(ᔫᓂ 21 2021, ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᑦ (NTF) ᖁᕕᐊᓱᒃᑐᑦ ᑐᓴᖅᑎᑦᓯᒋᐊᑦᓴᖅ $92,000-ᖑᓗᐊᖅᑐᑦ ᑐᓂᔭᐅᓯᒪᓂᖏᓐᓂᒃ ᓯᑕᒪᓄᑦ (4) ᐃᓕᖅᑯᓯᕐᒧᑦ ᒪᒥᓴᕐᓂᒧᓪᓗ ᐃᑲᔫᑎᒃᓴᓄᑦ.
ᑖᒃᑯᐊ ᓯᑕᒪᑦ ᐃᑲᔫᑎᒃᓴᑦ ᐱᓕᕆᐊᖑᓂᐊᖅᑐᑦ 2021 ᐊᐅᔭᖓᓂ:
- ᓛᓴᓘᓯ ᐃᓱᓪᓗᑕᖅ, ᐸᓐᓂᖅᑑᖅ, ᓄᓇᓕᐊᖅᑎᑦᓯᖃᑦᑕᓂᕐᒧᑦ
- ᑯᕆᔅᑕ ᔭᑖᔅᑭ, ᑲᖏᕐᖠᓂᖅ ᐊᒻᒪᓗ ᐃᒡᓗᓕᒑᕐᔪᖅ; ᓴᐸᙱᕆᓂᖅ ᒥᖅᓱᓂᕐᓗ
- ᐃᓕᓴᐱ ᓂᖏᐅᖓᓐ, ᓴᓪᓖᑦ; ᓄᓇᓕᐊᖅᑎᑦᓯᖃᑦᑕᓂᕐᒧᑦ
- ᕿᑎᕐᒥᐅᓂ ᐃᓚᓐᓇᕇᑦᑐᑦ ᓴᓴᐃᔭᑎ, ᐃᖃᓗᑦᑑᑦᑎᐊᖅ; ᒪᒃᑯᑦᑐᑦ ᓄᓇᓕᐊᖅᑎᑕᐅᖃᑦᑕᕐᓂᖓ
“ᓄᓇᖃᖅᑳᖅᓯᒪᔪᑦ ᐅᓪᓗᖓᓂ, ᐊᑏ ᓇᓪᓕᐅᓂᖅᓯᐅᕈᑎᒋᓂᖅᑲᕗᑦ ᐆᒻᒪᕆᑦᓯᐊᕐᓂᖓ ᐃᓄᐃᑦ ᐃᓕᖅᑯᓯᖓᑕ. ᑖᒃᑯᐊ ᓯᑕᒪᑦ ᐃᑲᔫᑎᓂᐊᖅᑐᑦ ᐳᐃᒍᕐᒃᑕᐅᕐᑯᓇᒍ ᐊᒻᒪᓗ ᐊᑐᓕᖅᑎᑕᐅᒃᑲᓐᓂᕈᑎᒋᓂᖓᓄᑦ ᐃᓄᐃᑦ ᐃᓕᖅᑯᓯᖏᓐᓂ ᐊᒻᒪᓗ ᒪᒥᓴᕐᓂᕐᒧᑦ ᑲᑉᐱᐊᓱᐊᑎᑕᐅᖃᑦᑕᖅᓯᒪᔪᑦ ᐊᒻᒪᓗ ᑭᖑᕚᖏᑦ ᐃᓕᓐᓂᐊᕆᐊᖅᑎᑕᐅᖃᑦᑕᖅᑐᒥᓂᕐᓄᑦ,” ᐅᖃᓚᐅᖅᑐᖅ ᐊᓗᑭ ᑰᑦᑎᖅ, ᐊᖓᔪᖅᑳᖅ ᓄᓇᕗᑦ ᑐᙵᕕᒃ ᑎᒥᖓᓂ.
ᑐᒃᓯᕋᐅᓯᐅᖁᔨᓐᓇᕈᒫᓕᕐᒥᔪᖅ ᐃᓕᖅᑯᓯᕐᒧᑦ ᒪᒥᓴᕐᓂᒧᓪᓗ ᐃᑲᔫᑎᒃᓴᓂᒃ ᔪᓚᐃ 1, 2021-ᒥᓂᒃ ᐊᐅᒡᒍᓯ 1,2021-ᒧᑦ ᐃᑲᔫᑎᓄᑦ ᐊᐅᓚᓂᖃᕐᓂᐊᖅᑐᓄᑦ ᓯᑉᑎᒻᐱᕆᒥᒃ ᑏᓰᒻᐱᕆᒧᑦ. ᑐᒃᓯᕋᐅᑎᑦ ᑕᑕᑎᕆᐊᓕᑦ, ᐃᑲᔫᑎᓄᑦ ᐊᑐᐊᒐᖅ ᐊᒻᒪᓗ ᐊᑐᐊᖅᓯᔾᔪᑎᒃᓴᖅ ᐊᑐᐃᓐᓇᐅᔪᑦ ᐅᕙᓂ www.tunngavik.com ᐅᖄᓚᓗᑎᓪᓘᓐᓃᑦ 1-888-236-5400.
ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᑦ (NTF) ᓴᖅᑭᖅᑕᐅᓯᒪᔪᖅ ᐊᐅᓚᑦᓯᖁᔭᐅᓪᓗᓂ ᐊᒥᐊᒃᑯᓂᒃ ᑮᓇᐅᔭᓂᒃ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᓯᒪᔪᑦ ᑮᓇᐅᔭᓕᑕᐅᒍᑎᒋᓯᒪᔭᖏᑎᒍᑦ ᐊᖏᖃᑎᒌᒍᑎᓂᒃ.
