ᓴᒃᑯᑕᐅᑲᐅᑎᒋᔭᕆᐊᓕᒃ
(ᕖᕝᕗᐊᕆ 14, 2025 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᔨᐅᓚᒥ ᑑᕐᖔᓗᒃ ᖁᕕᐊᓱᑉᐳᖅ ᓴᖅᑭᑎᑦᑎᔭᕆᐊᒃᓴᖅ ᓄᓇᕗᑦ ᑐᙵᕕᒃ ᑎᒥᖓᑕ ᓄᑖᖅ ᖃᓄᖅᑑᕈᑎᓕᐊᕆᔭᐅᓯᒪᔪᑦ ᓯᕗᓪᓕᖅᐸᐅᑎᓐᓂᐊᖅᑕᖏᑦ ᐃᓄᖕᓂᒃ ᒪᑭᑉᐸᓪᓕᐊᑎᑦᑎᓂᖅ 2025-2029.
ᖃᓄᖅᑑᕈᑎ ᑕᑯᒃᓴᐅᑎᑦᑎᓗᐊᖅᐳᖅ ᓴᕿᓂᖏᓐᓂᒃ ᑖᒃᑯᐊ ᖃᓄᖅ ᓄᓇᕗᑦ ᑐᙵᕕᒃ ᑎᒥᖓ ᓯᕗᓂᒃᓴᒧᑦ ᑲᒪᒋᔭᖃᕆᐊᕐᒪᖔᑦ. ᐃᓄᖕᓂᒃ ᒪᑭᑉᐸᓪᓕᐊᑎᑦᑎᓂᖅ ᑕᑯᒃᓴᐅᑎᑦᑎᕗᖅ ᑐᐊᕕᕐᓇᖅᑑᓕᕐᓂᖓᓂᒃ ᐊᒻᒪᓗ ᑲᒪᒋᔭᖃᑦᑎᐊᖃᑦᑕᕈᒪᓂᖓᓂᒃ ᓇᓗᓇᐃᖅᓯᓗᑎᑦ ᐃᓄᒻᒪᕇᑦ ᐊᔭᐅᕆᔪᓐᓇᕈᓐᓃᕐᒪᑕ ᐊᑐᕐᓗᑎᑦ ᐱᔪᓐᓇᐅᑎᒥᓂᒃ ᓴᓂᕌᓃᑐᐃᓐᓇᕐᓗᑎᑦ. ᑭᓯᐊᓂᓕ, ᒫᓐᓇ ᑲᒪᒋᔭᐅᔭᕆᐊᖃᓕᖅᑐᖅ ᐃᓄᒻᒪᕇᑦ ᓯᕗᒃᑲᖅᑕᕐᓗᑎᑦ ᓯᕗᒧᐊᓪᓚᑦᑖᕐᓂᒃᑯᑦ, ᐃᓱᒪᓕᐅᖅᓯᒪᔪᒃᑯᑦ ᖃᓄᐃᓕᐅᕆᐊᓯᓗᑎᑦ, ᐊᒻᒪᓗ ᐱᐅᓂᖅᓴᒥᒃ ᓯᕗᓂᒃᓴᖃᑦᑎᐊᖅᑎᓕᕐᓗᑎᑦ ᑭᖑᕚᕆᔭᐅᓂᐊᖅᑐᑦ ᐱᓪᓗᒋᑦ.
ᐃᓄᖕᓂᒃ ᒪᑭᑉᐸᓪᓕᐊᑎᑦᑎᓂᖅ ᓇᓗᓇᐃᔭᐃᓯᒪᕗᖅ ᑎᓴᒪᐅᔪᖅᑐᓂᑦ ᓯᕗᓪᓕᐅᑎᓐᓂᐊᖅᑕᖏᑦ ᓄᓇᕗᑦ ᑐᙵᕕᒃ ᑎᒥᖓᑕ ᐃᖅᑲᓇᐃᔮᕆᓗᓂᒋᑦ ᐱᕚᓪᓕᖁᓪᓗᒋᑦ ᑎᓴᒪᑦ ᐊᕐᕌᒎᓂᐊᖅᑐᓄᑦ, ᐅᑯᐊᖑᓪᓗᑎᑦ:
1. ᐋᖅᑭᓱᑦᑎᐊᖅᓯᒪᔪᒃᑯᑦ ᐊᒻᒪᓗ ᖃᓄᖅᑑᖅᓯᒪᓂᒃᑯᑦ ᐱᓕᕆᖃᑎᖃᕐᓗᑎᑦ ᒐᕙᒪᒃᑯᓐᓂ − ᐊᖅᑯᓯᐅᕐᓗᑎᑦ ᐊᑑᑎᖃᑦᑎᐊᖅᑐᒃᑯᑦ ᐱᓕᕆᖃᑎᖃᕈᓐᓇᕐᓂᐊᕐᒪᑕ ᒐᕙᒪᑐᖃᒃᑯᓐᓂ ᐊᒻᒪᓗ ᓄᓇᕗᑦ ᒐᕙᒪᖏᓐᓂᒃ ᐃᓄᒻᒪᕇᑦ ᓯᕗᓕᖅᑎᐅᑎᑕᐅᓗᑎᑦ ᐊᒻᒪᓗ ᐊᐅᓚᑦᑎᓗᑎᑦ.
2. ᓂᕿᑦᑎᐊᕙᖃᖅᑎᑕᐅᓗᑎᑦ ᐃᓄᒻᒪᕇᑦ ᓈᒻᒪᑦᑐᒃᑯᑦ − ᓂᕿᖃᑦᑎᐊᙱᓐᓂᖅ ᑲᒪᒋᔭᐅᓗᓂ ᖃᓄᖅᑑᖅᓯᒪᔪᒃᑯᑦ, ᐃᓄᒻᒪᕆᓐᓄᑦ ᓯᕗᒃᑲᖅᑖᕆᔭᐅᔪᓂᒃ ᐋᖅᑭᒍᑎᒃᓴᓕᐅᕈᑎᖃᐅᖅᑐᓂᒃ.
3. ᐊᑑᑎᖃᑦᑎᐊᖅᑐᒥᒃ ᐃᖅᑲᓇᐃᔮᖃᕐᓂᖅ − ᐃᓄᒻᒪᕇᑦ ᐱᓕᕆᐊᖃᕈᒪᓕᖅᑎᓪᓗᒋᑦ ᐃᖅᑲᓇᐃᔭᓕᕐᓂᖏᑎᒍᑦ ᓈᒻᒪᒋᔭᐅᔪᓂᑦ ᐊᒻᒪᓗ ᐊᔾᔨᖃᕐᓗᓂ ᐱᔪᓐᓇᕐᓂᑦᑎᓐᓂᒃ.
4. ᐊᔪᙱᑦᑑᓗᑎᑦ ᐃᓄᒻᒪᕇᑦ ᐅᐸᓗᖓᐃᖅᓯᒪᐅᑦᑎᐊᓕᖅᑐᑦ ᐃᖅᑲᓇᐃᔭᕐᓗᑎᑦ − ᐃᓕᓐᓂᐊᖅᑎᑦᑎᒍᑎᒃᓴᓂᒃ ᐱᓕᒻᒪᒃᓴᒍᑎᒃᓴᓂᓪᓗ ᐱᓕᕆᐊᓂᒃ ᐊᐅᓚᑦᑎᓂᖃᕐᓗᑕ ᐅᐸᓗᖓᐃᖅᑕᐅᖁᓪᓗᒋᑦ ᐃᓄᒻᒪᕇᑦ ᓯᕗᒃᑲᖅᑕᕐᓂᐊᕐᒪᑕ ᐃᖅᑲᓇᐃᔮᕆᔭᐅᕙᑦᑐᓂᑦ ᑕᒪᐃᓐᓂᓕᒫᖅ.
5. ᐱᓕᕆᔪᒻᒪᕆᑯᓗᐃᑦ ᐱᕈᖅᐸᓪᓕᐊᓂᖃᖅᑐᑎᑦ ᐃᓄᒻᒪᕇᑦ ᓄᓇᓕᖏᑦ − ᑲᒪᒋᔭᐅᓗᓂ ᐃᒡᓗᖃᙱᓗᐊᖅᑐᐊᓘᖃᑦᑕᓕᕐᓂᖅ ᐊᒻᒪᓗ ᐱᖁᑎᕐᔪᐊᖃᙱᓐᓂᖅ ᒪᑭᒪᑦᑎᐊᖅᑐᑯᓗᓐᓂᒃ, ᓇᖕᒥᓂᖅ ᒪᑭᒪᔪᓐᓇᖅᑐᑯᓗᓐᓂᓗ ᓄᓇᓕᖃᓕᖁᓪᓗᑕ.
6. ᐃᓄᒃᑐᑦ ᖃᖓᓕᒫᖅ ᐊᑐᖅᑕᐅᖃᑦᑕᕐᓗᓂ − ᖃᐅᔨᒪᑦᑎᐊᕐᓗᑎᑦ ᐃᓄᒃᑐᑦ ᐊᑐᖅᑕᑦᑎᐊᕚᓘᖃᑦᑕᕐᓂᐊᕐᒪᑦ ᑐᙵᕕᒋᔭᐅᓗᓂ ᐃᓄᒻᒪᕇᑦ ᑭᓇᐅᓂᖏᓐᓂᒃ.
7. ᓄᓇᓖᑦ ᐋᓐᓂᐊᖅᑕᐃᓕᒪᓗᑎᑦ, ᖁᕕᐊᓱᓪᓗᑎᑦ, ᐊᒻᒪᓗ ᖃᓄᐃᑦᑕᐃᓕᒪᓗᑎᑦ − ᐋᖅᑮᓗᑕ ᐃᓄᒻᒪᕇᑦ ᓇᒻᒥᓂᖅ ᐃᑉᐱᒋᑦᑎᐊᕈᓐᓇᕐᓂᖃᕐᓂᐊᕐᒪᑕ, ᐋᖅᑭᒃᓱᖅᓯᒪᐅᖅᑐᑦ ᐊᐅᓚᑦᑎᕙᑦᑐᑦ ᐊᑐᖅᑕᐅᓲᓂᒃ ᓇᒥᑐᐃᓐᓇᖅ ᓇᓕᒧᒌᙱᑦᑎᑦᑎᔪᖃᙱᓪᓗᓂ.
8. ᐃᓴᒃᓯᒪᓗᑎᑦ ᐃᓕᖅᑯᓯᖃᐅᑦᑎᐊᒻᒪᕆᑦᑐᒥᒃ − ᖁᕝᕙᐹᓪᓕᖃᑎᒌᖃᑦᑕᕐᓗᑎᑦ ᐃᓄᐃᑦ ᖁᑦᑎᓐᓂᖅᓴᒧᑦ ᑐᕌᕐᓂᐊᕐᒪᑕ ᐊᒻᒪᓗ ᐲᕚᓪᓕᑦᑎᐊᖅᑐᒻᒪᕆᑯᓘᓗᑎᑦ.
ᓴᐳᒻᒥᓗᑕ ᐃᓄᒻᒪᕇᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐊᑐᕈᒪᔭᕐᒥᓂᒃ ᒪᓕᓪᓗᒍ ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎ ᑐᐊᕕᕐᓇᖅᑐᒃᑯᑦ ᑲᒪᒋᔭᐅᔭᕆᐊᖃᓕᕐᒪᑦ ᐊᒻᒪᓗ ᐱᓕᕆᐊᕆᔭᒻᒪᕆᐅᒍᒪᓕᕐᓗᓂ ᐃᖅᑲᓇᐃᔭᖃᑎᒋᓗᒋᑦ ᐱᓕᕆᖃᑎᒋᕙᑦᑕᕗᑦ. ᓯᕗᓪᓕᐅᔾᔭᐅᔭᕆᐊᖃᓛᖑᕗᕐᓕ ᓴᐳᒻᒥᐅᓯᕐᓗᒍ ᐃᓄᒃᑐᑦ ᐅᖃᐅᓯᖅ, ᑐᙵᕕᒋᔭᓪᓚᕆᐅᒻᒪᑦ ᑭᓇᐅᓂᑦᑎᓐᓄᑦ. ᓄᓇᕗᑦ ᑐᙵᕕᒃ ᑎᒥᖓ ᖃᐅᔨᒪᑦᑎᐊᖅᑎᑦᑎᓂᐊᖅᑐᑦ ᐃᓄᒃᑐᑦ ᓴᐳᔾᔭᐅᒐᓗᐊᕐᒪᖔᕐᒥᒃ ᐊᒻᒪᓗ ᐊᑐᖅᑕᐅᒃᑲᓐᓂᒻᒪᕆᓕᕐᓗᓂ. ᑕᒪᓐᓇ ᑭᒃᑯᓕᒫᓄᑦ ᑲᒪᒋᔭᐅᑦᑎᐊᕆᐊᓕᒃ ᐊᒻᒪᓗ ᖃᓄᖅᑑᕈᑎᑦᑕ ᑲᓱᖅᓯᒪᓂᖃᐅᖅᑐᓄᑦ ᓯᕗᓪᓕᐅᑎᓐᓂᐊᖅᑕᑦᑎᓐᓅᖓᓂᖃᖅᑐᓂ.
“ᐃᓄᒻᒪᕇᑦ ᑕᖃᔪᐃᑦᑑᓪᓗᑎᑦ ᓄᓇᕗᑖᕋᓱᐊᖅᓯᒪᓂᖓᓂᒃ ᐱᓯᒪᓕᕋᑦᑕ. ᒫᓐᓇᓕ ᑕᐃᒪ ᑲᒪᒋᔭᕆᐊᖃᓕᕋᑦᑎᒍᑦ ᖃᐅᔨᒪᑦᑎᐊᖅᑎᑦᑎᓗᑕ ᐃᓄᒻᒪᕇᑦ ᐱᔪᓐᓇᐅᑎᖏᑦ ᓴᐳᔾᔭᐅᓯᒪᒐᓗᐊᕐᒪᖔᕐᒥᒃ, ᑖᒃᑯᐊ ᐃᓄᐃᑦ ᒪᑭᒪᑦᑎᐊᖅᑐᒃᑯᑦ ᐱᕈᖅᐸᓪᓕᐊᓯᒪᐅᕐᓂᐊᕐᒪᑕ ᐃᓅᓯᓕᒫᑦᑎᐊᑦᑎᓐᓂ ᖃᓄᓕᒫᖅ ᑭᖑᕚᕆᔭᐅᓂᐊᖅᑐᓄᑦ ᐊᑐᖅᑕᐅᖏᓐᓇᓕᖁᓪᓗᒋᑦ.” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᑑᕐᖔᓗᒃ.
ᑕᒪᐃᓐᓂ ᑎᑎᖅᑲᖏᑦ ᐃᓄᖕᓂᒃ ᒪᑭᑉᐸᓪᓕᐊᑎᑦᑎᓂᖅ ᑕᑯᔭᐅᔪᓐᓇᖅᑐᑦ ᐅᕙᓂ:
-30-
ᐱᕙᓪᓕᐊᔪᓕᕆᔨᒃᑯᓐᓄᑦ ᖃᐅᔨᒋᐊᕐᕕᒃ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᔪᓕᕆᔨᒃᑯᓐᓄᑦ
ᓄᓇᕗᑦ ᑐᙵᕕᒃ ᑎᒥᖓ
