(ᕖᕝᕗᐊᕆ 13, 2024 – ᐃᖃᓗᐃᑦ, ᓄᓇᕗᑦ) ᐅᓪᓗᒥ, ᓄᓇᕗᑦ ᐊᔪᐃᓐᓈᕆᐊᕐᕕᒃ ᐃᖅᑲᖅᑐᐃᕝᕕᖓ ᓈᓚᓐᓂᖃᖅᑲᐅᔪᑦ ᐊᔪᐃᓐᓈᕆᐊᕈᑎᒥᓂᖓᓂᒃ ᓄᓇᕗᑦ ᒐᕙᒪᖏᑦᑕ, ᐊᐱᕆᓪᓗᑎᑦ ᐃᖅᑲᖅᑐᐃᕕᒃᑯᓐᓂ ᖁᔭᓈᖅᓯᖁᓪᓗᒋᑦ ᐃᖅᑲᖅᑐᐃᕕᒻᒨᕈᔾᔭᐅᓯᒪᓂᖏᑦ 2021-ᖑᑎᓪᓗᒍ, ᒪᕐᕉᓐᓄᒃ ᐃᓄᐃᑦ ᐃᓚᒌᓐᓄᑦ ᐊᒻᒪᓗ ᓄᓇᕗᑦ ᑐᙵᕕᒃ ᑎᒥᖓᓄᑦ. ᑕᐃᑲᓂ ᐃᖅᑲᖅᑐᐃᕕᒻᒨᕈᔾᔨᓯᒪᓂᖏᑦ, ᓄᓇᕗᑦ ᑐᙵᕕᒃ ᑎᒥᖓ ᐊᒻᒪᓗ ᒪᕐᕉᒃ ᐃᓚᒌᑦᑑᒃ ᓴᐳᒻᒥᐅᓯᖅᑕᐅᔪᒪᓯᒪᕗᑦ ᒪᓕᑦᑐᒍ ᑎᑎᕋᖅᓯᒪᓂᖓᑕ ᐃᓚᖓ 15 ᐱᖁᔭᕐᔪᐊᑦ ᐱᔪᓐᓇᐅᑎᓄᑦ ᐊᒻᒪᓗ ᐃᓱᒪᖅᓲᑎᓄᑦ ᑭᒡᒐᖅᑐᐃᓪᓗᑎᑦ ᑕᒪᐃᓐᓂ ᐃᓄᓐᓂᒃ.
ᒪᕐᕉᒃ ᐃᓅᒃ ᐃᓕᓐᓂᐊᖅᑏᒃ ᓇᓕᒧᒌᙱᑦᑐᒃᑯᑦ ᐊᔾᔨᐅᙱᓐᓂᖏᖕᓄᑦ ᐊᒥᓱᑦ ᑕᐃᒪᐃᑦᑑᖃᑎᖏᑦ ᑲᒪᒋᔭᐅᓯᒪᓂᕋᖅᑑᒃ ᓄᓇᕗᑉ ᐃᓕᓐᓂᐊᕐᓂᓕᕆᓂᖓᓂᒃ ᓄᓇᕗᑦ ᒐᕙᒪᖏᑦᑕ ᐊᓯᔾᔩᔪᒥᓂᐅᓂᖏᖕᓂᒃ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᕐᒥᒃ ᐊᒻᒪᓗ ᐃᓄᐃᑦ ᐅᖃᐅᓯᖓ ᓴᐳᔾᔭᐅᓂᖓᓄᑦ ᐱᖁᔭᖓᓂᒃ 2020-ᖑᑎᓪᓗᒍ. ᓄᓇᕗᑦ ᒐᕙᒪᖏᑦᑕ ᐋᖅᑭᒋᐊᖅᓯᓯᒪᓂᖏᑦ ᐲᖅᓯᒃᑲᐃᔪᕗᑦ ᐱᖁᔭᕐᒥᒃ ᒪᓕᑦᑕᐅᔭᕆᐊᖃᔪᔫᒐᓗᐊᑦ ᐃᓄᒃᑐᑦ ᐃᓕᓐᓂᐊᖅᑎᑦᑎᔪᖃᖃᑦᑕᕐᓗᓂ ᓄᓇᕗᑉ ᐃᓕᓐᓂᐊᕐᕕᖏᓐᓂ ᑕᒪᐃᓐᓂ ᖁᑦᑎᓐᓂᓕᓕᒫᓂᑦ 2019 ᓇᓪᓕᖅᐸᑦ. ᑭᓯᐊᓂᓕ, ᓄᓇᕗᑦ ᒐᕙᒪᖏᑦ ᒫᓐᓇ ᑲᒪᒋᔭᖃᕐᓂᐊᕐᓂᕋᖅᓯᒪᓕᖅᑐᑦ ᐊᑕᐅᓯᕐᒥᒃ ᐃᓕᓐᓂᐊᕋᒃᓴᒥᒃ ᐃᓕᓐᓂᐊᖅᑎᑦᑎᓗᑎᑦ ᐃᓄᒃᑐᑦ ᐅᖃᐅᓯᓕᕆᓂᕐᒨᖓᓂᕋᕐᓗᒍ ᐃᓕᓐᓂᐊᕋᒃᓴᖅ.
“ᐃᓄᐃᑦ ᐅᓄᒃᑎᑑᕈᓐᓇᑦᑎᐊᕈᓐᓇᐃᓪᓕᔪᑦ ᓱᑲᑦᑐᒥᒃ ᖁᐊᖅᓵᕐᓇᖅᑐᒥᒃ, ᐊᒻᒪᓗ ᓄᓇᕗᑦ ᒐᕙᒪᖏᑦ ᐃᓕᓐᓂᐊᕐᓂᓕᕆᓂᖓᑎᒍᑦ ᑲᔪᓯᑎᑦᑎᓂᓕᒃ ᑕᒪᔅᓱᒥᖓ ᐊᓯᐅᔨᑐᐃᓐᓇᓕᕐᓂᖏᖕᓂᒃ ᐅᖃᐅᓯᕐᒥᒃ ᐊᒻᒪᓗ ᐊᓯᖏᖕᓂᒃ ᐅᖃᐅᓯᕐᒧᑦ ᐋᓐᓂᕈᑎᐅᓲᖑᔪᓂᑦ,” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᐊᓗᑭ ᑰᑦᑎᖅ. “ᐃᓄᒃᑐᑦ ᐅᖃᐅᓯᕐᒥᒃ ᐊᑐᕐᓗᑎᑦ ᐃᓕᓐᓂᐊᖅᑎᑦᑎᖃᑦᑕᕐᓂᐊᕐᓂᖏᑦ ᑎᑎᕋᖅᑕᐅᖏᓐᓇᐅᔭᕋᓗᐊᖅᑐᓂ ᓄᓇᕗᑦ ᒐᕙᒪᖏᑦᑕ ᐱᖁᔭᖓᓄᑦ 1999-ᒥᓂᑦ, ᐃᓕᓐᓂᐊᖅᑏᑦ ᓄᓇᕗᒻᒥ ᓂᕈᐊᒐᒃᓴᖃᙱᑦᑎᐊᖅᑐᑎᑦ ᐊᓯᖃᙱᑦᑎᑕᐅᓕᖅᑐᓂ ᖃᓪᓗᓈᑎᑐᑐᐊᖅ ᐅᐃᕖᑎᑐᓪᓘᓐᓃᑦ ᐃᓕᓐᓂᐊᖅᑎᑕᐅᖃᑦᑕᖅᑐᑦ. ᓄᓇᕗᒻᒥ ᐃᓄᐃᑦ ᐊᒥᓲᓂᖅᓴᐅᑎᓪᓗᒋᑦ, ᐃᓄᒃᑐᑦ ᐊᒥᓲᓂᖅᓴᐃᑦ ᐅᖃᓪᓚᓲᖑᓪᓗᑎᑦ ᐊᒻᒪᓗ ᐊᑐᖅᑕᐅᖔᕈᒪᒐᓗᐊᖅᑐᓂ, ᐃᓄᐃᑦ ᓂᕈᐊᒐᒃᓴᖃᙱᑦᑎᑕᐅᓪᓗᑎᑦ ᐃᓕᓐᓂᐊᕆᐊᕐᓗᑎᑦ ᐃᓄᐃᑦ ᑭᒃᑯᑐᐃᓐᓇᐃᑦ ᐃᓕᓐᓂᐊᕐᕕᖏᓐᓄᑦ ᐃᓕᓐᓂᐊᕆᐊᖃᑦᑕᓲᑦ ᓄᖑᑉᐸᓪᓕᐊᑎᑦᑎᔪᒥᒃ ᐅᖃᐅᓯᖓᓂᒃ ᐃᓕᖅᑯᓯᖓᓂᓪᓗ. ᐱᐅᙱᑦᑐᒃᑯᑦ ᐊᑦᑐᐃᓂᖃᖅᑐᒻᒪᕆᐅᓕᖅᑐᓂ ᐃᓄᐃᑦ ᐃᓕᓐᓂᐊᖅᑎᖏᖕᓄᑦ.”
ᐃᓕᓐᓂᐊᕐᕕᒻᒥ ᐃᓄᒃᑐᑦ ᐅᖃᐅᓯᖅ ᐊᑐᖅᑕᐅᙱᑦᑎᐊᒻᒪᕆᑦᑎᓪᓗᒍ ᐱᓪᓚᑦᑖᓂᒃ ᐃᓄᓐᓄᑦ ᐊᕝᕕᐊᕈᑕᐅᓕᓲᖅ, ᐃᓕᓐᓂᐊᕇᙱᓐᓂᖅᓴᐅᔪᑦ ᐊᒥᓲᓂᖅᓴᐅᕙᑦᑐᑎᑦ, ᐃᖅᑲᓇᐃᔭᑎᑦᑐᑦ ᐊᒥᓲᓂᖅᓴᐅᓪᓗᑎᓪᓗ, ᐊᒻᒪᓗ ᐱᕙᓪᓕᐊᙱᓐᓂᖅᓴᒻᒪᕆᐅᓪᓗᑎᑦ ᑮᓇᐅᔭᓕᐅᕋᓱᐊᕐᓂᕐᒥᒃ ᐃᓄᓐᓄᑦ ᐃᓕᓐᓂᐊᖅᑎᓄᑦ ᑕᐃᒃᑯᐊᓕ ᐊᓯᖏᑦ ᐃᓅᙱᑦᑐᑦ ᓄᓇᕗᒻᒥ ᑕᐃᒪᐃᙱᓐᓂᖅᓴᐅᓲᖑᓪᓗᑎᑦ. ᐃᓕᓐᓂᐊᖅᑎᑕᐅᖃᑦᑕᙱᓐᓂᖏᑦ ᐃᓄᒃᑐᑦ ᐊᑐᖅᑕᐅᓗᓂ ᐋᓐᓂᕈᑎᖃᕐᒪᑦ ᐃᓄᖕᓄᑦ, ᑲᓱᖅᓯᒪᓂᖏᑦ ᐃᓄᐃᑦ ᐃᓕᖅᑯᓯᕐᒥᖕᓄᑦ ᐊᑦᑎᓐᓂᖅᓴᐅᓕᖅᑎᑦᑎᓂᖃᖅᐸᑦᑐᓂ ᐊᒻᒪᓗ ᑭᓇᐅᓂᖏᖕᓂᒃ ᐊᒻᒪᓗ ᐱᐅᙱᑦᑐᒥᒃ ᑕᐅᑐᑦᑕᐅᑯᑖᓐᓂᖅᓴᐅᖃᑦᑕᓕᓲᑦ ᐱᒻᒪᕆᒋᔭᖃᕐᓂᖏᑦ ᐃᓄᒃᑐᑦ ᐊᒻᒪᓗ ᐃᓄᐃᑦ ᐃᓕᖅᑯᓯᖓ ᑐᙵᕕᐅᔭᕆᐊᖃᖅᑐᓂ ᐃᓕᓐᓂᐊᕇᖅᓯᒪᓂᖏᖕᓄᑦ.
ᐃᓄᐃᑦ ᐊᐅᓚᑦᑎᔨᒋᔭᐅᒐᑎᑦ ᐃᓕᓐᓂᐊᕐᓂᓕᕆᓂᕐᒥᒃ ᐊᑦᑐᐃᓂᖃᓲᖅ ᐃᓕᓐᓂᐊᕆᐊᖅᐸᓐᓂᖏᖕᓂᒃ ᐊᒻᒪᓗ ᐃᓕᓐᓂᐊᕇᖅᑐᑦ ᐊᒥᓲᓂᖏᓐᓂᒃ, ᐃᓕᓐᓂᐊᕇᕈᓐᓇᖅᑐᑐᖄᓘᒐᓗᐊᖅᑎᓪᓗᒋᑦ ᐱᔪᓐᓇᕋᓱᒋᔭᐅᒍᓐᓃᖅᑐᑎᑦ ᐊᒻᒪᓗ ᐃᓄᐃᑦ ᐃᓕᓐᓂᐊᖅᑏᑦ ᐱᓕᕆᔪᓐᓇᕐᓂᖏᑦ ᑕᐃᒪᓐᓇ ᑕᐅᑐᑦᑕᐅᙱᑦᑐᑎᑦ ᐃᓅᙱᑦᑐᑦ ᐃᓕᓐᓂᐊᖅᑏᑦ. ᑕᒪᓐᓇ ᐃᓅᖏᑦ ᐊᒻᒪᓗ ᑮᓇᐅᔭᓕᐅᕈᓐᓇᕐᓂᖏᑦ ᐊᕕᒃᓯᒪᓂᖃᒃᑲᓐᓂᒻᒪᕆᓕᖅᑐᓂ ᐃᓄᐃᑦ ᐊᒻᒪᓗ ᐃᓅᙱᑦᑐᑦ, ᐱᖃᓯᐅᑎᓪᓗᒍ ᑮᓇᐅᔭᓕᐅᕐᓂᖏᑦᑕ ᐊᔾᔨᒌᙱᒻᒪᕆᓐᓂᖏᑦ ᐊᒻᒪᓗ ᐃᖅᑲᓇᐃᔭᖅᑐᑦ ᐃᓄᓐᓂᒃ ᑭᒃᑯᑐᐃᓐᓇᕐᓂᒃ ᐱᔨᑦᑎᕋᖅᐸᑦᑐᑎᑦ.
“ᐃᓄᐃᑦ ᓇᒻᒥᓂᖅᓱᕐᓂᖅᓴᐅᓕᖁᓪᓗᒋᑦ ᐱᓇᓱᐊᖅᑐᑎᒍᓗ ᑕᒪᓐᓇ ᓄᓇᕗᒻᒥ, ᐃᓄᐃᑦ ᓄᑕᖅᑲᑦ ᐱᐅᓛᕐᓂᑦ ᐃᑲᔫᑎᓂᑦ ᐊᑐᕈᓐᓇᖅᑎᑕᐅᔭᕆᐊᓖᑦ ᐃᓕᓐᓂᐊᕇᕈᓐᓇᖁᓪᓗᒋᑦ ᐃᓕᓐᓂᐊᕐᓂᓕᕆᓂᕐᒥᒃ,” ᐅᖃᖅᑐᓂ ᐊᖓᔪᖅᑳᖅ ᑰᑦᑎᖅ. “ᓄᓇᕗᒻᒥᐅᑦ ᐃᓄᐃᑦ ᐃᓕᓐᓂᐊᖅᑎᑕᐅᔪᓐᓇᙱᑦᑎᓪᓗᒋᑦ ᐅᖃᐅᓯᖏᑦ ᐊᖓᔪᖅᑳᖏᑕ ᓂᖏᐅᒃᑯᖏᑕᓗ ᐊᑐᕐᓗᑎᑦ, ᐱᒻᒪᕆᐅᓛᕐᒥᒃ ᐊᑐᕈᓐᓇᖅᑕᒥᓂᒃ ᐃᓕᓐᓂᐊᕇᑦᑎᐊᕈᓐᓇᐅᑎᒋᔪᓐᓇᖅᑕᖓᓂᒃ.”
ᓄᓇᕗᑦ ᒐᕙᒪᖏᑦ ᖁᔭᓈᖅᓯᖁᔨᓚᐅᖅᑐᑦ ᐃᖅᑲᖅᑐᐃᕕᒻᒨᖅᑎᑦᑎᔾᔪᑎᖓᓂᒃ ᐃᓄᐃᑦ ᐃᓚᒌᓐᓄᒃ ᐊᒻᒪᓗ ᓄᓇᕗᑦ ᑐᙵᕕᒃ ᑎᒥᖓᓄᑦ ᐃᖅᑲᖅᑐᐃᕕᒻᒨᖅᑎᑕᐅᒋᐊᙵᑐᐊᕋᒥᒃ. “ᐱᖁᔨᕗᖔᕈᑎᖓ ᖁᔭᓈᖅᑕᐅᓪᓗᓂᐅᒃ ᐃᖅᑲᖅᑐᐃᕕᒻᒨᕈᔾᔭᐅᓯᒪᓂᖓ” ᖁᔭᓈᖅᑕᐅᖔᓚᐅᖅᑐᖅ ᐃᖅᑲᖅᑐᐃᔨᒃᑯᓐᓄᑦ ᒫᑦᓯ 2023-ᖑᑎᓪᓗᒍ. ᓄᓇᕗᑦ ᒐᕙᒪᖏᑦᑕ ᐊᔪᐃᓐᓈᕆᐊᕐᓂᖓ ᑖᔅᓱᒧᖓ ᐃᓱᒪᓕᐅᕈᑕᒥᓂᕐᓄᑦ ᓈᓚᒃᑕᐅᖅᑲᐅᕗᖅ ᐅᓪᓗᒥ. ᐅᑕᖅᑭᑎᓪᓗᑕᓕ, ᒪᕐᕉᒃ ᐊᕐᕌᒎᓕᖅᑑᓐᓄᒃ, ᓄᓇᕗᑦ ᒐᕙᒪᖏᑦ ᐊᑐᖅᓯᒪᔪᑦ ᐱᖁᔨᕗᖔᕈᑎᓕᐊᕆᓯᒪᔭᖓᓂᒃ ᖁᔭᓈᖅᑕᐅᖁᔨᓪᓗᑎᑦ ᐃᖅᑲᖅᑐᐃᕕᒻᒨᕈᔾᔭᐅᓯᒪᔪᒥᒃ ᐅᖓᕙᕆᐊᖅᓯᑎᑦᑎᓂᖃᑐᐃᓐᓇᖅᑐᑎᑦ ᐃᖅᑲᖅᑐᐃᕕᒃᑯᑎᒎᕈᑎᒋᓯᒪᔭᑦᑎᓐᓂᒃ. ᓄᓇᕗᑦ ᑐᙵᕕᒃ ᑎᒥᖓ ᖁᓅᕐᒥᖅᓯᒪᐃᓐᓇᖅᑐᑦ ᓄᓇᕗᑦ ᒐᕙᒪᖏᑦᑕ ᑲᒪᒋᒐᓱᐊᖅᑕᖓᓂᒃ ᐃᖅᑲᖅᑐᐃᕕᒻᒨᕈᔾᔨᓯᒪᔭᑦᑎᓐᓂᒃ.
ᐊᐱᖅᑯᑕᐅᔪᕐᓕ ᑕᕝᕙᓂ ᐃᑎᔪᒻᒪᕆᐅᕗᖅ ᐃᓱᒪᒃᓴᖅᓯᐅᕈᑕᐅᑦᑎᐊᕆᐊᓕᒃ ᐊᒻᒪᓗ ᑐᐊᕕᕐᓇᖅᑑᓪᓗᓂ: ᓄᓇᕗᑦ ᒐᕙᒪᖏᑦ ᖃᐅᔨᒪᑎᑦᑎᑦᑎᐊᕆᐊᓖᑦ ᐃᓄᐃᑦ ᑭᒃᑯᑐᐃᓐᓇᐃᑦ ᐃᓕᓐᓂᐊᕐᕕᖓ ᐃᓄᒃᑐᑦ ᐊᑐᕐᓗᑎᑦ ᐃᓕᓐᓂᐊᖅᑎᑦᑎᔪᖃᖅᑐᒻᒪᕆᐅᓂᐊᕐᒪᖔᑦ, ᐃᓄᐃᑦ ᐃᓕᓐᓂᐊᖅᑏᑦ ᓇᓕᒧᒌᑦᑐᒃᑯᑦ ᐃᑲᔫᑕᐅᑦᑎᐊᕈᓐᓇᕐᓂᐊᕐᒪᑕ ᐃᓄᐃᑦ ᑭᒃᑯᑐᐃᓐᓇᐃᑦ ᐃᓕᓐᓂᐊᕐᕕᖏᖕᓂ. ᐃᓱᒪᒋᓪᓗᒍ ᓱᑲᓐᓂᖓ ᐃᓄᒃᑑᕈᓐᓇᐃᓪᓕᕙᓪᓕᐊᔪᑦ ᐊᒻᒪᓗ ᐱᐅᙱᑦᑐᒃᑯᑦ ᐊᑦᑐᐃᓂᖃᕐᓂᖏᑦ ᖃᓪᓗᓈᑎᑐᑐᐊᖅ ᐃᓕᓐᓂᐊᖅᑎᑕᐅᕙᓐᓂᖏᑦ ᐃᓄᐃᑦ ᐃᓕᓐᓂᐊᖅᑏᑦ, ᐃᖅᑲᖅᑐᐃᕕᒻᒨᕈᑎᒋᓯᒪᔭᕗᑦ ᓱᑲᑦᑐᒃᑯᑦ ᐃᖅᑲᖅᑐᖅᑕᐅᔭᕆᐊᖃᓪᓚᕆᑦᑐᖅ, ᐃᖅᑲᖅᑐᐃᕕᒻᒨᖅᑎᑦᑎᔾᔪᑎᒋᓯᒪᔭᑦᑕ ᐱᔾᔪᑎᖓ ᐃᓱᒪᓕᐅᕈᑕᐅᓂᐊᕐᒪᑦ ᓇᓕᒧᒌᑦᑐᒃᑯᑦ ᒪᓕᓪᓗᒋᑦ ᑐᓂᓯᒪᔭᕗᑦ ᓇᓗᓇᐃᕈᑏᑦ ᓱᓕᔪᑦ ᐃᖅᑲᖅᑐᐃᕕᒻᒨᖅᓯᒪᔭᕗᑦ.
ᓄᓇᕗᒻᒥᐅᑦ ᐃᓄᐃᑦ ᑖᔅᓱᒥᖓ ᐱᒻᒪᕆᐅᔪᒥᒃ ᐃᖅᑲᖅᑐᐃᕕᒻᒨᕈᔾᔨᓯᒪᔭᑦᑎᓐᓂᒃ ᐊᑐᕈᓐᓇᑦᑎᐊᕆᐊᓖᑦ ᐃᓱᒪᒃᓴᖅᓯᐅᕈᑕᐅᓗᓂ ᐱᒻᒪᕆᐅᔪᖅ ᑭᖑᕙᙱᑦᑐᒃᑯᑦ, ᐊᒻᒪᓗ ᓄᓇᕗᑦ ᑐᙵᕕᒃ ᑎᒥᖓ ᓂᕆᐅᑦᑐᑦ ᐃᖅᑲᖅᑐᐃᔨᒃᑯᑦ ᐊᔪᐃᓐᓈᕆᐊᕐᕕᒃ ᐃᓱᒪᓕᐅᕐᓂᐊᕐᒪᑕ ᑭᖑᕙᓗᐊᙱᑦᑐᒃᑯᑦ ᓱᒃᑲᓕᔪᒃᑰᕈᑕᐅᓗᓂ ᐅᖓᕙᕆᐊᖅᑎᑦᑎᑦᑕᐃᓕᒪᖁᓪᓗᒋᑦ ᑭᓱᑐᐃᓐᓇᕐᓂᒃ.
-30-
ᐱᕙᓪᓕᐊᔪᓕᕆᔨᓄᑦ ᖃᐅᔨᒃᑲᕋᒃᓴᖅ:
ᑭᐊᕙᓐ ᖃᑉᓗᑦᓯᐊᖅ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᔪᓕᕆᔨᒃᑯᓐᓂ
ᓄᓇᕗᑦ ᑐᙵᕕᒃ ᑎᒥᖓ
