(ᒪᐃ 10, 2023, ᐃᖃᓗᐃᑦ, ᓄᓇᕗᑦ) ᐋᖅᑭᒋᐊᒃᑲᐃᔨ ᐊᐃᕙᔾᔪᑎᓕᒃ ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᐊᒻᒪᓗ ᑲᓇᑕ ᒐᕙᒪᖓ (GoC) ᐊᒻᒪᓗ ᓄᓇᕗᑦ ᒐᕙᒪᖓ (GN) ᐊᑐᓕᖅᑎᑦᓯᓂᕐᒧᑦ ᐊᖏᕈᑕᐅᓯᒪᔪᓂᒃ ᓄᓇᕗᑦ ᐊᖏᕈᑎᓂᒃ ᑐᕌᖓᔪᓂᒃ ᐃᓘᓐᓈᒍᑦ ᐃᓄᓐᓂᒃ ᑭᒡᒐᖅᑐᐃᔨᖃᕆᐊᖃᕐᓂᕐᒧᑦ ᐃᖅᑲᓇᐃᔭᕐᕕᖕᓂ ᓇᓗᓇᐃᕈᑎᒥᒃ ᑐᙵᕕᒃᑯᑦ ᐊᖏᖃᑎᒋᔭᐅᓪᓗᑎᒃ.
ᐋᖅᑭᒋᐊᒃᑲᐃᔨᒃᑰᕐᓂᖅ ᑭᖑᓪᓕᐹᖅᓯᐅᑦ ᐱᓇᓱᐊᒐᐅᓂᖓ ᐊᐃᕙᔾᔪᑕᐅᒋᐊᓚᐅᖅᑐᒧᑦ ᑐᙵᕕᒃᑯᓐᓂᒃ 2018-ᒥ ᐃᓛᒃᑯᑦ 38 ᓄᓇᕗᑦ ᐊᖏᕈᑎᖏᓐᓂ.
ᐋᖅᑭᒋᐊᒃᑲᐃᔨ ᓇᓗᓇᐃᕆᓚᐅᖅᑐᖅ ᒫᓐᓇ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᓐᓄᑦ ᐸᕐᓇᐅᑎᑦ (IEP) ᐸᕐᓇᓯᒪᔭᖏᑦ GoC ᐊᒻᒪᓗ GN ᒪᓕᑦᓯᒪᙱᓐᓂᖏᓐᓂᒃ ᓄᓇᕗᑦ ᐊᖏᕈᑎᖏᓐᓂᒃ:
- ᑲᒪᓯᒪᙱᓐᓂᖏᓐᓄᑦ ᐊᑐᓂᑦ ᐱᓕᕆᕝᕕᖏᑦ ᐸᕐᓇᐅᓯᐅᖅᓯᒪᓗᑎᒃ ᐅᓄᖅᓯᒋᐊᕈᑎᒃᓴᓂᒃ ᐋᖅᑭᐅᒪᒍᑎᓂᓪᓗ ᐃᓄᐃᑦ ᐃᖅᑲᓇᐃᔭᖅᑎᑕᐅᒋᐊᖃᕐᓂᖏᓐᓄᑦ ᑭᒡᒐᖅᑐᐃᔾᔪᑎᒧᑦ ᑎᑭᐅᑎᓯᒪᓗᑎᒃ; ᐱᓗᐊᖅᑐᒥ, ᑖᒃᑯᐊ IEP ᑲᒪᓯᒪᙱᒻᒪᑕ ᐊᑯᓂᐅᔪᒧᑦ−ᐋᖅᑭᑦᓯᒪᔪᓂᒃ ᑐᕌᒐᕐᓂᒃ ᐸᕐᓇᐅᑎᓂᓪᓗ ᑲᔪᓯᑎᑦᓯᒍᑎᒃᓴᓂᒃ ᐋᖅᑭᐅᒪᒍᑎᒃᓴᓂᓪᓗ ᐃᓘᓐᓈᒍᑦ ᐃᓄᓐᓂᒃ−ᑭᒡᒐᖅᑐᐃᔨᖃᕆᐊᖃᖅᓯᒪᓂᕐᒧᑦ;
- ᑲᔪᓯᑎᑦᓯᓯᒪᙱᓂᕐᒧᑦ ᐅᓂᒃᑳᓕᐅᖃᑦᑕᕆᐊᖃᕐᓂᕐᒥᒃ ᑐᕌᒐᕐᓂᒃ ᐊᐅᓚᔾᔭᐃᓂᕐᒧᓪᓗ ᐸᕐᓇᐅᑎᓂᓪᓗ ᑲᔪᓯᑎᑦᓯᓂᕐᒧᑦ ᑕᒪᐃᓐᓂᒃ ᑭᒡᒐᖅᑐᐃᔨᖃᕆᐊᖃᕐᓂᕐᒧᑦ ᐃᓄᐃᑦ ᐃᖅᑲᓇᐃᔭᖅᑎᑕᐅᓗᑎᒃ ᐱᓕᕆᕕᓕᒫᓂ ᐊᒻᒪᓗ ᐃᖅᑲᓇᐃᔮᓄᑦ ᑲᑎᖅᓱᖅᑕᐅᓯᒪᓗᑎᒃ ᐊᑐᖅᑕᐅᓗᓂ ᐊᖏᕈᑕᐅᓯᒪᔪᑦ ᑲᓇᑕᒥ ᐃᖅᑲᓇᐃᔮᓄᑦ ᓇᓗᓇᐃᒃᑯᑕᑦ;
- GN−ᒨᖓᔪᓂᓕ, ᑲᔪᓯᑎᑦᓯᓂᖏᓐᖏᓐᓄᑦ ᐋᖅᑭᑦᓯᒪᓂᕆᒋᐊᓕᖏᓐᓂᒃ ᐃᖅᑲᓇᐃᔭᑲᐃᓐᓇᖅᑎᑕᐅᕙᑦᑐᓄᑦ ᖃᓄᐃᓕᖓᓂᖏᓐᓂᒃ; ᐊᒻᒪᓗ
- ᐋᖅᑭᑦᓱᐃᓯᒪᓂᖏᓐᓄᑦ ᐱᔭᕐᓃᓪᓕᐅᕈᑕᐅᓂᐊᖅᑐᓂᒃ ᓇᓗᓇᐃᕆᓂᕐᒥᒃ ᑎᑭᐅᑎᓯᒪᓂᖓᓂᒃ ᓇᐅᒃᑯᑦ, ᐊᒻᒪᓗ ᓇᓂ, ᐱᕙᓪᓕᐊᓂᖃᖅᓯᒪᒻᒪᖔᑕ ᑲᔪᓯᑎᑦᓯᓂᕐᒥᒃ ᑭᒡᒐᖅᑐᐃᔨᖃᕆᐊᖃᕐᓂᕐᒧᑦ.
ᑎᑭᐅᑎᓂᖓ ᐃᓱᒪᓕᐅᕈᑎᒥᓄᑦ, ᐋᖅᑭᒋᐊᒃᑲᐃᔨ ᓇᓗᓇᐃᓚᐅᖅᑕᖓ ᒪᕐᕉᒃ ᒐᕙᒫᒃ ᐊᑐᓕᖅᑎᑦᓯᓚᐅᖅᑑᒃ ᐊᐳᖅᓯᒪᕕᓕᖕᒥᒃ ᑐᑭᓕᐅᕈᑎᖃᖅᓱᑎᒃ ᐊᑐᖅᑕᐅᒋᐊᓕᖕᒥᒃ ᑕᕝᕙᓂ ᐅᖃᐅᓯᕐᒥᒃ ᓄᓇᕗᑦ ᐊᖏᕈᑎᖏᓐᓂ ᑐᙵᓇᖏᑦᑐᒥᒃ, ᐊᒻᒪᓗ ᐃᓱᒪᑦᓴᖅᓯᐅᕈᑎᑦᓴᐅᖏᑦᑐᒥᒃ ᐱᓪᓗᐊᑕᐅᔪᒥᒃ ᐃᓘᓈᓄᑦ ᐱᓇᓱᐊᕋᑦᓴᓕᐊᖑᓯᒪᔪᒥᒃ ᓄᓇᕗᑦ ᐊᖏᕈᑎᖏᓐᓂ, ᐃᓚᒋᔭᐅᓪᓗᑎᒃ ᐃᓄᐃᑦ ᑮᓇᐅᔭᑎᒍᑦ ᐊᑭᓕᖅᑕᐅᒋᐊᖃᕐᓂᖏᑦ ᐊᒻᒪᓗ ᑐᑭᖓᓂᒃ ᐃᓚᒋᔭᐅᓂᖅ ᒪᑭᒪᔾᔪᑎᒃᓴᓄᑦ, ᐊᒻᒪᓗ ᑲᔪᖏᖅᓴᐃᓂᕐᒥᒃ ᐃᓄᓐᓂᒃ ᓇᖕᒥᓂᖅ−ᒪᑭᒪᒍᑎᒃᓴᖏᓐᓂᒃ ᖃᓄᐃᙱᑦᓯᐊᕈᑎᒃᓴᖏᓐᓂᓪᓗ.
“ᑖᓐᓇ ᐃᓱᒪᓕᐅᕈᑎ ᓴᖑᑦᓯᒋᐊᕈᑎᖅ ᐃᓅᓯᖏᓐᓂᒃ ᓄᓇᕗᒻᒥ ᐃᓄᐃᑦ ᐊᒻᒪᓗ ᓯᕗᒧᐊᒃᑎᑦᑎᓂᕐᒥᒃ ᐃᓅᓯᑦᑎᓐᓄᑦ ᒪᑭᒪᔾᔪᑎᒃᓴᑎᓐᓄᓪᓗ ᓄᓇᕗᒻᒥ ᐊᒻᒪᓗ ᐃᖅᑲᐃᑎᑦᓯᒋᐊᕈᑕᐅᓪᓗᓂ ᒐᕙᒫᓐᓂᒃ ᒪᓕᒋᐊᖃᕐᓂᖏᓐᓂᒃ ᒪᓕᒐᖅᑎᒍᑦ ᐱᓇᓱᐊᕋᑦᓴᓕᐊᖑᓯᒪᔪᓂᒃ ᓄᓇᕗᑦ ᐊᖏᕈᑎᖏᑎᒍᑦ,” ᐅᖃᖅᑐᖅ ᐊᓗᑭ ᑰᑦᑎᖅ, ᐊᖓᔪᖅᑳᖓ ᑐᙵᕕᒃᑯᑦ.
ᐋᖅᑭᒋᐊᒃᑲᐃᔨᐅᑉ ᐃᓱᒪᓕᐅᕈᑎᖓ ᐃᓱᓕᒍᑕᐅᔪᖅ ᓯᕗᓪᓕᖅᐹᖅᓯᐅᑎᖓᓂᒃ ᑲᒪᒋᔭᐅᓂᖓᓂᒃ ᐋᖅᑭᒍᑎᒥᒃ ᐋᖅᑭᒋᐊᒃᑲᐃᔨᒃᑰᑎᑦᓯᒍᑕᐅᔪᒥᒃ ᑕᕝᕗᖓ ᐊᐃᕙᔾᔪᑕᐅᔪᒧᑦ ᐃᓛᒃᑯᑦ 38 ᓄᓇᕗᑦ ᐊᖏᕈᑎᖏᓐᓂ. ᑐᙵᕕᒃᑯᑦ ᐊᒻᒪᓗ ᒪᕐᕉᒃ ᒐᕙᒫᒃ ᒫᓐᓇ ᐱᕝᕕᒃᓴᖃᓕᖅᑑᒃ ᐃᓱᒪᒃᓴᖅᓯᐅᕈᑎᖃᕐᓗᑎᒃ ᐊᖏᖃᑎᒌᒍᓐᓇᕐᒪᖔᕐᒥᒃ ᐊᑐᖃᑎᒌᓐᓂᕐᒧᑦ ᐊᐅᓚᔾᔭᐃᕙᓪᓕᐊᓂᕐᒧᑦ ᑐᓴᐅᒪᑎᑕᐅᓂᕐᒥᒍᑦ ᐋᖅᑭᒋᐊᒃᑲᐃᔨᐅᑉ ᐃᓱᒪᒃᓴᖅᓯᐅᕈᑎᒋᓚᐅᖅᑕᖓᓂᒃ. ᐊᖏᖃᑎᒌᓐᓂᕐᒧᑦ ᑎᑭᐅᑎᒍᓐᓇᖏᑉᐸᑎᒃ, ᐊᓱᐃᓛᒃ ᒪᑐᐃᖓᓂᐊᖅᑐᖅ ᐋᖅᑭᒋᐊᒃᑲᐃᔨ ᓇᓗᓇᐃᕆᓗᓂ ᓈᖕᒪᑦᑐᒃᑯᑦ ᐋᖅᑮᓗᓂ ᑐᒡᓕᐊᓂ ᐊᒻᒪᓗ ᑭᖑᓪᓕᐹᖅᓯᐅᒥ ᑲᒪᒋᔭᐅᓂᖓᓂ ᐋᖅᑭᒋᐊᒃᑲᐃᔨᒃᑰᓂᕐᒥᒃ.
ᑐᒡᓕᐊᓂ ᑲᒪᒋᔭᐅᓂᖓᓂ, ᐋᖅᑭᒋᐊᒃᑲᐃᔨ ᓴᙱᓂᓕᒃ ᕿᒥᕐᕈᓂᕐᒥᒃ ᐊᔾᔨᒌᙱᑦᑐᓂᒃ ᐋᖅᑭᒍᑎᒃᓴᓂᒃ, ᐃᓚᒋᔭᐅᓗᓂ ᑮᓇᐅᔭᑎᒍᑦ ᓱᕋᑦᑕᐅᓯᒪᓂᕐᒧᑦ.
ᐊᑕᖏᖅᑐᖅ ᐋᖅᑭᒋᐊᒃᑲᐃᔨᒧᑦ ᐃᓱᒪᓕᐅᕈᑎ ᑕᑯᔭᐅᔪᓐᓇᖅᑐᖅ ᑐᙵᕕᒃᑯᑦ ᐃᑭᐊᖅᑭᕕᖓᓂ.
-30-
ᑐᑭᓯᒋᐊᒃᑲᓂᕐᕕᒃᓴᖅ:
ᑭᐊᕙᓐ ᑲᑉᓗᑦᓯᐊᖅ
ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᔨᒃᑯᓐᓂ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4941
