ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ (ᕿᑭᖅᑕᓂᒃᑯᑦ) ᐊᐱᕆᓚᐅᖅᑐᑦ ᐸᓖᓯᒃᑯᓐᓂᒃ (RCMP) ᖃᐅᔨᓴᖁᓪᓗᒋᑦ ᐊᐅᓚᓂᕆᓚᐅᖅᑕᖏᓐᓂᒃ ᐊᒥᕋ ᒋᐅ, ᓇᑦᔭ ᒋᐅ ᐊᒻᒪᓗ ᑲᕆᒪ ᒫᓐᔨ ᑐᑦᓯᕋᖅᑎᓪᓗᒋᑦ ᐊᑎᓕᐅᖅᑕᐅᖃᑕᐅᔪᒪᓪᓗᑎᒃ ᓄᓇᕗᑦ ᐊᖏᕈᑎᖏᓐᓂ.
ᐱᖓᓱᑦ ᐊᕐᓇᐃᑦ ᑐᑦᓯᕋᓚᐅᖅᑐᑦ ᐊᑎᓕᐅᖅᑕᐅᖃᑕᐅᒍᒪᓪᓗᑎᒃ ᓄᓇᕗᑦ ᐊᖏᕈᑎᖏᓐᓄᑦ 2016−ᒥ (ᒋᐅᔅ) ᐊᒻᒪᓗ 2018 (ᒫᓐᔨ).
2016-ᒥ, ᐃᖃᓗᐃᑦ ᓄᓇᓕᓐᓂ ᐊᑎᖃᖃᑕᐅᔪᓕᕆᔨᒃᑯᑦ ᑲᑎᒪᔨᕋᓛᖏᑦ ᕿᒥᕐᕈᓚᐅᖅᑐᑦ ᐊᖏᖅᑐᒋᓪᓗ ᑐᑦᓯᕋᐅᑎᖏᒃ ᐊᒥᕋ ᐊᒻᒪᓗ ᓈᔾᔭ, ᑐᙵᕕᖃᖅᑐᑎᒃ ᑐᓴᖅᑎᑦᓯᒍᑎᒋᓚᐅᖅᑕᖏᓐᓂ ᑐᑦᓯᕋᐅᑎᒥᓂ ᐃᓄᖕᒥᒃ ᐴᑯᓗᖃᕐᓂᕋᖅᑐᑎᒃ. ᑐᑦᓯᕋᐅᓯᐊᒥᓂᕆᓚᐅᖅᑕᖓ ᑲᕆᒪ ᒫᓐᔨ ᑎᒍᐊᖅᑐᒥᓂᐅᓂᕋᖅᑐᓂ ᑖᒃᑯᓃᖓ ᐊᓈᓇᐅᓪᓗᓂ.
ᒫᑦᓯ 30, 2023-ᒥ, ᑐᑦᓯᕋᐅᓯᐅᓚᐅᖅᑐᖅ ᐃᓄᒃ ᐊᕐᓇᖅ ᒪᓕᒐᖅᑎᒍᑦ ᐸᐸᑦᑎᔨᖓ ᐲᖅᑕᐅᖁᔨᓪᓗᓂ ᐊᒥᕋ ᐊᒻᒪᓗ ᓇᑦᔭ ᐊᑎᖃᖃᑕᐅᔪᓂᒃ ᐱᔾᔪᑎᒋᓪᓗᒍ ᒋᐅᔅ ᓇᖕᒥᓂᕆᙱᓐᓇᒥᐅᒃ. ᑖᒃᑯᐊ ᒋᐅᒃ ᐊᐱᕆᔭᐅᓚᐅᖅᑑᒃ ᑐᙵᕕᒃᑯᓐᓄᑦ ᓇᓗᓇᐃᖅᓯᒍᑎᒥᒃ ᓱᖅᑯᐃᖅᓯᒍᑎᒃᓴᒥᒃ ᐃᓄᖕᒥᒃ ᐴᑯᓗᖃᕆᐊᒃᓴᖅ ᓇᓗᓇᐃᖅᑕᐅᓯᒪᓂᖓᒍᑦ ᑐᑦᓯᕋᐅᑎᒥᓂᒃ. ᑭᐅᔭᐅᓯᒪᙱᑦᑐᑦ.
ᐄᑉᕈ 6, 2023-ᒥ, ᐃᖃᓗᐃᑦ ᓄᓇᓕᓐᓂ ᐊᑎᖃᖃᑕᐅᔪᓕᕆᔨᒃᑯᑦ ᑲᑎᒪᔨᕋᓛᑦ ᑲᑎᒪᓪᓗᑎᒃ ᐋᖅᑭᑦᓯᓕᓚᐅᖅᑐᑦ ᐲᖅᑕᐅᖁᓪᓗᒋᒃ ᐊᒦᕋ ᐊᒻᒪᓗ ᓇᑦᔭ ᒋᐅ ᐃᓄᐃᑦ ᐊᑎᖃᖃᑕᐅᔪᑦ ᐊᑎᖏᓐᓂᒃ.
ᐱᓕᕆᕝᕕᒃᑯᑦ ᖃᐅᔨᓴᖅᑕᐅᑎᓪᓗᒍ, ᕿᑭᖅᑕᓂᒃᑯᑦ ᓇᓗᓇᐃᕆᓚᐅᖅᑐᑦ 2018-ᒥ ᑐᑦᓯᕋᐅᑕᐅᓚᐅᖅᑐᖅ ᐊᑎᓕᐅᖅᑕᐅᖃᑕᐅᒍᒪᓂᖏᓐᓂᒃ ᑲᕆᒪ ᐊᒻᒪᓗ ᒫᓐᔨ ᑕᐃᑦᓱᒪᓂ ᐅᖃᓚᐅᖅᑐᖅ ᒪᖓᑦᓯᓪᓗᓂ ᑎᒍᐊᖑᒋᐊᑦᓴᖅ ᒪᕐᕉᓐᓄᑦ ᐊᑎᓕᐅᖅᑕᐅᓯᒪᔫᓐᓄᑦ ᐃᓅᓐᓄᑦ ᐃᖃᓗᓐᓂ. ᑖᓐᓇ ᑐᑦᓯᕋᐅᑦ ᕿᐱᓗᑦᑕᐅᓚᐅᖅᑐᖅ ᐃᖃᓗᓐᓂ ᐊᑎᖃᖃᑕᐅᔪᓕᕆᔨᒃᑯᑦ ᑲᑎᒪᔨᕋᓚᖏᓐᓄᑦ ᑐᙵᕕᖃᖅᑐᑎᒃ ᖃᐅᔨᒪᓂᕐᒥᓂᒃ ᓄᓇᓕᖕᓂᒃ ᐊᒻᒪᓗ ᐱᑕᖃᙱᓗᐊᕐᓂᖓᓄᑦ ᐃᑲᔪᖅᓯᒪᒍᑎᒃᓴᓂᒃ ᑎᑎᕋᖅᓯᒪᔪᓂᒃ.
ᑐᙵᕕᒃᑯᑦ ᐊᑎᖃᖃᑕᐅᔪᓕᕆᓂᕐᒧᑦ ᐊᐅᓚᓂᖓ ᓴᙱᔪᕐᔪᐊᕌᓗᒃ ᐊᐅᓚᓂᖓ ᐊᐅᓚᑕᐅᔪᖅ ᐃᓛᒃᑯᑦ 35 ᓄᓇᕗᑦ ᐊᖏᕈᑎᖏᓐᓂ ᐊᒻᒪᓗ ᐊᑎᖃᖃᑕᐅᔪᓕᕆᓂᕐᒧᑦ ᐊᑐᐊᕋᑦᓴᓂ ᑲᔪᓯᑎᑕᐅᓯᒪᔪᓂ ᓄᓇᓕᓐᓂ ᐊᑎᖃᖃᑕᐅᔪᓕᕆᔨᒃᑯᑦ ᑲᑎᒪᔨᕋᓛᖏᓐᓄᑦ. ᓄᓇᓕᓐᓂ ᐊᑎᖃᖃᑕᐅᔪᓕᕆᔨᒃᑯᑦ ᑲᑎᒪᔨᕋᓛᑦ ᐊᑐᓂᑦ ᓄᓇᕗᑦ ᓄᓇᓕᖏᓐᓂ ᕿᒥᕐᕈᖃᑦᑕᖅᑐᑦ ᑐᑦᓯᕋᐅᑎᓂᒃ ᐊᒻᒪᓗ ᐊᑐᓂᑦ ᓇᐅᑦᓯᑐᑦᓯᐊᖅᑐᑎᒃ ᐃᓱᒪᓕᐅᕈᑎᖃᖃᑦᑕᖅᑐᑦ. ᑖᓐᓇ ᑲᒪᒋᔭᐅᔪᖅ ᓯᕗᓪᓕᖅᐹᖅ ᑕᐃᒪᐃᓕᐅᖅᑐᓂ ᑐᙵᕕᒃᑯᑦ ᐊᑎᖃᖃᑕᐅᔪᓕᕆᓂᕐᒧᑦ ᐱᓕᕆᐊᖏᓐᓂ. ᐅᖑᒪᑦᓯᔾᔪᑎᒃᓴᖅ ᐱᕋᔭᑕᐅᔾᔭᐃᒃᑯᑎᒃᓴᖅ ᓯᕗᓂᑦᑎᓐᓂ, ᑐᙵᕕᒃᑯᑦ ᐃᖅᑲᓇᐃᔭᖃᑎᓖᑦ ᓄᓇᓕᓐᓂ ᐊᑎᖃᖃᑕᐅᔪᓕᕆᔨᒃᑯᑦ ᑲᑎᒪᔨᕋᓛᖏᓐᓂᒃ ᐊᐅᓚᑦᓯᔾᔪᑎᒃᓴᑲᓐᓂᕐᓂᒃ ᓴᕐᖓᑎᑦᓯᒋᐊᒃᑲᓐᓂᕈᑎᒃᓴᓂᒃ ᐊᑎᖃᖃᑕᐅᔪᓄᑦ ᑐᑦᓯᕋᐅᑎᓂᒃ ᐊᒻᒪᓗ ᕿᒥᕐᕈᖃᑦᑕᓂᕐᒧᑦ.
ᑐᑭᓯᒋᐊᒃᑲᓂᕐᕕᒃᓴᖅ:
ᑭᐊᕙᓐ ᑲᑉᓗᑦᓯᐊᒃ
ᑐᓴᐅᒪᔾᔪᑎᓕᕆᔨᒃᑯᓐᓂ ᑐᑭᒧᐊᒃᑎᑦᑎᔨ
ᓄᓇᕗᑦ ᑐᙵᕕᒃ ᑎᒥᖓ
ᑭᐅᕋᓐ ᕙᓚᕋᑎ
ᑐᑭᒧᐊᑦᑎᑦᑎᔨ, ᑐᑭᒧᐊᒍᑎᔅᓴᓄᑦ ᑐᓴᐅᒪᖃᑦᑕᐅᑎᓂᕐᒧᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
