ᑐᓴᕋᑦᓴᓕᕆᔩᑦ

ᑐᓐᖓᕕᒃᑯᑦ ᓂᓪᓕᕈᑎᖃᕐᐳᑦ ᐊᑐᖅᑕᐅᒋᐊᖃᕐᓂᖓᓂᒃ ᐃᓄᒃᑐᑦ ᐅᖃᐅᓯᕐᒥᒃ ᑭᓐᖓᕐᓂ ᐊᒻᒪᓗ ᓄᓇᕗᑦ ᐃᓕᓐᓂᐊᕐᕕᓕᒫᖏᓐᓂ

(ᐆᑦᑑᕝᕙ 27, 2016 – ᐃᖃᓗᐃᑦ, ᓄᓇᕗᑦ) “ᖃᓄᐃᓕᐅᕐᓂᕆᔭᐅᓚᐅᖅᑐᖅ ᑭᓐᖓᕐᓂ ᓴᖅᑭᑎᑦᓯᓚᐅᕐᐳᖅ ᐃᑉᐱᓐᓂᕈᑕᐅᓪᓗᓂ ᐃᕐᖐᓐᓇᖅ ᐃᑉᐱᓐᓂᕈᑕᐅᑦᓴᐅᑎᒋᒍᓐᓇᖅᑐᖅ ᓴᖅᑭᑲᓐᓂᓚᐅᕐᓯᒪᔾᔮᕋᓱᒋᓐᖏᑕᑦᑎᓐᓂᒃ ᐃᓅᓯᑦᑎᓐᓂ, ᐅᖃᖅᑐᖅ ᐊᖓᔪᖅᑳᖅ ᑐᖏᓕᖓ ᓄᓇᕗᑦ ᑐᓐᖓᕕᒃ ᑎᒥᖓᓄᑦ, ᔭᐃᒥᓯ ᐃᑦᑐᓗᒃ.

“ᐅᖃᐅᓯᖏᑦ 8-ᓂᒃ ᐃᓕᓐᓂᐊᕐᓂᓕᒃ ᐃᓕᓐᓂᐊᖅᑎ ᑲᑉᐱᐊᓵᖅᑕᐅᓂᒃᑯᑦ ᖃᓄᐃᓕᔭᐅᒍᓐᓇᕐᓂᖓᓂᒃ ᐃᓄᒃᑐᑦ ᐅᖃᓕᒪᑉᐸᑦ ᐃᓱᒫᓗᓐᓇᖅᑐᖅ”, ᐅᖃᖅᑐᖅ ᐃᑦᑐᓗᒃ. “ᒥᓂᔅᑕ ᖁᐊᓴ ᐅᖃᑦᓯᐊᓚᐅᕐᒪᑦ, ᐋᓐᓂᓇᖅᑐᒃᑰᓚᐅᖅᑐᓄᑦ ᐃᖅᑲᐃᒍᑕᐅᕗᖅ ᐃᓅᓯᕆᔭᐅᓚᐅᖅᑐᒥᒃ ᐅᓄᖅᑐᓄᑦ ᐃᓄᖕᓄᑦ. ᐃᓅᓯᐅᓚᐅᖅᑐᖅ ᖄᖏᕐᓕᓯᒪᓕᖅᑐᑦ. ᑐᓐᖓᕕᒃᑯᑦ ᓱᖏᕐᓲᑎᖃᕐᐳᑦ ᒥᓂᔅᑕ ᑕᑯᒋᐊᕐᓂᐊᕐᓂᖓᓂᒃ ᐊᑕᖏᖅᑐᒥᒃ ᐊᒻᒪᓗ ᕿᒥᕐᕈᓇᑦᓴᐅᑎᒋᓗᓂ ᐊᑐᖅᑕᐅᖃᑦᑕᖅᑐᒥᒃ ᐊᒻᒪᓗ ᐊᑐᐊᒐᕐᓂᒃ ᐱᓕᕆᒡᕕᖕᒥ ᑖᑦᓱᒧᖓ, ᐅᓂᒃᑳᖅ ᓴᖅᑭᖅᑕᐅᖁᓪᓗᒍ ᐃᓄᓕᒫᓄᑦ, ᐊᒻᒪᓗ ᐊᐅᓚᔾᔭᐃᒋᐊᓗᓂ ᐋᖅᑭᒋᐊᖅᑕᐅᒋᐊᖃᕐᓂᖓᒍᑦ”.

ᑭᓯᐊᓂ ᒪᕐᕉᓐᓂᒃ ᐅᖃᐅᓯᓪᓚᑦᑖᓕᓐᓂᒃ ᐃᓕᓴᐃᔨᖃᓕᕈᑦᑕ ᐊᒻᒪᓗ ᐃᓕᓐᓂᐊᕐᕕᐊᕈᓯᕐᓂ ᐅᓄᕐᓂᕐᓴᑦ ᐃᓕᓴᐃᔩᑦ ᐃᓄᒃᑑᖃᑦᑕᓕᕐᐸᑕ, ᐅᖃᐅᓯᕐᒨᖓᔪᑦ ᐃᓕᖅᑯᓯᕐᒧᓪᓗ ᓈᖕᒪᖏᑦᑐᑦ ᑲᔪᓯᑐᐃᓐᓇᓂᐊᖅᑐᖅ ᑕᒪᓐᓇ ᐅᒡᒍᓇᖅᑐᖅ.

ᐅᖑᒪᑦᓯᔾᔪᑕᐅᓗᓂ ᐊᑐᖅᑕᐅᑲᓐᓂᖁᓇᒍ ᓄᓇᕗᓕᒫᒥ, ᐃᓕᓐᓂᐊᕐᓂᓕᕆᓂᖃᕆᐊᖃᖅᑐᒍᑦ ᐋᖅᑭᑦᓯᒪᔪᒥᒃ ᐊᒻᒪᓗ ᓴᓐᖏᔪᒥᒃ ᒪᓕᒐᑦᓴᓕᐅᖅᑕᐅᓯᒪᔪᒥᒃ ᐱᕙᓪᓕᐊᑎᑕᐅᓯᒪᔪᒥᒃ ᐃᑲᔫᑎᒍᓐᓇᓯᐊᖅᑐᒥᒃ ᒪᕐᕉᓐᓂᒃ ᐅᖃᐅᓰᓐᓂᒃ ᐃᓕᓴᐃᔾᔪᑎᖃᕐᓂᕐᒥᒃ ᐃᓄᒃᑐᓪᓗ ᖃᓪᓗᓈᑎᑐᓪᓗ ᐃᓕᓐᓂᐊᕕᑦᑎᓐᓂ.

ᐃᑦᑐᓗᒃ ᓂᕆᐅᒋᔭᓂᒃ ᓴᓐᖓᖅᑎᑕᐅᒋᐊᕐᓂᖓ ᐃᓄᐃᑦ ᐅᖃᐅᓯᖓᑕ ᐅᐱᒍᓲᑕᐅᔪᓐᓇᕐᓯᖁᓪᓗᒍ ᕿᑐᕐᖓᓕᖕᓄᑦ ᐃᓚᒋᔭᐅᑦᓯᐊᕈᓐᓇᕐᓯᓗᑎᒃ ᐃᓕᓐᓂᐊᕐᕕᖕᒥᓐᓂ ᐊᒻᒪᓗ ᑎᒍᓯᒋᐊᕐᓂᕐᒥᒃ ᓇᑭᓐᖔᕐᓯᒪᓂᕐᒥᓂᒃ ᓱᕈᓰᑦ ᐃᓕᓐᓂᐊᕐᓂᓖᑦ ᐃᓕᓐᓂᐊᕆᐊᓕᕋᑖᓂᒃ ᐃᓕᓐᓂᐊᕐᓂᓕᓐᓄᑦ 12-ᒥᒃ.

ᒫᓐᓇ ᐱᒋᐊᕈᑎᒃᓴᐅᓕᕐᐳᖅ ᖁᑉᕙᕆᐊᖅᑎᑦᓯᓂᕐᒥᒃ ᐱᓇᓱᐊᒐᑦᓴᖏᓐᓂᒃ ᓄᓇᓕᖕᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓄᑦ ᐊᒻᒪᓗ ᐃᓘᓐᓈᒍᑦ ᐃᑲᔪᕐᓱᓯᐊᕐᓗᒋᑦ, ᐊᖅᑯᑕᐅᓗᓂ ᕿᑐᕐᖓᓖᑦ ᐊᒻᒪᓗ ᓄᑕᖅᑲᑦ ᐊᖅᑯᑎᒃᓴᖏᓐᓂᒃ ᖃᐅᔨᒪᓂᖃᕈᑎᒃᓴᖏᓐᓄᑦ ᓇᑭᓐᖔᕐᓯᒪᓂᕆᔭᒥᓂᒃ ᐃᓕᓐᓂᐊᕕᖕᓂ.

ᐃᓕᓴᐃᔨᒃᓴᓄᑦ ᐃᓕᓐᓂᐊᕐᕖᑦ ᑲᔪᓯᑦᓯᐊᑐᒻᒪᕆᐅᖃᑦᑕᓚᐅᕐᓂᖏᑦ ᐅᓂᒃᑳᖑᕙᑦᑐᖅ ᐅᓄᖅᑐᑦ ᐃᓄᐃᑦ ᐃᓕᓴᐃᔨᓐᖑᕈᓐᓇᓚᐅᕐᒪᑕ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᑎᓪᓗᒋᑦ ᐊᖏᕐᕋᒥᓂᒃ ᕿᒪᐃᑎᑕᐅᖃᑦᑕᓚᐅᖅᑎᓪᓗᒋᑦ. ᑐᑭᓯᒃᑲᓐᓂᕈᓐᓇᖅᑐᒍᑦ ᑕᑉᕙᓐᖓᑦ ᐊᔾᔨᐅᔪᖁᑎᑦᓯᐊᕙᖕᒥᒃ ᑎᒍᓯᒋᐊᒃᑲᓐᓂᕈᑎᒋᓗᒍ ᐃᓄᖕᓂᒃ ᐃᓕᓴᐃᔨᓂᒃ ᐃᓕᓐᓂᐊᕐᕖᑦ ᐊᐅᓚᓂᖏᓐᓂ.

ᐃᑦᑐᓗᒃ ᐅᖃᖅᑐᖅ “ᑐᓐᖓᕕᒃᑯᑦ ᐱᓇᓱᐊᒐᖃᐃᓐᓇᕐᓯᒪᕗᑦ ᐊᒻᒪᓗ ᐱᓕᕆᐊᖃᐃᓐᓇᓂᐊᖅᑐᖅ ᒪᓂᒪᑎᑦᓯᖃᑦᑕᓂᕐᒥᒃ ᓇᓖᕌᕈᑎᒃᓴᓂᒃ ᐊᒻᒪᓗ ᐋᖅᑭᑦᓯᒪᒍᑎᒃᓴᖏᓐᓂᒃ ᐃᓕᓐᓂᐊᕐᓂᕐᒧᑦ ᓄᓇᕗᒻᒥ, ᓴᖅᑭᕈᑕᐅᓗᓂ ᐃᓄᐃᑦ ᕿᑐᕐᖓᖏᑦ ᐃᓕᓐᓂᐊᕌᓂᑦᓯᒪᑦᓯᐊᕐᓗᑎᒃ ᖁᑦᓯᓂᕐᐹᒥᒃ ᐃᓕᓐᓂᐊᕈᓐᓇᓂᕐᒥᒃ ᐊᔪᕈᓐᓃᕐᓯᐊᕐᓗᑎᒃ, ᒪᕐᕉᓐᓂᒃ ᐅᖃᐅᓰᓐᓂᒃ ᐊᑐᕈᓐᓇᑦᓯᐊᕐᓗᑎᒃ ᐃᓄᒃᑐᑦ ᖃᓪᓗᓈᑎᑐᓪᓗ. ᓄᓇᕗᑦ ᒐᕙᒪᖓ ᐃᖅᑲᓇᐃᔭᖃᑎᒋᔪᒪᑦᓯᐊᓂᐊᕐᐸᕗᑦ ᐱᓕᕆᐊᖑᓂᖏᓐᓂ ᓇᓖᕌᕈᑎᒃᓴᑦ ᐊᒻᒪᓗ ᐋᖅᑭᑦᓲᑎᒃᓴᑦ ᐱᕚᓪᓕᕈᑕᐅᖁᓪᓗᒋᑦ ᐃᓕᓐᓂᐊᕐᓂᖅ ᐊᐅᓚᓂᖓᓄᑦ ᓄᓇᕗᒻᒥ.”

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: