(ᐆᑦᑑᑉᐱᕆ 22, 2020 – ᐃᖃᓗᑦᑑᑦᑎᐊᖅ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑕ (ᑐᙵᕕᒃ) ᐊᖓᔪᖅᑳᖓ ᐊᓗᑭ ᑰᑦᑎᖅ ᑐᓴᖅᑎᓯᖅᑲᐅᔪᖅ ᐅᓪᓗᒥ ᑐᙵᕕᒃᑯᑦ ᐃᓱᓕᑦᓯᐊᓚᐅᖅᑐᑦ 2020 ᐊᕐᕌᒍᑕᒫᖅᓯᐅᒻᒥᒃ ᑲᑎᒪᓂᖓᑦ (AGM) ᐃᖃᓗᑦᑑᑦᑎᐊᒥ, ᓄᓇᕗᑦ.
ᐅᔾᔨᕐᓇᓗᐊᕐᓂᖏᑦ ᐊᕐᕌᒍᑕᒫᖅᓯᐅᒻᒥᒃ ᑲᑎᒪᓂᕐᒥ ᐱᖁᔨᕗᖔᕈᑏᑦ ᐃᓚᒋᔭᐅᓪᓗᑎᒃ:
- Dolphin Union ᑐᑦᑐᖏᓐᓄᑦ ᐊᑐᖅᑕᐅᑲᐃᓐᓇᓂᐊᖅᑐᖅ ᑎᓕᓯᔾᔪᑎ − ᑲᑎᒪᔭᖅᑐᖅᓯᒪᔪᑦ ᖃᐅᔨᒃᑲᐃᔪᑦ ᓄᓇᕗᑦ ᒐᕙᒪᒃᑯᖏᓐᓂᒃ (GN) ᒪᓕᖁᓪᓗᒋᑦ ᓴᖅᑭᖅᑕᐅᓯᒪᔪᒥᒃ, ᑕᒪᐃᓐᓄᑦ ᐊᖏᕈᑕᐅᑲᐃᓐᓇᖅᓯᒪᔪᒥᒃ ᐊᑐᖅᑕᐅᑲᐃᓐᓇᕐᓂᐊᖅᑐᑦ ᑖᒃᑯᐊ ᐃᓚᐅᔪᑦ ᑎᓕᐅᕆᕗᑦ ᓄᓇᕗᑦ ᒐᕙᒪᖏᓐᓂᒃ ᒪᓕᖁᓪᓗᒋᑦ ᐋᖅᑭᒃᑕᐅᓯᒪᔪᓂᒃ, ᐊᖏᕈᑕᐅᓯᒪᔪᑦ ᐊᑐᖅᑕᐅᕙᒃᑐᑦ ᐱᓕᕆᖃᑎᖃᕐᓗᓂ ᐃᓄᖕᓂᑦ ᓄᓇᓕᖕᓂ ᐊᒻᒪ ᐊᖑᓇᓱᒃᑎᓄᑦ ᐊᒻᒪ ᑕᒪᒃᑯᐊ ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ, ᐱᒐᓱᐊᖁᓪᓗᒋᑦ ᓄᓇᓖᑦ ᐃᑲᔪᖅᓲᑎᖏᓐᓂᒃ ᓇᓪᓕᐊᓐᓄᑐᐃᓐᓇ ᐊᑐᖅᑕᐅᑲᐃᓐᓇᕐᓂᐊᖅᑐᓄᑦ;
- ᕿᒥᕐᕈᓂᖅ ᑐᐊᕕᕐᓇᖅᑐᓕᕆᓂᕐᒧᑦ ᐋᓐᓂᐊᕐᕕᓕᐊᖅᑐᓄᑦ ᐱᔨᑦᓯᕋᐅᑏᑦ –ᐃᓚᐅᔪᑦ ᖃᐅᔨᒃᑲᐃᔪᑦ ᑖᒃᑯᐊ ᓄᓇᕗᑦ ᒐᕙᒪᖏᑦ ᐊᒻᒪ ᒐᕙᒪᑐᖃᒃᑯᑦ (GoC) ᕿᒥᕐᕈᖁᓪᓗᒋᑦ ᑐᐊᕕᕐᓇᖅᑐᒃᑯᑦ ᐋᓐᓂᐊᕐᕕᐊᕐᓂᕐᒧᑦ ᐱᔨᑦᓯᕋᐅᑏᑦ ᐊᒻᒪ ᒪᓕᒃᑕᐅᕙᒃᑐᑦ ᓄᓇᕗᒥ, ᐃᓚᐅᓗᑎᒃ ᖃᓄᐃᑦᑑᓂᖏᑦ ᐸᖅᑭᔾᔪᑏᑦ, ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᑦ ᐊᒻᒪ ᐃᖏᕐᕋᔪᓕᕆᓂᖅ ᐊᒻᒪᓗ ᕿᒥᕐᕈᔾᔪᑎᖏᑦ ᒪᓂᒪᓂᐊᕐᓗᒋᑦ ᑕᖅᑲᒃᑯᓄᖓ;
- ᓄᓇᓕᖕᓂ ᖃᓄᐃᓐᖏᑦᓯᐊᕆᐊᖃᕐᓂᕐᒧᑦ ᐊᒻᒪ ᐃᓅᓯᕐᒥᑦ ᓇᑲᑎᕆᑦᑕᐃᓕᒪᔾᔪᑕᐅᔪᑦ –ᐃᓚᐅᔪᑦ ᐅᖃᐅᔾᔨᕗᑦ ᓄᓇᕗᑦ ᒐᕙᒪᖏᓐᓂᒃ ᖃᓄᐃᓕᐅᕆᐊᕈᑎᖃᖁᓪᓗᒋᑦ ᑕᑯᒃᓴᐅᑎᑦᓯᓗᑎᒃ ᓯᕗᒻᒧᐊᒋᐊᕈᑕᐅᔪᓂᒃ ᑐᕌᖓᔪᓂᒃ ᐃᓅᓯᕐᒨᖓᔪᑦ ᓇᓕᒧᒋᔭᐅᓕᖁᓪᓗᒋᑦ ᓄᓇᕗᒥ ᓄᓇᓕᖕᓂ ᐊᒻᒪᓗ ᒪᓕᒡᓗᑎᒃ ᐱᓕᕆᐊᒃᓴᕆᑎᑕᐅᔪᓂᒃ ᐃᓄᖕᓅᖓᔪᓂᒃ ᓄᓇᓕᖕᓕᖕᓃᑦᑐᑦ ᖃᓄᐃᓐᖏᑦᓯᐊᕈᑎᒃᓴᓂᒃ ᐃᓅᓯᕐᒥᑦ ᓇᑲᑎᕆᑦᑕᐃᓕᒪᔾᔪᑏᑦ;
- ᓄᓇᕗᒥ ᐃᓄᐃᑦ ᓯᓚᑖᓃᑦᑐᑦ ᓄᓇᕗᑦ – ᐃᓚᐅᔪᑦ ᖃᐅᔨᒃᑲᐃᔪᑦ ᒐᕙᒪᑐᖃᒃᑯᓐᓂᒃ ᐱᑕᖃᖅᑎᑦᓯᖁᓪᓗᒋᑦ ᐊᒻᒪ ᓈᒻᒪᒃᑐᓂᒃ ᑮᓇᐅᔭᖃᖅᑎᑦᓯᓗᑎᒃ ᖃᐅᔨᓴᖅᑕᐅᔾᔪᑎᒃᓴᓂᒃ ᐱᓕᕆᐊᓄᑦ ᐊᒻᒪ ᐱᔨᑦᓯᕋᐅᑎᓄᑦ ᑭᓐᖒᒪᒋᔭᖏᓐᓂᒃ ᐃᓄᐃᑦ ᓯᓚᑖᓃᑦᑐᑦ ᓄᓇᕗᒥ ᓄᓇᑖᕐᕕᐅᓯᒪᔪᒥ;
- ᓄᕙᒡᔪᐊᕐᓇᕐᒧᑦ COVID-19 ᐊᒃᑑᑕᐅᔪᑦ – ᑖᒃᑯᐊ ᐃᓚᐅᔪᑦ ᐅᖃᐅᔾᔨᕗᑦ ᑖᒃᑯᓂᖓ ᓄᓇᕗᑦ ᒐᕙᒪᖏᓐᓂᒃ ᒐᕙᒪᑐᖃᒃᑯᓐᓂᓪᓗ ᑖᒃᑯᐊ ᐃᓄᐃᑦ ᐃᖅᑲᓇᐃᔭᖅᑎᑕᐅᒋᐊᖃᕐᓂᖏᓐᓄᑦ ᐱᓕᕆᐊᒃᓴᕆᑎᑕᐅᔪᑦ ᐊᑖᒍᑦ ᑖᒃᑯᐊ ᓄᓇᕗᒥ ᐊᖏᕈᒪᓕᒃᑕᐅᖁᓪᓗᒋᑦ ᓴᓇᓗᑎᒃ ᐊᔪᕈᓐᓃᕈᑎᒃᓴᓂᒃ ᓄᓇᕗᒥ, ᐱᓗᐊᖅᑐᒥᒃ ᐱᑕᖃᕆᐊᖃᒻᒪᕆᒃᑐᒥᒃ ᐃᓕᓐᓂᐊᖅᑐᓕᕆᓂᒃᑯ, ᐋᓐᓂᐊᖅᑐᓕᕆᓂᒃᑯᑦ ᐊᒻᒪ ᒪᓕᒐᓕᕆᓂᒃᑯᑦ;
- ᐃᒡᓗᑭᓴᕐᓂᖅ ᐃᓚᐅᔪᑦ ᐅᖃᐅᔾᔨᕗᑦ ᓄᓇᕗᑦ ᒐᕙᒪᖏᓐᓂᒃ, ᒐᕙᒪᑐᖃᒃᑯᓐᓂᓪᓗ ᑕᒪᒃᑯᐊᓕᒫᖅ ᐊᒃᑐᐃᔪᑦ ᐃᓅᓯᕐᒧᑦ ᓈᒻᒪᒍᓐᓃᕈᑕᐅᕙᒃᑐᑦ ᐋᓐᓂᐊᕐᓇᖅᑐᓄᑦ ᐃᓄᖕᓄᑦ ᐅᖃᐅᓯᐅᓗᑎᒃ ᑕᒪᒃᑯᐊ ᐃᓄᐃᑦ ᐊᑦᑕᕐᓇᖅᑐᒦᒃᑲᓐᓂᖁᓇᒋᑦ ᑐᐊᕕᕐᓇᖅᑐᖃᓕᕐᓂᖅᐸᑦ ᓲᕐᓗ ᐊᐃᑦᑑᑕᐅᔪᓐᓇᖅᑐᖃᖅᐸᑦ ᓄᓇᕐᔪᐊᓂ;
- ᐋᖅᑭᒋᐊᖅᑕᐅᓂᖏᑦ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦᑕ ᐊᑭᓕᒃᓴᖏᑦ – ᐃᓚᐅᔪᑦ ᓄᓇᕗᑦ ᑐᓐᖓᕕᒃ ᑎᒥᖓᓐᓄᑦ ᐊᖏᕈᑎᖃᖅᐳᑦ ᐋᖅᑭᒋᐊᖅᑕᐅᖁᓪᓗᒍ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦ $7.5−ᒥᓕᔭᓐ ᐊᑭᓕᒃᓴᐃᑦ ᐱᓪᓗᒍ ᖁᕐᓗᖅᑐᐊᕐᔪᒃ Greys Bay ᐱᓕᕆᐊᖑᓂᖓ ᐋᖅᑭᒋᐊᖅᑕᐅᓗᓂ ᖁᓕᓄᑦ ᐊᕐᕌᒍᓄᑦ ᕿᑐᓐᖏᐅᖏᓪᓗᓂ ᐊᑭᓕᒃᓴᐅᓂᐊᕐᓗᓂ; ᐊᒻᒪᓗ
- ᐋᑎᑯ 24 – ᑖᒃᑯᐊ ᐃᓚᐅᔪᑦ ᐅᖃᐅᔾᔨᕗᑦ ᓄᓇᕗᑦ ᒐᕙᒪᖏᓐᓂᒃ ᒪᓕᖃᑦᑕᖁᓪᓗᒋᑦ ᐃᓄᐃᑦ ᑲᓐᑐᕌᒃᑎᑕᐅᒋᐊᖃᕐᓂᖏᓐᓄᑦ ᐱᓕᕆᐊᒃᓴᕆᑎᑕᐅᔪᓂᒃ ᓄᓇᕗᒥ ᐊᖏᕈᑎᓂ ᐊᒻᒪ ᐋᖅᑭᒃᓱᐃᖁᓪᓗᒋᑦ ᓂᐅᕕᖃᑦᑕᕐᓂᕐᒧᑦ ᐊᑐᐊᒐᕐᓂᒃ, ᐃᓕᖅᑯᓯᐅᓂᐊᖅᑐᓂᒃ ᐊᒻᒪ ᐊᑐᖅᑕᐅᔪᒃᓴᓂᒃ ᐃᑲᔪᖅᓱᐃᒍᑎᒋᓗᒋᑦ ᐃᓄᐃᑦ ᓇᖕᒥᓂᖁᑎᖏᓐᓄᑦ ᐊᒻᒪ ᓄᓇᓕᖕᓂ ᓇᖕᒥᓂᖃᖅᑐᓄᑦ.
ᐊᖓᔪᖅᑳᖅ ᑰᑦᑎᖅ ᑐᓴᖅᑎᑦᓯᖅᐅᒋᕗᑦ ᑖᒃᑯᐊ ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᑲᑎᒪᔨᖏᑦ ᐊᖏᕈᑎᖃᕐᓂᖏᓐᓂᒃ ᐊᒻᒪ ᐱᒋᐊᖅᑎᑦᓯᓂᖏᓐᓂᒃ ᓄᑖᓂ ᐱᓕᕆᐊᓂᒃ ᐃᑲᔫᑎᒃᓴᓂᒃ ᑕᐃᔭᐅᔪᖅ ᐅᖅᑯᔾᔭᐃᑦ ᐃᓐᓇᕐᓄᑦ ᐃᓅᓯᒪᔪᓄᑦ ᐊᑯᓐᖓᓐᓂ ᔮᓐᓄᐊᕆ 1, 1949 ᐊᒻᒪ ᑎᓰᕝᕙ 31, 1955 ᑮᓇᐅᔭᑎᒍᑦ ᑕᖅᑭᑕᒫᑦ $120. ᑐᒃᓯᕋᐅᑏᑦ ᑕᑕᑎᕆᐊᓖᑦ ᐊᒻᒪ ᑐᑭᓯᒋᐊᕈᑎᒃᓴᒃᑲᓐᓃᑦ ᓇᓂᔭᐅᔪᓐᓇᖅᑐᑦ ᑕᒡᕙᓂ ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᐃᑭᐊᖅᑭᕕᐊᓂ www.tunngavik.com
ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᕿᓃᓐᓇᕐᒪᑕ ᓴᓐᖏᓂᖅᓴᓂᒃ ᐊᒻᒪ ᐊᑑᑎᖃᕐᓂᖅᓴᓂᒃ ᐱᓕᕆᖃᑎᒌᒍᑎᒃᓴᓂ ᐱᖃᑎᒋᓗᒋᑦ ᓄᓇᕗᑦ ᒐᕙᒪᖏᑦ, ᒐᕙᒪᑐᖃᒃᑯᓪᓗ. ᑕᒪᓐᓇ ᓇᓗᓇᕈᓐᓃᓚᐅᖅᑐᖅ ᑕᒫᓂ ᐊᕐᕌᒍᑕᒫᖅᓯᐅᒻᒥᒃ ᑲᑎᒪᕕᒡᔪᐊᖅᑎᓪᓗᒋᑦ ᓯᕗᕌᓐᓃᓚᐅᖅᑎᓪᓗᒋᑦ ᓄᓇᕗᑦ ᓯᕗᓕᖅᑎᖓ ᔫ ᓴᕕᑲᑖᖅ ᐊᒻᒪ ᑕᕐᕆᔭᐅᑎᒃᑯᑦ ᑲᑎᒪᖃᑕᐅᓂᖓ ᑕᑯᒃᓴᐅᖃᐅᑎᓪᓗᒍ ᒥᓂᔅᑕ ᑖᓐ ᕚᓐᑐ.
ᐱᔾᔪᑎᒋᓪᓗᒍ ᓄᕙᒡᔪᐊᕐᓇᕐᒧᑦ COVID-19 ᒪᓕᒋᐊᓖᑦ, $2500 ᐱᑕᖃᖅᑎᑕᐅᔪᑦ ᑕᒪᒃᑮᖕᓄᑦ ᓄᓇᓕᖕᓂ ᐊᔪᖅᓴᖅᑐᓄᑦ ᓂᕿᑖᕐᕕᐅᕙᒃᑐᓄᑦ ᐊᒻᒪ ᐃᓐᓇᒻᒪᕇᑦ ᐃᑦᑐᑯᕕᖕᒦᑦᑐᑦ, ᓂᕆᕕᒡᔪᐊᖅᑎᑕᐅᓐᖏᖔᕐᓗᑎᒃ.
-30-
ᑐᑭᓯᒋᐊᒃᑲᓂᕐᕕᒃᓴᖅ, ᖃᐅᔨᒋᐊᕐᕕᒋᓗᒍ:
ᓇᐅᓪᓚᕐᒃ ᕙᓚᐅᕋᑎ
ᑐᑭᒧᐊᒃᑎᑦᑎᔨ ᑐᒡᓕᐊ ᑐᓴᐅᒪᔾᔪᑎᓕᕆᔨᒃᑯᑦ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: 867-975-4900 ᐊᑭᖃᙱᑦᑐᖅ: 1-888-646-0006
@tunngavik.com
