ᑐᓴᕋᑦᓴᓕᕆᔩᑦ

ᐃᓄᐃᑦ ᓇᑯᕐᓴᖅᑐᑦ ᑲᑐᔾᔭᐅᓪᓗᓂ−ᐋᖅᑭᓱᖅᑕᐅᓚᐅᖅᑐᒥᒃ ᒐᕙᒪᑐᖃᒃᑯᑦ ᑐᑭᒧᐊᒍᑎᖓᓂᒃ ᑐᕌᖓᔪᒥᒃ ᐊᑐᓕᖅᑎᑕᐅᓂᖓᓂᒃ ᒐᕙᒪᒃᑯᑦ ᑳᓐᑐᓛᓄᑦ ᑲᔪᓯᑎᑦᓯᓛᓪᓚᕆᑦᓯᒪᓂᖓᓂᒃ (ᐃᓛᒃᑯᑦ 24) ᓄᓇᕗᒻᒥ ᐊᖏᕈᑎᓂ

ᐃᕐᖐᓐᓇᖅ ᓴᖅᑭᖅᑕᐅᔭᕆᐊᓕᒃ

ᐃᓄᐃᑦ ᓇᑯᕐᓴᖅᑐᑦ ᑲᑐᔾᔭᐅᓪᓗᓂ−ᐋᖅᑭᓱᖅᑕᐅᓚᐅᖅᑐᒥᒃ ᒐᕙᒪᑐᖃᒃᑯᑦ ᑐᑭᒧᐊᒍᑎᖓᓂᒃ ᑐᕌᖓᔪᒥᒃ ᐊᑐᓕᖅᑎᑕᐅᓂᖓᓂᒃ ᒐᕙᒪᒃᑯᑦ ᑳᓐᑐᓛᓄᑦ ᑲᔪᓯᑎᑦᓯᓛᓪᓚᕆᑦᓯᒪᓂᖓᓂᒃ (ᐃᓛᒃᑯᑦ 24) ᓄᓇᕗᒻᒥ ᐊᖏᕈᑎᓂ

(ᐃᖃᓗᐃᑦ, ᐊᐅᒡᒍᓯ 15, 2019) ᓄᓇᕗᑦ ᑐᓐᖓᕕᒃ ᑎᒥᖓ (ᑐᓐᖓᕕᒃ) ᓇᑯᕐᓴᖅᑐᑦ ᓴᖅᑭᖅᑕᐅᓂᖓᓂᒃ ᓄᑖᖅ ᑲᑐᔾᔭᐅᓪᓗᓂ−ᐋᖅᑭᓱᖅᑕᐅᓚᐅᖅᑐᒥᒃ ᒐᕙᒪᑐᖃᒃᑯᑦ ᓂᐅᕕᕈᓐᓇᓂᕐᒧᑦ ᑐᑭᒧᐊᒍᑎᖓᓂᒃ ᐊᑦᑐᐊᔪᓂᒃ ᑳᓐᑐᓛᓄᑦ ᐊᐅᓚᑕᐅᔪᓂᒃ ᓄᓇᕗᑦ ᓄᓇᖓᑕ ᓇᓗᓇᐃᖅᑕᐅᓯᒪᓂᖓᓂ.

“ᐊᑐᓕᖅᑎᑕᐅᓂᖓ ᓄᓇᕗᒻᒨᖓᔪᖅ ᒐᕙᒪᑐᖃᒃᑯᑦ ᓂᐅᕕᕈᓐᓇᓂᕐᒧᑦ ᐊᑐᐊᒐᖓ ᑎᑭᐅᑎᓯᒪᒋᐊᖃᖅᑎᑕᐅᔪᖅ ᒐᕙᓚᑐᖃᒃᑯᑦ ᑳᓐᑐᓛᓄᑦ ᐱᓇᓱᐊᕋᑦᓴᒫᖏᓐᓄᑦ ᐃᓛᒃᑯᑦ 24 ᓄᓇᕗᑦ ᐊᖏᕈᑎᖏᓐᓂ. ᐊᔭᐅᖅᑐᐃᖃᑦᑕᕐᓯᒪᔪᒍᑦ ᐊᒻᒪᓗ ᐃᖅᑲᓇᐃᔮᕆᓯᒪᓪᓗᒍ ᐊᕐᕌᒍᕋᓵᓗᓐᓂᒃ,” ᐅᖃᖅᑐᖅ ᑐᓐᖓᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ. “ᐱᖕᒪᕆᐊᓗᒃ ᓯᕗᒧᐊᑦᑎᑕᐅᓂᖓ ᐊᒻᒪᓗ ᑖᓐᓇᐅᕗᖅ ᐊᓯᔾᔩᒍᑕᐅᓂᐊᖅᑐᖅ ᖃᓄᐃᓐᖏᓯᐊᕈᑎᒃᓴᖏᓐᓄᑦ ᐃᓄᐃᑦ.”

ᐋᔩᕋᕈᑕᐅᓂᖓᓂ, ᑐᓐᖓᕕᒃᑯᑦ ᑐᑭᓕᐅᓕᖅᑭᑦᑖᖃᑦᑕᕐᓯᒪᔭᖏᑦ ᐊᒻᒪᓗ ᓇᓗᓇᐃᖅᑐᕐᓱᒋᑦ ᐊᑐᐊᒐᕐᓄᑦ ᑐᕌᒐᑦᓴᑦ ᐃᓛᒃᑯᑦ 24-ᖓᒍᑦ ᑖᒃᑯᓇᓐᖔᖅᑐᓂᒃ ᐱᖓᓱᓂᒃ ᐃᖕᒥᒃᑰᖅᑐᓂᒃ ᐊᒻᒪᓗ ᑐᓐᖓᕕᒃᓴᐅᓂᐊᖅᑐᓂᒃ ᐃᖕᒥᑰᕐᓗᑎᒃ:

1) ᐱᔪᓐᓇᐅᑎᖓ ᐃᓄᐃᑦ ᓇᖕᒥᓂᖁᑎᖃᕐᓗᑎᒃ ᐊᐅᓚᑦᓯᓗᑎᓪᓗ ᑲᒻᐸᓂᐅᔪᓂᒃ
2) ᐱᔪᓐᓇᐅᑎᖓ ᐃᓄᐃᑦ ᐃᖅᑲᓇᐃᔭᕐᓗᑎᒃ ᐊᒻᒪᓗ ᐃᖅᑲᓇᐃᔭᖅᑎᑕᐅᓗᑎᒃ ᒐᕙᒪᒃᑯᑦ ᑳᑐᓐᓛᖏᑎᒍᑦ, ᐊᒻᒪᓗ;
3) ᐱᔪᓐᓇᐅᑎᖓ ᐃᓄᐃᑦ ᐊᐅᓚᑦᓯᒍᓐᓇᖁᓪᓗᒋᑦ ᐊᔪᕈᓐᓃᕐᓴᐅᑎᓂᒃ ᐱᓕᖕᒪᒃᓴᐅᑎᒃᑯᑦ ᐊᒻᒪᓗ ᐱᕙᓪᓕᐊᓂᕐᒧᑦ, ᓈᖕᒪᑦᑐᓄᑦ ᑳᓐᑐᓛᓄᑦ

ᑐᓐᖓᕕᒃᑯᑦ ᓇᑯᕐᓴᖅᑐᑦ ᑐᑭᒧᐊᒍᑎᒃᓴᓄᑦ ᐱᓕᕆᐊᖑᔪᑦ ᑲᔪᓯᑎᑦᓯᒍᑎᒃᓴᓂᒃ ᑕᒪᐃᓐᓂᒃ ᐱᖓᓱᓂᒃ ᑖᒃᑯᓂᖓ ᑐᓐᖓᕕᓪᓗᐊᑕᓄᑦ ᐊᒻᒪᓗ ᐃᑲᔫᑎᓂᐊᖅᑐᑦ ᐊᒻᒪᓗ ᑲᔪᓯᑎᑦᓯᓗᑎᒃ ᒪᑭᒪᒍᑕᐅᒍᓐᓇᕐᓗᑎᒃ ᐊᒃᑐᐃᓯᒪᓂᖏᑦ ᐃᓄᓐᓂᒃ NNI ᐊᑐᐊᒐᖏᓐᓂ ᐅᑭᐅᖅᑕᖅᑐᒥ ᐊᕕᑦᑐᕐᓯᒪᓂᕐᒥ ᒐᕙᒪᒃᑯᑦ ᑳᓐᑐᓛᒃᓯᖃᑦᑕᕐᓂᖏᑎᒍᑦ.

ᑲᔪᓯᑎᑕᐅᑦᓯᐊᕐᓂᖓ ᐃᓚᒃᑯᑦ 24 ᐊᑯᓂᐊᓗᒃ ᓯᕗᓪᓕᐅᔾᔭᐅᒋᐊᓕᖁᑎᖓ ᑐᓐᖓᕕᒃᑯᑦ. ᑲᔪᓯᑎᑕᐅᓯᒪᓐᖏᓐᓂᖓ ᓇᓗᓇᐃᖅᑕᐅᓚᐅᖅᑐᖅ ᑐᓐᖓᕕᒃᑯᑦ 2006 ᐃᖅᑲᖅᑐᐃᕕᒃᑰᑎᑦᓯᒍᑎᖓ ᑯᐃᓐ, ᐊᒻᒪᓗ ᓄᑖᓐᖑᕆᐊᖅᑕᐅᓂᖓ ᐊᑐᓕᖅᑎᑕᐅᓇᓱᐊᕈᑎᖓᓄᑦ ᓇᓗᓇᐃᖅᑕᐅᓚᐅᖅᑐᖅ 2015−ᒥ ᐃᖅᑲᖅᑐᐃᕕᒃᑰᖏᑦᑐᖅ ᐊᖏᕈᑕᐅᓚᐅᖅᑐᖅ ᑕᑉᕗᖓ ᐃᖅᑲᖅᑐᐃᕕᒃᑰᑎᑦᓯᒍᑕᐅᔪᒧᑦ.

ᑐᓐᖓᕕᒃᑯᑦ ᐃᓱᒪᒋᔭᖃᑦᓯᐊᖅᑐᑦ ᑲᑐᔾᔨᓪᓗᑎᒃ−ᐋᖅᑭᓱᖅᑕᐅᓯᒪᓂᖓ ᐊᑐᐊᒐᐅᑉ ᖃᐅᔨᓴᕋᑦᓴᐅᒍᓐᓇᕐᓯᓯᒪᒍᑕᐅᔪᖅ ᒪᑐᐃᖓᑦᓯᐊᕐᓂᖏᓐᓄᑦ ᐃᓱᒪᒋᔭᒥᓄᑦ ᐊᒻᒪᓗ ᓴᓇᑐᓂᖏᓐᓂᒃ ᐃᓚᖏᑦ ᒐᕙᒪᑐᖃᒃᑯᓐᓂ ᐊᖓᔪᖅᑲᐅᑎᐅᔪᑦ ᑲᒪᖃᑕᐅᖃᑦᑕᓚᐅᖅᑐᑦ ᐊᕐᕌᓂᓂᒃ.

ᐱᓐᖑᖅᑎᑕᐅᓚᐅᕐᓂᖓ ᐃᓛᒃᑯᑦ 24 ᑐᕌᖓᓚᐅᖅᑐᖅ ᐱᔭᕆᐊᑭᓪᓕᑎᕆᔨᓄᑦ ᑭᖑᓂᑦᓯᐊᖓᒍᑦ ᐅᖃᐅᓯᐅᔪᖅ ᑐᓂᔭᐅᓕᓚᐅᖅᑐᖅ ᐋᖅᑭᒋᐊᒃᑲᐃᔨᒧᑦ ᐊᒻᒪᓗ ᐋᖅᑭᒋᐊᒃᑲᐃᔨᒃᑰᖅᑕᐅᓂᖓ ᑕᑉᕘᓇ ᓄᑖᒃᑯᑦ ᐊᐃᕙᔾᔪᑕᐅᔪᒧᑦ ᐋᖅᑭᒍᑎᒃᓴᓄᑦ ᑎᑎᕋᕐᓯᒪᓂᖏᑦ (ᐃᓛᒃᑯᑦ 38) ᓄᓇᕗᑦ ᐊᖏᕈᑎᖏᓐᓂ.

ᓇᓕᖅᑲᖏᓐᓂᒃ ᓄᑖᑦ ᑐᑭᒧᐊᒍᑎᒃᓴᑦ ᐱᕕᑦᓴᖅ ᐅᕙᓐᖓᑦ: ᑐᑭᒧᐊᒍᑎᒃᓴᖏᑦ ᒐᕙᒪᒃᑯᑦ ᑳᓐᑐᓛᓄᑦ, ᐃᓚᒋᔭᐅᓪᓗᑎᒃ ᓇᖕᒥᓂᖁᑎᓪᓚᑦᑖᓄᑦ ᐊᑐᖅᑐᐊᕈᑏᑦ, ᓄᓇᕗᑦ ᓄᓇᖓᑕ ᓇᓗᓇᐃᖅᑕᐅᓯᒪᓂᖓᓂ.
-30-
ᑐᑭᓯᒋᐊᒃᑲᓂᕐᕕᒃᓴᖅ

ᐆ ᐊᖅᐱᒃ
ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᔨᒃᑯᓐᓂ
ᓄᓇᕗᑦ ᑐᓐᖓᕕᒃ ᑎᒥᖓ
ᐅᖄᓚᐅᑖ: 867-975-4941

www.tunngavik.com

Download (PDF, 61KB)