(ᔪᓚᐃ 22, 2021 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᒥᕕᒃ ᑎᒥᖓᓄᑦ (ᑐᙵᕕᒃ) ᐊᖓᔪᖅᑳᖓ ᐊᓗᑭ ᑰᑦᑎᖅ ᐃᓚᒋᔭᐅᔪᖅ ᐃᓄᓐᓄᑦ ᓇᓪᓕᐅᓂᖅᓯᐅᕈᑕᐅᑎᓪᓗᒍ ᒪᑐᐃᖅᑕᐅᓂᖓ ᓕᐊᓄᑦ ᐳᑐᓕᒃ ᐱᖅᑯᓯᓕᕆᕝᕕᒃ.
“ᓕᐊᓄᑦ ᐳᑐᓕᒃ ᐱᖅᑯᓯᓕᕆᕝᕕᒃ ᐱᐅᔪᒻᒪᕆᐊᓗᒃ ᓂᕆᐅᖕᓂᖃᑦᓯᐊᓇᖅᑐᓂ ᐃᓂᖓ, ᐃᓂᒃᓴᑦᓯᐊᕙᐅᔪᖅ ᓴᓇᖃᑦᑕᓂᕐᒥᒃ ᓄᓇᓖᑦ ᐱᕙᓪᓕᐊᑎᑦᓯᒍᑎᒃᓴᖏᓐᓂᒃ ᐃᓕᖅᑯᓯᒃᑯᑦ ᖃᐅᔨᒪᓂᐅᔪᓂᒃ ᐃᓕᓐᓂᐊᑎᑦᓯᖃᑦᑕᓂᕐᒥᒃ, ᓴᕐᖓᑎᑦᓯᕙᓪᓕᐊᓯᓐᓈᑦ ᐊᒻᒪᓗ ᖁᕕᐊᓲᑎᖃᕐᓂᕐᒧᑦ ᐃᓄᐃᑦ ᐃᓕᖅᑯᓯᖓᓂᒃ ᐅᖃᐅᓯᖓᓂᓪᓗ. ᖁᓚᕐᓇᙱᓚᖅ ᐊᑐᖅᑕᐅᓵᓕᓂᐊᕐᓂᖓ ᑐᑦᑕᕐᕕᒋᔭᐅᓗᓂ ᐃᓕᖅᑯᓯᓕᕆᕝᕕᐅᓗᓂ ᐃᒡᓗᓕᒑᕐᔪᒻᒧᑦ,” ᐅᖃᖅᑐᖅ ᐊᓗᑭ ᑰᑦᑎᖅ, ᐊᖓᔪᖅᑳᖓ ᑐᙵᕕᒃᑯᑦ.
ᓕᐊᓄᑦ ᐳᑐᓕᒃ ᐱᖅᑯᓯᓕᕆᕝᕕᒃ ᐃᓕᖅᑯᓯᕐᒨᖓᔪᓂᒃ ᑭᓱᑐᐃᓐᓇᕐᓄᑦ−ᐊᑐᖅᑕᐅᒍᓐᓇᓂᐊᖅᑐᖅ ᐃᓪᓗ. ᐅᓄᖅᑐᓂᒃ ᐊᕙᓗᖃᙱᑦᑐᓂᒃ ᐃᓪᓗᕈᓯᖃᐅᖅᑐᖅ, ᐃᓂᒃᓴᓂᒃ ᑕᒪᒃᑯᓄᖓ ᓲᕐᓗ ᒥᖅᓱᕐᕕᒃ, ᐱᖅᑯᓯᒃᑯᑦ ᕿᓯᓕᕆᕕᒃ/ᐊᒥᓕᕆᕕᒃ, ᐃᓄᓕᖅᑕᓂᒃ ᓂᕿᓕᕆᕝᕕᒃ, ᐊᒻᒪᓗ ᓴᓇᕐᕈᑎᓕᐅᕐᕕᒃ. ᑐᑦᑕᕐᕕᐅᓂᐊᖅᑐᖅ ᒪᓂᒪᑎᑦᓯᒻᒥᔪᖅ ᐃᓂᒋᔭᐅᔪᒃᓴᒫᒥᒃ ᑲᑎᒪᔪᓄᑦ ᐊᒻᒪᓗ ᓴᖅᑭᔮᖅᑎᑦᓯᓂᕐᒧᑦ ᐊᒻᒪᓗ ᓂᐅᕕᐊᑦᓴᓂᒃ ᐃᓄᐃᑦ ᓴᓇᐅᒐᖏᓐᓂᒃ, ᓴᓇᕐᕈᑎᓂᒃ ᐊᒻᒪᓗ ᓴᓇᐅᒐᕐᓂᒃ.
ᐃᓄᐃᑦ ᐃᓕᖅᑯᓯᖓ ᐆᒪᒻᒪᑦ ᐃᓕᖅᑯᓯᖅ. ᐱᖅᑯᓯᓕᕆᕝᕕᒃ ᐃᓂᒃᓴᕆᔭᐅᔪᖅ ᐃᓄᓐᓄᑦ ᐊᔪᕈᓐᓃᓴᕐᕕᐅᓪᓗᓂ ᐊᒻᒪᓗ ᐱᔪᓐᓇᖅᓯᑦᓯᐊᕐᓗᑎᒃ ᐊᔪᕈᓐᓃᑦᓯᐊᖃᑦᑕᓂᕐᒧᑦ ᐃᓄᐃᑦ ᐃᓕᖅᑯᓯᖓᒍᑦ, ᐅᖃᐅᓯᖓᒍᑦ ᐊᒻᒪᓗ ᐱᖅᑯᓯᖓᓄᑦ ᖃᓄᐃᙱᑦᓯᐊᑲᓐᓂᕈᑎᒃᓴᖏᓐᓂᒃ, ᐊᔪᕈᓐᓃᖅᓴᐅᑎᒃᓴᓂᒃ, ᖃᐅᔨᒪᓃᑦ ᐊᒻᒪᓗ ᑭᖑᕚᕆᔭᐅᔪᓄᑦ ᑭᒪᐃᕕᒃᓴᒥᒃ ᑲᓲᒪᔾᔪᑎᒃᓴᖏᓐᓄᑦ.
ᐆᑦᑑᑉᐱᕆ 2017-ᒥ, ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᖐᑦ ᓴᖅᑮᓚᐅᖅᑐᑦ ᐸᕐᓇᐅᑎᒥᖕᓂᒃ ᓴᖅᑮᒍᒪᓪᓗᑎᒃ ᐱᖅᑯᓯᓕᕆᕝᕕᒻᒥᒃ ᐊᑐᓂᑦ 7-ᓂ ᑭᕙᓪᓕᕐᒥ ᓄᓇᓕᓐᓂ ᑐᙵᕕᒃᑯᑦ ᑲᑎᒪᕕᖏᓐᓄᑦ. ᑕᐃᑦᓱᒪᓂ, ᑐᙵᕕᒃᑯᑦ ᓇᓕᒧᖏᓐᓂᒃ ᑭᕙᓪᓕᖅ ᐃᓄᐃᑦ ᑲᑐᔾᔨᖃᑎᒌᑦ ᑮᓇᐅᔭᓖᒍᑎᖏᓐᓂᒃ ᑐᓂᓯᓚᐅᖅᑐᑦ, ᐅᓄᕐᓂᓕᓐᓂᒃ $2-ᒥᓕᔭᓐ, ᑕᕝᕗᖓ ᑐᕌᒐᕆᔭᐅᔪᒧᑦ. ᑖᒃᑯᐊ ᑮᓇᐅᔭᑦ ᑕᕝᕙᙶᖅᑐᑦ 2015 ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᑐᓄᑦ ᑮᓇᐅᔭᓕᑕᐅᓂᖏᓐᓄᑦ ᐊᖏᖃᑎᒌᒍᑎᖏᓐᓂᒃ ᑲᓇᑕ ᐊᒻᒪᓗ ᑐᙵᕕᒃ ᑲᔪᓯᑎᑦᓯᓚᐅᙱᓐᓂᖏᓐᓄᑦ ᐱᓕᖕᒪᒃᓴᐃᓂᕐᒥᒃ ᐃᖅᑲᓇᐃᔭᖅᑎᑦᓯᓂᕐᒥᓪᓗ ᐃᓄᓐᓂᒃ.
-30-
ᑐᑭᓯᒋᐊᒃᑲᓂᕐᕕᒃᓴᖅ:
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨᒧᑦ ᐃᓕᓐᓂᐊᖅᑐᖅ ᑐᓴᐅᒪᔾᔪᑎᓕᕆᔨᒃᑯᓐᓂ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006
ᐱᓕᕆᐊᖑᖃᑦᑕᖅᓯᒪᓂᖓ
ᓄᓇᕗᒻᒥ ᐱᖁᑎᕐᔪᐊᓄᑦ ᐊᐳᖅᑕᕐᕕᐅᕙᑦᑐᓂᒃ ᖃᐅᔨᕈᑎᒥᓃᑦ ᐅᓂᒃᑳᑦ ᓇᓗᓇᐃᕆᓯᒪᓚᐅᖅᑐᑦ ᐱᖕᒪᕆᐅᓂᖓᓂᒃ ᓱᐃᓛᕿᓂᖅ ᐊᒻᒪᓗ ᐃᓕᖅᑯᓯᕐᒨᖓᔪᓂᒃ ᐱᖁᑎᕐᔪᐊᖃᕆᐊᖃᕐᓂᖓᓂᒃ ᐱᑕᖃᕆᐊᖃᓪᓚᑦᑖᕐᓂᖓᓂᒃ ᖃᓄᐃᙱᑦᓯᐊᕈᑎᒃᓴᖏᓐᓄᑦ ᑭᒃᑯᑐᐃᓐᓇᐃᑦ ᓄᓇᓕᓐᓂ. ᓄᓇᕗᑦ ᐱᖅᑯᓯᓕᕆᕕᖃᑦᓯᐊᖏᒻᒪᑦ ᐃᓕᖅᑯᓯᓕᕆᓂᕐᒧᓪᓗ ᐱᖁᑎᕐᔪᐊᓂᒃ ᑎᑭᐅᑎᓯᒪᔪᓂᒃ ᓄᓇᕗᓕᒫᒥ ᐊᑐᖅᑕᐅᒋᐊᓕᓐᓂᒃ ᐃᓂᒃᓴᖃᑦᓯᐊᖁᓪᓗᒋᑦ ᓄᓇᕗᒻᒦᙶᖅᑐᑦ ᐃᑦᑕᕐᓂᓴᑦ ᐃᓕᖅᑯᓯᖏᑎᒍᑦ ᐊᒻᒪᓗ ᐃᑦᑕᕐᓂᓴᑦ ᐱᖁᑎᑐᖃᐃᑦ. ᓄᓇᕗᑦ ᑖᓐᓇᑐᐊᖅ ᑲᓇᑕᓕᒫᒥ ᐊᐅᓚᑦᓯᕕᐅᔪᓂ ᐃᑦᑕᕐᓂᓴᖃᙱᑦᑐᖅ, ᐱᑕᖃᕆᐊᖃᕋᓗᐊᖅᑎᓪᓗᒍ ᑲᔪᓯᑎᑦᓯᒍᑎᒃᓴᒥᒃ ᐊᖏᕈᑕᐅᓯᒪᔪᓂᒃ ᐃᓛᒃᑯᑦ 33 ᓄᓇᕗᑦ ᐊᖏᕈᑎᖏᓐᓂ.
ᐊᑐᖅᑕᐅᓯᒪᓂᖓ ᐃᓂᒋᔭᐅᖃᑦᑕᖅᓯᒪᓂᖓᓗ ᓄᓇᑦ ᓄᓇᒦᙶᑐᓪᓗ ᐃᓄᓐᓄᑦ ᓄᓇᕗᑦ ᓄᓇᖓᑕ ᓇᓗᓇᐃᖅᑕᐅᓯᒪᓂᖓ ᑕᐃᒪᙵᓂᑐᖄᓗᒃ ᑕᐃᔭᐅᔪᖅ ᐃᑦᑕᕐᓂᓴᑦ ᑎᑎᕋᖅᑕᐅᓯᒪᔪᑦ. ᑖᒃᑯᐊ ᑎᑎᖅᑲᑦ, ᑕᕝᕙᙶᖅᑐᑦ ᐱᑕᓕᕐᔪᐊᒻᒪᕆᒻᒥᒃ ᐱᖅᑯᓯᖏᑎᒍᑦ ᐃᓄᐃᑦ, ᑕᕐᓂᒃᑯᑦ, ᐃᓕᖅᑯᓯᒃᑯᑦ, ᐅᑉᐱᕐᓂᒃᑯᑦ ᐊᒻᒪᓗ ᐃᓕᓐᓂᐊᑎᑦᓯᒍᑕᐅᓂᖓ ᐱᖕᒪᕆᐅᔪᑦ ᐃᓄᓐᓄᑦ. ᑕᐃᒪᐃᑎᓪᓗᒍ, ᐃᓄᐃᑦ ᐊᔾᔨᐅᖏᑦᑐᒥᒃ ᐱᔪᓐᓇᐅᑎᓖᑦ ᐊᒻᒪᓗ ᐱᔪᒪᔭᖏᑦ ᐃᓚᖏᓐᓂ ᓄᓇᓂ ᐊᖏᕈᑕᐅᓯᒪᔪᓂ, ᓇᓗᓇᐃᖅᑐᖅᑕᐅᓯᒪᔪᓂ ᐃᓛᒃᑯᑦ 33.
ᑖᒃᑯᓇᓂ ᓄᓇᕗᑦ ᐊᖏᕈᑎᖏᓐᓂ ᓇᓗᓇᐃᖅᑕᐅᓯᒪᔪᖅ “ᑐᐊᕕᕐᓇᖅᑐᒥᒃ ᐱᔭᕆᐊᓕᒃ” ᓴᖅᑮᓂᕐᒥᒃ ᐃᓪᓗᓂᒃ ᓄᓇᕗᒻᒥ ᓴᖅᑮᓂᐊᖅᑐᒥᒃ ᐃᓂᓪᓚᑦᑖᕆᓂᐊᖅᑕᖓᓂᒃ ᐃᑦᑕᕐᓂᓴᓃᙶᖅᑐᑦ ᑎᑎᕋᖅᓯᒪᔪᓂ. ᐅᑎᖅᑎᑦᓯᓂᖅ ᐱᖕᒪᕆᐅᕗᖅ ᐃᓕᖅᑯᓯᒃᑯᑦ ᐱᖁᑎᑐᖃᕐᓂᖅ ᐊᒻᒪᓗ ᓯᕗᓕᖏᑕ ᓴᐅᓂᖏᓐᓂᒃ ᐱᖕᒪᕆᐊᓘᔪᖅ, ᑕᐃᒫᑎᒋᑦᑕᐅᖅ ᐃᓂᓪᓚᑦᑖᕆᓂᐊᖅᑕᖏᓐᓂᒃ ᐊᖏᕐᕋᕆᓗᒋᑦ ᓄᓇᕗᑦ ᓄᓇᖓᑕ ᓇᓗᓇᐃᖅᑕᐅᓯᒪᓂᖓ ᐃᑦᑕᕐᓂᓴᓄᑦ ᑎᑎᕋᖅᓯᒪᔪᒃᑯᑦ ᑕᒫᓂ ᓄᓇᒥ.
ᑮᓇᐅᔭᖅᑐᑐᒻᒪᕆᐅᓂᐊᕋᓗᐊᖅᑎᓪᓗᒍ ᓈᖕᒪᑦᑐᒥᒃ ᐃᑦᑕᕐᓴᓕᕆᕕᑦᑖᕐᓂᖅ ᓄᓇᕗᒻᒥ ᐃᓂᒃᓴᓂᒃ ᓄᓇᕗᒻᒥ ᑕᐸᐃᕐᓇᖅᑐᒥᒃ ᐊᑐᖅᓯᒪᔭᖏᓐᓂᒃ ᐊᒻᒪᓗ ᐃᓕᖅᑯᓯᖓᓂᒃ ᓱᓕ ᑲᔪᓯᓯᒪᙱᑦᑐᖅ − ᑖᒃᑯᐊ ᑮᓇᐅᔭᓕᑕᐅᔪᑦ ᐱᖅᑯᓯᓕᕆᕝᕕᓐᓄᑦ ᐱᕚᓪᓕᕈᑎᒃᓴᐅᔪᑦ ᐃᓄᐃᑦ ᐃᓕᖅᑯᓯᖓᓄᑦ ᐊᒻᒪᓗ ᑭᒃᑰᓂᖏᓐᓂᒃ ᐃᑲᔫᑎᖃᕐᓂᐊᖅᑐᖅ ᐃᓄᐃᑦ ᐃᓗᓯᖏᓐᓄᑦ.
1954-ᒥ, ᓴᐃᓐ. ᒫᕆ ᐊᖏᕐᕋᖅ ᒪᑐᐃᖅᑕᐅᓚᐅᖅᑐᖅ ᐃᒡᓗᓕᒑᕐᔪᒻᒥ ᐃᑦᓯᕋᕐᔪᐊᓄᑦ, ᐃᓄᐃᑦ ᓄᑕᖅᑲᑦ ᐃᓚᖏᓐᓂᒃ ᐊᖅᓵᖅᓯᒍᑕᐅᓪᓗᑎᒃ ᐊᖏᕐᕋᖏᓐᓂᒃ ᐊᒻᒪᓗ ᐃᓕᖅᑯᓯᖏᓐᓂᒃ ᐃᓕᓐᓂᐊᕆᐊᖅᑎᑕᐅᓚᐅᖅᑐᑦ ᑕᐃᑦᓱᒪᓂ ᐃᓕᓐᓂᐊᕕᒻᒧᑦ. 1961−ᒥ, ᑖᓐᓇ ᐃᓂᒋᔭᐅᔪᖅ ᐊᓯᔾᔨᖅᑕᐅᓚᐅᖅᑐᖅ ᐊᑎᖓ ᑕᐃᔭᐅᓕᖅᑐᓂ ᑑᑯᑎᐅ ᕼᐊᓪ.
ᖃᐅᔨᒋᐊᕐᕕᒃᓴᑦ:
ᓄᓇᕗᑦ ᑐᙵᕕᒃ ᑎᒥᖓ – ᑖᒃᑯᐊ ᓄᓇᕗᒻᒥ ᐊᖏᕈᑏᑦ
ᓯᕗᒧᐊᖕᓂᖅ ᓄᓇᕗᒻᒥ: ᐊᖏᖃᑎᒌᒍᑦ ᐊᒃᑐᐊᔪᖅ ᐊᑭᓖᑎᑦᓯᓂᕐᒧᑦ ᐃᖅᑲᖅᑐᐃᕕᒃᑰᑎᑦᓯᓂᖅ ᐊᒻᒪᓗ ᐃᓚᖏᓐᓂᒃ ᐊᑐᓕᖅᑎᑕᐅᕙᓪᓕᐊᒋᐊᓕᓐᓅᖓᔪᓂᒃ
https://www.tunngavik.com/files/2015/05/FINAL-SIGNED-SETTLEMENT-AGREEMENT.pdf
ᑲᓇᑕᒥ ᑐᑦᑕᕐᕕᒃ ᓱᓕᔪᒥᒃ ᓴᖅᑮᓂᕐᒥᒃ ᓴᐃᒻᒪᖃᑎᒌᓐᓂᒧᓪᓗ − ᐃᒡᓗᓕᒑᕐᔪᒃ (ᑑᑯᑎᐅ ᕼᐊᓪ)
https://dev.nctr.ca/residential-schools/northern/chesterfield-inlet-turquetil-hall/
