ᑐᓴᕋᑦᓴᓕᕆᔩᑦ

ᓄᓇᕗᑦ ᑐᙵᕕᒃᑯᑦ ᓇᓪᓕᒍᓱᒃᐳᑦ ᐃᓅᔪᓐᓃᓚᐅᕐᓂᖓᓄᑦ ᓗᐃ ᖃᒧᒃᑳᑉ, ᐅᕐᓱᖅᑑᕐᒥᐅᖅ

(ᒪᑦᓯ 27, 2018 – ᐃᖃᓗᐃᑦ, ᓄᓇᕗᑦ)  ᓄᓇᕗᑦ ᑐᙵᕕᒃᑯᑦ ᑐᖏᓕᖓ ᐊᖓᔪᖅᑳᑉ, ᔭᐃᒥᓯ ᐃᑦᑐᓗᒃ, ᓇᓪᓕᒍᓱᒃᐳᖅ ᐃᓅᔪᓐᓃᓚᐅᕐᑎᓪᓗᒍ ᓗᐃ ᖃᒧᒃᑳᖅ ᐅᕐᓱᕐᑑᕐᒥᐅᑕᖅ, ᓄᓇᕗᖕᒥ.
“ᓗᐃ ᓇᓪᓕᓐᓂᖃᕐᕕᐅᓚᐅᕐᒪᑦ ᐊᒻᒪᓗ ᐱᐅᒋᔭᐅᑦᑎᐊᕐᑐᓂ ᒪᖃᐃᑎᐅᔪᖅ ᐊᒻᒪᓗ ᓯᕗᓕᑦᑕ ᐊᑐᖅᓯᒪᔭᖏᓐᓂᒃ ᖃᐅᔨᒪᓚᐅᕐᑐᓂ ᐃᓅᓯᓕᒫᕐᒥᓂ ᓴᖅᑭᔮᕐᑎᑏᓐᓇᓚᐅᕐᐳᖅ ᐊᒻᒪᓗ ᐳᐃᒍᖅᑕᐅᖁᔨᓇᓂ ᐃᓄᐃᑦ ᐃᓕᖅᑯᓯᖏᓐᓂᒃ ᐊᒻᒪᓗ ᓯᕗᓕᑦᑕ ᐊᑐᖅᓯᒪᔭᖏᓐᓂᒃ. ᓗᐃ ᖃᐅᔨᕚᓪᓕᑎᑦᑎᕙᓚᐅᕐᐳᖅ ᐊᓯᒥᓂᒃ ᑕᑯᒃᓴᐅᑎᑦᑎᓪᓗᓂ, ᐃᓄᐃᑦ ᐃᓱᒪᔾᔪᓯᖓᒍᑦ, ᓯᕗᓕᑦᑕ ᐊᑐᖅᐸᓚᐅᕐᓯᒪᔭᖏᓐᓂᒃ ᐃᓄᐃᑦ ᑎᑭᑕᐅᕙᓕᕐᑎᓪᓗᒋᑦ ᖃᓪᓗᓈᓄᑦ ᓇᕈᔨᓄᑦ.” ᐅᖃᐅᓯᕆᓚᐅᕐᑕᖓ ᑕᐃᒫᒃ ᐃᑦᑐᓘᑉ.

ᓗᐃ ᐱᖃᑕᐅᓪᓚᕆᒃᐸᓚᐅᕐᒪᑦ ᐊᒻᒪᓗ ᑕᑎᒋᔭᐅᕙᒃᑐᓂᒃ ᕿᓂᖅᑕᐅᑎᓪᓗᒋᑦ ᐊᓯᐅᔨᔭᐅᓯᒪᔪᑦ ᐅᒥᐊᕐᔪᐊᑦ HMS ᐃᐅᕋᐸᔅ ᐊᒻᒪᓗ HMS ᑎᐅᕈ, ᑲᒪᖃᑦᑕᓐᓂᖓᓄᑦ ᓇᓂᔭᐅᔪᓐᓇᓕᓚᐅᕐᐴᒃ ᐅᒥᐊᕐᔪᐊᒥᓃᒃ ᖃᓄᐃᓕᓐᓂᕐᒪᖔᑖ ᖃᐅᔨᒪᔭᐅᔪᙱᑦᑐᑦ ᐊᓯᐅᑎᓪᓗᒍ ᐳᕋᓐᑭᓛᓐᑯᑦ.

2017-ᖑᑎᓪᓗᒍ, ᓗᐃ ᐃᓚᒋᔭᐅᓕᓚᐅᖅᐳᖅ ᐃᓕᓴᕆᔭᐅᓯᒪᖃᑕᐅᓪᓗᓂ ᓄᓇᕗᖕᒥ ᐃᓕᓴᖅᓯᔾᔪᑕᐅᔪᒥᓂᒃ ᐅᔭᒥᖕᒥᒃ ᐊᒻᒪᓗ ᐃᓕᓴᕐᓯᔾᔪᑎᒥᒃ ᑲᓇᑕᒥ. ᐃᓕᓴᕆᔭᐅᓚᐅᕐᒥᔪᖅᑕᐅᖅ ᑲᓇᑕᐅᑉ ᒐᕙᒪᒃᑯᖏᓐᓄᑦ ᑲᓇᑕᑉ ᐅᑭᐅᖅᑕᖅᑐᖓᓂ ᐃᓕᓴᕐᓯᔾᔪᑎᒥᒃ ᐊᒻᒪᓗ ᐃᓄᐃᑦ ᐱᖁᑎᖏᓐᓂᒃ ᐸᐸᑦᑎᔨᓄᑦ ᐃᓕᓴᕆᔭᐅᔾᔪᑎᒥᒃ ᐃᓕᓴᕆᔭᐅᓚᐅᕆᓪᓗᓂ.

ᓗᐃ ᖃᐅᔨᒪᔪᒻᒪᕆᐅᓚᐅᖅᑐᖅ ᐅᓂᒃᑳᓂᒃ ᐊᒻᒪᓗ ᖃᐅᔨᒪᔭᖃᖅᑐᓂ ᓄᐊᓯᒪᔭᕐᒥᓐᓂᒃ ᐃᓐᓇᖏᓐᓂᒃ ᐅᕐᓲᖅᑑᑉ. ᐅᑭᐅᑦ ᓯᑕᒪᑦ ᖁᓕᐅᓗᐊᖅᑐᓂᒃ, ᓗᐃ ᖁᕕᐊᒋᔭᒥᓂᒃ ᑲᒪᒋᐊᓯᓚᐅᖅᑐᖅ ᐃᓕᓐᓂᐊᕐᕕᐊᓗᖕᒥ ᓇᕈᔩᑦ ᖃᓄᐃᓕᐅᕐᐸᓐᓂᒥᓂᖏᓐᓂᒃ ᐃᖏᕐᕋᕙᓐᓂᒥᓂᖏᓐᓂᓪᓗ ᓄᓇᒥᓂ, ᐊᒻᒪᓗ ᑲᑎᓯᒋᐊᙵᑎᓪᓗᒋᑦ ᐃᓄᖕᓂᒃ ᐅᕐᓱᖅᑑᑉ ᕿᑭᖅᑕᖓᓂ ᐊᒻᒪᓗ ᖃᓂᒋᔭᖓᓂ.

ᖃᐅᔨᓴᕐᓯᒪᓂᖓ ᐊᒻᒪᓗ ᐃᖅᑲᓇᐃᔮᖃᖅᓯᒪᓂᖓ ᐳᐃᒍᖅᑕᐅᓂᐊᖏᓚᖅ ᑐᖅᑯᐃᕕᖓᓂ ᐊᑐᖅᑕᐅᓯᒪᔪᓂᒃ ᑲᓇᑕᒥ ᓄᓇᕗᖕᒥᓗ. ᐊᒃᓱᐊᓗᒃ ᑭᖑᓂᖃᓈᖅᑕᐅᓂᐊᖅᑐᖅ.

ᑐᑭᓯᒋᐊᑲᓐᓂᕈᓐᓇᖅᐳᑎᑦ:

ᑭᐅᓚᓐ ᕙᓚᐅᕋᑎ

ᑐᑭᒧᐊᒃᑎᑦᑎᔨᐅᑲᐃᓐᓇᕐᑐᖅ ᑐᓴᐅᒪᖃᑦᑕᐅᑎᓕᕆᔨᒃᑯᓐᓂ

ᓄᓇᕗᑦ ᑐᙵᕕᒃᑯᑦ ᑎᒥᖓᑦ

ᐅᖄᓚᐅᑖ: (867) 975-4900 ᐊᑭᓕᕆᐊᖃᙱᑦᑐᖅ: 1-888-646-0006

www.tunngavik.com