ᓄᓇᕗᑦ ᑐᓐᖓᕕᒃᑯᑦ ᐊᖏᔪᖅᑳᖓᑕ ᑐᒡᓕᐊ ᔭᐃᒥᓯ ᐃᑦᑐᓗᒃ ᐅᓪᓗᒥ ᐅᖃᖅᑲᐅᔪᖅ ᖃᓪᓗᓈᑦ ᖃᐅᔨᓴᖅᑎᕐᔪᐊᖏᑕ ᐅᖃᐅᓯᕆᔭᖓᓄᑦ ᓄᖅᑲᖓᑎᑦᓯᖁᔨᓪᓗᑎᒃ ᑮᓇᐅᔭᓕᐅᕋᓱᐊᕈᑎᒃᓴᓂᒃ ᐃᖃᓗᓕᕆᓂᒃᑯᑦ ᓯᓚᕐᔪᐊᒥ ᐃᒪᖏᓐᓂᒃ ᐅᑭᐅᖅᑕᖅᑐᖓᓅᖓᔪᓂᒃ ᐱᔪᒥᒋᔭᐅᒻᒪᕆᑦᑐᓂ ᒪᑭᒪᔾᔪᑎᒃᓴᖃᕐᕕᐅᕙᑦᑐᓂ ᑭᒡᓕᓕᐊᖑᓯᒪᔪᓂᒃ ᐅᑭᐅᖅᑕᖅᑐᒥ.
ᐅᖃᐅᓯᐅᔪᖅ ᓄᖅᑲᑎᑦᓯᖁᔨᔾᔪᑎᑦ ᑐᓂᔭᐅᓚᐅᖅᑐᖅ ᒥᐊᓕᒐᒃᑯᑦ PEW ᐊᕙᑎᓕᕆᔨᒃᑯᖏᓐᓂᒃ ᑲᑐᔾᔨᖃᑎᒌᑦᑐᓂᒃ ᐱᓇᓱᐊᕈᓯᑦᑎᓐᓂᒃ ᓯᓚᕐᔪᐊᖅ ᐅᑭᐅᖅᑕᖅᑐᖏᑕ ᐊᕐᕌᒍᐊᓄᑦ ᑲᑎᒪᓂᕐᔪᐊᒥ ᒪᓐᑐᕆᐊᓪᒥ. ᑲᑐᔾᔨᖃᑎᒌᑦᑐᑦ ᐅᖃᐅᓯᖃᓚᐅᖅᑐᑦ ᓄᖅᑲᑎᑦᓯᒍᒪᓂᕐᒥᒃ ᑮᓇᐅᔭᓕᐅᕋᓱᐊᕈᑎᒃᓴᓂᒃ ᐃᖃᓗᓕᕆᓂᒃᑯᑦ ᓯᓚᕐᔪᐊᒥ ᐃᒪᖏᓐᓂ ᓄᖅᑲᖓᖁᔨᓪᓗᑎᒃ ᖃᐅᔨᓴᖅᑕᐅᓚᐅᓐᖏᓐᓂᓕᒫᖏᓐᓂ ᐃᒪᖏᑦ ᓯᑰᖃᑦᑕᓚᐅᖅᑐᓂ ᐊᕐᕌᒍᓕᒫᒥ.
ᐃᑦᑐᓗᒃ ᐅᖃᖅᑲᐅᔪᖅ ᑐᓐᖓᕕᒃᑯᑦ ᐱᓕᕆᐊᖓ ᐊᒻᒪᓗ ᐱᓕᕆᐊᕇᓐᓇᓂᐊᖅᑕᖓ ᐱᓕᕆᖃᑎᖃᕐᓗᑎᒃ ᒐᕙᒪᓂᒃ ᐋᖅᑭᑦᓱᐃᓗᑎᒃ ᐱᓕᕆᔾᔪᑎᑦᓯᐊᕙᖕᓂᒃ ᐸᕐᓇᐅᑎᓂᒃ ᐊᒻᒪᓗ ᑐᑭᒧᐊᒍᑎᒃᓴᓂᒃ ᐋᖅᑭᐅᒪᑦᓯᐊᕈᑎᒃᓴᓂᒃ ᐃᖃᓗᒐᓱᓐᓂᕐᒧᑦ ᐊᒻᒪᓗ ᓂᕐᔪᑎᖏᓐᓄᑦ ᐅᑭᐅᖅᑕᖅᑐᒥ.
“ᑮᓇᐅᔭᓕᐅᕋᓱᐊᕈᑎᖃᕐᓂᖅ ᐃᖃᓗᓕᕆᓂᕐᒥᒃ ᐅᑭᐅᖅᑕᖅᑐᒥ, ᐃᓚᒋᔭᐅᓪᓗᑎᒃ ᓯᓚᕐᔪᐊᒥ ᐃᒪᖏᓐᓂ, ᑐᓐᖓᕕᖃᕆᐊᓕᒃ ᐋᖅᑭᐅᒪᑦᓯᐊᑎᑦᓯᒍᑎᓂᒃ, ᐅᖃᕐᕕᖃᕈᓐᓇᕐᓗᑎᒃ ᐊᐅᓚᑦᓯᖃᑎᒌᓐᓂᒃᑯᑦ ᐋᖅᑭᐅᒪᔭᐅᓗᓂ ᐱᓕᕆᖃᑕᐅᓗᑎᒃ ᓄᓇᖃᖅᑳᖅᓯᒪᔪᑦ ᐃᓄᖏᑦ, ᐊᒻᒪᓗ ᐃᓱᒪᒋᔭᐅᖔᕐᓗᑎᒃ ᐋᖅᑭᐅᒪᑦᓯᒍᑎᒃᓴᑦ ᐊᑐᖅᑕᐅᓗᑎᒃ ᓄᓇᖃᖅᑳᖅᓯᒪᔪᑦ ᐃᓄᖏᓐᓃᖔᖅᑐᑦ ᑕᒪᑦᓱᒧᖓ ᐊᒃᑐᐊᓂᓖᑦ ᐃᒪᖏᓐᓄᑦ ᐊᒻᒪᓗ ᓄᓇᖃᓪᓚᑖᖅᑐᓄᑦ ᑕᒫᓂ ᐅᑭᐅᖅᑕᖅᑐᒥ,” ᐅᖃᓚᐅᖅᑐᖅ ᐃᑦᑐᓗᒃ.
