(ᔫᓂ 30, 2021 – ᐃᖃᓗᐃᑦ, ᓄᓇᕗᑦ) ᔫᓂ 21, 2021-ᒥ, ᐱᖁᔭᒃᓴᖅ C-15, ᓄᓇᕐᔪᐊᕐᒥ ᑲᑎᒪᔨᕐᔪᐊᑦ ᓇᓗᓇᐃᕈᑎᖏᓐᓂ ᐱᔪᓐᓇᐅᑎᖏᓐᓄᑦ ᓄᓇᖃᖅᑳᖅᓯᒪᔪᑦ (UNDRIP) ᐱᖁᔭᖅ, ᑲᔪᓯᑎᑕᐅᓚᐅᖅᑐᖅ ᐱᖁᔭᒃᓴᖅ. ᐱᔾᔪᑖ ᐱᖁᔭᖅ ᑎᑭᐅᑎᓯᒪᖁᓪᓗᒍ ᑲᓇᑕᐅᑉ ᒪᓕᒐᖏᓐᓄᑦ ᓇᓕᖅᑯᑦᓯᓯᒪᓗᑎᒃ UNDRIP ᐊᒻᒪᓗ ᓯᕗᒧᐊᒍᑎᒃᓴᐅᓗᓂ ᑲᓇᑕ ᒐᕙᒪᖓᓄᑦ ᐊᒻᒪᓗ ᓄᓇᖃᖅᑳᖅᓯᒪᔪᓄᑦ ᐃᖅᑲᓇᐃᔭᖃᑎᒌᓐᓂᕐᒥᒃ ᐃᓘᓐᓈᒍᑦ ᐊᑐᓕᖅᑎᑕᐅᖁᓪᓗᒍ UNDRIP ᑲᓇᑕᒥ. ᑕᒪᓐᓇ ᐊᑐᓕᖅᑎᑕᐅᓂᖓ ᓇᓗᓇᐃᖅᓯᒪᒋᐊᓕᒃ ᓇᓕᖅᑯᑦᓯᓯᒪᒐᓗᐊᕐᒪᖔᖅ ᐊᑐᖅᑕᐅᓂᖏᑎᒍᑦ UNDRIP ᑐᙵᕕᓕᐊᖑᓯᒪᔪᑦ, ᑕᒪᓐᓇᐅᒐᓗᐊᖅᑎᓪᓗᒍ ᓄᓇᖃᖅᑳᖅᓯᒪᔪᑦ ᑲᓇᑕᓕᒫᒥ − ᐃᓚᒋᔭᐅᓪᓗᑎᒃ ᐃᓄᐃᑦ − ᐅᑕᖅᑭᑐᐃᓐᓇᖃᑦᑕᓂᐊᙱᒻᒪᑕ.

ᐱᖁᔭᖅ ᐱᔭᕆᐊᖃᖅᑎᑦᓯᔪᖅ ᑲᓇᑕ ᒐᕙᒪᒃᑯᖏᓐᓂᒃ ᐊᑐᕆᐊᓕᓕᒫᖏᓐᓂᒃ ᐊᐅᓚᑦᓯᔾᔪᑎᖃᕐᓗᑎᒃ ᓇᓗᓇᐃᕈᑕᐅᔪᒥᒃ ᑲᓇᑕ ᒪᓕᒐᖏᑦ ᓇᓕᖅᑯᑦᓯᓯᒪᑦᓯᐊᖁᓪᓗᒋᑦ UNDRIP, ᑐᙵᕕᒋᔭᐅᔪᒥᒃ “ᐃᓄᖅᑕᐅᑲᓐᓂᕈᓐᓇᖏᑦᑐᖅ ᐊᑐᕆᐊᓖᑦ ᐊᓐᓇᓯᒪᒍᑎᒃᓴᒧᑦ, ᐅᐱᒍᓱᓐᓂᕐᒧᑦ, ᐊᒻᒪᓗ ᖃᓄᐃᙱᑦᓯᐊᕈᑎᒃᓴᖏᓐᓄᑦ ᓄᓇᖃᖅᑳᖅᓯᒪᔪᑦ ᓯᓚᕐᔪᐊᒥ”.

ᐱᖁᔭᖅ ᐱᔭᕆᐊᖃᖅᑎᑦᓯᔪᖅ ᒐᕙᒪᑐᖃᒃᑯᑦ − ᑐᓴᕆᐊᕐᕕᖃᕐᓗᑎᒃ ᐱᓕᕆᖃᑎᖃᕐᓗᑎᓪᓗ ᓄᓇᖃᖅᑳᖅᓯᒪᔪᓂᒃ − ᐸᕐᓇᓂᕐᒧᑦ ᑲᔪᓯᑎᑦᓯᓂᕐᒧᓪᓗ ᐊᐅᓚᔾᔭᐃᒍᑎᒃᓴᓄᑦ ᐸᕐᓇᐅᑎᓂᒃ ᑲᔪᓯᑎᑦᓯᓂᕐᒧᑦ ᑐᕌᒐᑦᓴᖏᓐᓂ UNDRIP. ᐊᐅᓚᔾᔭᐃᓂᕐᒧᑦ ᐸᕐᓇᐅᑎᑦ, ᓴᖅᑭᖅᑕᐅᒋᐊᓕᒃ ᑭᒃᑯᑐᐃᓐᓇᕐᓄᑦ, ᐊᐅᓚᔾᔪᑕᐅᒋᐊᓕᒃ ᐋᖅᑭᑦᓯᒍᑎᒃᓴᓂᒃ ᐱᕋᔭᑕᐅᖃᑦᑕᓂᕐᓄᑦ, ᒥᑭᓪᓕᑎᖅᓯᒪᔭᐅᖃᑦᑕᓂᕐᒧᑦ ᓵᙵᑦᓯᒍᑕᐅᓗᓂ, ᐊᒻᒪᓗ ᓄᖑᑎᑕᐅᓗᑎᒃ ᓇᐅᒃᑯᑐᐃᓐᓇᖅ ᐋᓐᓂᑎᖅᑕᐅᖃᑦᑕᕐᓃᑦ, ᐅᕕᓂᖃᑎᒌᙱᓂᕐᒧᑦ ᐊᔾᔨᐅᑎᑕᐅᙱᓂᕐᒧᓪᓗ ᓄᓇᖃᖅᑳᖅᓯᒪᔪᓂᒃ. ᐃᓚᓕᐅᔾᔭᐅᓯᒪᒋᐊᖃᕐᒥᔪᑦ ᐊᐅᓚᑦᓯᔾᔪᑏᑦ ᐱᕚᓪᓕᕈᑎᒃᓴᑦ ᐊᖏᖅᓯᒪᖃᑎᒌᓐᓂᒃᑯᑦ ᐃᑉᐱᒋᐅᑎᑦᓯᐊᕐᓂᖅ ᐊᒻᒪᓗ ᑐᑭᓯᒪᓂᖅ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓂᒃ ᐃᓕᓐᓂᐊᖅᑎᑕᐅᓂᒃᑯᑦ.

UNDRIP ᓴᖅᑭᖅᑕᐅᓯᒪᔪᖅ ᐊᑯᓂᐊᓗᒃ, ᐊᑦᓱᕉᓴᓂᒃᑯᑦ ᓵᙵᓯᔾᔪᑕᐅᖃᑦᑕᖅᑐᓂ, ᐊᐅᓚᓂᖃᖅᑐᓂ ᐊᕙᑎᓂᒃ ᐊᕐᕌᒍᓂᒃ, ᓄᓇᖃᖅᑳᖅᓯᒪᔪᓄᑦ ᓯᓚᕐᔪᐊᒥ ᐃᓕᓴᕆᔭᐅᖁᓪᓗᒋᑦ ᐱᔪᓐᓇᐅᑎᖏᑦ. UNDRIP ᐃᓕᓴᕆᔭᐅᓯᒪᔪᒃᑯᑦ ᐊᑐᓕᖅᑎᑕᐅᓚᐅᕋᓗᐊᖅᑎᓪᓗᒍ ᓄᓇᖃᕐᔪᐊᒥ ᑲᑎᒪᔨᓄᑦ 2007-ᒥ, ᐋᔅᑐᕆᓕᐊ, ᑲᓇᑕ, ᓅ ᔩᓚᓐ ᐊᒻᒪᓗ ᒥᐊᓕᒃᑲᑦ ᓄᓇᖓᓂ (ᐊᔾᔨᒌᐸᓗᒻᒥᒃ ᖃᓪᓗᓈᕈᖅᑎᑕᐅᒐᓱᐊᖅᓯᒪᓂᕐᒧᑦ ᐊᑐᖅᓯᒪᔪᑦ) ᕿᐱᓗᓚᐅᖅᑐᑦ ᐊᑎᓕᐅᕈᒪᓇᑎᒃ ᑕᐃᑦᓱᒪᓂ. 2016-ᒥ, ᑲᓇᑕ ᐊᓯᔾᔨᓚᐅᖅᑐᖅ ᖃᓄᐃᓕᖓᓂᕐᒥᓂᒃ, ᑎᒍᓯᓪᓗᓂ UNDRIP ᐊᒻᒪᓗ ᓇᓗᓇᐃᕆᓪᓗᓂ ᐃᓘᓐᓈᓂᒃ ᐊᑐᓕᖅᑎᑦᓯᓛᕐᓂᐊᓂᕐᒥᒃ. ᐊᒻᒪᓗ 2016-aᒥ, ᕉᒥᐅ ᓵᒐᓈᔅ, ᑲᑎᒪᔨᕐᔪᐊᖑᓚᐅᖅᓯᒪᔪᖅ ᐱᖁᔭᓕᐅᕐᕕᔾᔪᐊᒥ, ᓴᖅᑮᓚᐅᖅᑐᖅ ᐱᖁᔭᒃᓴᖅ C-262, ᐱᓇᓱᐊᒐᖃᖅᑐᓂ ᑲᓇᑕᒥ ᓇᓕᖅᑯᑦᓯᖁᔨᓪᓗᓂ ᒪᓕᒐᖏᓐᓄᑦ ᓄᓇᕐᔪᐊᒥ ᒥᑭᓂᖅᐹᖑᓗᓂ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓄᑦ ᐊᑐᖅᑕᐅᖃᑦᑕᓲᒥᒃ ᓄᓇᖃᖅᑳᖅᓯᒪᔪᓄᑦ. ᐃᓛᒃ ᐱᖁᔭᒃᓴᖅ ᑲᔪᓯᑎᑕᐅᓚᐅᕋᓗᐊᖅᑎᓪᓗᒍ ᒪᓕᒐᓕᐅᕐᕕᔾᔪᐊᒥ 2018, ᑲᔪᓯᓚᐅᙱᑦᑐᖅ ᐃᑦᑑᑏᑦ ᑲᑎᒪᕕᖓᒍᑦ 2019−ᒥ. “ᐃᓕᓴᕆᒍᒪᓪᓗᒍ ᖁᔭᒋᓪᓗᒍᓗ ᕉᒥᐅ ᓵᒐᓈᔅ ᐱᓕᕆᖃᑦᑕᓚᐅᖅᑐᖅ ᑕᖃᓂᕋᕈᓐᓇᕋᓂ ᐃᑲᔫᑎᒃᓴᑐᐃᓐᓇᒥᓅᙱᑦᑐᖅ ᑎᑎᕋᖅᑕᐅᕙᓪᓕᐊᓂᖏᓐᓂᒃ ᐋᔩᕋᕈᑕᐅᓂᖏᓐᓂᓪᓗ UNDRIP, ᑭᓯᐊᓂᓕᑦᑕᐅᖅ ᓇᓗᓇᐃᕈᑎᒥᒃ ᐊᖏᕈᑕᐅᓂᖓᓂᒃ ᐃᓚᒋᔭᐅᓂᖓᓂᒃ ᒪᓕᒐᑦᓴᑦ ᐋᖅᑭᑦᓯᒪᓂᖏᓐᓄᑦ ᑲᓇᑕᒥ,” ᐅᖃᓚᐅᖅᑐᖅ ᐊᓗᑭ ᑰᑦᑎᖅ, ᑐᙵᕕᒃᑯᑦ ᐊᖓᔪᖅᑳᖓ.

ᑖᓐᓇ UNDRIP ᐱᖁᔭᖅ ᓇᓗᓇᐃᕈᑎ ᑐᑭᓯᑎᑦᓯᕐᖓᐅᑎᖓᓂ “ᑐᐊᕕᕐᓇᕐᓂᖓᓂᒃ ᐃᑉᐱᒋᔭᐅᑦᓯᐊᖁᓪᓗᒋᑦ ᐊᒻᒪᓗ ᐱᕚᓪᓕᕈᑎᒃᓴᖏᓐᓂᒃ ᐱᔪᓐᓇᐅᑎᖏᑦ ᓄᓇᖃᖅᑳᖅᓯᒪᔪᑦ ᐊᖏᕈᑕᐅᓯᒪᔪᓂ ᓄᓇᑖᕈᑎᓂ, ᐊᖏᖃᑎᒌᒍᑎᓂ ᐊᒻᒪᓗ ᐊᓯᖏᓐᓂ ᐋᖅᑭᒋᐊᕈᑎᒃᓴᓕᐊᖑᓯᒪᔪᓂ”. ᓄᓇᕗᑦ ᑐᙵᕕᒃᑯᑦ ᐅᒡᒍᕐᓇᕋᓗᐊᖅᐳᖅ ᐊᑐᕆᐊᖃᓚᐅᕐᓂᖏᓐᓂᒃ ᐃᖅᑲᖅᑐᐃᕕᓐᓂᒃ ᐊᒥᓱᐃᒐᓚᑦᑐᑎᒃ ᐊᑭᑐᔪᕐᔪᐊᒃᑯᑦ ᐊᒻᒪᓗ ᑭᖑᕙᕈᑕᐅᓯᒪᔪᒥᒃ ᒐᕙᒪᒃᑯᑦ ᓴᐳᔾᔨᓯᒪᖁᓪᓗᒋᑦ ᐊᒻᒪᓗ ᑲᔪᓯᑎᑦᓯᓗᑎᒃ ᐱᓇᓱᐊᕆᐊᓕᖕᒥᓂᒃ ᑲᒪᒋᔭᒃᓴᒫᒥᒍᑦ ᓄᓇᕗᑦ ᐊᖏᕈᑎᖏᓐᓂ. ᐊᓗᑭ ᑰᑦᑎᕐᒧᑦ, ᐊᖓᔪᖅᑳᕆᔭᐅᔪᖅ ᑐᙵᕕᒃᑯᓐᓂ, “ᑲᔪᓯᑎᑕᐅᓂᖓ ᐱᖁᔭᖅ ᓵᓚᒃᓴᕐᓂᐅᔪᖅ ᓄᓇᖃᖅᑳᖅᓯᒪᔪᓕᒫᓄᑦ ᑲᓇᑕᒥ, ᐃᓚᒋᔭᐅᓪᓗᑎᒃ ᐃᓄᐃᑦ, ᐊᒻᒪᓗ ᐊᑐᖅᑕᐅᒋᐅᖅᑐᖅ ᓇᓗᓇᐃᒃᑯᑕᐅᓂᐊᓕᖅᑐᓂ ᑲᓇᑕᒧᑦ. ᑕᒪᓐᓇ ᐱᕕᒃᓴᖃᖅᑎᑦᓯᖁᓇᕐᓂᐊᕋᓗᐊᖅᐳᖅ ᓇᓗᓇᐃᕈᑕᐅᓗᓂ ᐃᑉᐱᒋᐅᑎᑦᓯᐊᓂᒃᑯᑦ ᐱᓇᓱᐊᖃᑕᐅᖃᑦᑕᓕᕐᓗᑎᒃ ᐃᓄᐃᑦ, ᐃᑉᐱᒋᔭᐅᑦᓯᐊᕐᓗᑎᒃ ᐃᓅᓂᑦᑎᒍᑦ ᓇᑭᙶᖅᓯᒪᓂᑦᑎᓂᒃ ᐊᒻᒪᓗ ᓄᓇᑖᖅᓯᒪᓂᒃᑯᑦ ᐱᔪᓐᓇᐅᑎᓂᒃ ᐊᒻᒪᓗ ᐱᕚᓪᓕᕈᑕᐅᒋᐊᒃᑲᓂᕐᓗᓂ ᐃᓅᓯᖃᑦᓯᐊᑲᓐᓂᕈᑎᒃᓴᑎᓐᓄᑦ ᐊᒻᒪᓗ ᑐᙵᕕᒋᔭᑦᑎᓐᓄᑦ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓄᑦ.”

ᖃᐅᔨᒃᑲᓕᖅᐸᕗᑦ ᓄᓇᕗᑦ ᒐᕙᒪᒃᑯᖏᑦ ᓇᓗᓇᐃᕆᖁᓪᓗᒋᑦ ᐊᑐᓕᖅᑎᑦᓯᓗᑎᒃ ᑲᔪᓯᑎᓪᓗᒋᓪᓗ UNDRIP, ᓇᓗᓇᐃᖅᑕᐅᓯᒪᔪᑦ ᓱᓕᔪᒥᒃ ᓴᐃᒻᒪᖃᑎᒌᓐᓂᒥᓪᓗ ᑲᒥᓴᒃᑯᓐᓄᑦ ᐊᐅᓚᔾᔭᐃᒍᑎᒃᓴᓕᐊᖑᓯᒪᔪᓂ 43. ᓄᓇᕗᑦ ᒐᕙᒪᖓ ᐱᓕᕆᐊᒃᓴᖃᕐᒪᑦ ᐊᐅᓚᑦᓯᓂᒃᑯᑦ ᓴᐳᔨᓯᒪᓂᕐᒥᒃ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐋᖅᑭᒍᑎᒃᓴᓂᒃ ᐊᔾᔨᐅᖏᑎᑕᐅᖃᑦᑕᓂᒃᑯᑦ ᐱᕋᔭᑕᐅᖃᑦᑕᕐᓂᖏᓐᓂᒃ, ᓵᙵᑦᓯᓗᑎᒃ ᒥᑭᓪᓕᑎᑕᐅᓯᒪᖃᑦᑕᕐᓂᖏᓐᓂᒃ ᐊᒻᒪᓗ ᑲᒪᒋᔭᖃᕐᓗᑎᒃ ᓄᖑᑎᑕᐅᖁᓪᓗᒋᑦ ᓇᐅᒃᑯᑐᐃᓐᓇᖅ ᐋᓐᓂᖅᑎᕆᓂᐅᕙᑦᑐᑦ, ᐅᕕᓂᖃᑎᒌᙱᓂᕐᒧᑦ ᒥᑭᓪᓕᑎᖅᑕᐅᓂᖅ ᐊᒻᒪᓗ ᐱᕋᔭᑕᐅᖃᑦᑕᕐᓂᖏᓐᓄᑦ ᐃᓄᐃᑦ.

ᑲᓇᑕ ᓇᖕᒥᓂᖅᓱᖅᑐᒥᒃ ᓄᓇᖃᖅᑳᖅᓯᒪᔪᑦ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓄᑦ ᑲᒥᓴᑖᕆᐊᓕᒃ. ᐃᓄᐃᑦ ᓯᕗᓕᖅᑏᑦ ᑕᒪᑦᓱᒧᖓ ᑲᒥᓴᑖᓚᐅᙱᑦᑐᑦ ᐃᓚᓕᐅᔾᔭᐅᓯᒪᔪᒥᒃ UNDRIP ᐱᖁᔭᖓᓄᑦ, ᒪᓕᒐᑦᓴᖅ ᐱᒋᐊᕈᑎᑦᓯᐊᕙᒃ ᑐᑭᒧᐊᑦᓯᐊᖅᑐᒥᒃ ᐃᖅᑲᓇᐃᔭᖃᑎᒌᒍᑎᒃᓴᐅᓂᕐᒧᑦ ᓄᖑᑎᑦᓯᓂᕐᒧᑦ ᐱᕋᔭᑕᐅᓂᕆᖃᑦᑕᖅᑕᖏᓐᓂᒃ ᓄᓇᖃᖅᑳᖅᓯᒪᔪᑦ ᓵᙵᔭᕆᐊᖃᖃᑦᑕᖅᑕᖏᓐᓂᒃ.

-30-

ᑐᑭᓯᒋᐊᒃᑲᓂᕐᕕᒃᓴᖅ:

ᒪᓚᐃᔭ ᒥᑭᔾᔪᒃ

ᑐᑭᒧᐊᒃᑎᑦᑎᔨᐅᓂᕐᒧᑦ ᐃᓕᓐᓂᐊᖅᑐᖅ ᑐᓴᐅᒪᔾᔪᑎᓕᕆᔨᒃᑯᓐᓂ

ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006

www.tunngavik.com

UNDRIP:

http://www.un.org/development/desa/indigenouspeoples/wp-content/uploads/sites/19/2018/11/UNDRIP_E_web.pdf

UNDRIP Act:

https://parl.ca/Content/Bills/432/Government/C-15/C-15_1/C-15_1.PDF

Download (PDF, 81KB)