(ᕕᕗᐊᕆ 22, 2012 – ᑕᓗᕐᔪᐊᖅ, ᓄᓇᕗᑦ) ᓄᓇᕗᑦ ᑐᙵᕕᒃᑯᑦ ᐊᖏᔪᖅᑳᖓᑕ ᑐᒡᓕᐊ ᔭᐃᒥᓯ ᐃᑦᑐᓗᒃ ᐅᓪᓗᒥ ᖁᕕᐊᒋᔭᖃᖅᑲᐅᔪᖅ ᐱᓇᓱᐊᕐᓂᕆᔭᖏᓐᓂᒃ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ, ᓄᓇᕗᒻᒥ ᐃᒪᓕᕆᓂᕐᒧᑦ ᑲᑎᒪᔩᑦ, ᓄᓇᕗᒻᒥ ᐸᕐᓇᐃᔩᑦ ᑲᒥᓴᓐ ᐊᒻᒪᓗ ᓄᓇᕗᒻᒥ ᓄᓇᓕᓕᕆᔩᑦ ᑲᑎᒪᔨᖏᑦ (ᐱᓗᐊᖅᑐᒥᒃ ᑭᒃᑯᓕᒫᓄᑦ ᒐᕙᒪᐅᔪᑦ) ᓴᖅᑮᓯᒪᓕᕐᓂᖏᓐᓄᑦ ᓄᓇᕗᒻᒥ ᑕᕆᐅᕐᒥᐅᑕᓕᕆᓂᕐᒧᑦ ᑲᑎᒪᔨᐅᓂᐊᖅᑐᓂᒃ (NMC) ᐊᑖᓂ ᐃᓛᒃᑰᖓᑕ 15.4.1 ᑕᕝᕙᓂ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᐅᑉ.

“ᑕᕆᐅᑦ ᓄᓇᕗᒻᒥ ᐱᒻᒪᕆᐅᒻᒪᑕ ᓄᓇᕗᒻᒥᐅᓄᑦ ᑲᓇᑕᒥᐅᑕᓄᓪᓗ, ᐊᑐᐃᓐᓇᐅᑎᑦᓯᕙᓐᓂᖏᑦ ᓂᕿᒃᓴᒥᒃ, ᐊᓐᓄᕌᑦᓴᓂᒃ ᐊᒻᒪ ᐊᖏᕐᕋᒃᓴᒥᒃ ᐃᓄᓐᓄᑦ ᓯᕗᓕᕆᓚᐅᖅᑕᑎᓐᓄᓪᓗ ᐊᕐᕌᒍᒐᓴᒻᒪᕆᐊᓗᓐᓄᑦ,” ᐅᖃᖅᑐᖅ ᐃᑦᑐᓗᒃ. “ᓄᓇᕗᒻᒥ ᑕᕆᐅᕐᒥᐅᑕᓕᕆᓂᕐᒧᑦ ᑲᑎᒪᔩᑦ ᐱᒻᒪᕆᐅᓂᐊᖅᐳᑦ ᐅᖃᐅᔾᔨᒋᐊᖅᑎᐅᓗᑎᒃ ᐃᓱᒪᒃᓴᖅᓯᐅᕈᑎᒃᓴᓂᒃ ᑐᓂᓯᕙᓪᓗᑎᒃ ᒐᕙᒪᐃᑦ ᑎᒥᖁᑎᖏᓐᓄᑦ, ᐱᓗᐊᖅᑐᒥᒃ ᖃᐅᔨᓴᕈᒪᕙᒃᑐᑦ ᐅᓄᖅᓯᕙᓪᓕᐊᖏᓐᓇᑎᓪᓗᒋᑦ, ᐱᕚᓪᓕᕈᑎᒃᓴᐃᑦ, ᐅᓇᑕᖅᑐᒃᓴᐃᑦ ᐊᒻᒪ ᐊᓯᖏᑦ ᐱᓕᕆᐊᖑᕙᓪᓕᐊᓯᒪᔪᑦ ᓄᓇᕗᒻᒥ ᐊᕐᕌᒍᕆᓵᓚᐅᖅᑕᑎᓐᓂ.”

ᐃᑦᑐᓗᒃ ᐊᔭᐅᕆᐊᖅᐸᐃᑦ ᒐᕙᒪᒃᑯᑦ ᐃᑲᔪᖅᑐᐃᖁᓪᓗᒋᑦ ᑖᒃᓱᒥᖓ ᐱᓕᕆᓂᕐᒧᑦ ᓴᖅᑭᑕᐅᓯᒪᔪᒥᒃ ᑕᕆᐅᕐᒥᐅᑕᓕᕆᔩᑦ ᑲᑎᒪᔨᖏᓐᓄᑦ ᐊᒻᒪ ᑭᒃᑯᓕᒫᑦ ᒐᕙᒪᒋᔭᖏᓐᓄᑦ, ᐊᒻᒪᓗ ᐊᑐᐃᓐᓇᐅᑎᑦᓯᖃᑦᑕᕐᓗᑎᒃ ᓈᒻᒪᒃᑐᓂᒃ ᒪᑭᒪᔾᔪᑎᒋᔪᓐᓇᓂᐊᖅᑕᖏᓐᓂᒃ ᑮᓇᐅᔭᑎᒍᑦ ᑖᒃᑯᓄᖓ ᓄᓇᕗᒻᒥ ᑕᕆᐅᕐᒥᐅᑕᓕᕆᓂᕐᒧᑦ ᑲᑎᒪᔨᖏᓐᓄᑦ ᑲᔪᓯᔪᓐᓇᖁᓪᓗᒋᑦ ᐊᐅᓚᓂᕆᔭᕆᐊᓕᓕᒫᖏᓐᓄᑦ..