(ᒫᑦᓯ 24, 2021 – ᐃᖃᓗᐃᑦ, ᓄᓇᕗᑦ) ᐅᓪᓗᒥ ᓄᓇᕐᔪᐊᒥ ᐳᕙᓪᓗᓐᓇᖅ TB ᐅᓪᓗᖓ, ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᖁᕕᐊᓱᑦᑐᖅ ᓇᓗᓇᐃᕆᒋᐊᑦᓴᖅ ᐊᓪᓗᕆᐊᕈᑕᐅᓂᐊᖅᑐᓂᒃ ᐳᕙᓪᓗᓐᓇᖅ TB ᓄᖑᑎᑕᐅᓂᖓᓄᑦ ᓄᓇᕗᒻᒥ.
ᐊᕐᕌᓂ, ᓄᓇᕗᒻᒥ ᐳᕙᓪᓗᓐᓇᖅ ᓄᖑᑎᑕᐅᓂᖓᓄᑦ ᐊᐅᓚᔾᔭᐃᒍᑎᒃᓴᑦ ᐸᕐᓇᐅᑏᑦ, 2020-2023 ᑕᒪᐃᓐᓄᑦ ᐊᖏᕈᑕᐅᓚᐅᖅᑐᑦ ᑐᙵᕕᒃᑯᑦ ᑲᑎᒪᔨᖏᓐᓄᑦ. ᓇᓗᓇᐃᖅᓯᒪᔪᒃᑯᑦ ᑲᔪᓯᑎᑕᐅᒐᓱᐊᕐᓂᖓ ᐊᐅᓚᔾᔭᐃᒍᑎᒃᓴᑦ ᐸᕐᓇᐅᑎᖏᑦ ᓄᓇᕗᑦ ᒐᕙᒪᒃᑯᑦ (GN) ᓄᖅᑲᖓᑎᑕᐅᓚᐅᕐᒪᑕ ᐱᕙᓪᓕᐊᑎᑕᐅᓂᖏᑦ ᓄᕙᔾᔪᐊᕐᓇᖅ−19 ᓄᓇᕐᔪᐊᒥ ᖃᓂᒪᓐᓇᖅ, ᐊᒻᒪᓗ ᐊᐅᓚᓂᐅᓚᖓᓚᐅᖅᑐᑦ ᐸᕐᓇᑕᐅᓯᒪᔪᑦ 2020-ᒧᑦ ᑭᖑᕙᕆᐊᖅᑕᐅᓚᐅᖅᑐᑦ ᒪᓕᑦᑕᐅᖁᓪᓗᒋᑦ ᐃᖢᐊᖅᓴᐃᔨᓄᑦ ᒪᓕᒐᑦᓴᓕᐊᖑᓯᒪᔪᑦ.
ᐳᕙᓪᓗᓐᓂᖅ TB ᓄᖑᑎᑕᐅᖁᓪᓗᒍ ᐊᐅᓚᔾᔭᐃᒍᑎᒃᓴᑦ ᐸᕐᓇᐅᑏᑦ ᑐᑭᒧᐊᒍᑎᒋᓂᐊᖅᑕᕗᑦ ᓯᕗᒧᐊᒃᐸᓪᓕᐊᒍᑎᒋᓗᑎᒍ ᐊᖅᑯᑎᒧᑦ ᐃᖢᕐᕆᑲᓐᓂᕈᑎᒃᓴᖏᓐᓄᑦ ᓄᓇᓖᑦ. ᐊᖏᖅᓯᒪᓂᒃᑯᑦ ᐱᓇᓱᐊᕐᓂᕆᔭᕗᑦ ᐊᒃᑐᐃᓂᖃᕐᓂᐊᖅᑐᑦ ᓄᓇᓕᑦᑎᓐᓂᒃ ᐃᑯᓪᓚᕈᑕᐅᔪᓐᓇᖅᑐᑎᒍᑦ ᐊᖑᒪᑦᓯᔾᔪᑕᐅᔪᓐᓇᖅᑐᓂᒃ ᐋᓐᓂᐊᓂᕐᓂᒃ ᓲᕐᓗ ᐳᕙᓪᓗᓐᓂᖅ TB ᐊᒻᒪᓗ ᓄᕙᔾᔪᐊᕐᓇᖅ−19.” ᐅᖃᖅᑐᖅ ᑰᑦᑎᖅ.
ᑐᙵᕕᒃᑯᑦ ᖃᐅᔨᓇᓱᐊᖏᓐᓇᖅᑐᑦ ᑲᔪᓯᑎᑦᓯᒍᑎᒃᓴᖓᓂᒃ ᐊᐅᓚᔾᔭᐃᒍᑎᒃᓴᓄᑦ ᐸᕐᓇᐅᑎᓕᐊᕆᓯᒪᔭᖏᓐᓂᒃ GN ᐊᒻᒪᓗ ᐱᒋᐊᒃᑲᓐᓂᓚᐅᖅᑐᑦ ᐃᖅᑲᓇᐃᔭᖃᑎᖃᕐᓂᕐᒥᒃ ᐊᓯᖏᓐᓂᒃ ᐱᓇᓱᐊᖃᑕᐅᓪᓗᐊᑕᖅᑐᓂᒃ ᑖᑦᓱᒧᖓ ᐱᓇᓱᐊᒐᐅᔪᒧᑦ. ᐱᕙᓪᓕᐊᓯᒪᓂᖓ ᐅᓪᓗᒥᒧᑦ ᐃᓚᒋᔭᐅᓪᓗᓂ ᐊᐅᓚᑦᓯᒍᓐᓇᖅᓯᕙᓪᓕᐊᓂᖏᑦ ᑐᙵᕕᒃᑯᑦ ᐋᖅᑭᐅᒪᓂᖃᖁᓪᓗᒍ ᐳᕙᓪᓗᓐᓇᕐᒧᑦ TB ᐊᐅᓚᔾᔭᐃᒍᑎᒃᓴᓄᑦ ᐸᕐᓇᐅᑏᑦ ᑲᔪᓯᑎᑕᐅᓂᖏᑦ ᐊᒻᒪᓗ ᓴᖅᑮᓂᕐᒥᒃ ᓄᓇᕗᒻᒥ ᐳᕙᓪᓗᓇᕐᒧᑦ TB ᓄᖑᑎᑕᐅᖁᓪᓗᒍ ᖃᐅᔨᒪᔨᑕᑦ ᑲᑎᒪᔨᕋᓛᓂᒃ. ᐱᒋᐊᕈᑎᒋᓯᒪᔭᖓ ᐱᓇᓱᐊᒐᑦᓴᖏᓐᓄᑦ ᑲᑎᒪᔨᕋᓛᑦ ᓇᓗᓇᐃᖅᓯᓯᒪᓂᖅ ᐳᕙᓪᓗᓐᓇᕐᒧᑦ TB ᐊᐅᓚᔾᔭᐃᒍᑎᒃᓴᓄᑦ ᐸᕐᓇᐅᑏᑦ ᓇᓕᖅᑯᓯᑦᓯᐊᖅᓯᒪᒐᓗᐊᕐᒪᖔᑕ ᐊᒻᒪᓗ ᐃᑲᔪᖅᓯᒪᓗᑎᒃ ᓄᓇᕗᒻᒥ ᐊᖅᑯᑕᐅᔪᒥᒃ ᓯᕗᒧᐊᒃᐸᓪᓕᐊᓂᕐᒧᑦ ᓄᕙᔾᔪᐊᕐᓇᖅᑕᖃᖅᑎᓪᓗᒍ-19 ᐊᒻᒪᓗ ᐊᐅᓚᑦᓯᔾᔪᑎᒃᓴᓂᒃ ᓄᑖᓄᑦ ᒐᕙᒪᑐᖃᒃᑯᓐᓂ ᐊᑭᑐᔪᖅᑑᑎᒃᓴᐅᔪᓂᒃ ᐃᓅᓯᕐᒧᑦ ᒪᑭᒪᔾᔪᑎᓄᓪᓗ ᐱᖁᑎᕐᔪᐊᑎᒍᑦ.
ᖃᓄᐃᓐᓂᖏᑦ ᐱᓗᖅᑯᑕᐅᔪᓪᓗ ᐃᖢᕐᕆᖏᓐᓂᕐᒧᑦ ᐃᑲᔪᓂᕐᓗᒻᒪᑕ ᖁᑦᓯᓗᐊᕐᓂᖏᓐᓄᑦ ᓇᓗᓇᐃᖅᑕᐅᓯᒪᔪᑦ ᐳᕙᓪᓗᑦᑐᑦ TB ᐃᓄᐃᑦ ᓄᓇᓕᖏᓐᓂ ᑖᒃᑯᓴᐃᓐᓇᐃᑦ ᐱᓗᖅᑯᑕᐅᓯᒪᔪᑦ ᐅᓗᕆᐊᓇᖅᑐᒦᓐᓂᕐᒧᑦ ᓄᕙᔾᔪᐊᕐᓇᖅ-19− ᒧᑦ. ᐃᓚᒋᔭᐅᓪᓗᑎᒃ ᐸᖕᒥᐅᓗᐊᖅᑐᒦᖃᑦᑕᕐᓃᑦ ᐊᒻᒪᓗ ᐊᓂᖅᑎᕆᕕᖃᑦᓯᐊᖏᑦᑐᒦᓐᓃᑦ ᐃᓪᓗᒥ, ᐊᑐᐃᓐᓇᖃᑦᓯᐊᙱᓗᐊᕐᓃᑦ ᓂᕆᔭᒃᓴᓂᒃ ᑎᒥᒧᑦ ᐊᑐᕐᓂᓕᓐᓂᒃ, ᓴᙲᑦᑐᑦ ᐃᖢᐊᖅᓴᐃᔾᔪᑎᖏᓐᓄᑦ ᐊᐅᓚᓂᓖᑦ, ᐊᐳᖅᑕᕐᕖᑦ ᐃᖢᐊᖅᓴᖅᑕᐅᔾᔪᑎᒃᓴᓄᑦ ᐊᒻᒪᓗ ᖁᑦᓯᓗᐊᖅᑐᑦ ᓇᓗᓇᐃᖅᑕᐅᓯᒪᓂᖏᑦ ᐊᓯᖏᓐᓄᑦ ᐃᐱᓂᐊᕐᓂᕐᒧᑦ ᖃᓂᒻᒪᓯᓖᑦ. ᑐᙵᕕᒃᑯᑦ ᐊᔭᐅᖅᑐᐃᖏᓐᓇᓂᐊᖅᑐᑦ ᑭᒡᒐᖅᑐᐃᓗᑎᒃ ᐃᓄᓐᓂᒃ ᓇᓗᓇᐃᕈᑎᒃᓴᒥᒃ ᑲᓇᑕ ᒐᕙᒪᒃᑯᖏᑦ ᖃᐅᔨᕐᕚᓪᓚᖁᓪᓗᒋᑦ ᓄᓇᕗᒻᒥ ᒪᓂᒪᔪᓪᓚᕆᐅᓂᖏᓐᓂᒃ ᐳᕙᓪᓗᓇᕐᒧᑦ TB ᐊᒻᒪᓗ ᑭᒡᒍᑎᖃᖁᓪᓗᒋᑦ ᐊᑭᑐᔪᖅᑑᑎᒃᓴᓄᑦ ᑮᓇᐅᔭᓕᑕᐅᒃᑲᓐᓂᕈᑎᒃᓴᖏᓐᓂᒃ ᐃᓄᓐᓄᑦ−ᓯᕗᓕᖅᑕᐅᔪᓂᒃ ᐱᓇᓱᐊᒐᐅᔪᓂᒃ ᓄᖑᑎᑕᐅᒍᑎᒃᓴᖓᓄᑦ ᐳᕙᓪᓗᓐᓇᖅ TB.
ᑐᑭᓯᒋᐊᒃᑲᓂᕐᕕᒃᓴᖅ:
ᑭᐅᕆᓐ ᕙᓚᐅᕋᑎ
ᑐᑭᒧᐊᒃᑎᑦᑎᔨᒧᑦ ᑐᓴᐅᒪᔾᔪᑎᓕᕆᔨᒃᑯᓐᓂ ᐃᑲᔪᖅᑎ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006
