ᑐᓴᕋᑦᓴᓕᕆᔩᑦ

ᑲᓇᑕᐅᑉ ᒐᕙᒪᒃᑯᖏᑦ ᒪᓕᒐᙳᑎᑦᑎᕗᑦ ᓇᓗᓇᐃᒃᑯᑕᑐᐃᓐᓇᕐᒥᒃ ᓄᓇᖅᑲᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᒪᓕᒐᕐᒥ

ᒪᓕᒐᖅ ᐃᓚᑰᓗᐊᖅᑐᖅ ᑲᒪᒋᐊᕈᑎᖏᓐᓂᒃ ᒐᕙᒪᒃᑯᑦ ᐃᓄᒃᑐᑦ ᐅᖃᓯᕐᒥᒃ ᐳᐃᒍᖅᑎᑦᑎᓇᓱᐊᕐᓯᒪᑎᓪᓗᒋᑦ ᐊᒻᒪᓗ ᐊᓯᖏᑕ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ

ᒐᕙᒪᑐᖃᒃᑯᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ ᒪᓕᒐᖅ, ᐱᖁᔭᒃᓴᖅ C-91, ᒪᓕᒐᙳᖅᑎᑕᐅᕗᖅ.

ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᐅᖃᖃᐅᔪᖅ ᑖᓐᓇ ᓇᓗᓇᐃᒃᑯᑕᑐᐃᓐᓇᐅᖕᒪᑦ ᐃᓚᑰᓗᐊᖅᑐᓂᒃ ᐃᓄᐃᑦ ᐱᔪᓐᓇᐅᑎᒥᒍᑦ ᓂᕆᐅᒋᔭᖏᓐᓂᒃ ᒐᕙᒪᑐᖃᒃᑯᓐᓂᒃ, ᐊᒻᒪᓗ ᐱᖃᓯᐅᔾᔨᓯᒪᒐᓂ ᒪᓕᒐᓕᖅᑎᒍᑦ ᑲᒪᒋᐊᕈᑕᐅᔪᓐᓇᕆᐊᓕᖕᓂᒃ ᓴᖅᑮᒍᑎᒃᓴᐅᓇᔭᕐᑐᓂᒃ.

 

“ᓄᓇᕗᖕᒥ ᐃᓄᐃᑦ, ᐱᓕᕆᖃᑎᖃᖅᑐᑎᒃ ᐊᓯᖏᓐᓂ ᐃᓄᖕᓂᒃ ᐃᓄᐃᑦ ᓄᓈᓐᓂᖔᖅᓯᒪᔪᓂᒃ, ᖃᓄᖅᑑᒻᒪᕆᓚᐅᕐᑐᑦ ᐋᖅᑭᒃᓱᐃᖃᑎᖃᑦᑎᐊᕋᓱᐊᕐᑐᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᒃ ᓴᖅᑮᕙᓪᓕᐊᑎᓪᓗᒋᑦ ᐱᖁᔭᒃᓴᕐᒥᒃ C-91-ᒥᒃ”, ᐅᖃᖅᑐᖅ ᑰᑦᑎᖅ. “ᐃᓛᒃ ᐱᓕᕆᖃᑕᐅᓇᓱᐊᕐᓯᒪᒐᓗᐊᕐᑎᓪᓗᑕ ᑲᒪᒋᔭᐅᕙᓪᓕᐊᑎᓪᓗᒍ, ᑖᓐᓇ ᐱᖁᔭᒃᓴᖅ, ᑭᓯᐊᓂ ᓴᖅᑮᕙᓪᓕᐊᖃᑕᐅᓚᐅᙱᓇᒃᑕ ᐃᓄᒃᑎᒍᑦ.” ᒥᔅ ᑰᑦᑎᖅ ᐅᖃᖅᑲᓂᖅᑲᐅᖕᒥᔪᖅ, “ᑖᓐᓇ ᒪᓕᒐᖅ, ᐊᑑᑎᖃᕈᒫᕐᓂᐊᕐᓯᒪᔪᖅ ᐳᐃᒍᖅᑕᐅᕙᓪᓕᐊᖁᓇᒋᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ, ᑲᒪᒋᐊᕈᑎᒃᓴᐅᒐᔭᕐᑐᓂᒃ ᐱᔨᑦᑎᕐᑕᐅᓂᕐᒥᒃ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᐊᑐᕐᓗᒋᑦ ᒐᕙᒪᒃᑯᑦ ᐱᓕᕆᕕᖏᓐᓂ ᐊᒻᒪᓗ ᐱᔭᐅᔭᕆᐊᓕᖕᓂᒃ ᐱᑕᖃᕋᓂ ᓇᓗᓇᐃᖅᑎᐊᕈᑕᐅᓪᓗᓂ ᐃᓄᖕᓄᑦ ᑐᓴᖅᑕᐅᑎᑕᐅᓯᒪᔪᓂᒃ.”

ᑲᓇᑕᐅᑉ ᒐᕙᒪᒃᑯᖏᑦ ᐳᐃᒍᖅᑕᐅᒃᑲᐃᓐᓇᓱᒻᒪᕆᐊᓗᓚᐅᕐᓯᒪᒻᒪᑕ ᐃᓄᒃᑐᑦ ᐅᖃᐅᓯᕐᒥᒃ ᐊᒻᒪ ᖃᓪᓗᓈᙳᑎᑦᑎᓇᓱᐊᕐᑐᑎᒃ ᒐᕙᒪᑐᑲᒃᑯᑦ ᐃᓕᓐᓂᐊᕐᕕᖏᑦᑎᒍᑦ ᐊᒻᒪᓗ ᐊᐅᓪᓚᕐᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᕐᓯᒪᓪᓗᑎᒃ ᐃᓄᐃᑦ. ᐅᓪᓗᒥᐅᔪᖅ ᓱᓕ ᐃᓄᐃᑦ ᐱᑦᑎᐊᑕᐅᕙᙱᒻᒪᑕ ᒐᕙᒪᑐᖃᒃᑯᓐᓂᒃ ᒥᑭᓂᕐᓴᒻᒪᕆᓐᓂᒃ ᑮᓇᐅᔭᓂᒃ ᓴᓂᕐᕙᐃᓂᒃᑯᑦ ᐃᓄᒃᑐᑦ ᐅᖃᐅᓯᕐᒧᑦ ᑐᕌᖅᑐᓂᒃ ᑖᒃᑯᐊ ᐅᐃᕖᑦ ᐊᒻᒪ ᖃᓪᓗᓈᑐᑦ ᐅᖃᐅᓯᖃᖅᑐᓄᑦ ᓴᓂᐊᓂ; ᐊᖅᑯᑎᖃᖅᑐᑎᒃ ᐊᔾᔨᒋᙱᑕᖓᓂᒃ ᑮᓇᐅᔭᖃᖅᑎᑦᑎᓂᒃᑯᑦ ᐱᑦᑎᐊᑕᐅᖏᒍᑕᐅᖕᒪᑕ ᐃᓄᖕᓂᒃ ᐳᕋᕕᓐᓯᓂ ᓄᓇᖃᖅᑐᓄᑦ; ᐊᒻᒪᓗ ᐃᓄᒃᑐᑦ ᐅᖃᓪᓚᓲᓂᒃ ᖃᓪᓗᓇᐅᔭᖁᔨᕙᒃᑐᑎᒃ ᐊᒻᒪ ᐅᐃᕖᑎᑐᑦ ᒐᕙᒪᑐᖃᒃᑯᑦ ᐱᓕᕆᕕᖏᓐᓂ ᐱᔨᑦᑎᕈᑎᑎᒍᑦ ᑕᒪᐃᓐᓂ ᐃᓄᐃᑦ ᓄᓈᓐᓂ, ᐊᓪᓛᑦ ᐃᓄᒃᑐᑦ ᐅᖃᕈᓐᓇᕐᑐᑦ ᐃᓄᒋᐊᓐᓂᕐᓴᐅᒐᓗᐊᕐᑎᓪᓗᒋᑦ.

ᐃᓛᒃ ᐃᓄᐃᑦ ᐱᔭᕇᔭᐃᓚᐅᕐᑎᓪᓗᒋᑦ, ᑐᓂᓯᕙᒃᑐᑎᒃ ᐊᒻᒪᓗ ᐅᓂᒃᑳᐸᒃᑐᑎᒃ ᐃᓱᒪᒃᓴᕐᓯᐅᕈᑕᐅᑦᑎᐊᕐᓯᒪᔪᓂᒃ ᐊᒻᒪᓗ ᓈᖕᒪᒃᑐᓂᒃ ᐋᖅᑭᒋᐊᕈᑎᖃᖁᔨᓚᐅᕐᑎᓪᓗᒋᑦ ᒪᓕᒐᒃᓴᓕᐅᕐᑎᓪᓗᒋᑦ, ᑲᓇᑕ ᖃᓄᐃᒃᓴᕐᑑᔮᙱᒻᒪᑦ ᐊᑐᓕᕐᑎᑦᑎᒐᓗᐊᕈᑎᒃ ᐱᒡᒐᓇᕐᑐᓂᒃ ᐋᖅᑭᒋᐊᕈᑎᓂᒃ, ᐃᒃᐱᒋᔭᐅᒐᑎᒃ ᐃᓄᐃᑦ, ᓄᓇᖃᖅᑳᖅᓯᒪᔪᓪᓗ ᖃᐅᔨᒪᔨᒻᒪᕆᖏᑦ ᐅᓂᒃᑳᑎᓪᓗᒋᑦ ᓇᓗᓇᐃᕆᑦᑎᐊᓚᐅᕐᑐᑦ ᐱᔭᕆᐊᓕᒥᑕ ᑐᖔᓂᖁᔨᓇᑎᒃ ᐋᖅᑭᑕᐅᒋᐊᓐᓂᐊᕈᓂ ᐱᑦᑎᐊᙱᒍᑕᐅᕙᒃᑐᑦ ᐃᓄᖕᓂᒃ ᐊᒻᒪ ᑲᓇᑕᒥ ᓄᓇᖃᖅᑳᖅᓯᒪᔪᓂᒃ.  ᒪᓕᒐᖅ ᐃᓕᓴᕐᓯᓯᒪᔪᖅ ᑖᒃᑯᐊ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᓐᓂᒃ ᐃᓚᖓᓂ 35-ᒥ ᑲᓇᑕᐅᑉ ᒪᓕᒐᕐᔪᐊᖓᓂ, 1982, ᐱᖃᓯᐅᔾᔨᒻᒪᑦ ᐱᔾᔪᑕᐅᓪᓗᑎᒃ ᐱᔪᓐᓇᐅᑎᖏᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ ᑖᓐᓇᓗ ᖁᕕᐊᓇᕐᐳᖅ, ᑭᓯᐅᓂᓗ ᐃᒻᒥᒃᑰᖓᑎᓪᓗᒍ ᑖᓐᓇ ᓈᒻᒪᖏᓗᐊᕐᒪᑦ ᐋᖅᑭᒋᐊᕈᑕᐅᓂᐊᕐᓗᓂ ᒐᕙᒪᒃᑯᑦ ᐊᑐᕐᓯᒪᔭᖏᓐᓄᑦ ᓯᕗᓂᒃᑎᓐᓂ ᐊᒻᒪᓗ ᐅᓪᓗᒥᒧᑦ ᓱᓕ ᐅᖃᐅᓯᒃᑎᒍᑦ ᐊᒻᒪ ᐃᓕᖅᑯᓯᑦᑎᒍᑦ ᐱᐅᙱᒻᒪᑦ ᐊᑑᑎᖃᖅᑎᑕᐅᔪᑦ ᑲᓇᑕᒥ ᓯᕗᓪᓕᐹᖑᓪᓗᑎᒃ ᐃᓄᒋᓯᒪᔭᖏᓐᓄᑦ.

“ᓄᓇᕗᑦ ᐊᒻᒪ ᑲᓇᑕᒥᐅᑕᑦ ᐃᓄᐃᑦ ᓂᐱᖃᕈᑎᖃᐃᓐᓇᓂᐊᕐᐳᑦ, ᐱᓕᕆᐊᖃᓪᓗᑎᓪᓗ ᓈᖕᒪᒃᑐᒥᒃ ᒪᓕᒐᕐᒥᒃ ᐊᒻᒪ ᐊᓯᖏᓐᓂᒃ ᑲᒪᒋᐊᕈᑕᐅᔪᓐᓇᕐᑐᓂᒃ ᐃᑲᔪᕈᑕᐅᔪᓐᓇᕐᑐᓂᒃ ᐋᓐᓇᐅᒪᐃᓐᓇᖁᓪᓗᑕ ᐊᒻᒪᓗ ᐱᕚᓪᓕᖁᓪᓗᒋᑦ ᑎᒥᒋᑦᑎᐊᕐᓂᖅ ᐊᒻᒪᓗ ᐳᐃᒍᖅᑕᐅᖁᓇᒍᑦ ᐃᓄᒃᑐᑦ ᐅᖃᐅᓯ”, ᐅᖃᖅᑐᖅ ᑰᑦᑎᖅ.

ᑰᑦᑎ ᐅᖃᒃᑲᓂᕐᑐᓂ: “ᑖᓐᓇᓕ ᐱᔾᔪᑎᖃᙱᒻᒪᑦ ᑕᐃᒃᓱᒪᓂ ᐊᑐᖅᑕᐅᓚᐅᕐᑐᓂᒃ. ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᒪᓕᒐᖏᑦᑎᒍᑦ ᑲᓇᑕᒥ 2019-ᒦᓕᕋᑦᑕ ᐱᔨᑦᑎᕆᐊᖃᓐᓂᖏᑦ ᒐᕙᒪᒃᑯᑦ ᐱᓕᕆᔾᔪᑎᒥᒍᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦᑎᒍᑦ, ᐱᓗᐊᕐᒥᒃ ᐃᓄᒋᐊᓐᓂᕐᓴᐅᑎᓪᓗᒋᑦ ᐅᖃᓪᓚᒍᓐᓇᕐᑐᑦ. ᐊᒥᓱᐊᕐᑎᕐᑐᓂ, ᒐᕙᒪᒃᑯᑦ ᐱᔨᑦᑎᕈᑎᖏᑦᑎᒍᑦ ᓲᕐᓗᖃᐃ ᐃᖅᑲᖅᑐᐃᕕᓂᓕ, ᐃᓕᓐᓂᐊᕐᓂᓕᕆᓂᕐᒥ ᐊᒻᒪᓗ ᐋᓐᓂᐊᖃᓐᓇᖏᓐᓂᓕᕆᓂᕐᒥ ᐱᔨᑦᑎᕈᑎᖃᕆᐊᓕᒃ ᑐᖁᔪᖃᕈᓐᓇᕐᒪᑦ, ᐊᒻᒪ ᐃᓅᔪᓐᓃᕐᓯᒪᔪᑦ ᑎᒥᖏᓐᓂᒃ ᖃᐅᔨᓴᕐᑎ ᖃᐅᔨᓚᐅᕐᒪᑦ ᐅᖃᐅᓯᖅ ᐱᔾᔪᑕᐅᓪᓗᓂ ᐊᑕᐅᓯᐊᕋᓂ ᐃᓅᔪᓐᓂᕐᑐᖃᖅᓯᒪᓂᖓᓂᒃ, ᓄᓇᑦᑎᓐᓂ − ᓄᓇᑦᑎᓐᓂ ᐃᓄᒋᐊᓐᓂᕐᓴᐅᔪᒍᑦ − ᑲᓇᑕ ᒪᓕᒐᖅᑎᒍᑦ ᑲᒪᒋᔭᕆᐊᓕᒥᓂᒃ ᑲᒪᙱᒻᒪᑕ ᐱᓪᓗᖏᑦ ᐱᔭᕆᐊᓕᕗᑦ ᐊᑑᑎᖃᖅᑐᑦ.”

-30-

ᑐᑭᓯᒋᐊᒃᑲᓐᓂᕈᓐᓇᕐᐳᑎᑦ:

ᒪᓚᐃᔭ ᒥᑭᔾᔪᒃ
ᑐᖏᓕᖓ ᑐᑭᒧᐊᒃᑎᑦᑎᔨᐅᑉ ᑐᓴᐅᒪᔾᔪᑎᓕᕆᔨᒃᑯᓐᓂ
ᓄᓇᕗᑦ ᑐᓐᖓᕕᒃ ᑎᒥᖓ

ᖃᔮᖅ ᐃᐊᔅᕗᐊᑦ, ᑐᓴᐅᒪᔾᔪᑎᓕᕆᓂᕐᒧᑦ ᖃᐅᔨᒪᔨᑕᖅ
ᐊᖓᔪᖅᑳᖅ ᐊᓗᑭ ᑰᑦᑎᖅ ᐊᓪᓚᑉᕕᖓᓂ