕐᓇᒍᑎᓕᐅᕆᐊᖃᕋᓗᐊᕐᑎᓪᓗᑕ ᐱᕚᓪᓕᕈᑎᒃᓴᖏᓐᓂᒃ ᓄᓇᕘᑉ, ᑕᐃᒪ ᓇᓗᓇᐃᕆᑐᐃᓐᓇᖔᓕᕆᕗᒍᑦ ᑲᓇᑕᐅᑉ ᒐᕙᒪᑯᖏᑦ ᑮᓇᐅᔭᖃᑦᑎᑎᒃᑲᓐᓂᕆᐊᖃᓐᓂᖏᓐᓂᒃ ᓄᓇᕗᖕᒥ ᐅᕝᕙᓗ ᐱᓇᓇᕐᑐᑦ ᑮᓇᐅᔭᕐᑐᕈᑎᒃᓴᖏᑦ ᐊᑐᓗᐊᕐᑕᓂᐊᕐᒪᑕ ᐊᒥᓱᕈᖅᐸᓪᓕᐊᑎᓪᓗᒋᑦ ᐃᓄᓕᕆᔨᒃᑯᑎᒍᑦ ᐃᑲᔪᖅᑕᐅᔪᑦ ᐊᒻᒪ ᐃᒡᓗᖃᕆᐊᓖᑦ,” ᐅᖃᖅᑐᖅ ᑰᑦᑎᖅ
-30-
ᖃᐅᔨᒋᐊᒃᑲᓐᓂᕈᓐᓇᕐᐳᑎᑦ:
ᐳᕌᓐᑯ ᐳᓴᐃᒥ
ᑐᑭᒧᐊᒃᑎᑦᑎᔨᐅᑲᐃᓐᓇᕐᑐᖅ ᑐᓴᐅᒪᖃᑦᑕᐅᑎᓕᕆᔨᒃᑯᓐᓄᑦ
ᓄᓇᕗᑦ ᑐᙵᕕᒃ ᑎᒥᖓ
