(ᐄᑉᕈ 20, 2021 – ᐃᖃᓗᐃᑦ, ᓄᓇᕗᑦ) ᐊᑯᓐᓂᖓᓂ ᓄᓇᓕᐸᐅᔭᓕᒫᖅ ᒪᑐᔭᐅᓯᒪᓂᖓᑕ ᐊᒻᒪᓗ ᐅᓄᖅᓯᕙᓪᓕᐊᑐᐃᓐᓇᑎᓪᓗᒋᑦ ᓄᕙᔾᔪᐊᕐᓇᓖᑦ−19-ᒥᒃ ᓈᓴᖅᑕᐅᓯᒪᔪᑦ, ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᐅᔾᔨᓱᖅᑐᑎᒃ ᓂᕆᐅᖕᓂᕆᔭᒥᓂᒃ 2021 ᒐᕙᒪᑐᖃᒃᑯᑦ ᑮᓇᐅᔭᖅᑑᑎᒃᓴᖏᓐᓂᒃ.
“ᑕᐃᒪᙵᑦ ᓴᖅᑭᖅᑕᐅᓚᐅᕐᒪᑕᓂᒃ ᐃᓄᐃᑦ−ᑯᐃᓐ ᐱᓇᓱᐊᖃᑎᒌᑦᑐᑦ ᑲᑎᒪᔨᕋᓛᑦ 2017-ᒥ, ᐃᓄᐃᑦ ᓯᕗᓪᓕᐅᔾᔭᐅᔭᕆᐊᓕᖁᑎᖏᑦ ᐃᓕᓴᕆᔭᐅᕙᓪᓕᐊᖏᓐᓇᖅᓯᒪᔪᑦ ᒐᕙᒪᑐᖃᒃᑯᑦ ᑮᓇᐅᔭᖅᑑᑎᒃᓴᖏᑎᒍᑦ. ᓂᕆᐅᒋᔭᖃᑦᓯᐊᖅᑐᖓ ᐊᖏᕈᑕᐅᓯᒪᔪᓂᒃ ᑮᓇᐅᔭᖅᑑᑎᒃᓴᓂᒃ ᓄᓇᖃᖅᑳᖅᓯᒪᔪᑦ ᓄᓇᓖᑦ ᐱᖁᑎᕐᔪᐊᓄᑦ ᑮᓇᐅᔭᓕᑕᐅᒍᑎᖏᓐᓂᒃ, ᐃᓕᓐᓂᐊᓵᓕᔪᑦ ᒥᑭᓂᖏᓐᓂ ᐊᒻᒪᓗ ᐋᖅᑭᑦᓱᐃᒍᑎᒃᓴᓂᒃ ᐊᕐᓇᐅᓂᖏᑦ/ᐊᖑᑕᐅᓂᖏᑦ ᐱᔾᔪᑕᐅᓪᓗᑎᒃ ᓂᖓᖃᑦᑕᓂᕐᒧᑦ. ᓄᓇᕐᔪᐊᒥ ᖃᓂᒪᓐᓇᖅ ᓇᓗᓇᐃᖅᓯᓯᒪᔪᖅ ᓴᙲᓐᓂᐅᔪᓂᒃ ᐊᑐᓂᑦ ᑖᒃᑯᐊ ᐊᐅᓚᔾᔪᑎᖏᓐᓂᒃ” ᐅᖃᖅᑐᖅ ᐊᓗᑭ ᑰᑦᑎᖅ, ᑐᙵᕕᒃᑯᑦ ᐊᖓᔪᖅᑳᖓ.
“ᓇᓗᓇᐃᖅᓯᒪᑦᓯᐊᑎᓪᓗᒍ ᖃᓄᐃᑦᑑᓂᖓ ᐃᓪᓗᓕᕆᓂᕐᒨᖓᔪᖅ ᓴᐳᔾᔨᓯᒪᒍᑎᒃᓴᒥᒃ ᐊᐃᑦᑐᕐᓘᑎᑦᑕᐃᓕᒪᓂᕐᒧᑦ ᐊᐃᑦᑐᕐᓘᑕᐅᕙᑦᑐᓂᒃ ᐋᓐᓂᐊᓂᒃ, ᓲᕐᓗ ᓄᕙᔾᔪᐊᕐᓇᖅ−19 ᐊᒻᒪᓗ ᐳᕙᓪᓗᓐᓂᖅ, ᖁᐊᖅᓵᖅᑐᖓ ᐊᒻᒪᓗ ᖁᕕᐊᒋᙱᑕᕋ ᑐᑭᓯᓇᑦᓯᐊᖅᑐᒥᒃ ᑮᓇᐅᔭᓕᑕᐅᙱᓐᓂᖓᓂᒃ ᐃᓄᐃᑦ ᐃᓪᓗᖏᓐᓄᑦ ᓄᓇᕗᒻᒥ,” ᐅᖃᖅᑐᖅ ᑰᑦᑎᖅ.
ᓄᓇᕗᒻᒥ ᐃᓄᐃᑦ ᐃᓚᓕᐅᔾᔭᐅᓚᐅᙱᑦᑐᑦ ᑲᓇᑕ ᒐᕙᒪᖓᑕ ᑮᓇᐅᔭᓖᓂᖏᓐᓂᒃ $400−ᒥᓕᔭᓂᒃ ᐃᓄᐃᑦ ᐊᔾᔨᐅᙱᓐᓂᖏᓐᓄᑦ ᐃᓪᓗᓕᕆᓂᕐᒧᑦ 2018-ᒥ. ᓄᓇᕗᑦ ᑐᙵᕕᒃ ᑎᒥᖓ ᓇᓗᓇᐃᖅᓯᒪᔪᒃᑯᑦ ᑐᓂᓯᓚᐅᖅᑐᑦ $500 – ᒥᓕᔭᓂᒃ ᑐᒃᓯᕋᖅᑐᑎᒃ ᐃᓄᐃᑦ ᐃᓪᓗᖏᓐᓄᑦ ᓄᓇᕗᒻᒥ ᐅᑭᐊᑦᓵᖓᓂ 2020, ᑐᙵᕕᒋᓪᓗᒍ ᐃᓪᓗᖃᕆᐊᓖᑦ ᓄᓇᕗᒻᒥ ᐊᔾᔨᒋᒻᒪᒋᑦ ᐊᓯᓕᒫᖏᑕ ᐃᓄᐃᑦ ᓄᓇᖓᓂ ᑲᑎᓪᓗᒋᑦ.
“ᖁᑦᓯᓗᐊᕐᓂᖓᓄᑦ ᐸᖕᒥᐅᖅᑐᒦᖃᑦᑕᖅᑐᑦ ᐃᓄᐃᑦ ᐊᖏᕐᕋᖏᓐᓂᒃ, ᐃᓄᑑᒋᐊᖃᖅᑎᑕᐅᔪᖃᖅᑎᓪᓗᒍ ᐊᑐᕐᓗᒍ ᑭᓯᐊᓂᐅᖃᑦᑕᖅᑐᖅ ᓄᓇᓕᓕᒫᑦ ᓇᒧᙶᔭᕆᐊᖃᖅᑎᑕᐅᒍᓐᓃᖅᑐᑎᒃ. ᐊᔭᐅᖅᑐᐃᓇᕐᓂᐊᖅᑕᕗᑦ ᓈᖕᒪᑦᑐᒥᒃ ᑮᓇᐅᔭᓕᑕᐅᖁᓪᓗᒋᑦ ᐃᓄᐃᑦ ᐃᓪᓗᑦᓴᖏᓐᓂᒃ,” ᐅᖃᖅᑐᖅ ᔭᐃᒥᓯ ᐃᑦᑐᓗᒃ, ᐊᖓᔪᖅᑳᑉ−ᑐᒡᓕᐊ ᑐᙵᕕᒃᑯᓐᓂ.
ᑐᙵᕕᒃᑯᑦ ᓂᕆᐅᒋᔭᓖᑦ ᓇᓗᓇᐃᖅᑐᖅᓯᒪᓂᕐᓴᓂᒃ ᐅᖃᐅᓯᖃᕐᓂᐊᕐᓂᖏᓐᓂᒃ ᐱᓇᓱᐊᕈᓯᐅᓂᐊᖅᑐᓂᒃ ᐊᒻᒪᓗ ᐃᓄᐃᑦ ᑐᓴᕆᐊᕐᕕᐅᓂᐊᕐᓂᖏᓐᓂᒃ ᐊᒻᒪᓗ ᑲᒪᖃᑕᐅᓗᑎᒃ ᐅᓄᖅᑐᓂᒃ ᐱᓇᓱᐊᒐᑦᓴᐅᖏᓐᓂ ᐃᓄᐃᑦ−ᑯᐃᓐ ᐱᓇᓱᐊᖃᑎᒌᑦᑐᑦ ᑲᑎᒪᔨᕋᓛᑦ ᐅᕝᕙᓘᓐᓃᑦ ᐱᓇᓱᐊᖃᑎᒌᓐᓂᒃᑯᑦ.
ᓄᓇᕗᑦ ᓯᐊᒻᒪᕐᕕᐅᑐᐃᓐᓇᕆᐊᖃᒻᒪᕆᓐᓂᖓ ᓄᕙᔾᔪᐊᕐᓇᕐᒧᑦ−19 ᓄᓇᕐᔪᐊᒥ ᖃᓂᒪᓐᓇᕐᒧᑦ ᓴᖅᑭᖅᓯᒪᔪᖅ ᑲᒪᒋᔭᐅᒻᒪᐃᑦᑐᑐᖃᐅᓂᖏᓐᓄᑦ ᐃᓅᓯᕐᒧᑦ ᒪᑭᒪᔾᔪᑎᓄᓪᓗ ᐊᔾᔨᐅᑎᑕᐅᖃᑦᑕᖏᓐᓂᖏᓐᓄᑦ ᓄᓇᕗᒻᒥ ᐃᓄᐃᑦ.
-30-
ᑐᑭᓯᒋᐊᒃᑲᓂᕐᕕᒃᓴᖅ:
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨᐅᓂᕐᒥᒃ ᑐᓴᐅᒪᔾᔪᑎᓕᕆᔨᒃᑯᓐᓂ ᐃᓕᓐᓂᐊᖅᑐᖅ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006
ᖃᓄᐃᓕᐅᕈᑕᐅᓯᒪᓂᖓ
ᒫᑦᓯ 2017-ᒥ ᐃᑦᑑᑏᑦ ᑲᑎᒪᔨᕋᓛᑦ ᐅᓂᒃᑳᖏᓐᓂ, ᐱᑦᓯᐊᕆᐊᒃᑲᓐᓂᕈᓐᓇᖅᑐᒍᑦ: ᐃᓪᓗᓕᕆᓂᖅ ᐃᓄᐃᑦ ᓄᓇᖓᓂ, ᐅᖃᐅᓯᐅᓚᐅᖅᑐᖅ ᐃᓪᓗᖃᑦᓯᐊᖏᓐᓂᖅ ᑭᒃᑯᑐᐃᓐᓇᕐᓄᑦ ᐃᓗᕐᕆᙱᓐᓂᕐᒧᑦ ᐱᓗᖅᑯᑎᒻᒪᕆᐅᕙᑦᑐᖅ ᐃᓄᐃᑦ ᓄᓇᖓᓂ ᐳᕝᕕᕆᓂᒃᑯᑦ ᐋᓐᓂᐊᓃᑦ, ᐱᓗᐊᖅᑐᒥ, ᓯᐊᒻᒪᐸᓪᓕᐊᑐᐃᓐᓈᓂᑦᑐᖅ, ᐳᕙᓪᓗᖃᑦᑕᕐᓃᑦ ᖁᕝᕙᓯᓐᓂᖏᑦ ᓈᓴᖅᑕᐅᓯᒪᓂᖓᒍᑦ ᐅᖓᑖᓂ 250 ᐱᓂᖅᓴᐅᓪᓗᓂ ᓄᓇᖃᖅᑳᖅᓯᒪᙱᑦᑐᓂᒃ ᑲᓇᑕᒥᐅᓂᒃ, ᐊᒻᒪᓗ ᐳᕝᕕᕆᕙᑦᑐᑦ ᖁᕝᕙᓯᑦᑐᒻᒪᕆᐅᓂᖏᓐᓂᒃ ᐋᓐᓂᐊᓃᑦ ᐃᓄᐃᑦ ᓄᑕᖅᑲᑦ, ᐃᓚᒋᔭᐅᓪᓗᑎᒃ ᐃᐱᓂᐊᓕᖅᑕᐅᑎᓖᑦ ᐳᕙᓪᓗᓂᕐᒧᑦ, ᑭᖑᓂᐊᒍᑦ ᐃᐱᓂᐊᓕᖅᑕᐅᑎᑖᖃᑦᑕᖅᑐᑦ ᐋᓐᓂᐊᓂᒃ, ᐊᒃᑐᐊᔪᓂᒃ ᑕᕝᕙᙵᑦ ᐸᖕᒥᐅᓗᐊᖅᑐᒦᖃᑦᑕᕐᓂᖏᓐᓄᑦ ᐊᒻᒪᓗ ᐊᓂᖅᑎᕆᕕᖃᑦᓯᐊᖏᑦᑐᓂᒃ ᐊᖏᕐᕋᕐᓂᒃ.
ᐆᑦᑑᑉᐱᕆ 2020-ᒥ, ᓄᓇᕗᑦ ᑐᙵᕕᒃᑯ ᑎᒥᖓ ᓴᖅᑮᓚᐅᖅᑐᖅ ᓄᓇᕗᒻᒥ ᐱᖁᑎᕐᔪᐊᓕᕆᓂᕐᒧᑦ ᐊᐳᖅᑕᕐᕖᑦ. ᓇᕝᕚᓚᐅᖅᑐᑦ, ᑕᒪᐃᓐᓂ 18−ᓂ ᓯᕗᓪᓕᐅᔾᔭᐅᔭᕆᐊᓕᓐᓂ ᐱᖁᑎᕐᔪᐊᓕᕆᓂᕐᒨᖓᔪᓂᒃ ᖃᐅᔨᓴᖅᑕᐅᓯᒪᔪᓂᒃ, ᓄᓇᕗᑦ ᓵᙵᑦᓯᖃᑦᑕᖅᑐᖅ ᓇᓗᓇᐃᖅᑕᐅᒍᓐᓇᖅᑐᓂᒃ ᖃᐅᔨᓴᖅᑕᐅᒍᓐᓇᖅᑐᓂᓪᓗ ᐱᖁᑎᕐᔪᐊᓄᑦ ᐊᐳᖅᑕᕐᕕᓕᒃ ᐊᓯᓕᒫᖓᑦᑕᐅᖅ ᑲᓇᑕᒥ. ᐊᐳᖅᑕᕐᕕᒃ ᐅᔾᔨᓇᖅᑐᒥᒃ ᓈᖕᒪᒍᓐᓃᕈᑕᐅᓯᒪᔪᖅ ᓱᕋᐃᓯᒪᓪᓗᓂ ᓄᓇᕗᒻᒥ ᐃᓄᓐᓂᒃ ᐊᒻᒪᓗ ᐅᔾᔨᕆᔭᐅᒋᐊᓕᒃ, ᑮᓇᐅᔭᓕᑕᐅᓗᓂ ᐊᒻᒪᓗ ᐊᐅᓚᔾᔭᐃᒍᑕᐅᒋᐊᓕᒃ ᑲᓱᕈᑎᒃᓴᖓᓂᒃ ᐊᐳᖅᑕᕐᕕᐅᔫᑉ.
