(ᔪᓚᐃ 26, 2017 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑕ (ᑐᓐᖓᕕᒃ) ᐊᖓᔪᖅᑳᖓ ᐊᓗᑭ ᑰᑦᑎᖅ ᑐᓐᖓᓴᐃᖅᑲᐅᔪᖅ ᐃᓱᒪᓕᐅᕈᑕᐅᔪᒥᒃ ᑲᓇᑕᒥ ᐃᖅᑲᖅᑐᐃᔨᕐᔪᐊᑦ ᐃᓱᒪᓕᐅᕈᑎᖓᓂᒃ ᓇᓗᓇᐃᕐᓯᓂᕐᒥᒃ ᐱᔪᓐᓇᐅᑎᖏᓐᓂᒃ ᐃᓄᐃᑦ ᑐᓴᕆᐊᕐᕕᐅᑦᓯᐊᖃᑦᑕᕆᐊᖃᕐᓂᖏᓐᓂᒃ ᐃᓄᐃᑦ ᐱᔪᓐᓇᐅᑎᖏᑦ ᓄᓇᕗᑦ ᐊᖏᕈᑎᖏᑎᒍᑦ ᐊᒃᑐᖅᑕᐅᓂᖃᕐᓂᐅᓴᑐᐊᕐᐸᑕ, ᐊᒻᒪᓗ ᓇᓗᓇᐃᕐᓯᓪᓗᓂ ᖁᕕᐊᒃᑯᔾᔨᓂᕐᒥᓂᒃ ᑲᖏᕐᖢᒑᐱᒃᒥᐅᓂᒃ ᓵᓚᖃᕐᓂᖏᓐᓂᒃ ᓵᓐᖓᑦᓯᒍᑎᒋᓚᐅᖅᑕᒥᓂᒃ 2014 ᑲᓇᑕᒥ ᐊᐅᓚᔪᓐᓇᐅᑎᓕᕆᔨᒃᑯᑦ ᑲᑎᒪᔩᑦ ᐃᓱᒪᓕᐅᕈᑎᒋᓚᐅᖅᑕᖓᓂᒃ ᐊᑭᐅᖅᑎᑦᓯᓂᒃᑯᑦ ᐃᖅᑲᕐᒥᒃ ᖃᐅᔨᓴᕐᓂᐅᓚᖓᓚᐅᖅᑐᒥᒃ ᓴᓐᓂᕈᑎᐅᑉ ᐃᒪᖓᓂ ᐊᒻᒪᓗ ᕿᑭᖅᑖᓗᒃ ᐊᑯᑭᑦᑐᓪᓗ ᐃᑭᖓᓂ.
ᑲᓇᑕᒥ ᐃᖅᑲᖅᑐᐃᔨᕐᔪᐊᑦ ᓈᓚᖕᓂᖃᓚᐅᖅᑐᑦ ᐃᖅᑲᖅᑐᐃᕕᖕᒦᑎᑦᓯᒍᑕᐅᔪᒥᒃ ᓅᕙᐃᒻᕙ 2016−ᒥ ᐊᒻᒪᓗ ᑐᓐᖓᕕᒃᑯᑦ ᐃᓚᒋᔭᐅᓚᐅᖅᑐᑦ ᓈᓚᖕᓂᕐᒥ ᐊᑲᐅᓂᕐᓴᒃᑰᕆᐊᖅᑎᑦᓯᓇᓱᒃᑎᐅᓪᓗᑎᒃ.
“ᑲᓇᑕᒥ ᐃᖅᑲᖅᑐᐃᔨᕐᔪᐊᑦ ᓇᓗᓇᐃᕐᓯᒍᑎᒋᓚᐅᖅᑕᖓ ‘ᑐᓴᕆᐊᕐᕕᖃᕐᓂᕐᒥᒃ ᐱᕕᖃᖅᑎᑦᓯᒋᐊᖃᕐᓂᖏᓪᓗ ᑖᑦᓱᒧᖓ ᓈᖕᒪᓐᖏᓗᐊᓚᐅᕐᒪᑕ ᐊᒻᒪᓗ ᑎᑭᐅᑎᓯᒪᓇᑎᒃ…,’ ᐅᖃᖅᑐᖅ ᑰᑦᑎᖅ, “ᑕᐃᒫᒃ ᑐᓐᖓᕕᒃᑯᑦ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ (ᕿᑭᖅᑕᓂ), ᐃᑲᔪᕐᓱᐃᓪᓗᑎᒃ ᓄᓇᓕᖕᓂᒃ, ᐅᖃᐅᓯᖃᐃᓐᓇᓚᐅᖅᑐᑦ ᐅᖃᖃᑎᒌᓐᓂᑎᓐᓂ ᐊᒻᒪᓗ ᑐᒃᓯᕋᐅᑎᑦᑎᓐᓂᒃ ᑲᓇᑕ ᒐᕙᒪᖓᓄᑦ ᐊᒻᒪᓗ ᑲᓇᑕᒥ ᐊᐅᓚᔪᓐᓇᐅᑎᓕᕆᔨᒃᑯᑦ ᑲᑎᒪᔨᖏᓐᓄᑦ.”
ᑲᓇᑕᒥ ᐃᖅᑲᖅᑐᐃᔨᕐᔪᐊᑦ ᓴᓐᖏᓂᕐᓴᐅᑎᑦᓯᓚᐅᖅᑐᑦ ᑯᐃᓐ ᑭᒡᒐᖅᑐᐃᔨᖏᑦ ᓯᖁᒥᑦᓯᓚᐅᕐᓂᖏᓐᓂᒃ ᐱᓕᕆᐊᒃᓴᒥᓂᒃ ᑐᓴᕆᐊᕐᕕᖃᕆᐊᖃᕐᓂᕐᒧᑦ ᐊᒻᒪᓗ ᓄᖅᑲᑎᑦᓯᓪᓗᑎᒃ ᑲᓇᑕᒥ ᐊᐅᓚᔪᓐᓇᐅᑎᓕᕆᔨᒃᑯᑦ ᑲᑎᒪᔩᑦ ᐃᓱᒪᓕᐅᕈᑎᖓᓂᒃ ᐊᑭᐅᖅᑎᑦᓯᓂᒃᑯᑦ ᐃᖅᑲᕐᒥ ᖃᐅᔨᓴᕈᓐᓇᑎᑦᓯᓚᐅᕐᓂᖓᓂᒃ.
ᑐᓐᖓᕕᒃᑯᑦ ᐊᒻᒪᓗ ᕿᑭᖅᑕᓂᒃᑯᑦ ᐋᖅᑭᑦᓯᒪᓂᕆᓚᐅᖅᑕᖓ ᑐᑭᒧᐊᒍᑎᒃᓴᑦ ᐊᕙᑎᒥᒃ ᖃᐅᔨᓴᕐᓂᕐᒧᑦ (SEA) ᖃᐅᔨᓴᖅᑕᐅᖅᑳᕆᐊᓖᑦ ᐱᔪᓐᓇᐅᑏᑦ ᑐᓂᔭᐅᓐᖏᓐᓂᖏᓐᓂ ᐊᑭᐅᖅᑎᑦᓯᓂᕐᒧᑦ ᐃᖅᑲᕐᒥ ᖃᐅᔨᓴᕈᑎᒃᓴᒥᒃ. SEA ᖃᐅᔨᓴᕈᓐᓇᖅᑎᑕᐅᓇᔭᖅᑐᖅ ᐃᑲᔫᑎᒃᓴᖃᕈᓐᓇᖅᑐᓂᒃ ᐃᓄᓐᓄᑦ ᐊᒻᒪᓗ ᐊᒃᑐᐃᓂᐊᕐᓂᖓᓂᒃ ᑕᕆᐅᕐᒥᐅᑕᓂᒃ ᐆᒪᔪᓂᒃ. ᑐᓐᖓᕕᒃᑯᑦ ᐊᒻᒪᓗ ᕿᑭᖅᑕᓂᒃᑯᑦ ᒫᓐᓇ ᐱᓇᓱᐊᖃᐅᔪᑦ SEA ᐊᐅᓚᓂᖓᓂᒃ ᓯᕗᓕᖅᑎᑕᐅᔪᒥᒃ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ.
ᑲᓇᑕᒥ ᐃᖅᑲᖅᑐᐃᔨᕐᔪᐊᑦ ᓇᓗᓇᐃᕐᓯᒻᒥᔪᑦ ᐱᖕᒪᕆᐅᔪᒥᒃ ᒪᓕᒐᖅᑎᒍᑦ ᑐᓐᖓᕕᒃᓴᒥᒃ ᑯᐃᓐ ᑭᒡᒐᖅᑐᐃᔨᖏᓐᓄᑦ ᑕᑎᒋᔭᐅᖃᑦᑕᕈᓐᓇᓂᐊᖅᑐᓂᒃ ᐱᓕᕆᐊᖑᕙᓪᓕᐊᓯᒪᓂᖓᓂᒃ ᐊᐅᓚᑦᓯᔾᔪᑎᓕᕆᔨᓄᑦ ᑎᒥᓄᑦ ᑲᔪᓯᑎᑦᓯᓂᕐᒥᒃ ᐱᓕᕆᐊᒃᓴᖏᓐᓂᒃ ᖃᐅᔨᒋᐊᖃᑦᑕᕆᐊᖃᕐᓂᖏᓐᓂᒃ “ᑯᐃᓐ ᑭᒡᒐᖅᑐᐃᔨᖏᑦ ᑎᒍᒥᐊᖏᓐᓇᖅᑐᑦ ᐱᓕᕆᐊᒃᓴᓪᓗᐊᑕᕐᓂᒃ ᑐᓴᕆᐊᑦᓯᐊᖃᑦᑕᕆᐊᖃᕐᓂᖏᓐᓄᑦ ᓇᓕᖅᑯᑦᑐᒥᒃ.” ᑕᒪᓐᓇ ᑐᓐᖓᕕᒃᑯᑦ ᖃᓄᐃᓕᖓᓂᕆᓚᐅᖅᑕᖓ ᑐᒃᓯᕋᐅᓯᐊᕆᓚᐅᖅᑕᑎᓐᓂᒃ ᑲᓇᑕᒥ ᐃᖅᑲᖅᑐᐃᔨᕐᔪᐊᑯᓐᓂᒃ ᐊᒻᒪᓗ ᓇᑯᕐᓴᖅᑐᒍᑦ ᐃᖅᑲᖅᑐᐃᔨᒃᑯᑦ ᐊᖏᖃᑎᖃᓚᐅᕐᒪᑕ ᐅᕙᑦᑎᓐᓂᒃ ᑖᓐᓇ ᑐᓐᖓᕕᒃᓴᓕᐊᖑᔪᖅ ᐊᑐᖅᑕᐅᖃᑦᑕᕈᓐᓇᓂᐊᖅᑐᓂᒃ ᐊᒃᑐᐃᓂᖃᕐᒪᑕ ᖃᐅᑕᒫᕐᓯᐅᑎᑦᑎᓐᓂᒃ ᐃᖅᑲᓇᐃᔮᑦᑎᒍᑦ ᒐᕙᒪᓂᒃ ᐊᒻᒪᓗ ᑎᒥᓐᖑᖅᑎᑕᐅᓯᒪᔪᓂᒃ ᐊᖏᕈᑎᑎᒍᑦ ᓄᓇᕗᒻᒥ,” ᐅᖃᖅᑐᖅ ᑰᑦᑎᖅ.
