ᓴᒃᑯᑕᐅᑲᐅᑎᒋᔭᕆᐊᓕᒃ
(ᐋᒡᒌᓯ 12, 2024 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᐊᓗᑭ ᑰᑦᑎᖅ ᖁᕕᐊᓱᑦᑐᖅ ᑐᓴᖅᑎᑦᑎᔭᕆᐊᒃᓴᖅ ᓵᓚᒃᓴᖅᑐᒥᓂᕐᓂᒃ 2024-ᒥ ᓄᓇᕗᑦ ᐅᓪᓗᖓ ᖁᕕᐊᓲᑕᐅᑎᓪᓗᒍ ᖃᒧᑕᐅᔭᕐᓂᑦ ᐊᒻᒪᓗ ᐱᓲᑎᓂᑦ ᐊᒧᔭᒥᓂᐅᓪᓗᑎᑦ ᐊᑎᖏᑦ.
ᓄᓇᕗᒻᒥᐅᑦ ᐃᓄᒻᒪᕆᖏᑦ ᐊᑎᓕᐅᖅᓯᒪᔪᑦ ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎᖓᓄᑦ ᐊᑎᖏᑦ ᐊᑕᐅᑦᑎᒨᖅᑕᐅᔪᐃᓐᓇᐅᓚᐅᕐᒪᑕ ᐊᒧᔭᐅᔪᖃᕐᓂᐊᖅᑐᓂ ᓵᓚᒃᓴᕈᓐᓇᖁᓪᓗᒋᑦ 2024 ᐃᒃᔅᐱᑎᓴᓐ ᔅᐳᐊᑦ 900 ᐊᐃᔅ LE ᖃᒧᑕᐅᔮᓐᓂᒃ, ᐅᕝᕙᓘᓐᓃᑦ 2024 ᐊᐅᑦᓛᓐᑐ DPS 500CC ᐱᓲᑎᒥᒃ. ᒪᕐᕉᒃ ᓵᓚᒃᓴᖅᑑᒃ ᐊᑐᓂ ᓄᓇᓕᐅᔪᓂᑦ ᓂᕈᐊᖅᑕᐅᓚᐅᖅᑐᑦ ᐊᑎᕐᓂᒃ ᓂᕈᐊᖅᓯᑎᒍᑎᒥᒃ ᖃᕋᓴᐅᔭᒃᑯᑦ ᐊᑐᖅᑐᑎᑦ ᐊᒻᒪᓗ ᑭᒃᑰᒻᒪᖔᕐᒥᒃ ᓇᓗᓇᐃᖅᑕᐅᓪᓗᑎᑦ ᐋᒡᒌᓯ 9−ᖑᑎᓪᓗᒍ, ᓄᓇᕐᔪᐊᕐᒥ ᐅᓪᓗᖓ ᐃᓕᓴᖅᓯᒍᑕᐅᑎᓪᓗᒍ ᓄᓇᕐᔪᐊᕐᒥ ᓄᓇᖃᖅᑳᖅᓯᒪᔪᑦ ᐃᓄᖏᑦ.
ᓵᓚᒃᓴᖅᑐᑦ ᖃᐅᔨᒃᑲᖅᑕᐅᓛᖅᑐᑦ ᓄᓇᕗᑦ ᑐᙵᕕᒃ ᑎᒥᖓᓄᑦ ᐋᖅᑮᒐᔭᕐᒪᑕ ᓵᓚᖃᐅᓯᐊᖏᑦ ᐱᔭᐅᓗᑎᑦ. ᓄᓇᓕᓐᓄᐊᖅᑕᐅᒐᔭᖅᑐᑦ ᐅᒥᐊᕐᔪᐊᒃᑯᑦ ᐊᒻᒪᓗ ᐊᔾᔨᒌᙱᑦᑐᓂᑦ ᐅᓪᓗᖃᕐᓗᑎᑦ ᑎᑭᕝᕕᒃᓴᖏᑦ.
“ᖁᕕᐊᓱᑦᑐᖓ 50 ᐅᖓᑖᓄᑦ ᐃᓚᒌᑦᑐᑦ ᓄᓇᕗᒻᒥ ᓱᓇᒃᑯᑖᖅᑖᕐᓂᐊᕐᒪᑕ ᐃᑲᔪᖅᑐᐃᓂᖃᖅᑐᒥᒃ ᓂᕿᖃᑦᑎᐊᕈᓐᓇᓂᕐᒥᒃ, ᓇᒻᒥᓂᖅᓱᕐᓂᖅᓴᐅᓗᑎᑦ ᐊᒻᒪᓗ ᐃᓕᖅᑯᓯᕐᒥᓂᒃ ᐊᑐᕈᓐᓇᕐᓗᑎᑦ ᓄᓇᒧᑦ ᐊᐅᓪᓚᕈᓐᓇᖅᓯᓂᖏᖕᓄᑦ,” ᐅᖃᖅᑐᓂ ᐊᖓᔪᖅᑳᖅ ᑰᑦᑎᖅ. “ᖁᕕᐊᓲᑎᒋᕙᓯ ᑕᒪᐃᓐᓂ ᓵᓚᒃᓴᖅᑐᑦ!”
ᑖᓐᓇ ᑭᖑᓪᓕᕐᒥᒃ ᐊᕐᕌᒍᕆᓕᖅᑕᖓ ᓄᓇᕗᑦ ᑐᙵᕕᒃ ᑎᒥᖓ ᓄᓇᕗᑦ ᐅᓪᓗᖓᓂ ᖃᒧᑕᐅᔮᓐᓂᒃ ᐊᒻᒪᓗ ᐱᓲᑎᓂᑦ ᓵᓚᒃᓴᕋᔭᖅᑐᓂᑦ ᐊᒧᓯᖃᑦᑕᑎᓪᓗᒋᑦ, ᑮᓇᐅᔭᖃᖅᑎᑕᐅᓪᓗᓂ ᓂᕿᑦᑎᐊᕙᓕᕆᔭᐅᓂᖏᑦ ᑲᓇᑕᑉ ᐅᑭᐅᖅᑕᖅᑐᖓᓂ ᐊᖑᓇᓱᑦᑎᓄᑦ ᐃᑲᔫᑏᑦ ᐊᐃᑦᑑᓯᐊᑦᓴᓂᑦ. ᓵᓚᒃᓴᖅᑐᑦ ᓄᓇᕗᒻᒥᐅᑕᐅᔭᕆᐊᓖᑦ. ᐃᓄᐃᑦ ᓄᓇᕗᑦ ᓯᓚᑖᓂᕐᒥᐅᑦ ᓵᓚᒃᓴᕈᓐᓇᓚᐅᕐᒥᔪᑦ $5000−ᓂᒃ ᑮᓇᐅᔭᖃᖅᑎᑦᑎᓪᓗᑎᑦ ᓄᓇᕗᑦ ᑐᙵᕕᒃ ᑎᒥᖓ.
ᓵᓚᒃᓴᖅᑐᑦ ᐊᑎᖏᑦ ᑎᑎᖅᑐᖅᓯᒪᔪᑦ ᐃᓚᓕᐅᑎᓯᒪᔪᒥᒃ ᐊᓪᓕᕐᒥ
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
