(ᔫᓂ 5, 2012 – ᐃᖃᓗᐃᑦ)    ᓄᓇᕗᑦ ᑐᓐᖓᑯᒃᑯᑦ ᐊᖓᔪᖅᑳᑉ ᑐᒡᓕᐊ ᔭᐃᒻᔅ ᐃᑦᑐᓗᑦ ᐅᓪᓗᒥ ᑐᓴᖅᑎᑦᓯᔪᖅ ᑖᒃᑯᐊ ᑲᓇᑕᒥ ᑕᐅᖅᓰᖃᑦᑕᕐᓂᕐᒧᑦ ᐃᓱᓕᑦᑕᕐᕕᐅᔪᖅ ᐱᓪᓗᒋᑦ ᑑᒑᓖᑦ ᑑᒑᖏᑦ ᐲᖅᑕᐅᓯᒪᓕᖅᑐᑦ ᐃᖃᓗᓕᕆᔨᒃᑯᓐᓄᑦ, ᐃᒪᕐᒥᐅᑕᓕᕆᔨᒃᑯᓐᓄᓪᓗ ᐃᓘᓐᓇᖏᓐᓄᑦ ᓄᓇᕗᒥ ᓄᓇᓕᐅᔪᓄᑦ ᐃᓚᐅᑎᑕᐅᓐᖏᑦᑐᑑᓪᓗᓂ − ᐊᐅᓱᐃᑦᑐᖅ.

ᐊᕐᕌᒍᐊᓂ 2010 ᐃᖃᓗᓕᕆᔨᒃᑯᓐᓄᑦ, ᐃᒪᕐᒥᐅᑕᓕᕆᔨᒃᑯᓐᓄᓪᓗ ᑐᓂᓯᔪᓐᓃᓚᐅᖅᑐᑦ ᐊᖏᖃᑎᒌᒍᑎᑦ ᓄᖑᓐᓂᐊᖅᑐᕆᔭᐅᓕᖅᑐᓄᑦ ᐆᒪᔪᕐᓄᑦ ᓂᐅᕈᑕᐅᓂᖏᓐᓄᑦ ᓄᒃᑎᕆᔪᓐᓇᕐᓂᕐᒧᑦ ᐱᔪᓐᓇᐅᑎᓂᒃ ᑕᒪᒃᑯᓄᖓ ᑑᒑᓖᑦ ᑐᒑᖏᓐᓂᒃ ᑖᒃᑯᓄᖓ 17−ᓄᑦ ᓄᓇᕗᒥ ᓄᓇᓕᐅᔪᓄᑦ.  ᓄᓇᕗᑦ ᑐᓐᖓᕕᒃᑯᑦ ᓴᖑᑎᑦᓯᒐᓱᐊᓚᐅᕐᒪᑕ ᑕᒪᑐᒥᖓ ᑕᐅᖅᓰᖃᑦᑕᕐᓂᕐᒧᑦ ᐃᓱᓕᑦᑕᕐᕕᐅᔪᒥᒃ ᐃᖅᑲᖅᑐᐃᕕᒃᑰᖅᑎᑦᑐᒋᑦ ᐃᖃᓗᓕᕆᔨᒃᑯᓐᓄᑦ, ᐃᒪᕐᒥᐅᑕᓕᕆᔨᒃᑯᓐᓄᓪᓗ.  ᔫᓂ 2011−ᒥ ᓄᓇᕗᑦ ᑐᓐᖓᕕᒃᑯᑦ ᐊᒻᒪ ᐃᖃᓗᓕᕆᔨᒃᑯᓐᓄᑦ, ᐃᒪᕐᒥᐅᑕᓕᕆᔨᒃᑯᓐᓄᓪᓗ ᐋᖅᑮᓚᐅᖅᑐᑦ ᐃᖅᑲᖅᑐᐃᕕᒃᑰᖅᑎᑦᓯᒍᑕᐅᔪᓂᒃ ᐊᑐᓕᐅᕈᑎᖃᖅᑐᑎᒃ ᐊᓯᐊᒎᕈᑕᐅᔪᓐᓇᖅᑐᓂᒃ ᐊᖏᕋᑎᒌᒍᑎᓂᒃ”.  ᐊᒃᑑᕝᕙ 2011−ᒥ, ᐃᖃᓗᓕᕆᔨᒃᑯᓐᓄᑦ, ᐃᒪᕐᒥᐅᑕᓕᕆᔨᒃᑯᓐᓄᓪᓗ ᓴᖅᑭᑎᑦᓯᓚᐅᖅᑐᑦ ᓄᖅᑲᖅᑎᑦᓯᔾᔪᑎᒃᓴᖃᓐᖏᑦᑐᓂᒃ ᖃᐅᔨᔭᐅᔪᓂᒃ ᐅᓂᒃᑳᓂᒃ, ᐲᖅᓯᒍᑕᐅᓪᓗᑎᒃ ᑕᐅᖅᓰᖃᑦᑕᕐᓂᕐᒧᑦ ᐃᓱᓕᑦᑕᕐᕕᐅᔪᓂᒃ ᑖᒃᑯᓄᖓ ᓯᑕᒪᓄᑦ ᑖᒃᑯᓇᓂ 17−ᓂ ᓄᓇᕗᒥ ᓄᓇᓕᐅᔪᓂ ᑕᒪᓐᓇ ᐅᑎᕆᐊᖅᑎᑕᐅᓚᐅᖅᑐᖅ 2010-ᒧᑦ.

ᑎᑎᖅᑲᑎᒍᑦ ᐅᓪᓗᓕᖅᓯᒪᔪᖅ 31 ᒪᐃ 2012, ᑖᒃᑯᐊ ᐃᖃᓗᓕᕆᔨᒃᑯᓐᓄᑦ, ᐃᒪᕐᒥᐅᑕᓕᕆᔨᒃᑯᓐᓄᓪᓗ ᓴᖅᑭᑎᑦᓯᓚᐅᖅᑐᑦ ᓄᖅᑲᖅᑎᑦᓯᔾᔪᑎᒃᓴᖃᓐᖏᓐᓂᕐᒧᑦ ᖃᐅᔨᔭᐅᔪᓂᒃ ᐅᓂᒃᑳᓂᒃ ᐲᖅᓯᒍᑕᐅᓪᓗᓂ ᑕᐅᖅᓰᖃᑦᑕᕐᓂᕐᒧᑦ ᐃᓱᓕᑦᑕᕐᕕᐅᔪᓂᒃ ᑖᒃᑯᓄᖓ 12−ᓄᑦ ᐊᒥᐊᒃᑰᓚᐅᖅᑐᓂᒃ ᓄᓇᕗᒥ ᓄᓇᓕᐅᔪᓄᑦ ᐅᑎᕆᐊᖅᑎᑕᐅᔪᓐᓇᕐᒥᔪᖅ ᑕᒪᓐᓇ 2010−ᒧᑦ.  ᐊᐅᓱᐃᑦᑐᖅ ᓄᓇᓕᑐᐊᖑᓕᖅᑐᖅ ᓱᓕ ᐃᓱᓕᑦᑕᕐᕕᖃᖅᑐᖅ ᑲᓇᑕᒥ ᑕᐅᖅᓰᖃᑦᑕᕐᓂᕐᒧᑦ ᑑᒑᓕᖕᓂᑦ ᓴᓇᓯᒪᔪᓂᒃ, ᑖᒃᑯᐊ ᐃᖃᓗᓕᕆᔨᒃᑯᓐᓄᑦ, ᐃᒪᕐᒥᐅᑕᓕᕆᔨᒃᑯᓐᓄᓪᓗ ᐱᑕᖃᓐᖏᒻᒪᑕ ᖃᐅᔨᓴᐃᓂᒃᑯᑦ ᑐᑭᓯᒋᐊᕈᑎᒃᓴᓂᒃ ᐱᓪᓗᒋᑦ ᓯᐊᒻᒪᒃᓯᒪᔪᓂᒃ ᐅᕝᕙᓘᓐᓃᑦ ᐊᒥᓲᑎᒋᓂᖏᓐᓂᒃ ᑑᒑᓖᑦ ᑕᐃᑲᓂ Jones Sound, Smith Sound ᐅᕝᕙᓘᓐᓃᑦ Parry Channel.

ᑖᒃᑯᐊ ᑑᒑᓖᑦ ᑑᒐᖏᓐᓂᒃ ᑕᐅᖅᓰᖃᑦᑕᕐᓂᕐᒧᑦ ᐲᖅᓯᓂᖅ ᑕᑯᒃᓴᐅᑎᑦᑎᔪᖅ ᑖᒃᑯᐊ ᓄᓇᕗᑦ ᑐᓐᖓᕕᒃᑯᑦ ᑲᔪᓯᓯᒪᓂᖏᓐᓂᒃ ᑕᒪᒃᐊ ᐃᓄᐃᑦ ᐱᔪᓐᓇᐅᑎᖏᑦ ᐊᑖᒍᑦ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓂ ᐊᑐᓕᖅᑎᑕᐅᕙᓪᓕᐊᑦᓯᐊᕐᓂᖏᓐᓂᒃ ᐊᒻᒪ ᓴᐳᔾᔨᓯᒪᓂᖏᓐᓂᒃ”. ᐅᖃᖅᑐᖅ ᐃᑦᑐᓗᒃ.  “ᖁᕕᐊᓱᒃᑐᒍᑦ ᑐᓴᕈᓐᓇᕋᑦᑕ ᑕᒪᓐᓇ ᐅᑎᕆᐊᕈᓐᓇᕐᒪᑦ ᐲᖅᑕᐅᓯᒪᓚᐅᖅᑐᖅ ᑲᓇᑕᒥ ᑕᐅᖅᓰᖃᑦᑕᕐᓂᕐᒧᑦ ᑑᒑᓕᖕᓂᑦ ᐲᖅᑕᐅᖕᒪᑦ ᐃᓘᓐᓇᖏᓐᓄᑦ ᓄᓇᓕᖕᓄᑦ ᐊᒻᒪ ᕿᓚᓈᕈᑎᖃᖅᐳᑦ ᐱᓕᕆᖃᑎᖃᕐᓂᐊᕐᓂᕐᒥᓂᒃ  ᐃᖃᓗᓕᕆᔨᒃᑯᓐᓄᑦ, ᐃᒪᕐᒥᐅᑕᓕᕆᔨᒃᑯᓐᓂᓪᓗ ᐊᒻᒪ ᓄᓇᓕᐊᓂᒃ ᐊᐅᓱᐃᑦᑐᖅ ᐲᖅᑕᐅᔾᔪᑎᒃᓴᖏᓐᓄᑦ ᑕᐅᖅᓰᖃᑦᑕᕐᓂᕐᒧᑦ ᐃᓱᓕᑦᑕᕐᕕᐅᔪᓂᒃ ᐱᓪᓗᒋᑦ ᑑᒑᓖᑦ ᖃᐅᔨᓴᕈᑎᖃᕐᓂᒃᑯᑦ ᐊᒻᒪ ᐃᓕᖅᑯᓯᑐᖃᒃᑯᑦ ᖃᐅᔨᒪᔭᐅᔪᓂᒃ ᑲᑎᖅᓱᐃᓂᒃᑯᑦ.