ᐃᑉᐸᑦᓴᖅ ᐊᑐᖅᑕᐅᓚᐅᖅᓯᒪᓐᖏᑦᑐᒥᒃ ᐱᔪᖃᓚᐅᖅᑐᖅ ᐃᖅᑲᖅᑐᐃᔨ ᐅᕈ ᔮᓐᓴᓐ ᓄᓇᕗᒻᒥ ᐃᖅᑲᖅᑐᐃᕕᖓᓂ ᓇᓗᓇᐃᖅᓯᓂᕆᓚᐅᖅᑕᖓ ᐊᖏᖃᑎᖃᕐᓂᕐᒥᓂᒃ ᓄᓇᕗᑦ ᑐᓐᖓᕕᒃ ᑎᒥᖓᓂᒃ ᓯᕗᒧᐊᒋᐊᓕᖕᓂᒃ ᓯᕗᒧᐊᒃᑎᑦᓯᓯᒪᓐᖏᓐᓂᖏᓐᓂᒃ ᑲᓇᑕᐅᑉ ᒐᕙᒪᖓ ᓴᖅᑭᖅᑕᐅᔭᕆᐊᖃᖅᓯᒪᔪᓂᒃ ᓄᓇᕗᒻᒥ ᖃᐅᔨᒪᔭᐅᓇᓱᐊᕆᐊᖃᕐᓂᖏᓐᓄᑦ ᐸᕐᓇᐅᑎᓂᒃ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᒃᑯᑦ.
ᑖᓐᓇ ᓯᑕᒪᒋᔭᖓ ᒪᓕᒐᒃᑯᑦ ᓅᑕᐅᒋᐊᖅᑐᖅ ᑐᓐᖓᕕᒃᑯᑦ ᓵᓚᒃᓴᐅᑎᒋᔭᖏᓐᓂ ᐃᖅᑲᖅᑐᐃᕕᒃᑰᑎᑦᓯᒋᐊᓚᐅᖅᓯᒪᒻᒪᑕᓂᒃ 2006-ᒥ ᑎᑎᕋᖅᓯᒪᔪᓂᒃ ᓴᖅᑭᑎᑦᓯᓪᓗᑎᒃ ᓵᓐᖓᑦᓯᒍᑎᒃᓴᒥᓂᒃ ᑲᓇᑕᐅᑉ ᒐᕙᒪᖓᓂᒃ, ᑭᒡᒐᖅᑐᐃᔪᓂᒃ ᑯᐃᓐᒥᒃ. ᐃᖅᑲᖅᑐᐃᔨ ᔮᓐᓴᓐ ᓇᓗᓇᐃᖅᓯᓚᐅᖅᑐᖅ ᐊᖏᖃᑎᖃᕐᓂᕐᒥᓂᒃ ᑐᓐᖓᕕᒃᑯᓐᓂᒃ ᐃᑉᐸᑦᓴᖅ ᐊᒻᒪᓗ ᑐᓂᓯᔾᔪᑕᐅᓪᓗᓂ $14.8 ᒥᓕᔭᓂᒃ ᓱᕋᐃᓯᒪᓂᖏᓐᓄᑦ.
“ᑐᓐᖓᕕᒃᑯᑦ ᖁᕕᐊᓲᑎᒋᒻᒪᕆᑦᑕᖓ ᑐᑭᑖᕈᑕᐅᓚᐅᖅᑐᖅ. ᐊᑭᓖᑎᑦᓯᒍᑎ ᓱᕋᑦᑕᐅᓚᐅᖅᑐᒧᑦ, $14.8 ᒥᓕᔭᓐ, ᓈᖕᒪᓯᐊᖅᑐᖅ ᐊᒻᒪᓗ ᖃᐅᔨᔾᔪᑕᐅᔪᖅ ᑕᒪᐃᓐᓄᑦ ᑲᓇᑕᒥᐅᓄᑦ ᒐᕙᒪᑐᖃᒃᑯᓐᓄᓪᓗ ᐃᑉᐱᒍᓱᑦᑕᐃᓕᒪᖃᑦᑕᕐᓂᕆᓚᐅᖅᑕᖓ ᐱᓕᕆᐊᒃᓴᒥᓐᓂᒃ ᑲᒪᒋᔭᕆᐊᓕᖕᓂᒃ ᓄᓇᑖᕐᓂᕐᒧᑦ ᐊᖏᕈᑎᓃᑦᑐᓂᒃ ᑕᐃᒫᖑᓐᖏᑦᑐᖅ ᐱᓇᓱᐊᖅᑕᐅᓚᐅᕐᓂᖓᓂᒃ,” ᐅᖃᖅᑐᖅ ᐊᖏᔪᖅᑳᒧᑦ ᑭᖑᕝᕕᐅᑎᓯᒪᔪᖅ ᔭᐃᒥᓯ ᐃᑦᑐᓗᒃ.
ᑐᑭᑖᕈᑕᐅᔪᖅ ᐊᑕᐅᓯᕐᒨᖓᔪᖅ ᐃᓚᐃᓐᓇᖓᓄᑦ ᐃᖅᑲᖅᑐᐃᕕᖕᒦᑎᑦᓯᒍᑕᐅᔪᑦ. ᐊᓯᖏᑦ ᐃᖅᑲᖅᑐᐃᕕᖕᒦᑎᑦᓯᒍᑕᐅᔪᑦ, ᐃᓚᒋᔭᐅᓪᓗᓂ ᒐᕙᒪᒃᑯᑦ ᓯᖁᒥᑦᓯᓯᒪᓂᖏᑦ ᐃᓄᐃᑦ ᐃᖅᑲᓇᐃᔭᖅᑎᑕᐅᒋᐊᖃᕐᓂᖏᓐᓂᑦ (ᐃᓛᒃᑯᑦ 23) ᐊᒻᒪᓗ ᒐᕙᒪᒃᑯᑦ ᑳᓐᑐᓛᒃᓯᖃᑦᑕᕐᓂᖏᑦ (ᐃᓛᒃᑯᑦ 24), ᓯᕗᒧᐊᑉᐸᓪᓕᐊᖏᓐᓇᖅᑑᒃ.
“ᐃᖅᑲᖅᑐᐃᕕᒃᑯᑦ ᐋᖅᑭᑦᑕᐅᓚᐅᖅᑐᖅ ᑐᑭᓕᐅᕈᑕᐅᓪᓗᓂ ᓴᖅᑮᔪᖅ ᐱᐅᓐᖏᑦᑐᖅ ᒪᓕᒐᖅ ᒐᕙᒪᑐᖃᒃᑯᓐᓄᑦ ᑲᔪᓯᑎᑦᓯᖏᓐᓂᖓᓄᑦ ᐊᑐᓕᖅᑎᑕᐅᔭᕆᐊᖃᖅᓯᒪᔪᓂᒃ ᐊᑐᓕᖅᑎᓯᑦᓯᐊᖃᑦᑕᖅᓯᒪᓐᖏᓐᓂᖏᑦ ᓄᓇᑖᕐᓂᕐᒧᑦ ᐊᖏᕈᑎᓂᒃ ᐊᒻᒪᓗ ᐊᓯᖏᓐᓂᒃᓄᓇᑖᕐᓂᕐᒧᑦ ᐊᖏᕈᑕᐅᓯᒪᔪᓂᒃ, ᐊᒻᒪᓗ ᑕᒪᓐᓇ ᑲᔪᓯᑎᑦᓯᖏᓐᓂᕆᓚᐅᖅᑖᑦ ᒪᑭᑉᐸᓪᓕᐊᑦᓯᐊᕈᑕᐅᓚᖓᓚᐅᖅᑑᒐᓗᐊᓂᒃ ᐊᒻᒪᓗ ᓈᖕᒪᑦᓯᐊᑐᒃᑯᑦ ᐋᖅᑭᓯᐊᖅᓯᒪᔪᒃᑯᑦ ᑲᑐᔾᔨᖃᑎᒋᔭᐅᓗᑎᒃ ᐃᓄᐃᑦ ᐊᒻᒪᓗ ᐊᓯᓕᒫᖏᑦ ᓄᓇᑖᖅᓯᒪᔪᑦ,” ᐅᖃᓚᐅᖅᑐᖅ ᐃᑦᑐᓗᒃ.
ᑐᓐᖓᕕᒃᑯᑦ ᐃᖅᑲᖅᑐᐃᕕᖕᒨᖅᓯᓚᐅᖅᑐᑦ ᐊᔪᐃᓐᓇᖃᑦᑕᓚᐅᕋᓗᐊᖅᓱᑎᒃ ᐅᑭᐅᕋᓵᓗᖕᓂᒃ ᑲᔪᓯᕙᓪᓕᐊᑎᑦᓯᖁᔨᓪᓗᑎᒃ ᐊᔪᓕᕋᒥᒃ ᐋᖅᑭᑦᑕᐅᓇᓱᐊᕆᐊᓕᖕᓂᒃ ᐊᐃᕙᔾᔪᑕᐅᓗᑎᒃ ᓄᑖᓂᒃ ᐊᑐᓕᖅᑎᑦᓯᕙᓪᓕᐊᓂᕐᒧᑦ ᑳᓐᑐᓛᓂᒃ ᑲᓇᑕᐅᑉ ᒐᕙᒪᒃᑯᖏᓐᓂᒃ. ᒐᕙᒪᑐᖃᒃᑯᑦ ᕿᒪᐃᑐᐃᓐᓇᖃᑦᑕᓚᐅᖅᑐᑦ ᐊᖏᖃᑎᒌᒐᓱᐊᕐᓂᕐᒧᑦ ᐊᐃᕙᓂᐅᔪᒥᒃ, ᕿᐱᓗᓕᖅᑮᑦᑖᕙᑦᑐᑎᒃ ᐅᓄᖅᑐᓂᒃ ᒪᓂᒪᑎᑦᓯᕕᐅᒐᐃᒐᓗᐊᕋᒥᒃ ᑐᓐᖓᕕᒃᑯᓐᓂᒃ ᐋᖅᑭᒋᐊᒃᑲᐃᔨᒃᑰᕈᒪᓪᓗᑎᒃ, ᐊᒻᒪᓗ ᕿᐱᓗᖃᑦᑕᖅᑐᑎᒃ ᐊᖏᕈᒪᓇᑎᒃ ᐊᑐᓕᖁᔨᔾᔪᑎᓕᐊᕆᓚᐅᖅᑕᖏᓐᓂᒃ ᑖᒪᔅ ᕘᔾᔪ, ᐊᖏᕈᑕᐅᓯᒪᓪᓗᓂ ᑕᒪᒃᑮᓐᓄᑦ-ᓇᓗᓇᐃᖅᑕᐅᓯᒪᓚᐅᖅᑐᖅ ᐋᖅᑭᒋᐊᒃᑲᐃᔨᓐᖑᖅᑎᑕᐅᓯᒪᓪᓗᓂ. ᑐᓐᖓᕕᒃᑯᑦ ᑲᑎᒪᔨᑦ ᐊᓯᐊᒎᕐᕕᒃᓴᖃᕈᓐᓃᕆᐊᒃᓴᖅ ᓇᓗᓇᐃᖅᓯᓕᓚᐅᖅᑐᑦ ᐃᖅᑲᖅᑐᐃᕕᒃᑯᑦ ᑭᓯᐊᓂ ᓵᓐᖓᑦᓯᒍᑎᒋᓕᕐᓗᒍ ᒐᕙᒪᒃᑯᓐᓂᒃ ᑲᔪᓯᑎᑦᓯᓚᐅᓐᖏᓐᓂᖏᓐᓄᑦ ᐊᖏᖃᑎᒌᒍᑎᒋᓯᒪᔭᒥᓂᒃ ᐱᓇᓱᐊᒐᑦᓴᓕᐊᖑᓯᒪᔪᓂᒃ ᓄᓇᑖᕐᓂᕐᒧᑦ ᐊᖏᕈᑎᒃᑯᑦ.
“ᑖᓐᓇ ᐋᖅᑭᑦᑕᐅᔪᖅ ᓱᖅᑯᐃᖅᓯᒍᑕᐅᔪᖅ ᑕᒪᕐᒥᒃ ᐃᓄᐃᑦ ᓵᓐᖓᑦᓯᖃᑦᑕᖅᓯᒪᔪᑦ ᐱᓇᓱᐊᖅᑐᑎᒃ ᐃᓄᐃᑦ ᐱᔪᓐᓇᐅᑎᖓᓂᒃ ᐅᑭᐅᖑᓚᐅᖅᑐᓂᒃ 40-ᓂᒃ ᐊᑭᓕᐅᑎᓂᖓᓂᒃ,” ᐅᖃᖅᑐᖅ ᐃᑦᑐᓗᒃ. “ᑐᓐᖓᕕᒃᑯᑦ ᑲᔪᓯᕙᓪᓕᐊᖏᓐᓇᓂᐊᖅᑐᖅ ᓇᓗᖅᑯᑎᓐᖏᓪᓗᑎᒃ ᐃᖅᑲᖅᑐᐃᕕᖕᒦᑎᑦᓯᒍᑎᒋᔭᒥᓂᒃ.”
