ᐅᔾᔨᕆᔭᐅᒋᐊᓕᒃ: ᑖᒃᑯᐊ ᐅᖃᐅᓯᐅᔪᑦ ᑖᒃᑯᓇᓂ ᐃᑉᐱᓐᓂᕈᑕᐅᑐᐃᓐᓇᕆᐊᓕᒃ ᐃᓗᓕᖃᕐᒪᑕ ᐅᖃᐅᓯᐅᓯᒪᔪᓂᒃ ᑐᖁᕋᖅᑕᐅᖃᑦᑕᐅᓯᒪᓂᖏᓐᓂᒃ ᓄᓇᖃᖅᑳᖅᓯᒪᔪᑦ ᐊᒻᒪᓗ ᑲᔪᓯᐊᓂᖓ ᐃᖅᑲᓇᕐᓂᖓ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᓯᒪᔪᑦ.
(ᔫᓂ 28, 2021 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᐃᑉᐱᓇᖅᑐᒥᒃ ᒪᑭᒪᖃᑎᖃᕆᐊᕐᓂᖃᖅᐳᑦ ᑯᐃᓰᓯᔅ ᐊᓪᓚᓂᒃ ᐊᒻᒪᓗ ᑲᑐᔾᔨᖃᑎᒌᕐᔪᐊᓂᒃ ᐃᓐᓃᓯᒪᔪᓂᒃ ᓄᓇᖃᖅᑳᖅᓯᒪᔪᓂᒃ ᓇᓂᔭᐅᓚᐅᖅᑎᓪᓗᒋᑦ ᑎᒥᖏᑦ 751 ᓄᑕᖅᑲᑦ ᐃᓕᓐᓂᐊᕆᐊᕐᕕᐅᖃᑦᑕᓚᐅᖅᑑᑉ ᓄᓇᖓᓂ ᓵᔅᑳᑦᓯᕗᐊᒥ.
“ᓇᓪᓕᒋᕙᕗᑦ ᑯᐃᓰᓯᔅ ᐊᓪᓚᐃᑦ, ᐆᒻᒪᑎᒃᑯᑦ ᓇᒡᓕᒋᕙᕗᑦ ᐊᓐᓇᓯᒪᔪᓄᑦ ᐃᓚᖏᓐᓄᓪᓗ ᓄᓇᖓᓂ, ᐊᒻᒪᓗ ᐅᕙᒍᑦ ᑕᒪᑦᑕ ᐊᓐᓇᓯᒪᔪᒍᑦ ᐃᓕᓐᓂᐊᕆᐊᕕᒻᒨᖅᑕᐅᓚᐅᖅᓯᒪᔪᒍᑦ ᐊᒻᒪᓗ ᓄᓇᖃᖅᑳᖅᓯᒪᔪᑦ ᓄᓇᓖᑦ ᓇᓂᑐᐃᓐᓇᖅ ᐊᒃᑐᖅᑕᐅᓯᒪᔪᒻᒪᕆᐅᔪᑦ ᐃᑎᔪᒥᒃ ᑖᒃᑯᓄᖓ ᐱᕙᓪᓕᐊᔪᑎᒍᑦ ᑐᓴᖅᑎᑦᓯᒍᑕᐅᕙᑦᑐᓄᑦ” ᐅᖃᓚᐅᖅᑐᖅ ᐊᓗᑭ ᑰᑦᑎᖅ, ᑐᙵᕕᒃᑯᑦ ᐊᖓᔪᖅᑳᖓ.
“ᓇᓂᔭᐅᒃᑲᓐᓂᓚᐅᖅᑐᑦ ᓇᓗᓇᐃᒃᑯᓯᖅᑕᐅᓯᒪᙱᑦᑐᑦ ᐃᓗᕕᖅᓯᒪᔪᑦ ᐃᓗᕕᖃᕐᕕᓐᓂ ᐊᒥᓱᕐᔪᐊᕌᓗᐃᑦ ᓱᕈᓯᑯᓗᐃᑦ ᐱᕋᔭᓯᒪᓂᖃᙱᑦᑐᑦ ᐃᓕᓐᓂᐊᕆᐊᖅᑎᑕᐅᕕᐅᕙᓚᐅᖅᑐᒥ ᓇᓗᓇᐃᕈᑕᐅᔪᖅ ᓄᓇᖃᖅᑳᖅᓯᒪᔪᑦ ᐅᖃᐅᓯᕆᖃᑦᑕᖅᓯᒪᔭᑐᖃᖏᓐᓂᒃ ᐊᕐᕌᒍᕋᓴᔾᔪᐊᓂ, ᑲᓇᑕ ᒐᕙᒪᒃᑯᖏᑦ ᐊᒻᒪᓗ ᐃᑦᓯᕋᕐᔪᐊᑦ ᑳᑐᓕᒃ ᐱᓂᕐᓗᖃᑦᑕᕐᓂᕆᓯᒪᔭᖏᓐᓂᒃ ᐃᓕᖅᑯᓯᖏᓐᓂᒃ ᑐᖁᑎᑦᓯᓇᓱᐊᕐᓂᕐᒧᑦ ᐊᓪᓚᐃᑦ, ᐊᓪᓚᖓᔪᑦ ᐊᒻᒪᓗ ᐃᓄᐃᑦ ᑖᒃᑯᑎᒎᓇ ᓄᖑᑎᑦᓯᓇᓱᐊᕐᓂᕐᒧᑦ ᐊᒻᒪᓗ ᐃᓕᖅᑯᓯᕆᙱᑕᖏᓐᓂᒃ ᐃᓕᖅᑯᓯᖅᑖᑎᑦᓯᓇᓱᐊᕐᓂᕐᒧᑦ ᐊᑐᐊᒐᕐᒥᒍᑦ,” ᐅᖃᖅᑐᖅ ᐊᓗᑭ ᑰᑦᑎᖅ, ᑐᙵᕕᒃᑯᑦ ᐊᖓᔪᖅᑳᖓ.
ᐃᓄᐃᑦ ᐅᑭᐅᖅᑕᖅᑐᓕᒫᒥ ᐱᓇᓱᐊᒐᐅᓚᐅᕐᒥᔪᑦ ᑕᕝᕘᓇᑦᓴᐃᓐᓇᖅ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᕐᒥᔪᑦ ᐊᓯᐊᒎᕐᕕᖃᙱᑦᑐᒥᒃ ᐊᑐᖅᑎᑕᐅᓪᓗᑎᒃ ᑲᑐᔾᔭᐅᔪᒥᒃ ᐊᐅᓚᑕᐅᓪᓗᑎᒃ ᐋᖕᓕᑲᒃᑯᑦ ᐃᑦᓯᕋᕐᔪᐊᑯᓪᓗ ᑐᑦᓯᐊᕐᕕᖏᓐᓄᑦ ᐊᒻᒪᓗ ᑲᓇᑕ ᒐᕙᒪᒃᑯᖏᓐᓄᑦ, ᐱᒋᐊᖅᑐᓂ 1926, ᑎᑭᑦᑐᒍᑦ ᐃᓱᐊᓄᑦ 1997.
ᑖᒃᑯᐊ ᐋᖕᓕᑲᒃᑯᑦ ᑐᑦᓯᐊᕐᕕᖏᑦ, ᐃᑦᓯᕋᕐᔪᐊᒃᑯᑦ ᑐᑦᓯᐊᕐᕕᖏᑦ ᑲᓇᑕᒥ, ᐊᒻᒪᓗ ᑲᓇᑕ ᒐᕙᒪᒃᑯᖏᑦ ᐃᓕᓴᕆᔭᐅᓯᒪᔪᒃᑯᑦ ᒪᒥᐊᓐᓂᖃᖅᓯᒪᒐᓗᐊᖅᑎᓪᓗᒋᑦ ᑖᖅᑐᐊᓗᒃᑰᑎᑦᓯᖃᑦᑕᕐᓂᒥᓂᕐᒥᓄᑦ, ᓇᓗᓇᐃᕈᑕᐅᓪᓗᓂ ᓇᓂᔭᐅᒃᑲᓐᓂᖅᑐᖃᓚᐅᖅᑎᓪᓗᒍ ᓴᖅᑮᔪᖅ ᓱᓕᔪᒥᒃ ᓴᐃᒻᒪᖃᑎᒌᓂᖅᑕᖃᕆᐊᖃᕐᓂᖓᓂᒃ ᑕᑎᒃᓴᐅᖏᓐᓇᖅᑐᒥᒃ ᐊᖏᕈᑕᐅᓯᒪᑦᓯᐊᖅᑐᒥᓪᓗ, ᐃᓚᒋᔭᐅᓪᓗᑎᒃ ᐃᓕᓴᕆᔭᐅᓯᒪᔪᒃᑯᑦ ᒪᒥᐊᕝᕕᐅᓂᖅ ᐊᑖᑕᑦᓯᐊᕌᓗᒻᒥᒃ ᐃᑦᓯᕋᕐᔪᐊᒃᑯᑦ ᑐᑦᓯᐊᕐᕕᖓᓂᒃ. ᐱᖓᓱᓪᓗᐊᑕᐅᓚᐅᖅᑐᑦ ᐊᖏᔫᑏᑦ ᐃᓕᓐᓂᐊᕆᐊᕐᕕᐅᖃᑦᑕᓚᐅᖅᑐᑦ ᐊᐅᓚᑕᐅᔪᑦ ᐃᑦᓯᕋᕐᔪᐊᑯᓐᓄᑦ ᐅᑭᐅᖅᑕᖅᑐᒥ, ᐃᓚᒋᔭᐅᓪᓗᑎᒃ Immaculate Conception ᑐᒃᓯᐊᕐᕕᖓ ᐊᒃᓛᕕᒻᒥ, ᒍᕉᓕᐊ ᕼᐊᓪ ᐃᓅᕕᒻᒥ ᐊᒻᒪᓗ ᑑᑯᑎᐊ ᕼᐊᓪ ᐃᒡᓗᓕᒑᕐᔪᒻᒥ.
ᐅᓄᖅᑐᑦ ᐃᓄᐃᑦ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᑐᑦ ᐊᓐᓇᓯᒪᔪᑦ ᐊᖓᔪᖅᑳᖏᓪᓗ ᐃᓅᒍᓐᓃᖅᓯᒪᔪᑦ ᑐᓴᓚᐅᖅᓯᒪᓇᑎᒃ ᐃᓕᓴᕆᔭᐅᓯᒪᓂᕐᒧᑦ ᒪᒥᐊᕝᕕᐅᓂᕐᒥᒃ, ᐊᓪᓛᑦ ᐊᑭᓕᖅᑕᐅᓚᐅᖅᓯᒪᓇᑎᒃ ᐊᓪᓛᑦ ᖃᐅᔨᕐᕙᓚᑦᑕᐅᓚᐅᖅᓯᒪᓇᑎᒃ ᐋᓐᓂᐊᑎᑕᐅᖃᑦᑕᖅᓯᒪᓂᐅᔪᓂᒃ ᐃᓕᓐᓂᐊᕆᐊᕐᕕᐅᖃᑦᑕᓚᐅᖅᓯᒪᔪᓂᒃ. ᑭᓯᐊᓂ ᐅᓪᓗᒥ, ᐅᓄᖅᑐᑦ ᐊᓐᓇᓯᒪᔪᑦ ᐊᖓᔪᖅᑳᖏᓪᓗ ᐆᒪᔪᑦ ᐃᖅᑲᐅᒪᔪᑦ ᐊᑐᖅᓯᒪᔭᒥᓂᒃ ᑲᙳᑦᓯᓇᖅᑐᒃᑯᑦ, ᒥᑭᓪᓕᑎᑕᐅᓯᒪᓂᒃᑯᑦ, ᐃᓄᑑᑎᑕᐅᖃᑦᑕᖅᓯᒪᓂᒃᑯᑦ, ᐊᒻᒪᓗ ᓇᓗᓕᖅᓯᒪᓂᒃᑯᑦ ᐅᖃᐅᓯᖅᑕᖃᙱᒻᒪᕆᑦᑐᒥᒃ ᐋᓐᓂᑎᖅᑕᐅᖃᑦᑕᖅᓯᒪᓂᕐᒥᒃ ᐊᒡᒐᖏᑎᒍᑦ ᐃᑦᓯᕋᕐᔪᐊᑦ ᓇᔭᐃᓪᓗ ᐊᐅᓚᑦᓯᖃᑦᑕᓚᐅᖅᑐᑦ ᐃᓕᓐᓂᐊᕆᐊᕐᕕᐅᓯᒪᔪᓂᒃ. ᑖᒃᑯᐊᓕᒫᑦ ᐃᑦᓯᕋᕐᔪᐊᑦ ᓇᔭᐃᓪᓘᓐᓃᑦ ᓵᖓᔭᐅᓚᐅᖅᓯᒪᙱᑦᑐᑦ ᐊᓪᓛᑦ ᐱᕋᔭᓯᒪᓂᖏᓐᓂᒃ ᐸᓯᔭᐅᓚᐅᖅᓯᒪᙱᑦᑐᑦ, ᐊᓪᓛᑦ ᐃᓕᓐᓂᐊᖅᑎᒥᓃᑦ ᐱᔪᓐᓇᕆᐊᖅᓯᒪᓂᕐᒥᒍᑦ ᐅᓂᒃᑳᖃᑦᑕᓕᕋᓗᐊᕐᒪᑕ 1990-ᖏᓐᓂ ᐅᓪᓗᒥᒧᑦ ᐊᓪᓛᑦ. ᐃᓄᐃᑦ ᑐᑭᓯᒪᑦᓯᐊᖅᑐᑦ ᓂᐸᐃᑦᑑᓂᖏᓐᓂᒃ, ᑐᓴᖅᑎᓯᑦᑕᐃᓕᖃᑦᑕᖅᓯᒪᓂᖏᓐᓂᒃ ᐊᒻᒪᓗ ᐱᔪᒪᙱᓂᕐᒥᓐᓂᒃ ᐃᑦᓯᕋᕐᔪᐊᒃᑯᑦ ᑐᑦᓯᐊᕐᕕᖏᑦ ᐊᒻᒪᓗ ᑲᓇᑕ ᒐᕙᒪᒃᑯᖏᑦ ᖃᐅᔨᕐᕚᓚᒐᓱᐊᖅᓯᒪᙱᓐᓂᖏᓐᓂᒃ ᐃᓕᖅᑯᓯᖏᑦ ᑐᖁᑕᐅᓯᒪᓂᖏᓐᓄᑦ ᐊᓪᓚᐃᑦ, ᐊᓪᓚᖓᔪᑦ ᐊᒻᒪᓗ ᐃᓄᐃᑦ ᑲᓇᑕᓕᒫᒥ, ᑲᔪᓯᑐᐃᓐᓇᖅᓯᒪᒻᒪᑕ ᐊᒻᒪᓗ ᐊᔭᐅᖅᑐᐃᓪᓗᑎᒃ ᑕᑎᒃᓴᐅᑦᓯᐊᕆᐊᖃᕐᓂᕐᒧᑦ ᐃᓘᓐᓈᒍᑦ ᐊᑯᓂᕐᔪᐊᕌᓗᒃ.
ᐱᒋᐊᓕᓵᖅᑎᓪᓗᒍ 2019, ᑭᕙᓪᓕᖅ ᕼᐊᓪ ᐃᓕᓴᕆᔭᐅᓚᐅᖅᑐᖅ ᐃᓕᓐᓂᐊᕆᐊᕐᕕᐅᖃᑦᑕᖅᓯᒪᓂᖓᓂᒃ ᐊᓪᓚᐃᑦ ᐃᓕᓐᓂᐊᕐᕕᖏᑎᒍᑦ ᐊᑭᓕᖅᑕᐅᒍᑎᓄᑦ ᐊᖏᖃᑎᒌᒍᑎᓄᑦ. ᑕᒪᓐᓇ ᐊᓯᔾᔩᓚᐅᖅᑐᖅ ᐅᖃᐅᓯᐅᒐᔪᓐᓂᖓᓂᒃ ᐅᓗᖏᓐᓂᒃ ᒪᑐᓚᐅᕐᓂᖏᓐᓂᒃ ᐃᓕᓐᓂᐊᕆᐊᕐᕕᐅᖃᑦᑕᓚᐅᖅᑐᑦ 1996-ᒥ ᑏᓰᒻᐱᕆ 31, 1997-ᒨᖅᑕᐅᖔᖅᑐᓂ. ᐃᓕᓐᓂᐊᖅᑏᑦ ᐱᐊᓂᓚᐅᖅᑐᑦ ᐃᓕᓐᓂᐊᕐᓇᐅᑉ ᐊᕐᕌᒍᐊᓂ ᑭᕙᓪᓕᖅ ᕼᐊᓪᒥ ᓄᓇᑦᓯᐊᖅ ᒐᕙᒪᒃᑯᖏᑎᒍᑦ.
ᑐᙵᕕᒃᑯᑦ ᑲᔪᖏᖅᓴᐃᔪᑦ ᐃᓄᓐᓂᒃ ᐃᓕᓐᓂᐊᕆᐊᖅᑎᑕᐅᖃᑦᑕᖅᓯᒪᔪᒥᓂᕐᓂᒃ ᐊᓐᓇᓯᒪᔪᓂᒃ ᐃᓚᖏᓐᓂᓪᓗ ᐊᑐᕆᐊᖁᓪᓗᒋᑦ ᐃᓱᒪᒃᑯᑦ ᖃᓄᐃᙱᓯᐊᕐᓂᕐᒧᑦ, ᐃᑉᐱᓐᓂᐊᓂᕐᒧᓪᓗ ᐊᒻᒪᓗ ᐃᓕᖅᑯᓯᒃᑯᑦ ᐃᑲᔫᑎᒃᓴᓂᒃ ᐊᑐᐃᓐᓇᐅᑎᑕᐅᔪᓂᒃ ᐊᓪᓚᐃᑦ ᐃᓕᓐᓂᐊᕆᐊᖅᑎᑕᐅᕕᒋᖃᑦᑕᖅᓯᒪᔭᖏᓐᓂᒃ ᖃᓄᐃᙱᓯᐊᕐᓂᕐᒧᑦ ᐋᖅᑭᒍᑎᒃᓴᓂᒃ ᐃᑲᔪᖅᑕᐅᕕᒃᓴᖅ ᐃᓚᒋᔭᐅᓪᓗᓂ ᐃᓅᓯᓕᕆᔨᒥᒃ ᐅᖃᖃᑎᖃᕐᓂᕐᒥᒃ ᐃᓄᒃᑐᑦ ᐱᓇᓱᐊᖃᑎᒌᖑᔪᓄᑦ ᓄᓇᕗᒻᒥ ᖃᓄᐃᙱᓯᐊᕐᓂᕐᒧᑦ ᑲᑐᔾᔨᖃᑎᒌᓂᒃ; ᑖᓐᓇ ᒪᑐᐃᖓᐃᓐᓇᖅᑐᖅ 24-ᓂᒃ ᐃᑲᕐᕋᓂᒃ ᖃᐅᑕᒫᑦ ᑲᑉᐱᐊᓱᐊᓂᕐᒦᑦᑐᓄᑦ ᐃᑲᔪᖅᑕᐅᕕᒃᓴᖅ ᐅᖄᓚᐅᑖ 1-(866)-925-4419. ᐃᓄᐃᑦ ᐅᖄᓚᖃᑦᑕᕈᓐᓇᕐᒥᔪᑦ ᑕᐃᔭᐅᔪᒥᒃ ᓂᕆᐅᖕᓂᖃᕐᓂᕐᒧᑦ ᖃᓄᐃᙱᑦᓯᐅᑲᓐᓂᓂᕐᒧᑦ ᐃᑲᔪᖅᑕᐅᕕᒃᓴᖅ ᐅᖄᓚᐅᑖ, 1-(855)-242-3310, ᐃᓅᓯᓕᕆᔨᒥᒃ ᐅᖃᖃᑎᖃᕐᕕᒃᓴᖅ ᐃᓄᒃᑎᑐᑦ.
ᑐᑭᓯᒋᐊᒃᑲᓂᕐᕕᒃᓴᖅ:
ᑭᐅᕋᓐ ᕙᓚᐅᕋᑎ
ᑐᑭᒧᐊᒃᑎᑦᑎᔨᐅᑲᐃᓐᓇᕐᑐᖅ ᑐᓴᐅᒪᖃᑦᑕᐅᑎᓕᕆᔨᒃᑯᓐᓄᑦ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᓕᕆᐊᑐᙱᑦᑐᖅ: 1-888-646-0006
