ᐃᕐᖐᓐᓈᖅ ᓴᖅᑭᖅᑕᐅᒋᐊᓕᒃ
(ᓅᕙᐃᒻᕙ 5, 2020 – ᐃᖃᓗᐃᑦ, ᓄᓇᕗᑦ) ᐅᓪᓗᒥ, ᓄᓇᕗᑦ ᒐᕙᒪᖓ (GN) ᓂᕈᐊᖅᑲᐅᔪᖅ ᐃᓚᒍᑦᓯᐅᑎᓂᕐᒧᑦ ᐊᑯᓂᐊᓗᒃ ᑕᐃᒪᙵᓂᑐᖄᓗᒃ ᐃᓕᖅᑯᓯᕆᙱᑕᒥᓂᒃ ᐃᓕᖅᑯᓯᖅᑖᖅᑎᑕᐅᒐᓱᐊᖅᓯᒪᓂᒃᑯᑦ ᓱᕋᑦᑕᐅᓯᒪᓂᖏᓐᓂᒃ ᐃᓄᐃᑦ ᐅᖃᐅᓯᖓ ᐃᓕᖅᑯᓯᖓᓗ ᑲᔪᓯᑎᑦᓯᓪᓗᑎᒃ ᐱᖁᔭᖅ ᐋᖅᑭᒋᐊᕈᑕᐅᔪᖅ ᐃᓕᓐᓂᐊᕐᓂᓕᕆᔨᒃᑯᑦ ᐱᖁᔭᖓᓂᒃ ᐊᒻᒪᓗ ᐃᓄᐃᑦ ᐅᖃᐅᓯᖓᑕ ᓴᐳᑎᔭᐅᓯᒪᓂᖓᓄᑦ ᐱᖁᔭᒥᒃ.
ᓄᓇᕗᑦ ᐱᙳᖅᑎᑕᐅᓚᐅᕐᒪᑦ ᓴᐳᔾᔨᓯᒪᖁᓪᓗᒍ ᐱᕚᓪᓕᕈᑎᒃᓴᓂᓪᓗ ᐃᓄᐃᑦ ᐅᖃᐅᓯᖓᓄᑦ ᐃᓕᖅᑯᓯᖓᓄᓪᓗ ᐊᑯᓐᓂᖓᓂ ᐊᓯᔾᔨᕐᓂᐅᔫᑉ ᐊᒻᒪᓗ ᐊᑦᓱᕉᓐᓂᖓᓇᖅᑐᑰᕐᓂᕐᒧᑦ ᐱᕙᓪᓕᐊᓂᐅᔪᒧᑦ,” ᐅᖃᖅᑐᖅ ᓄᓇᕗᑦ ᑐᙵᕕᒃ ᑎᒥᖓᓄᑦ (ᑐᙵᕕᒃ) ᑭᖑᕝᕕᐅᑎᓯᒪᔪᖅ ᐊᖓᔪᖅᑳᒧᑦ ᔭᐃᒥᓯ ᐃᑦᑐᓗᒃ. “ᐃᓄᐃᑦ ᐃᖅᑲᐅᒪᓂᐊᖅᑐᑦ ᑖᑦᓱᒥᖓ ᐅᓪᓗᕐᒥᒃ ᒐᕙᒪᒃᑯᓐᓄᑦ ᐊᖅᓵᖅᑕᐅᓚᕐᓂᑎᓐᓂᒃ ᓯᓐᓇᑦᑐᐊᕆᖃᑦᑕᖅᓯᒪᔭᑦᑎᓐᓂᒃ ᒪᕐᕉᒃ ᐅᖃᐅᓰᒃ ᐊᑐᕐᓗᒋᒃ ᐃᓕᓐᓂᐊᑎᑦᓯᓂᕐᒥᒃ ᓄᓇᒋᔭᑦᑎᓐᓂ. ᑕᒻᒪᑎᑦᓯᒍᑕᐅᔪᖅ ᐱᖁᔭᖅ.”
ᐄᑉᕈ 2019-ᒥ, ᑐᙵᕕᒃᑯᑦ ᓴᖅᑮᓚᐅᖅᑐᑦ ᐅᓂᒃᑳᒥᒃ ᖃᐅᔨᔾᔪᑕᐅᓚᐅᖅᑐᒥᒃ ᐃᓕᓐᓂᐊᕐᓂᖅ ᓄᓇᕗᒻᒥ ᐊᑐᖅᑕᐅᓯᒪᔪᖅ ᐃᓕᖅᑯᓯᕐᒥᒃ ᓄᑮᕈᔾᔨᓯᒪᓂᖓᓂᒃ ᐊᒻᒪᓗ ᑐᖁᑦᓯᓯᒪᓂᖓᓂᒃ ᐅᖃᐅᓯᕐᒥᒃ. ᓄᖑᑎᕆᓂᖅ ᐅᖃᐅᓯᕐᒥᒃ ᐃᓕᓐᓂᐊᓂᕐᒥᒃ ᑖᖅᓯᒍᑕᐅᔪᖅ ᐃᓕᓐᓂᐊᖅᑎ ᐊᔪᖏᓐᓂᕆᒐᔭᖅᑕᖓᓂᒃ ᐃᓄᒃᑐᑦ ᐊᒻᒪᓗ ᖃᓪᓗᓈᑐᑦ ᐊᒻᒪᓗ ᓴᙱᓕᑎᑦᓯᔪᖅ ᐃᓕᓐᓂᐊᖅᑎᓂᒃ. ᐅᓂᒃᑳᖅ ᐃᓱᓕᒍᑎᖃᓚᐅᖅᑐᖅ ᓄᓇᕗᒻᒥ ᐃᓕᓐᓂᐊᓂᕐᒧᑦ ᐊᐅᓚᓂᖓ ᒪᓕᑦᓯᒪᙱᓐᓂᖓᓂᒃ ᐱᓇᓱᐊᒐᑦᓴᓂᒃ ᐊᒻᒪᓗ ᐊᖏᕈᑕᐅᓯᒪᔪᓂᒃ ᐃᓄᓐᓄᑦ ᑲᓇᑕᒥ ᐊᒻᒪ ᓄᓇᕐᔪᐊᓕᒫᒥ ᒪᓕᒐᕐᓂᒃ.
ᑐᙵᕕᒃᑯᑦ ᐅᑉᐱᕈᓱᑦᑐᑦ ᐃᓕᓐᓂᐊᖅᑐᓕᕆᔨᒃᑯᑦ ᐱᓕᕆᕝᕕᖃᕆᐊᖃᕐᓂᖓᓂᒃ ᐃᓄᐃᑦ ᐃᖅᑲᓇᐃᔭᕐᓂᖏᓐᓄᑦ ᐸᕐᓇᐅᑎᓂᒃ ᐋᖅᑭᑦᓯᒪᓗᑎᒃ ᐊᒻᒪᓗ ᑲᔪᓯᑎᑕᐅᓯᒪᓗᑎᒃ, ᐱᕕᒃᓴᓕᐅᖅᑕᐅᓯᒪᓗᑎᒃ ᐱᓕᖕᒪᒃᓴᐅᑎᒃᓴᓄᑦ ᐊᒻᒪᓗ ᐃᖅᑲᓇᐃᔭᖅᑎᑖᖃᑦᑕᓂᕐᒧᑦ ᓇᓕᖅᑯᑦᓯᓯᒪᔪᓂᒃ ᓈᓴᐅᑎᓂᒃ ᐃᓄᒃᑑᕈᓐᓇᖅᑐᓂᒃ ᐃᓕᓴᐃᔨᓂᒃ. ᓄᓇᕗᑦ ᒐᕙᒪᒃᑯᓐᓂᒃ ᐃᖅᑲᓇᐃᔭᖃᑎᖃᕋᓱᐊᖃᑦᑕᖅᓯᒪᔪᑦ ᐋᖅᑭᑕᐅᒍᑎᒃᓴᖏᓐᓂᒃ ᑕᒪᒃᑯᐊ ᐊᑦᓱᕈᕐᓇᖅᑐᑦ, ᐃᓚᒋᔭᐅᓪᓗᑎᒃ ᓇᓗᓇᐃᖅᓯᒪᔪᓂᒃ ᑮᓇᐅᔭᓕᑕᐅᓯᒪᓗᑎᒃ ᐃᓄᐃᑦ ᐱᓕᖕᒪᒃᓴᐅᑎᒃᓴᖏᓐᓂᒃ. ᒪᐃ 2018−ᒥ, ᑐᙵᕕᒃᑯᑦ ᑲᔪᖏᖅᓴᐃᓚᐅᖅᑐᑦ ᐃᓕᓴᐃᔨᒃᓴᓂᒃ ᐃᓕᓐᓂᐊᑎᑦᓯᓂᕐᒧᑦ ᐱᒋᐊᕈᑎᒃᓴᓂᒃ ᑮᓇᐅᔭᓂᒃ ᑮᓇᐅᔭᓕᑕᐅᒍᑕᐅᓚᐅᖅᑐᓂᒃ 2015 ᐊᖏᕈᑎᒃᑯᑦ ᑐᙵᕕᒃᑯᑦ ᐃᖅᑲᖅᑐᐃᕕᒻᒦᑎᑦᓯᑎᓪᓗᒋᑦ ᑲᓇᑕ ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓂᒃ; ᑕᐃᑦᓱᒪᓂ $180-ᒥᓕᔭᓃᑦᑐᑦ ᐊᑐᐃᓐᓇᐅᓚᐅᖅᑐᑦ. 2019-ᒥ, ᒐᕙᒪᑐᖃᒃᑯᑦ ᒥᓂᔅᑕᖏᓐᓄᑦ ᐃᑲᔪᖅᓱᖅᑕᐅᓚᐅᖅᑐᖅ ᐸᕐᓇᐅᑦ $69-ᒥᓕᔭᓄᑦ ᐃᓕᓴᐃᔨᒃᓴᓂᒃ ᐃᓕᓐᓂᐊᑎᑦᓯᓂᕐᒥᒃ. ᑖᓐᓇ ᐸᕐᓇᐅᑦ ᐃᓅᓴᓪᓕᒋᐊᓚᐅᖅᑕᖓ $42−ᒥᓕᔭᓄᑦ ᓄᓇᕗᑦ ᒐᕙᒪᖓᑕ, ᑐᓴᖅᑎᑦᓯᒍᑕᐅᓪᓗᓂ ᓯᑉᑎᒻᐱᕆ 2019−ᒥ. ᐱᓕᕆᐊᖑᓂᖓ ᓄᖅᑲᖓᓕᖅᑐᖅ ᐊᒻᒪᓗ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᓴᕐᕕᒃ ᓯᕗᓪᓕᖅᐹᒥ−ᐊᕐᕌᒍᒥ ᐃᓕᓴᐃᓂᖃᙱᑦᑐᖅ ᓄᓇᕗᒻᒥ ᐃᓕᓴᐃᔨᒃᓴᓂᒃ ᐃᓕᓐᓂᐊᓂᕐᒧᑦ.
ᐃᓇᖐᓂᐅᔪᖅ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐱᕕᒃᓴᓕᐅᖅᑕᐅᓯᒪᓪᓗᓂ ᐃᓚᒋᐊᕈᑎᓂᒃ ᐃᓄᒃᑐᑦ ᐅᖃᐅᓯᖅ ᑎᑎᕋᐅᔭᕐᓂᒃᑯᑦ ᐃᓕᓐᓂᐊᕈᑕᐅᓂᖓᓂ ᐃᓕᓐᓂᐊᕈᑎᒃᓕᐊᖑᓯᒪᔪᖅ, ᐱᖁᔭᒃᓴᖅ 25 ᑕᐃᒪᐃᓕᖓᒻᒪᑦ, ᓈᖕᒪᖏᑦᑐᖅ ᑭᖑᕝᕕᐅᑎᔭᐅᓂᖓ. ᐃᓕᓐᓂᐊᖅᑐᓕᕆᔨᒃᑯᑦ ᐱᓕᕆᕝᕕᖓ ᐋᖅᑭᑦᓱᐃᒋᐊᓕᒃ ᐊᑐᕈᓐᓇᖅᑐᒥᒃ ᐃᓄᐃᑦ ᐃᖅᑲᓇᔭᕐᓂᖏᓐᓄᑦ ᐸᕐᓇᐅᒻᒥᒃ, ᐊᒻᒪᓗ ᑐᙵᕕᖃᕐᓗᓂ ᐃᓄᒃᑐᑦ ᐅᖃᐅᓯᕐᒥᒃ ᐃᓕᓴᐃᓂᕐᒧᑦ ᐱᓕᕆᐊᖑᓂᖓᓄᑦ ᐋᖅᑭᑦᑕᐅᓯᒪᔪᓂᒃ ᐸᕐᓇᐅᑎᒥ ᑕᕝᕙᓂ. ᐃᓕᓐᓂᐊᖅᑐᓕᕆᔨᒃᑯᑦ ᐋᖅᑭᑦᓱᐃᓚᐅᖅᓯᒪᒻᒪᑕᓂᒃ 2017−ᒥ ᐃᓄᐃᑦ ᐃᖅᑲᓇᐃᔮᖏᓐᓄᑦ ᐸᕐᓇᐅᑎᒥᖕᓂᒃ, ᐃᓄᐃᑦ ᐃᖅᑲᓇᐃᔭᖅᑐᑦ ᑲᑕᑦᓯᒪᓕᖅᑐᑦ. ᓯᑉᑎᒻᐱᕆᒥ, ᑐᕌᖅᐸᓪᓕᐊᓂᖅ ᑭᒡᒐᖅᑐᖅᑕᐅᓂᕐᒧᑦ ᒐᕙᒪᒃᑯᓐᓂ ᐱᔨᑦᓯᕈᑎᓄᑦ ᐅᓂᒃᑳᓂ ᓴᖅᑭᔮᖅᑐᖅ ᓄᓇᕗᑦ ᒐᕙᒪᒃᑯᖏᓐᓂ ᐃᓄᐃᑦ ᐃᖅᑲᓇᐃᔭᖅᑐᑦ ᑲᑕᑦᓯᒪᒋᐊᖏᑦ 49%−ᒥᒃ ᐊᒻᒪᓗ ᐃᓕᓐᓂᐊᖅᑐᓕᕆᔨᒃᑯᓐᓂ, ᑲᑕᑦᓯᒪᒋᐊᒃᑲᓂᕐᒥᔪᖅ 47%-ᒥᒃ.
“ᖁᕕᐊᓇᙱᑦᑐᒥᒃ ᐊᒃᑐᐃᓂᖓ ᐱᖁᔭᒃᓴᖅ 25 ᐃᑉᐱᓐᓂᕈᑕᐅᓂᐊᖅᑐᖅ ᑭᖑᕚᕇᕋᓴᐅᓂᐊᖅᑐᓄᑦ,” ᐅᖃᖅᑐᖅ ᐃᑦᑐᓗᒃ.
ᑐᑭᓯᒋᐊᒃᑲᓂᕐᕕᒃᓴᖅ:
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᔨᒃᑯᓐᓂ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006
www.tunngavik.com
“ᓄᓇᕗᑦ ᐱᙳᖅᑎᑕᐅᓚᐅᕐᒪᑦ ᓴᐳᔾᔨᓯᒪᖁᓪᓗᒍ ᐱᕚᓪᓕᕈᑎᒃᓴᓂᓪᓗ ᐃᓄᐃᑦ ᐅᖃᐅᓯᖓᓄᑦ ᐃᓕᖅᑯᓯᖓᓄᓪᓗ”
