ᑐᓴᕋᑦᓴᓕᕆᔩᑦ

ᑐᙵᕕᒃᑯᑦ ᑲᑎᒪᔨᖏᑦ ᑕᒪᕐᒥᒃ ᐃᑲᔪᕐᓱᐃᕗᑦ ᐅᐃᕆᓯᒪᔪᓄᑦ ᐊᒻᒪ ᐊᒃᓱᕈᓗᐊᕐᓯᒪᔪᓄᑦ ᐃᓱᐊᕐᓴᐃᕕᒃᓴᒥᒃ ᓄᓇᕗᖕᒥ

(ᕕᕗᐊᕆ 14, 2019 – ᐃᖃᐃᑦ, ᓄᓇᕗᑦ) ᑐᙵᕕᒃᑯᑦ ᑲᑎᒪᔨᖏᑦ ᐃᑲᔪᖅᑐᐃᕗᑦ ᐱᖓᓱᐃᓕᖓᓪᓗᓂ ᑕᑎᒃᓴᐅᔪᓂᒃ ᑲᒪᒋᐊᕈᑎᒃᓴᓂᒃ ᐊᔪᓕᕐᓯᒪᔪᓄᑦ ᐊᒻᒪᓗ ᐊᒃᓲᕉᓴᓗᐊᕐᓯᒪᔪᓄᑦ ᐃᓱᐊᕐᓴᐃᕕᒃᓴᒥᑦ ᓄᓇᕗᖕᒥ ᐊᒻᒪᓗ ᒐᕙᒪᒃᑯᓐᓂᒃ ᑮᓇᐅᔭᖃᖅᑎᑦᑎᖁᔨᓪᓗᑎᒃ ᑲᔪᓯᑦᑎᐊᕈᓐᓇᕐᒪᖔᑦ ᖃᐅᔨᓴᕐᑕᐅᒍᑎᒃᓴᖓᓄᑦ ᑖᓐᓇᓗ ᑐᐊᕕᕐᓇᕆᔭᐅᓪᓗᓂ.

ᑐᙵᕕᒃᑯᑦ ᐱᓕᕆᖃᑕᐅᓪᓚᕆᒃᓯᒪᒻᒪᑕ ᑕᒪᒃᑮᓐᓄᑦ ᒐᕙᒪᐅᔫᓐᓄᑦ ᑲᔪᓯᓂᖃᑦᑎᐊᕈᓐᓇᕐᒪᖔᑦ ᖃᐅᔨᓴᕐᑕᐅᑎᓪᓗᒋᑦ 2017-ᒥ ᐊᒻᒪ 2018-ᒥ ᓄᑖᖅ ᐊᒃᓱᕈᓗᐊᕐᓯᒪᔪᓄᑦ ᐊᒻᒪᓗ ᐅᐃᕆᔾᔪᑎᖃᖅᓯᒪᔪᓄᑦ ᐃᓱᐊᕐᓴᐃᕕᒃᓴᒧᑦ ᓄᓇᕗᖕᒥ. ᖃᐅᔨᓴᕈᑕᐅᓯᒪᔪᑎᒍᑦ ᓇᓗᓇᐃᕆᓚᐅᕐᒪᑕ ᐱᖓᓱᓂᒃ ᑕᑎᒋᔭᐅᔪᓐᓇᕐᑐᓂᒃ ᐃᓱᐊᕐᓴᐃᕕᖕᓂᒃ: ᐱᕚᓪᓕᖁᓪᓗᒋᑦ ᐱᔨᑦᑎᕈᑕᐅᓲᑦ ᓄᓇᓕᖕᓂ ᐊᐅᓪᓚᕈᔾᔭᐅᓪᓗᑎᒃ ᒪᒥᓴᕐᓂᕐᒧᑦ ᐊᑐᓂᑦ ᓄᓇᐃᑦ ᐊᕕᒃᑐᕐᓯᒪᓂᖏᓐᓂ, ᐱᒋᐊᕐᓗᒍ ᐃᐱᕆ 2019; ᐃᒡᓗᓕᐅᕆᐊᕐᓂᐊᕐᓗᑎᒃ 32−ᓂᒃ ᐃᒡᓕᖃᖅᑐᒥᒃ ᓄᓇᕗᖕᒥ ᐃᓱᐊᕐᓴᐃᕕᒃᓴᒥᒃ ᐃᖃᓗᖕᓂ ᑖᓐᓇᓗ ᓇᔾᔨᔪᓂᒃ ᑲᒪᔪᓐᓇᕐᕕᐅᒐᔭᕐᑐᖅ ᐊᒻᒪᓗ ᕿᑐᙵᖏᓐᓂᒃ, ᒪᑐᐃᕋᔭᕐᓗᓂ 2023/24; ᐊᒻᒪ ᐃᖅᑲᓇᐃᔭᕐᑎᑖᕐᐸᓪᓕᐊᓗᑎᒃ ᐃᓄᖕᓂᒃ ᐃᓕᓐᓂᐊᕐᑎᑕᐅᓗᑎᒃ ᐃᓅᓯᓕᕆᓂᕐᒥᒃ ᐊᒻᒪ ᐃᓄᓕᕆᓂᕐᒥᒃ ᓯᓚᑦᑐᓴᕐᕕᔾᔪᐊᒃᑯᑦ, ᐊᑕᐅᑦᑎᑰᖅᑕᐅᓗᑎᒃ, ᐃᓱᐊᕐᓴᕐᑕᐅᔪᓐᓇᕋᔭᕐᒪᑕ ᐃᓄᒃᑐᑦ ᐅᖃᓪᓚᒍᓐᓇᕐᑐᓄᑦ.

ᐅᖃᐅᓯᐅᓯᒪᒻᒪᑦ ᖃᓄᖅᑑᕆᐊᕈᑕᐅᖁᔭᐅᓪᓗᓂ ᓈᓴᐅᑎᖓᓂ 21 ᑭᓪᓕᓯᓂᐊᕈᑕᐅᓯᒪᔪᓂ, “ᒐᕙᒪᑐᖃᒃᑯᑦ ᑮᓇᐅᔭᖃᖅᑎᑦᑎᖁᔭᐅᓪᓗᑎᒃ ᐱᑕᖃᕇᖅᑐᓄᑦ ᐊᒻᒪᓗ ᓄᑖᓄᑦ ᓄᓇᖃᖅᑳᖅᓯᒪᔪᓄᑦ ᒪᒥᓴᐃᕕᒃᓴᓄᑦ ᑲᒪᒋᐊᕈᑕᐅᓂᐊᕐᓗᓂ ᑎᒥᒃᑯᑦ, ᐃᓱᒪᒃᑯᑦ, ᐃᒃᐱᓐᓂᐊᔭᒥᒍ ᐊᒻᒪᓗ ᐅᑉᐱᕐᓂᕐᒧᑦ ᖃᓄᐃᓕᔭᐅᓯᒪᔪᓄᑦ ᐊᐅᓪᓚᕐᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᕐᓯᒪᔪᓄᑦ, ᐊᒻᒪᓗ ᓇᓗᓇᐃᑦᑎᐊᖁᓪᓗᒍ ᑮᓇᐅᔭᖃᖅᑎᑦᑎᒍᑕᐅᔪᑦ ᒪᒥᓴᐃᕕᓄᑦ ᓄᓇᕗᖕᒥ ᓯᕗᓪᓕᖅᐹᖑᑎᑕᐅᖁᓪᓗᒋᑦ.

“ᐃᓄᐃᑦ ᐅᖁᒪᐃᒃᓴᕈᑎᖃᖃᑦᑕᕐᓯᒪᒻᒪᑕ ᐊᑯᓂᐊᓘᓕᕐᑐᖅ,” ᐅᖃᖅᑐᖅ ᐊᖓᔪᖅᑳᖅ ᑰᑦᑎᖅ. “ᐊᔾᔨᒌᙱᑦᑐᓂᒃ ᒪᒥᓴᐃᕕᖃᕆᐊᖃᕋᑦᑕ, ᓄᓇᕘᓕᒫᕐᒥ, ᐅᖃᓪᓚᒍᓯᕗᑦ ᐊᑐᕐᓗᒍ ᐊᒻᒪ ᐱᖃᑎᒋᓗᒋᑦ ᐃᓚᔮᕗᑦ. ᑲᒪᔾᔪᓯᓄᑦ ᐱᕚᓪᓕᕈᑕᐅᒐᔭᕐᑐᑦ ᒪᓕᓐᓂᖃᓐᓂᐊᕐᐳᑦ ᐃᓄᐃᑦ ᐃᓕᖅᑯᓯᖏᓐᓂᒃ ᐊᒻᒪ ᐃᓅᔾᔪᓯᖏᓐᓂᒃ ᐊᑐᕐᓗᒋᑦ ᓄᓇᕗᖕᒥ ᓴᓇᔭᐅᓐᓂᑯᑦ ᒪᒥᓴᐃᒍᑎᒃᓴᑦ ᐊᒻᒪᓗ ᐃᓄᖕᓂ ᐃᖅᑲᓇᐃᔭᕐᑎᖃᓪᓗᑎᒃ. ᑕᑯᒃᓴᐅᖁᓪᓗᒋᑦ ᐱᓂᐊᕐᓂᕋᕈᑎᒋᓯᒪᔭᕗᑦ, ᓴᓂᕐᕙᐃᓂᐊᕐᐳᒍᑦ $5 ᒥᓕᐊᓂᒃ ᑐᕌᖓᓗᓂ ᐃᓄᐃᑦ ᐃᓱᐊᕐᓴᒃᑕᐅᒍᑎᖏᓐᓄᑦ ᑮᓇᐅᔭᖃᕈᑎᒃᓴᓂᒃ ᐱᕚᓪᓕᖁᓪᓗᒋᑦ ᑲᒪᕕᐅᓲᑦ ᐊᒻᒪ ᐃᖅᑲᓇᐃᔭᖃᑎᒋᓂᐊᕐᐸᕗᑦ ᓄᓇᕗᖕᒥ ᐱᓕᕆᕕᖓᑦ ᐋᓐᓂᐊᖃᓐᓇᖏᑦᑐᓕᕆᔨᒃᑯᑦ ᐱᕙᓪᓕᐊᑎᓪᓗᒋᑦ ᐃᓄᖕᓂᒃ ᐃᖅᑲᓇᐃᔭᖅᑎᖃᓐᓂᕐᒧᑦ ᐸᕐᓇᓯᒪᒍᑏᑦ.”

ᐊᖓᔪᖅᑳᖅ ᑰᑦᑎᖅ ᐅᖃᕆᓪᓗᓂ, “ᐱᓕᕆᖃᑎᒌᓐᓂᑦᑎᒍᑦ ᐱᕚᓪᓕᕈᑕᐅᔪᓐᓇᕐᑐᓂᒃ ᐸᕐᓇᓯᒪᒍᑎᓕᐅᕐᓯᒪᕗᒍᑦ ᒪᒥᓴᐃᒍᑕᐅᔪᓐᓇᕐᑐᓂᒃ ᐃᓄᐃᑦ ᐅᖃᐅᓯᖓ ᐊᑐᕐᓗᒍ ᐊᒻᒪᓗ ᐃᓅᔾᔪᓯᕗᑦ.”

ᐊᓪᓚᓄᑦ ᐊᒻᒪ ᐃᓄᖕᓄᑦ ᐋᓐᓂᐊᖃᓐᓇᖏᑦᑐᓕᕆᔨᐅᔪᑦ ᓄᓇᖃᖅᑳᖅᓯᒪᔪᓂᒃ ᐱᔨᑦᑎᕐᑏᑦ ᑲᓇᑕᑉ ᒐᕙᒪᒃᑯᖏᑦᑎᒍᑦ, ᑮᓇᐅᔭᐃᓚᐅᕐᑐᑦ ᑲᔪᓯᓂᖃᑦᑎᐊᕈᓐᓇᕐᒪᖔᑦ ᖃᐅᔨᓴᕐᑎᓪᓗᒋᑦ ᕕᕗᐊᕆ 2017-ᒥ. ᐱᖓᓱᐃᑦ ᐱᓕᕆᖃᑎᖏᑦ ᑐᙵᕕᒃᑯᑦ, ᒐᕙᒪᒃᑯᖏᑦ ᓄᓇᕘᑉ ᐊᒻᒪᓗ ᐊᓪᓚᓄᑦ ᐊᒻᒪ ᐃᓄᖕᓄᑦ ᐋᓐᓂᐊᖃᓐᓇᖏᑦᑐᓕᕆᔨᐅᔪᑦ ᓄᓇᖃᖅᑳᖅᓯᒪᔪᓂᒃ ᐱᔨᑦᑎᕐᑏᑦ ᖃᐅᔨᓴᕈᑎᓂᒃ ᐃᓂᕐᓯᓚᐅᕐᑐᑦ ᐊᒡᒋᓯ 2018-ᒥ.

-30-

ᖃᐅᔨᒋᐊᒃᑲᓐᓂᕈᓐᓇᕐᐳᑎᑦ:

ᐳᕌᓐᑯ ᐳᓴᐃᒥ
ᑐᑭᒧᐊᒃᑎᑦᑎᔨᐅᑲᐃᓐᓇᕐᑐᖅ ᑐᓴᐅᒪᖃᑦᑕᐅᑎᓕᕆᔨᒃᑯᓐᓄᑦ
ᓄᓇᕗᑦ ᑐᙵᕕᒃ ᑎᒥᖓ

ᐱᖁᔨᕗᖔᕈᑦ # 19-01-WR1ᐃᑲᔪᕐᓯᒍᑏᑦ ᐊᒃᓱᕉᓴᕐᓯᒪᔪᓄᑦ ᐊᒻᒪ ᐅᐃᕆᒃᓯᒪᔪᓄᑦ ᐃᓱᐊᕐᓴᐃᕕᒃᓴᖅ

Resolution No. 19-01-WR1Support for Trauma and AddictionsTreatment System