ᑐᓴᕋᑦᓴᓕᕆᔩᑦ

ᐱᖁᔭᒃᓴᖅ 25 ᐃᓕᓐᓂᐊᖅᑐᓕᕆᓂᕐᒧᑦ ᐱᖁᔭᕐᓄᑦ ᐋᖅᑭᒋᐊᕈᑏᑦ ᖁᕕᐊᓇᓐᖏᒃᑲᓐᓂᖅᑐᑦ

(ᔫᓂ 5, 2019 – ᐃᖃᓗᐃᑦ, ᓄᓇᕗᑦ) ᐱᖁᔭᒃᓴᖅ 25 –ᐱᖁᔭᖅ ᐋᖅᑭᒋᐊᕈᑕᐅᓂᐊᖅᑐᖅ ᑖᒃᑯᓄᖓ ᐃᓕᓐᓂᐊᖅᑐᓕᕆᓂᕐᒧᑦ ᐱᖁᔭᕐᓄᑦ ᐊᒻᒪ ᐃᓄᐃᑦ ᐅᖃᐅᓯᖏᑦ ᓴᐳᔾᔭᐅᓯᒪᓂᖏᓐᓄᑦ ᐱᖁᔭᖅ, ᓯᕗᓪᓕᖅᐹᒥ ᐅᖃᐅᓕᒫᖅᑕᐅᓂᖃᖅᑐᑦ ᔫᓂ 4, ᐱᐅᓯᕚᓪᓕᓗᐊᕋᓂ ᓴᓂᐊᓂᒃ ᐊᕐᕌᓂ ᐊᓂᒎᑎᓚᐅᓐᖏᑦᑐᖅ ᐱᖁᔭᒃᓴᖅ 37.

ᑖᓐᓇᐅᒐᓗᐊᖅᑎᓪᓗᒍ ᐱᖁᔭᒃᓴᖅ 32 ᑖᒃᑯᓇᓂ ᓄᓇᕗᒥ ᐊᖏᕈᑎᓂ ᐃᓚᐅᑦᓯᐊᕆᐊᖃᖅᑎᑕᐅᔪᑦ ᐋᖅᑭᒃᓱᖅᑕᐅᓂᖓᓂᒃ ᐃᓕᓐᓂᐊᖅᑐᓕᕆᔾᔪᑕᐅᓂᐊᖅᑐᑦ, ᓄᓇᕗᑦ ᑐᓐᖓᕕᒃᑯᑦ ᑕᑯᓚᐅᕐᒪᑕ ᐱᖁᔭᒃᓴᒥᒃ ᓯᕗᓪᓕᖅᐹᒥ ᐃᒃᐸᒃᓴᖅ. ᐊᖓᔪᖅᑳᖅ ᐊᓗᑭ ᑰᑦᑎᖅ ᐅᖃᓚᐅᖅᑐᑦ “ᓄᓇᕗᒥ ᐃᓄᐃᑦ ᓇᓗᓇᐃᖅᓯᒪᑦᓯᐊᖅᑎᓪᓗᒋᑦ ᓂᕆᐅᒋᔭᒥᓂᒃ ᐃᓕᓐᓂᐊᖅᑐᓕᕆᓂᕐᒧᑦ ᐱᖁᔭᕐᓂ. ᐊᕐᕌᒍᒐᓴᖕᓂᑦ ᐃᑲᔫᑎᓯᒪᒐᓗᐊᖅᑎᓪᓗᒋᑦ ᓄᓇᕗᑦ ᑐᓐᖓᕕᒃ ᑎᒥᖓᑦ ᑖᒃᑯᐊᑦᓴᐃᓐᓇᐃᑦ ᐋᖅᑭᒋᐊᕈᑕᐅᒍᒪᓯᒪᔪᑦ ᐋᖅᑭᒋᐊᖅᑕᐅᑐᐃᓐᓇᖅᑐᑦ. ᑕᒪᓐᓇ ᒪᓕᓐᖏᑦᑐᖅ ᐱᓕᕆᐊᒃᓴᖃᖅᑎᑕᐅᓂᖏᑦ ᒥᓂᔅᑕᖁᑎᖏᑦ ᓄᓇᕗᑦ ᒪᓕᒐᓕᐅᕕᒃ, ᓄᓇᕗᒥᐅᓄᑦ.”

ᓄᓇᕗᑦ ᑐᓐᖓᕕᒃᑯᑦ ᑐᓴᕐᓯᒪᔭᕗᑦ ᐅᓂᒃᑳᓂ ᐅᖃᐅᓯᖃᓚᐅᖅᑐᑦ ᑐᓴᖅᑕᐅᓚᐅᖅᑐᓂᒃ ᓄᓇᓕᖕᓂ ᐋᔩᖃᑎᖃᖅᑎᓪᓗᒋᑦ: ᓄᓇᕗᒥ ᐃᓄᐃᑦ ᑕᑯᒍᒪᖕᒪᑕ ᐃᓄᒃᑯᑦ ᐊᑐᖅᑕᐅᑎᓪᓗᒋᑦ ᐃᓕᓐᓂᐊᖅᑎᑦᓯᔪᓄᑦ ᐃᓕᓐᓂᐊᕐᕕᖁᑎᑦᑎᓐᓂ (ᐃᓕᓐᓂᐊᓕᕋᑖᓂᒃ-ᖁᑦᓯᖕᓂᓕᖕᓄᑦ 12) ᐊᒻᒪ ᐃᓕᓐᓂᐊᕐᓂᐊᓕᓵᖅᑐᓄᑦ ᐱᓕᒻᒪᒃᓴᐅᑏᑦ; ᑕᐅᑐᒐᖃᕐᓂᖅᓴᐅᓗᑎᒃ ᐃᓕᓴᐃᓂᕐᒥᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ; ᐅᓄᕈᓐᓃᖅᐹᓪᓕᖏᓪᓗᒋᑦ ᓄᓇᓖᑦ ᐃᓕᓐᓂᐊᖅᑐᓕᕆᔨᖏᑦᑕ ᑲᑎᒪᔨᖏᑦ ᐊᒻᒪ ᐃᑲᔪᖅᓱᐃᔾᔪᑎᖃᕐᓂᖅᓴᐅᓗᑎᒃ ᐃᓕᓐᓂᐊᖅᑯᓕᕆᔨᐅᔪᑦ ᑲᑎᒪᔩᑦ; ᓴᖅᑭᑎᒃᑲᓐᓂᕐᓗᒋᑦ ᐊᕕᒃᑐᖅᓯᒪᓂᐅᔪᓂ ᐃᓕᓐᓂᐊᖅᑐᓕᕆᔨᕐᔪᐊᑦ ᑲᑎᒪᔨᖏᑦ; ᐱᐅᓯᕚᓪᓕᕐᓗᒋᑦ ᐊᑐᖅᑕᐅᒋᐊᖃᖅᑐᑦ ᑖᒃᑯᓅᖓ ᓄᓇᓖᑦ ᐃᓕᓐᓂᐊᖅᑐᓕᕆᓂᕐᒧᑦ ᑲᑎᒪᔨᖏᑦ, ᐱᓕᕆᕕᐊᑦ ᐃᓕᓐᓂᐊᖅᑐᓕᕆᔨᒃᑯᑦ ᐊᒻᒪ ᐊᕕᒃᑐᖅᓯᒪᓂᐅᔪᓂ ᐃᓕᓐᓂᐊᕐᕕᖕᓄᑦ ᐊᐅᓚᑦᓯᕕᐅᔪᑦ; ᐃᓱᓕᓪᓗᒋᑦ ᑭᖑᓪᓕᒨᖅᑎᑦᓯᖃᑦᑕᕆᐊᖃᕐᓂᖅ ᖁᑦᓯᖕᓂᐅᔪᒧᑦ; ᐊᒻᒪ ᐃᓕᓐᓂᐊᖅᑐᓕᕆᔭᐅᓗᑎᒃ ᐊᒻᒪ ᐃᓕᓐᓂᐊᖅᑎᓄᑦ ᐃᑲᔪᖅᓲᑎᖃᑦᓯᐊᕐᓗᓂ.

ᒪᕐᕉᓗᐊᖕᓂᑦ ᐋᓯᔾᔩᔪᖃᕋᓗᐊᖅᑎᓪᓗᒍ ᐱᐅᓯᕚᓪᓕᕈᑎᒃᓴᓂᒃ, ᐱᖁᔭᒃᓴᖅ 25 ᐅᑎᕆᐊᑦᑎᑦᓯᓂᐊᖅᑐᑦ ᐃᓗᐃᑦᑐᒥᒃ ᐊᑐᓕᖅᑎᑕᐅᓂᒃᓴᖓ ᐃᓄᒃᑐᑦ ᐃᓕᓴᐃᓂᖅ (LOI), ᑎᑭᓪᓗᒍ ᐊᕐᕌᒍᐊ 2039. ᐅᖃᖅᑐᖅ ᐊᖓᔪᖅᑳᖅ ᑰᑦᑎᖅ: “ᑕᒪᓐᓇ ᐊᑐᖅᑕᐅᔪᒃᓴᑦ ᓱᒃᑲᐃᑦᑑᑎᓪᓗᒍ, ᓱᕈᓯᖅ ᐅᓪᓗᒥ ᐃᓅᔪᖅ — ᐊᑭᐅᖃᓕᕐᓂᐊᖅᑐᑦ ᐊᕙᑎᓂᒃ 20 ᐊᕐᕌᒍᖃᕐᓗᓂ ᑎᑭᑉᐸᑦ 2039 — ᐱᑎᑕᐅᒍᓐᓇᔾᔮᖏᑦᑐᑦ ᖁᑦᓯᖕᓂᓖᑦ 9-12 ᐃᓕᓴᖅᑕᐅᓂᕐᒥᑦ ᐃᓄᒃᑐᑦ.”

ᖁᓕᓄᑦ ᐊᕐᕌᒎᓯᒪᔪᓄᑦ ᐊᒻᒪ ᐅᖓᑖᓄᑦ, ᓄᓇᕗᑦ ᑐᓐᖓᕕᒃ ᑎᒥᖓᑦ ᐃᑲᔪᖅᑎᖃᕈᒪᓯᒪᒐᓗᐊᕐᒪᑕ ᓄᓇᕗᑦ ᒐᕙᒪᖏᓐᓂ ᐱᓪᓗᒍ ᐃᓕᓐᓂᐊᖅᑐᓕᕆᓂᖅ. ᐊᕐᕌᒎᓗᐊᓕᖅᑐᖅ, ᓄᓇᕗᑦ ᑐᓐᖓᕕᒃ ᑎᒥᖓᑦ ᑐᒃᓯᕋᐅᑎᓕᐅᓚᐅᕐᒪᑦ ᐱᖓᓲᓕᖓᔪᓄᑦ ᐃᑲᔪᖅᑎᒌᒍᑕᐅᖁᓪᓗᒋᑦ ᐊᖅᑯᑕᐅᓂᐊᖅᑐᑦ ᐃᓄᒃᑐᑦ ᐃᓕᓴᐃᓂᕐᒧᑦ:

• ᓯᕕᑭᑦᑐᒧᑦ, ᕿᑎᐊᓄᓪᓗ ᐊᑐᓕᖅᑎᑦᓯᓂᕐᒧᑦ ᑐᕌᒐᐅᔪᑦ ᐃᓄᐃᑦ ᐃᓕᓴᐃᔨᓄᑦ ᐃᓕᓐᓂᐊᕈᑎᒃᓴᑦ;

• ᓄᑖᓂᒃᐱᓕᕆᕕᐊᓂ ᐃᓕᓐᓂᐊᖅᑐᓕᕆᔨᒃᑯᑦ ᐃᓄᖕᓂᑦ ᐃᖅᑲᓇᐃᔭᖅᑎᖃᕐᓂᕐᒧᑦ
ᐸᕐᓇᐅᑎᓕᐅᕐᓗᓂ, ᐱᕕᒃᓴᖏᑦ ᐱᕕᒃᓴᖃᑦᓯᐊᕐᓗᑎᒃ ᑭᒡᒐᖅᑐᐃᔨᐅᔪᓂᒃ ᐃᓄᐃᑦ ᐃᖅᑲᓇᐃᔭᕐᓂᖏᓐᓄᑦ ᐃᓕᓐᓂᐊᕐᕕᖕᒥ ᐊᒻᒪ ᐱᓕᕆᕕᐊᓂ ᐃᓕᓐᓂᐊᖅᑐᓕᕆᔨᒃᑯᑦ; ᐊᒻᒪ

• ᓄᑖᓂᒃ ᐱᕕᒃᓴᖃᕐᓗᑎᒃ ᐃᓄᒃᑐᑦ ᐃᓕᓐᓂᐊᖅᑎᑦᓯᒍᑎᒃᓴᑦ, ᒪᓕᒡᓗᒋᑦ ᐃᓄᐃᑦ ᐃᖅᑲᓇᔭᐃᔭᕐᓂᖏᓐᓄᑦ ᐸᕐᓇᐅᑏᑦ ᐱᕕᒃᓴᕆᑎᑕᐅᔪᑦ ᐃᓄᖕᓄᑦ ᐃᓕᓴᐃᔨᓄᑦ ᐃᖅᑲᓇᐃᔭᕐᕕᒃᓴᑦ.

ᓄᓇᕗᑦ ᑐᓐᖓᕕᒃ ᑎᒥᖓᑦ ᐅᖃᐅᔾᔩᓐᓇᖅᑑᒐᓗᐊᑦ ᑖᒃᑯᐊ ᓄᓇᕗᑦ ᒐᕙᒪᖏᑦᑕ ᒥᓂᔅᑕᖏᑦ ᐊᒻᒪ ᑲᑎᒪᔨᑦ ᑕᑯᒃᓴᐅᑎᑦᓯᖁᓪᓗᒋᑦ ᓯᕗᓕᖅᑎᐅᓂᕐᒥᑦ ᓄᓇᕗᒥ ᐃᓕᓐᓂᐊᖅᑐᓕᓂᕐᒧᑦ ᐊᒻᒪ ᐅᖃᐅᓯᓕᕆᓂᕐᒧᑦ ᓈᒻᒪᖏᔾᔪᑕᐅᔪᓂᒃ.
ᐅᖃᐅᓯᖃᖅᑐᓂ ᐱᒻᒪᕆᐅᓂᖓᓂᒃ ᑕᖅᑲᒃᑯᓂᖓ ᑐᓴᖅᑕᐅᔪᑦ, ᑰᑦᑎᖅ ᐃᓚᓕᐅᔾᔨᓚᐅᖅᑐᖅ, “ᑎᓕᐅᖅᐸᒃᑲ ᓄᓇᕗᒥ ᐃᓄᐃᑦ ᓂᓪᓕᐊᑯᓪᓗᒋᑦ. ᓄᓇᕗᑦ ᓴᖅᑭᑎᑕᐅᓚᐅᕐᒪᑦ ᑕᒪᒃᑯᓄᖓ ᐊᒻᒪ ᐃᓄᖕᓄᑦ ᐊᒻᒪ ᒫᓐᓇᐅᓕᖅᐳᖅ ᐅᖃᓕᒪᒋᐊᖃᕐᓂᓯ ᒪᓕᒐᓕᐅᖅᑎᑦᓯᓐᓄᑦ ᐱᓪᓗᒍ ᓯᕗᓂᒃᓴᖓ ᓄᓇᕗᒥ ᐃᓕᓐᓂᐊᖅᑎᑦᓯᔾᔪᑕᐅᔪᑦ.”

ᓄᓇᕗᑦ ᒐᕙᒪᖏᑦ ᓴᖅᑭᑎᑕᐅᓚᐅᖅᑐᑦ ᐊᑐᖅᑐᒍ ᐋᑎᑯ 4 ᑲᓇᐅᑉ ᑐᓐᖓᕕᒡᔪᐊᖓᑎᒍᑦ-ᓴᐳᔾᔭᐅᓯᒪᔪᖅ ᓄᓇᕗᒥ ᐊᖏᕈᑎ. ᐋᑎᑯ 32 ᑕᖃᕆᐊᖃᖅᑎᑦᑎᔪᖅ ᑖᒃᑯᐊ ᓄᓇᕗᑦ ᒐᕙᒪᖏᑦ ᒪᓕᖁᓪᓗᒋᑦ ᐃᓄᐃᑦ ᑐᕌᒐᖏᓐᓂᒃ ᐊᒻᒪ ᑎᑭᒐᓱᐊᖅᑕᖏᓐᓄᑦ ᐱᕙᓪᓕᐊᑎᑦᓯᓂᒃᑯᑦ, ᐋᖅᑭᓯᒪᓂᐊᑎᒍᑦ ᐊᒻᒪ ᓴᖅᑭᐅᒪᑎᑕᐅᓂᖓᑎᒍᑦ ᐃᓕᓐᓂᐊᖅᑐᓕᕆᔾᔪᑕᐅᔪᑦ ᓄᓇᕗᒥ. ᑖᒃᑯᐊ ᓄᓇᕗᑦ ᒐᕙᒪᖏᑦ ᐃᓚᐅᑎᑦᓯᓐᖏᓗᐊᖅᓯᒪᔪᑦ ᓄᓇᕗᑦ ᑐᓐᖓᕕᒃ ᑎᒥᖓᓐᓂᒃ, ᑭᒡᒐᖅᑐᐃᔨᐅᑎᓪᓗᒋᒃ ᐃᓄᖕᓂᑦ, ᐱᕙᓪᓕᐊᑎᑕᐅᓂᖓᓄᑦ ᑖᒃᑯᐊ ᐋᖅᑭᒋᐊᕈᑕᐅᒐᓱᐊᖅᑐᑦ ᐃᓕᓐᓂᐊᖅᑐᓕᕆᓂᕐᒧᑦ ᐱᖁᔭᑦ, ᓴᖅᑭᑎᑕᐅᓪᓗᑎᒃ ᑖᓐᓇ ᐱᖁᔭᒃᓴᑦ 25 ᒪᓕᓐᖏᑦᑐᑦ ᓱᓕ ᐃᓄᐃᑦ ᑐᕌᒐᖏᓐᓂᒃ, ᑎᑭᒐᓱᐊᖅᑕᖏᓐᓂᓪᓗ.

-30-

ᑐᑭᓯᒋᐊᕈᑎᖃᒃᑲᓐᓂᕈᒪᒍᕕᑦ ᐅᖃᕐᕕᒋᓗᒋᑦ:
ᐸᕋᖕᑯ ᕗᓯᒦ
ᑐᑭᒧᐊᒃᑎᑦᑎᔨᐅᑲᐃᓐᓇᖅᑐᖅ ᑐᓴᖃᑦᑕᐅᑎᓕᕆᓂᕐᒧ

ᖃᔮᖅ ᐃᐅᔅᕘᑦ
ᐊᖓᔪᖅᑳᖓᑦ ᑐᓴᖃᑦᑕᐅᑎᓕᕆᓂᕐᒧᑦ ᐅᖃᐅᔾᔨᒋᐊᖅᑏᑦ
ᓄᓇᕗᑦ ᑐᓐᖓᕕᒃ ᑎᒥᖓᑦ ᐊᓪᓚᒡᕕᐊ ᐊᖓᔪᖅᑳᑉ ᑰᑦᑎᖅ

ᑐᓴᖅᓯᒪᔭᕗᑦ ᐅᓂᒃᑳᑦ:
https://www.tunngavik.com/wp-content/blogs.dir/1/files/2019/05/Tusaqsimajavut-English.pdf

(ᐃᓄᒃᑑᖅᑐᑦ – ᐃᓄᒃᑎᑑᖅᑐᒧᑦ ᐊᑕᓕᕈᒪᒍᕕᑦ NR: https://www.tunngavik.com/wp-content/blogs.dir/1/files/2019/05/Tusaqsimajavut-Inuktut.pdf )