ᑐᓴᕋᑦᓴᓕᕆᔩᑦ

ᓄᓇᕗᑦ ᑐᓐᖓᕕᒃ ᑎᒥᖓᑦ ᐃᑲᔪᖅᑐᐃᔪᑦ ᕿᕿᖅᑕᓂ ᑐᒃᑐᐃᑦ ᐱᑕᖅᑕᐅᕙᖕᓂᖏᑦ ᓄᖅᑲᖅᑎᑕᐅᔪᑦ

ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᐊᖓᔪᖅᑳᑉ-ᑐᖏᓕᐊ ᔭᐃᒻᔅ ᐃᑦᑐᓗᒃ ᐅᖃᖅᑐᖅ ᓄᓇᕗᑦ ᑐᓐᖓᕕᒃ ᑎᒥᖓᑦ ᐃᑲᔪᖅᑐᐃᔪᖅ ᓄᓇᕗᑦ ᒐᕙᒪᒃᑯᑦ ᓄᖅᑲᖅᑎᑦᑎᓯᒪᓂᐊᕐᒪᑕ ᐊᖑᓇᓱᐊᕐᓂᕐᒥᑦ ᑐᒃᑐᓂᒃ ᕿᑭᖅᑕᓂ. ᐊᕙᑎᓕᕆᓂᕐᒧᑦ ᒥᓂᔅᑕ ᔮᓂ ᒪᐃᒃ ᑐᓴᖅᑎᑦᑎᕋᑖᓚᐅᖅᑐᖅ ᐃᓱᒪᓕᐅᕈᑎᐅᓯᒪᑲᐃᓐᓇᕐᑐᑦ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐃᑲᔪᕐᑐᐃᓯᒪᓂᖏᑦ ᒪᓕᒃᑐᒋᑦ. ᖃᐅᔨᒪᔨᕐᔪᐊᖑᓂᕋᖅᑕᑦ ᖃᖓᑕᓲᒃᑯᑦ ᓈᓴᐃᒍᑕᐅᓯᒪᔪᑦ ᖃᐅᔨᓇᕐᓯᒍᑎᐅᓚᐅᕐᒪᑕ ᕿᑭᖅᑕᓂ ᑐᒃᑐᐃᑦ ᐊᒥᓲᓂᖏᑦ ᓇᓚᐅᑦᑕᖅᑕᐅᓯᒪᔪᑦ ᐊᑯᓐᓂᖓᓂ ᐅᓄᕐᓂᖃᕐᓂᖏᑦ 3,462 ᑎᑭᐅᑎᓪᓗᒋᑦ 6,250 ᑐᒃᑐᐃᑦ ᐱᑕᖃᓕᕐᓂᖏᑦ, ᖃᑦᓯᓐᓇᕈᖅᐹᓪᓕᕐᓯᒪᒻᒪᑕ 90-ᐳᓴᓐᑎᒥᑦ ᑕᐃᒪᖓᓂᑦ 1990s.

“ᑕᒪᓐᓇ ᐃᓱᒪᓕᐊᕆᒋᐊᖅ ᐊᔪᕐᓇᓚᐅᖅᑐᖅ, ᑭᓯᐊᓂ ᐃᓱᒪᓕᐊᖑᔪᖅ ᑕᐃᒪᓐᓇ ᑭᓯᐊᓂᐅᓕᓚᐅᖅᑐ ᕿᑭᖅᑕᓂ ᑐᒃᑐᐃᑦ ᐊᒥᓲᓂᖏᑦ ᐅᓄᖅᓯᒋᐊᒃᑲᓐᓂᖁᓪᓗᒋᑦ. ᑭᓯᐊᓂ ᖃᓄᖅᑑᕆᐊᕈᑎᒋᙱᑯᑦᑎᒍ ᐃᓐᖐᓐᓇᖅ, ᐅᓄᕐᓯᕙᓪᓕᐊᓂᖃᕋᔭᓚᐅᕐᒪᑕ ᐅᑭᐅᒐᓴᐅᓂᖅᓴᓂᒃ ᐅᖃᖅᑐᖅ ᐃᑦᑐᓗᒃ.

ᒥᓂᔅᑕᐅᑉ ᐃᓱᒪᓕᐅᕈᑎᒋᓯᒪᑲᐃᓐᓇᖅᑕᖓ ᐱᕕᒃᓴᖃᓕᒃᑲᓐᓂᕈᑎᐅᓂᐊᖅᑐᖅ ᐆᒪᔪᓕᕆᔨᓄᑦ ᐊᐅᓚᑦᑎᔨᑦ ᑲᑐᔾᔨᓪᓗᑎᒃ ᑲᒪᑦᑎᐊᕈᑎᒃᓴᓂᒃ ᐸᕐᓇᒍᑎᓕᐅᕈᓐᓇᕐᓯᓗᑎᒃ ᑐᙵᕕᖃᑦᑎᐊᕐᓗᑎᒃ ᓄᖑᓗᐊᖅᑕᐃᓕᒪᑎᑦᑎᓂᕐᒥᒃ ᐅᓄᕐᓯᕚᓪᓕᖁᓪᓗᒋᑦ ᑐᒃᑐᐃᑦ ᐊᒻᒪ ᐊᒥᓱᕈᖅᐸᓪᓕᐊᓂᕐᓴᐅᖁᓪᓗᒋᑦ ᑖᒃᑯᐊ ᖃᑦᑏᓐᓇᕈᓗᐊᖅᓯᒪᔪᑦ ᑐᒃᑐᖏᑦ ᕿᑭᖅᑕᓂ. ᓄᓇᕘᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᒫᓐᓇ ᐱᓕᕆᐊᖃᕐᓂᐊᓕᖅᑐᑦ ᑭᒃᑯᓕᒫᓂᒃ ᓈᓛᒃᑎᑦᑎᓗᑎᒃ ᑕᒪᑦᓱᒧᖓ ᐱᔾᔪᑎᐅᔪᓄᑦ ᐊᒻᒪᓗ ᐃᓱᒪᓕᐅᕈᑎᒥᓂᒃ ᑐᓂᓯᓛᖅᑐᑎᒃ ᒥᓂᔅᑕᖓᓄᑦ ᐊᕙᑎᓕᕆᔨᒃᑯᑦ ᓯᕗᓂᑦᑎᓐᓂ ᑐᒃᑐᑕᐅᔪᓐᓇᕈᒫᕐᑐᓂᒃ ᕿᑭᖅᑕᓂ ᑐᑦᑐᖏᓐᓂᒃ. ᐱᓪᓗᒍ ᑕᒪᑦᓱᒧᖓ ᑲᔪᓯᑎᑕᐅᔪᑦ ᐊᑯᓂᐅᓂᖃᕐᓂᐊᖅᑐᑦ ᑕᖅᑭᓄᑦ 10-ᓄᑦ ᐱᓕᕆᐊᖑᓂᐊ, ᓄᓇᕗᑦ ᒐᕙᒪᒃᑯᖏᑦ ᐊᑐᓕᖅᑎᑦᑎᔪᑦ ᑐᒃᑐᒐᓱᐊᕈᓐᓇᐃᓕᑎᑦᑎᓯᒪᑲᐃᓐᓇᖅᑐᑦ ᓯᕗᓂᒥ ᓄᖑᒃᑲᓐᓂᖁᓇᒋᑦ ᑐᒃᑐᐃᑦ ᐅᑯᐊ ᓄᑖᑦ ᑲᒪᑦᑎᐊᕈᑎᒃᓴᑦ ᐸᕐᓇᒍᑎᓕᐊᑦ ᐊᖅᑭᒃᓱᖅᑕᐅᑎᓪᓗᒋᑦ ᓴᖅᑭᑎᑕᐅᓂᐊᖅᑐᑦ.

“ᐅᓇ ᐃᓱᒪᓕᐅᕈᑕᐅᔪᖅ ᒪᓕᒃᑐᖅ ᐃᓗᐊᓂ ᑎᑎᕋᖅᓯᒪᔪᓂᑦ ᓄᓇᕗᒥ ᓄᓇᑖᕈᑎᓄᑦ ᐊᖏᕈᑎᓂᒃ ᑎᑎᕋᖅᓯᒪᔪᓂ ᐃᓛᒃᑯᑦ 5.3.24-ᒥ, ᐱᔪᓐᓇᖅᑎᑦᑎᔪᖅ ᐊᕙᑎᓕᕆᔨᐅᑉ ᒥᓂᔅᑕᖓᓐᓂ ᐊᔪᙱᑎᑦᑎᒪᑦ ᐃᓱᒪᓕᐅᕈᑎᖃᑲᐃᓐᓇᕈᓐᓇᕐᓂᖓᓂᒃ ᐃᒪᓐᓇᐃᑦᑐᖃᖅᐸᑦ ᑐᐊᕕᕐᓇᖅᑐᒥᑦ ᐊᒻᒪᓗ ᐊᔾᔨᐅᖏᑦᑐᒧᑦ ᓴᖅᑭᑦᑐᓄᑦ ᑕᒪᓐᓇ ᐃᓐᖐᓐᓇᖅ ᐊᖅᑮᒋᐊᕐᓗᓂ ᑕᒪᑦᓱᒧᖓ ᐊᖑᓇᓱᐊᕐᓂᕐᒧᑦ ᐱᓕᕆᐊᓂᒃ” ᐅᖃᖅᑐᑦ ᐃᑦᑐᓗᒃ.

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: