ᓴᒃᑯᑕᐅᑲᐅᑎᒋᔭᕆᐊᓕᒃ
(ᐋᒡᒌᓯ 29, 2024 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ ᖁᕕᐊᓲᑎᖃᖅᐳᑦ ᐃᑉᐸᒃᓴᖅ ᑕᒪᐃᓐᓄᑦ ᐃᓱᒪᓕᐅᕈᑎᒋᔭᐅᓚᐅᕐᓂᖓᓄᑦ ᓄᓇᕗᒻᒥ ᐊᔪᐃᓐᓈᕆᐊᕐᕕᒃ ᐃᖅᑲᖅᑐᐃᔨᖏᑦ ᖁᔭᓈᖅᓯᓪᓗᑎᑦ ᓄᓇᕗᑦ ᒐᕙᒪᖏᑕ ᐊᔪᐃᓐᓈᕆᐊᖅᑐᒥᓂᐅᓂᖏᑦ ᓄᖅᑲᖅᑎᑦᑎᓇᓱᒃᑐᒥᓂᐅᓚᐅᖅᑐᑎᑦ ᐃᓄᒃᑐᑦ ᐊᑐᖅᑐᑎᑦ ᐃᓕᓐᓂᐊᖅᑎᑦᑎᓂᕐᒥᒃ ᓇᓕᒧᒌᙱᓗᐊᖅᑎᑦᑎᕙᓐᓂᖏᑦ ᐃᖅᑲᖅᑐᐃᕕᒻᒨᖅᑎᑦᑎᓯᒪᓂᕆᔭᑦᑕ. ᐃᖅᑲᖅᑐᐃᔨᒃᑯᑦ ᐃᓱᒪᓕᐊᒥᓂᖓ ᓇᓗᓇᐃᖅᓯᕗᖅ ᐱᒻᒪᕆᐅᓂᖓᓂᒃ ᐊᒻᒪᓗ ᑕᐃᒪᐃᑦᑕᕆᐊᖃᕐᓂᖏᖕᓂᒃ ᐃᓄᐃᑦ ᓈᓚᒃᑕᐅᓗᑎᑦ ᑕᒪᐃᓐᓂ ᐃᖅᑲᖅᑐᐃᔾᔪᑎᖏᖕᓂᒃ.
ᐃᓕᓐᓂᐊᖅᑏᑦ ᐃᓕᓐᓂᐊᖅᑎᑕᐅᔭᕋᐃᒻᒪᑕ ᐊᑐᖅᑕᐅᓪᓗᓂ ᓇᖕᒥᓂᖅ ᐅᖃᐅᓯᖓ ᐊᒻᒪᓗ ᐃᓕᖅᑯᓯᖓ, ᐃᓕᓐᓂᐊᖅᑎᓪᓗᒋᑦ ᐊᕝᕕᐊᕈᑎᖃᙱᓐᓂᖅᓴᐅᓲᑦ ᐊᒻᒪᓗ ᐱᕕᖃᒃᑲᓐᓂᕐᓂᖅᓴᐅᓲᑦ ᑎᑭᓐᓇᓱᐊᖅᑕᒥᓂᒃ ᑎᑭᑦᑎᓗᑎᑦ ᐱᔭᕇᕐᓗᑎᑦ ᐃᓕᓐᓂᐊᖅᑕᒥᓂᒃ ᐊᒻᒪᓗ ᐃᖅᑲᓇᐃᔮᖅᑖᕐᓗᑎᑦ. ᓄᓇᕗᑦ ᑐᙵᕕᒃ ᑎᒥᖓ ᐊᐃᕙᐅᑎᖃᖅᐳᑦ ᐃᖅᑲᖅᑐᐃᕕᒻᒨᕈᔾᔨᓯᒪᓂᖏᑦ ᓄᓇᕗᑦ ᒐᕙᒪᖏᑦ ᓇᓕᒧᒌᙱᑦᑐᒃᑯᑦ ᑲᒪᓂᕋᖅᑕᐅᓲᖑᓪᓗᑎᑦ ᐃᓄᒃᑐᑦ ᐊᑐᖅᑎᓪᓗᒋᑦ ᓄᓇᕗᑦ ᐃᓕᓐᓂᐊᕐᕕᖏᖕᓂ, ᖃᓪᓗᓈᑎᑐᑦ ᐅᐃᕖᑎᑐᓪᓗ ᓇᓕᒧᒌᑎᑕᐅᕙᙱᒻᒪᑕ, ᐊᓯᐅᔨᑎᑦᑎᓯᒪᓪᓚᕆᑦᑐᓂ ᐃᓄᒃᑐᑦ ᐊᒻᒪᓗ ᐃᓕᓐᓂᐊᕇᙱᓐᓂᖅᓴᓪᓚᕆᐅᓲᑦ ᐃᓕᓐᓂᐊᖅᑏᑦ ᐊᒻᒪᓗ ᐱᔭᕇᙱᓐᓂᖅᓴᓪᓚᕆᐅᓲᖑᓪᓗᑎᑦ ᐃᓄᐃᑦ ᐃᓕᓐᓂᐊᖅᑎᖏᑦ.
ᐃᖅᑲᖅᑐᐃᕕᒻᒨᕈᔾᔨᓯᒪᓂᕗᑦ ᐃᓱᓕᑦᑎᑦᑎᓇᓱᐊᖅᑐᖅ ᐋᓐᓂᕈᑎᒋᔭᐅᓲᖑᓂᖏᓐᓂᒃ ᓇᓕᒧᒌᙱᑦᑐᒃᑯᑦ ᑲᒪᒋᔭᐅᖃᑦᑕᕐᓂᖏᑦ ᐃᓄᐃᑦ ᐃᓕᓐᓂᐊᖅᑏᑦ ᓄᓇᕗᒻᒥ ᐃᓄᖕᓄᑦ ᑭᒃᑯᑐᐃᓐᓇᕐᓄᑦ ᐅᐸᑦᑕᐅᔪᓐᓇᓲᓂᑦ ᐃᓕᓐᓂᐊᕐᕕᓂ, ᓴᐳᒻᒥᐅᓯᖅᑕᐅᓯᒪᓪᓗᑎᑦ ᒪᓕᑦᑐᒍ ᑎᑎᕋᖅᓯᒪᓂᖓᑕ ᐃᓚᖓ 15 ᐱᖁᔭᕐᔪᐊᓂ ᐊᒻᒪᓗ ᐃᓱᒪᖅᓲᑎᓂ. ᐃᖅᑲᖅᑐᐃᕕᒻᒨᕈᔾᔨᓯᒪᕗᒍᑦ ᑐᒃᓯᕋᖅᑐᑕ ᑕᓪᓕᒪᓄᑦ ᐊᕐᕌᒍᓄᑦ ᐸᕐᓇᐅᑎᓕᐅᖁᔨᓪᓗᑕ ᐊᑐᓕᖅᑎᑕᐅᒐᔭᕐᓂᖓᓂᒃ ᐃᓄᐃᑦ ᐅᖃᐅᓯᖏᖕᓂᒃ ᐊᑐᕐᓗᑎᑦ ᐃᓕᓐᓂᐊᖅᑎᑦᑎᖃᑦᑕᕈᑎᒃᓴᓂᑦ ᒥᑭᔫᑕᐅᓂᖅᐹᓂᑦ ᑎᑭᓪᓗᒍ ᖁᑦᑎᓐᓂᓖᑦ 12-ᓄᑦ ᑕᒪᐃᓐᓂ ᓄᓇᕗᑉ ᐃᓕᓐᓂᐊᕐᕕᖏᖕᓂ ᐱᖃᓯᐅᔾᔨᖁᔨᓪᓗᑕᓗ ᐃᖅᑲᓇᐃᔭᖅᑎᑖᕆᔭᐅᓂᖏᑦ ᐊᒻᒪᓗ ᐱᓕᒻᒪᒃᓴᖅᑎᑕᐅᓂᖏᑦ ᐃᓄᐃᑦ ᐅᖃᐅᓯᖏᖕᓂᒃ ᐅᖃᓪᓚᓲᑦ ᐃᓕᓴᐃᔨᓂᑦ, ᐱᕙᓪᓕᐊᒍᑎᒋᔭᐅᓂᖓᓂᒃ ᐃᓄᐃᑦ ᐅᖃᐅᓯᖓᓂᒃ ᐊᑐᕐᓗᑎᑦ ᐃᓕᓐᓂᐊᕈᑎᒃᓴᓕᐅᖁᔨᓪᓗᑕ, ᐊᒻᒪᓗ ᐃᓚᐅᖃᑕᐅᓂᖅᓴᐅᓗᑎᑦ ᐃᓄᐃᑦ ᐃᓕᓐᓂᐊᕐᓂᓕᕆᓂᕐᒥᒃ ᐊᐅᓚᑦᑎᓂᐅᕙᑦᑐᓂᑦ.
ᐊᖓᔪᖅᑳᖅ ᐊᓗᑭ ᑰᑦᑎᖅ ᐅᖃᖅᑐᒥᓂᐅᓪᓗᓂ, “ᐃᓄᐃᑦ ᐃᓕᓐᓂᐊᕐᕕᖃᐅᕈᒪᕗᑦ ᐃᓄᐃᑦ ᐅᖃᐅᓯᖏᖕᓂᒃ ᐃᓕᖅᑯᓯᖏᓐᓂᓗ ᐊᑐᕐᓗᑎᑦ. ᑲᒪᒋᔭᖃᕐᓂᖅᓴᐅᒍᑎᑦ ᐊᒻᒪᓗ ᓈᒻᒪᑦᑐᓂᑦ ᐊᑐᕋᒃᓴᓂᑦ ᐊᑐᕈᓐᓇᕐᓗᑎᑦ ᑮᓇᐅᔭᖃᕐᓗᑎᓪᓗ, ᓈᒻᒪᑉᐳᖅ ᐊᒻᒪᓗ ᐊᔪᙱᓚᖅ ᑕᒪᓐᓇ ᐱᕚᓪᓕᖅᑎᑕᐅᓗᓂ ᑕᒪᓐᓇ ᑕᓪᓕᒪᑦ ᐊᕐᕌᒎᓂᐊᖅᑐᓂᑦ. ᐅᒡᒍᕐᓇᓪᒪᕆᒻᒪᑦ ᐃᓄᐃᑦ ᐊᑐᕆᐊᖃᖅᑎᓪᓗᒋᑦ ᐃᖅᑲᖅᑐᐃᔨᒃᑯᓐᓂ ᖃᐅᔨᒪᓇᑦᑎᐊᖁᓪᓗᒍ ᓇᓕᒧᒌᑦᑐᒥᒃ ᑲᒪᒋᔭᐅᖃᑦᑕᖁᓪᓗᒋᑦ ᐃᓄᐃᑦ ᐃᓕᓐᓂᐊᖅᑏᑦ, ᒐᕙᒪᒃᑯᓐᓂ ᐋᖅᑭᒃᓱᖅᑕᐅᓯᒪᔪᒥᓂᐅᒐᓗᐊᖅᑐᓂ ᐃᓄᖕᓄᑦ, ᐊᒻᒪᓗ ᒐᕙᒪᒃᑯᑦ ᐊᑐᖅᓯᒪᕗᑦ ᑮᓇᐅᔭᖁᑎᒥᖕᓂᒃ ᐅᖓᕙᕆᐊᖅᑎᑦᑎᑐᐃᓐᓇᖅᑐᑎᑦ ᐊᒻᒪᓗ ᓄᖅᑲᖓᑎᑦᑎᓪᓗᑎᑦ ᐃᖅᑲᖅᑐᐃᔾᔪᑎᒃᓴᑦᑎᓐᓂ. ᑭᓯᐊᓂᓕ, ᖁᕕᐊᓱᑉᐳᒍᑦ ᐃᖅᑲᖅᑐᐃᔨᒃᑯᑦ ᐊᖏᕈᑎᖃᒃᑲᓐᓂᓕᕐᒥᒻᒪᑕ ᓄᓇᕗᑦ ᑐᙵᕕᒃ ᑎᒥᖓᓂᒃ ᓇᓗᓇᐃᖅᑕᐃᖅᓯᒃᑲᓐᓂᖅᑐᑎᑦ ᑕᒪᓐᓇ ᐃᖅᑲᖅᑐᐃᕕᒻᒨᕈᑎᒋᓯᒪᔭᕗᑦ ᐱᔾᔪᑎᖃᑦᑎᐊᕐᒪᑦ ᓱᓕᓪᓗᓂ ᐊᒻᒪᓗ ᑲᔪᓯᑦᑕᕆᐊᖃᖅᑐᓂ.”
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
ᐊᓯᒥᓄᑦ ᐃᓄᖕᓄᑦ ᓈᓚᑦᑕᐅᒋᐊᖃᕋᑎᑦ ᑲᑎᒪᓂᖏᑦ ᐱᔭᕇᖅᐳᑦ. ᖃᕋᓴᐅᔭᒃᑯᑦ ᐃᕐᖐᓐᓇᖅ ᑕᑯᒃᓴᐅᑦᑕᐅᑎᒋᔪᒃᑯᑦ ᑲᑎᒪᓂᖏᖕᓂᒃ ᑕᐅᑐᖁᓪᓗᓯ ᑲᑎᒪᒃᑲᓐᓂᕐᓂᖏᓐᓂᒃ ᑕᑯᒃᓴᐅᑎᑦᑎᓂᐊᓕᕆᕗᒍᑦ.
