ᑐᓴᕋᑦᓴᓕᕆᔩᑦ

ᓄᓇᕗᑦ ᑐᓐᖓᕕᒃ ᑎᒥᖓᑦ ᑕᐃᓯᕗᑦ 2016-ᒥ ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᖅᑐᓄᑦ ᐃᑲᔫᑎᒃᓴᓂᒃ ᐱᓂᐊᖅᑐᓂᒃ

ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᐊᖓᔪᖅᑳᖓᑦ ᑳᑎ ᑕᐅᑐᖏ ᐅᑉᓗᒥ ᑕᐃᓯᔪᖅ ᐅᖃᖅᖢᓂ ᐱᑎᑕᐅᔪᓂᒃ ᑕᒪᑦᓱᒧᖓ ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᖅᑐᓄᑦ ᐃᑲᔫᑎᒃᓴᓂᒃ ᐅᑭᐅᖓᓂ 2016. ᐊᐃᐳᕆ ᐋᓕ ᐊᕐᕕᐊᒥᐅᑕᖅ ᐊᒻᒪᓗ ᕈᔅᒥᐊᕆ ᐋᑯᓗᒃᔪᒃ ᐸᓐᓂᖅᑑᒥᐅᑕᖅ ᐊᑐᓂᑦ ᐱᓂᐊᖅᑑᒃ $5,000-ᓂᒃ ᑐᕌᕐᓗᑎᒃ ᐃᓕᓐᓂᐊᕈᑎᒋᔭᖏᓐᓄᑦ.  ᐋᓕ ᐅᑭᐅᒋᓕᖅᑕᖓ ᓯᑕᒪᖓᓐᓂ ᑲᔪᓯᔪᖅ ᐃᓕᑕᕆᐅᔾᔪᑎᑖᕐᓂᕐᒧᑦ ᓄᓇᕗᒥ ᐃᓕᓴᐃᔨᐅᓂᕐᒧᑦ ᐃᓕᓐᓂᐊᕈᑎᓂᒃ ᐃᓕᓴᖅᑐᖅ ᐱᓕᕆᐊᖑᔪᑎᒍᑦ ᐊᒻᒪᓗ ᐋᑯᓗᒃᔪᖅ ᑐᖏᓕᐊᓂ ᐅᑭᐅᑉ ᑲᔪᓯᔪᖅ ᐃᓕᑕᔭᐅᔨᔾᔪᑎᑖᕐᓂᕐᒧᑦ ᓄᓇᕗᒥ ᐃᓕᓴᐃᔨᐅᓂᕐᒧᑦ ᐃᓕᓐᓂᐊᕈᑎᓂᒃ ᐃᓕᓴᖅᑐᖅ ᐱᓕᕆᐊᖑᔪᑎᒍᑦ. ᑕᒪᕐᒥᒃ ᑐᓂᓯᓚᐅᖅᓯᒪᔫᒃ ᑎᑎᕋᖅᑕᖏᓐᓂᒃ ᐃᓄᒃᑎᑐᑦ.

“ᖁᕕᐊᓱᐊᑎᒋᕙᕗᑦ ᐅᑯᐊᒃ ᐊᐃᐳᕆ ᐊᒻᒪᓗ ᕉᔅᒥᐊᕆ ᐱᑎᑕᐅᓚᐅᕐᓂᖏᓐᓂᒃ ᑕᒪᑦᓱᒧᖓ ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᖅᑐᑦ ᐃᑲᔫᑎᒃᓴᓂᒃ. ᐅᒃᐱᕈᓱᒃᑐᖓ ᓂᕈᐊᕋᑦᑕ ᒪᕐᕉᖕᓂᒃ ᐊᔪᖏᑦᑐᒻᒪᕆᐊᓘᖕᓂᒃ ᐃᓕᓐᐊᖅᓂᖏᑎᒍᑦ ᐃᒪᓐᓇ ᐱᓇᓱᐊᒻᒪᕆᒃᖢᑎᒃ ᐊᖏᔪᒥᑦ ᑲᔪᓯᑎᑦᑎᓂᕐᒥᑦ ᐃᖅᑲᐅᒪᓂᕐᒥᑦ ᔫᓯᒥᒃ ᖃᓄᐃᓕᖓᓂᕆᓚᐅᖅᓯᒪᔭᖓᓄᑦ.” ᐅᖃᖅᑐᖅ ᑕᐅᑐᖏ.

ᖃᐅᔨᓴᓚᐅᖅᑐᑦ ᕿᒥᕐᕈᓚᐅᖅᖢᑎᒃ 14-ᓂᒃ ᐱᓇᓱᐊᖃᑕᐅᓚᐅᖅᑐᓂᒃ ᑲᑎᖦᖢᒋᑦ. ᐳᔾᔫᑦ ᑯᓱᒐᖅ, ᔫᓯᐅᑉ ᐃᕐᓂᐊ, ᐃᓚᐅᓚᐅᖅᑐᖅ ᖃᐅᔨᓴᖃᑕᐅᓪᓗᓂ ᐱᓂᐊᖅᑐᓂᒃ ᐅᑭᐅᒥ ᒫᓐᓇ.  ᔫᓯ ᖃᑕᖑᑎᖏᑦ ᐃᓚᐅᓯᒪᔪᑦ ᑕᓯᐅᖅᑎᐅᓪᓗᑎᒃ ᑕᒪᑦᓱᒧᖓ ᐃᓕᓐᓂᐊᖅᑐᓄᑦ ᐃᑲᔫᑎᒃᓴᓄᑦ ᑕᐃᒪᓐᖓᓂᒃ ᐱᒋᐊᓚᐅᖅᓯᒪᖕᒪᑕ ᑕᒪᓐᓇ 2011-ᒥ.

“ᑯᓱᒐᐅᑉ ᐃᓚᖏᑦ ᖃᓄᐃᖏᑦᑎᐊᖁᔨᕗᑦ ᐃᓕᓴᖅᑐᓂᒃ ᐱᐅᓂᖅᐹᓂᒃᓗ ᑲᔪᓯᓗᑎᑦ ᐃᓕᓴᐃᔨᐅᓂᕐᒧᑦ. ᐱᑕᖃᓚᐅᖅᑐᖅ ᐆᒃᑐᖅᑐᓂᒃ ᐊᒻᒪᓗ  ᖁᔭᓐᓇᒦᕈᒪᔭᓄᑦ ᑕᒪᕐᒥᒃ ᐃᓕᓯᖃᑕᐅᓚᐅᕐᓂᖏᓐᓂᒃ ᑕᒪᑦᓱᒧᖓ ᐱᓇᓱᐊᖃᐅᓂᕐᒧᑦ. ᓂᕆᐅᒃᑐᒍᑦ ᑲᔪᓯᓂᕐᒥᑦ ᑕᑯᓗᖓ ᐊᒥᓱᓂᒃ ᑕᒪᑦᓱᒧᖓ ᐱᓇᓱᐊᖃᑦᑕᖅᑐᓂᒃ ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᖅᑐᒧᑦ ᐃᑲᔫᑎᒃᓴᓄᑦ. ᐊᑏ ᑲᔪᓯᒋᑦ ᐱᓇᓱᐊᖅᑕᕐᓄᑦ ᓯᕗᓂᒃᓴᕐᓄᑦ ᐊᒻᒪᓗ ᐃᑲᔪᕐᓗᑎᑦ ᓄᓇᕗᒥᑦ ᐊᒻᒪᓗ ᐃᓄᖏᓐᓂᒃ ᑐᓂᓯᖃᑕᐅᖃᑦᑕᕐᓂᖏᓐᓄᑦ ᓇᖕᒥᓂᖅ ᖃᑕᖑᑎᖏᓐᓄᑦ, ᓄᓇᓕᖕᒧᑦ ᐊᒻᒪᓗ ᓄᓇᕗᒧᑦ.” ᐅᖃᖅᑐᖅ ᑯᓱᒐᖅ.

ᑭᖑᓪᓕᕐᒥ ᐃᓱᓕᕝᕕᒃᓴᖓ ᑕᑕᑎᖅᓯᒪᔪᓄᑦ ᑕᒪᑦᓱᒧᖓ ᐱᓇᓱᐊᕐᑐᓄᑦ ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᖅᑐᓄᑦ ᐃᑲᔫᑎᒃᓴᓂᒃ ᔪᓚᐃ 9th, 2017-ᒥ.  ᑕᑕᑎᕈᑎ ᐃᓗᐃᑦᑐᑦ ᐊᑐᐃᓐᓇᐅᓛᖅᑐᑦ ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᐃᑭᐊᕿᔾᔪᑎᖏᓐᓂ ᖃᕆᑕᐅᔭᑎᒍᑦ. ᐃᓄᐃᑦ ᐃᓕᓴᖅᑐᑦ ᑕᐃᒃᑯᐊ ᐊᑎᖃᖃᑕᐅᔪᑦ ᓄᓇᕗᑦ ᐊᖏᕈᑎᖏᓐᓂ ᐊᒻᒪᓗ ᑲᔪᓯᔪᖅ ᖁᑦᑎᖕᓂᖅᓴᓄᑦ ᐃᓕᓐᓂᐊᓂᕐᒥᑦ ᐱᔪᓐᓇᖅᑎᑕᐅᔪᑦ ᑕᒪᑦᓱᒧᖓ ᐃᓕᓐᓂᐊᖅᑐᒧᑦ ᐃᑲᔫᑎᒃᓴᕐᒧᑦ.
 

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: