(ᐄᑉᕈ 29, 2022, ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᓂ (ᑐᙵᕕᒃ) ᐊᖓᔪᖅᑳᖓ ᐊᓗᑭ ᑰᑦᑎᖅ ᐊᑯᓐᓂᐅᑎᓚᐅᖅᑐᖅ ᓄᓇᕐᔪᐊᒥ ᑲᑎᒪᔨᕐᔪᐊᑦ ᑲᑎᒪᓂᖏᓐᓂ ᓄᓇᖃᖅᑳᖅᓯᒪᔪᓕᕆᓂᕐᒧᑦ (UNPFII) ᐋᔩᕋᕈᑎᖃᖅᑎᓪᓗᒋᑦ ᑲᓇᑕ ᑲᔪᓯᑎᑦᓯᓯᒪᙱᓐᓂᖓᓂᒃ ᐋᖅᑭᒋᐊᕆᓂᕐᒥᒃ ᐊᐅᓚᔾᔪᑕᐅᔪᒧᑦ ᐊᔾᔨᒌᒃᑎᑕᐅᖃᑕᖏᒪᑕ ᒪᓕᒐᖅᑎᒍᑦ ᐃᓕᓐᓂᐊᓂᕐᒧᑦ.
ᐊᖓᔪᖅᑳᖅ ᑰᑦᑎᖅ ᐊᑯᓐᓂᐅᑎᓚᐅᖅᑐᖅ UNPFII ᐋᔩᕋᕈᑎᖃᖅᑎᓪᓗᒋᑦ ᐃᓕᓐᓂᐊᓂᕐᒥᒃ ᐊᒻᒪᓗ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓂᒃ. ᐅᖃᐅᓯᖃᓚᐅᖅᑐᖅ ᐊᐅᓚᑦᓯᔾᔪᑕᐅᕙᑦᑐᖅ ᓱᕋᐃᓯᒪᓂᖓᓂᒃ ᐊᒻᒪᓗ ᐊᔾᔨᒌᒃᑎᑕᐅᖃᑕᖏᒪᑕ ᒪᓕᒐᖅᑎᒍᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᑲᓇᑕᒥ ᐋᔩᕋᕈᑕᐅᖏᓐᓇᕐᓂᖓᓂᒃ ᑖᒃᑯᓅᖓ ᑲᓇᑕᒥ ᒐᕙᒪᑐᖃᒃᑯᓐᓄᑦ ᐊᒻᒪᓗ ᓄᓇᕗᑦ ᒐᕙᒪᒃᑯᑦ ᒪᓕᒐᑦᓴᖏᓐᓂ, ᐊᑐᐊᒐᕐᓂ, ᐊᒻᒪᓗ ᐊᑐᖅᑕᐅᔪᓂ.
ᓄᓇᕗᑦ ᒐᕙᒪᒃᑯᑦ ᐋᖅᑭᒋᐊᕈᑎᖏᓐᓂ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᓄᑦ ᐊᒻᒪᓗ ᐃᓄᐃᑦ ᐅᖃᐅᓯᖓᑕ ᓴᐳᒻᒥᔭᐅᓂᖓᓄᑦ ᐱᖁᔭᒥ 2019-2020 ᐊᔪᕐᓇᓂᖅᓴᐅᑎᑦᓯᒻᒪᕆᒍᑕᐅᔪᖅ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐃᓄᒃᑐᑦ− ᐃᓕᓐᓂᐊᓂᕐᒥᒃ. ᒐᕙᒪᒃᑯᑦ ᓱᓕ ᐊᐅᓚᑕᐅᔾᔪᓯᒃᑯᑦ ᐊᔾᔨᒌᒃᑎᑕᐅᖃᑕᖏᒪᑕ ᒪᓕᒐᖅᑎᒍᑦ ᐃᓄᓐᓂᒃ ᐃᓕᓐᓂᐊᖅᑎᓂᒃ − ᑖᒃᑯᐊ 94%−ᖏᑦ ᐃᓕᓐᓂᐊᖅᑏᑦ ᓄᓇᕗᒻᒥ − ᐃᓕᓐᓂᐊᑎᑦᓯᓪᓗᑎᒃ ᐊᐅᓚᑦᓯᔾᔪᓯᒃᑯᑦ ᑖᒃᑯᓇᙶᖅᓯᒪᔪᓂᒃ ᓲᖑᓂᖅᓴᐅᑎᑕᐅᔪᓂᒃ ᖃᓪᓗᓈᑎᑐᑦ ᐅᐃᕖᑎᑐᓪᓘᓐᓃᑦ. ᐃᓄᐃᑦ ᐊᖏᖅᑕᐅᓯᒪᙱᑦᑐᑦ ᓇᓕᒧᖓᓂᒃ ᐃᓕᓐᓂᐊᖅᑎᑕᐅᔪᓐᓇᕈᑎᒃᓴᖏᓐᓂᒃ ᓇᖕᒥᓂᖅ ᐅᖃᐅᓯᑦᑎᒍᑦ ᐃᓕᖅᑯᓯᑦᑎᒍᓪᓗ.
ᑕᒪᓐᓇ ᓯᖁᒥᑦᓯᓂᐅᔪᖅ ᑐᙵᕕᔾᔪᐊᒃᑯᑦ ᓴᐳᔾᔭᐅᓯᒪᔪᒥᒃ ᓇᓕᒧᒌᒥᒃ ᐱᔪᓐᓇᐅᑎᖃᕐᓂᖏᓐᓂᒃ ᐃᓄᐃᑦ ᒪᓕᒐᕐᔪᐊᓂ ᑲᓇᑕᒥ ᒪᓕᒐᕐᔪᐊᑦ ᐱᔪᓐᓇᐅᑎᖃᕐᓂᕐᒧᑦ ᐃᓱᒪᖅᓱᕈᓐᓇᓂᕐᒧᓪᓗ (ᑖᓐᓇ ᒪᓕᒐᕐᔪᐊᖅ). ᑭᓯᐊᓂ ᓄᓇᕗᑦ ᒐᕙᒪᒃᑯᑦ, ᑭᐅᔾᔪᑎᒥᓂᒃ ᐊᐅᓚᔾᔭᐃᒋᐊᕐᓂᕐᒧᑦ ᓴᒃᑯᐃᖁᔨᔾᔪᑎᒥᒃ ᑐᙵᕕᒃᑯᑦ ᐃᖅᑲᑐᖅᑕᐅᑎᑦᓯᔾᔪᑎᒥᒃ ᑐᓂᓚᐅᖅᑕᖓᓂᒃ, ᑖᒃᑯᑐᐊᓐᓂᒃ ᐅᖃᐅᓯᕐᒥᒃ ᐃᓕᓐᓂᐊᕈᑎᑦᓴᑑᓂᕋᐃᓪᓗᑎ ᐱᔪᓐᓇᐅᑎᑎᒍᑦ ᑲᓇᑕᒥ ᐅᐃᕖᑎᑐᑦ ᖃᓪᓗᓈᑎᑐᓪᓗ.
“ᒐᕙᒪᒃᑯᑦ ᐅᑉᐱᕈᓱᓪᓚᑦᑖᕆᐊᓖᑦ ᐊᐅᓚᑦᓯᒍᓐᓇᕐᓂᖏᓐᓂᒃ ᐃᓄᐃᑦ ᐊᒻᒪᓗ ᐃᖅᑲᓇᐃᔮᓂᒃ ᑎᒍᓯᒃᑲᓐᓂᕈᑎᒃᓴᒥᒃ ᐊᐅᓚᑦᓯᒍᓐᓇᕐᓂᖏᓐᓂᒃ. ᒥᑭᓪᓕᑎᑕᐅᓯᒪᓂᖓ ᐃᓄᒃᑐᑦ ᐅᖃᐅᓯᖅ ᐃᓕᓴᐃᔾᔪᑕᐅᓂᖓᓂᒃ ᐅᖃᐅᓯᖅ ᐃᓕᓐᓂᐊᑲᐃᓐᓇᖅᑕᐅᖃᑦᑕᕐᓂᖓᓄᑦ ᐊᒻᒪᓗ ᑭᖑᕙᕆᐊᖅᑎᑕᐅᓂᖓ ᐊᕐᕌᒍ 2039 ᑕᑯᓐᓇᖅᑕᖓᓃᙶᖅᑐᖅ ᐊᔪᙱᔾᔪᑎᓕᓐᓂᒃ ᐃᓕᓴᐃᔨᖃᙱᓗᐊᕐᓂᖓᓄᑦ ᐃᓄᓐᓂᒃ ᐱᕋᔭᐃᒍᑕᐅᔪᖅ ᒪᓕᒐᒃᑯᑦ. ᐊᖏᕈᑕᐅᓯᒪᓂᖓ ᐊᒻᒪᓗ ᓄᑖᓂᒃ ᓴᖅᑮᓂᕐᒥᒃ ᐊᐅᓚᔾᔭᐃᒋᐊᕈᑎᓂᒃ, ᐃᓄᐃᑦ ᓄᑕᖅᑲᑦ ᐃᓕᓐᓂᐊᖅᑎᑕᐅᒍᓐᓇᖅᑐᑦ ᐃᓄᒃᑐᑦ, ᐃᓄᓐᓄᑦ ᓄᓇᕗᒻᒥ ᐃᓕᓐᓂᐊᕐᓂᓕᕆᓂᕐᒧᑦ ᐊᐅᓚᓂᖓᒍᑦ,” ᐅᖃᖅᑐᖅ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ.
21−ᒋᓕᖅᑕᖓᓂ ᑲᑎᒪᓂᖓ UNPFII ᐄᑉᕈ 25-ᒥᓂᒃ ᒪᐃ 6−ᒧᓄᑦ 2022 ᓄᓇᕐᔪᐊᒥ ᑲᑎᒪᔨᕐᔪᐊᑦ (UN) ᐊᖓᔪᖅᑳᒃᑯᕕᖓᓂ ᓅ ᔪᐊᒃᒥ, ᓅ ᔪᐊᒃ. UN ᐊᖏᕈᑎᖃᓚᐅᖅᑐᑦ UN ᓇᓗᓇᐃᖅᓯᒍᑎᖓᓂᒃ ᐱᔪᓐᓇᐅᑎᖏᓐᓂᒃ ᓄᓇᖃᖅᑳᖅᓯᒪᔪᑦ (UNDRIP) 2007-ᒥ, ᐱᔪᓐᓇᐅᑎᖃᕈᑕᐅᔪᓂᒃ ᓄᓇᖃᖅᑳᖅᓯᒪᔪᓄᑦ:
- ᐆᒻᒪᑎᑦᓯᒋᐊᒃᑲᓂᕐᓂᕐᒥᒃ, ᐊᑐᕐᓂᕐᒥᒃ, ᐋᖅᑭᑦᓱᐃᓂᕐᒥᒃ, ᐊᒻᒪᓗ ᓯᐊᒻᒪᖅᑎᕆᓂᕐᒥᒃ ᓯᕗᓂᑦᑎᓐᓂ ᑭᖑᕚᖑᓂᐊᖅᑐᓄᑦ ᐊᑐᖅᓯᒪᔭᒥᓂᒃ, ᐅᖃᐅᓯᕐᒥᓂᒃ, ᐅᖃᐅᓯᒃᑯᑦ ᐅᓂᒃᑳᓂᒃ, ᐱᖕᒪᕆᐅᔪᖁᑎᒥᓂᒃ, ᑎᑎᕋᐅᓯᕐᒥᓂᒃ ᐊᒻᒪᓗ ᑎᑎᖅᑭᕆᔾᔪᓯᕐᒥᓂᒃ; ᐊᒻᒪᓗ
- ᓴᖅᑭᓂᕐᒥᒃ ᐊᐅᓚᑦᓯᓂᕐᒥᓪᓗ ᐃᓕᓐᓂᐊᕈᑎᓄᑦ ᐊᐅᓚᑦᓯᔾᔪᓯᕐᒥᓂᒃ ᐊᒻᒪᓗ ᐃᓕᓴᕕᖕᓂᒃ ᐃᓕᓐᓂᐊᕐᕕᐅᖃᑦᑕᓂᐊᖅᑐᓂᒃ ᓇᖕᒥᓂᖅ ᐅᖃᐅᓯᕐᒥᒍᑦ, ᓈᖕᒪᑦᓯᐊᕐᓗᓂ ᐃᓕᖅᑯᓯᒃᑯᑦ ᐱᔾᔪᓯᖏᓐᓄᑦ ᐃᓕᓴᐃᓂᕐᒧᑦ ᐃᓕᓐᓂᐊᓂᕐᒧᓪᓗ.
ᑲᓇᑕ ᑲᔪᓯᑎᓚᐅᖅᑕᖓ UNDRIP 2016-ᒥ ᐊᒻᒪᓗ ᓄᓇᕐᔪᐊᒥ ᑲᑎᒪᔨᕐᔪᐊᑦ ᓇᓗᓇᐃᖅᑐᓂᐅᒃ ᐱᔪᓐᓇᐅᑎᖏᑦ ᓄᓇᖃᖅᑳᖅᓯᒪᔪᑦ ᐱᖁᔭᖓᓄᑦ ᐊᖏᖅᑕᐅᓚᐅᕐᓂᖏᓐᓂᒃ ᒐᕙᒪᑐᖃᒃᑯᓐᓄᑦ ᑲᔪᓯᑎᑕᐅᓪᓗᑎᒃ ᔫᓂ 21, 2021.
-30-
ᑐᑭᓯᒋᐊᒃᑲᓂᕐᕕᒃᓴᖅ:
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨᐅᓂᕐᒥᒃ ᑐᓴᐅᒪᔾᔪᑎᓕᕆᔨᒃᑯᓐᓂ ᐃᓕᓐᓂᐊᖅᑐᖅ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006
