(ᒫᑦᓯ 26, 2026 – ᓅᒃ, ᑲᓛᖡᑦ, ᓄᓈᑦ) ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᑲᑎᒪᓚᐅᖅᑐᑦ ᑲᒪᒋᔭᖃᖅᑐᑎᑦ ᒐᕙᒪᑐᖃᒃᑯᑦ ᖁᑭᐅᑎᓂᒃ ᐱᖁᔭᖓᓂᒃ ᐊᑦᑐᐃᓂᓖᑦ ᐊᖑᓇᓱᒍᓐᓇᓂᕐᒧᑦ ᐱᔪᓐᓇᐅᑎᖏᓐᓂᒃ ᐊᑐᐃᓐᓇᖁᓪᓗᒋᑦ ᐊᑦᑕᕐᓇᖅᑕᐃᓕᒪᖁᓪᓗᒋᓪᓗ ᓄᓇᒦᑦᑎᓪᓗᒋᑦ.
ᑲᑎᒪᔩᑦ ᐅᖃᐅᓯᖃᖅᑲᐅᕗᑦ ᐃᓄᐃᑦ ᐃᓱᒫᓘᑎᒥᓂᒃ ᐱᔾᔪᑎᖃᖅᑐᓂᒃ ᒫᓐᓇᒫᖑᔪᖅ ᒐᕙᒪᑐᖃᒃᑯᑦ ᖁᑭᐅᑎᖃᕆᐊᖃᙱᓐᓂᕐᒧᑦ ᐃᓚᖏᓐᓂᒃ ᐱᖁᔭᖅ, ᖃᐅᔨᒪᔭᐅᒻᒥᔪᖅ ᐱᖁᔭᒃᓴᖅ C-21, ᒪᓕᑦᑕᐅᔭᕆᐊᖃᓕᓚᐅᖅᓯᒪᔪᖅ ᑎᓰᕝᕙ 15, 2025, ᖁᑭᐅᑎᖃᕆᐊᖃᕈᓐᓃᖅᑎᑦᑎᓯᒪᔪᖅ ᐅᖓᑖᓃᑦᑐᓂᒃ 2,500 ᖁᑭᐅᑎᓂᒃ ᐊᒻᒪᓗ ᖃᓄᐃᑦᑑᓂᖏᓐᓂᒃ ᑕᐃᔭᐅᔪᑦ “ᐅᓇᑕᕈᑕᐅᓲᑦ” ᖁᑭᐅᑏᑦ. ᑲᑎᒪᔩᑦ ᐱᖁᔨᕗᖔᕈᑎᒥᒃ ᐊᖏᖅᓯᖅᑲᐅᔪᑦ ᑲᓇᑕᒥ ᒐᕙᒪᒃᑯᓐᓂ ᐊᑯᓂᐅᓂᖅᓴᐅᖁᔨᓪᓗᑎᑦ ᖁᑭᐅᑏᑦ ᐊᑐᖅᑕᐅᔭᕆᐊᖃᙱᑦᑐᑦ ᖁᔭᓈᖅᑕᐅᓯᒪᓂᖏᑦ ᓄᓇᕗᒻᒥ ᑕᓪᓕᒪᒃᑲᓐᓂᕐᓄᑦ ᐊᕐᕌᒍᓄᑦ ᐅᖓᑕᐅᔨᔭᐅᓗᓂ ᐋᖅᑭᒃᓯᒪᓂᖓᑕ ᐃᓱᓕᓐᓂᖓ ᐊᒃᑑᕝᕙ 30, 2026-ᒥ, ᐊᒻᒪᓗ ᑖᒃᑯᐊ ᓄᓇᖃᖅᑳᖅᓯᒪᔪᑦ ᒪᓕᙲᓐᓇᖁᔭᐅᓪᓗᑎᑦ ᐱᖁᔭᕐᒥᒃ ᐊᑐᕆᐊᖃᙱᓕᖅᑎᑕᐅᓯᒪᓂᖓᑕ ᐊᑯᓂᐅᓂᖓ ᐃᓄᐃᑦ ᐊᖑᓇᓱᒍᓐᓇᖁᓪᓗᒋᑦ ᐱᔪᓐᓇᐅᑎᒥᓂᒃ ᐊᑐᕐᓗᑎᑦ ᐊᒻᒪᓗ ᓴᐳᑎᓯᒪᔭᐅᖁᓪᓗᒋᑦ ᐃᓚᖏᑦ ᐊᑦᑕᓇᖅᑐᓄᑦ ᐆᒪᔪᕐᓄᑦ ᐊᑐᙲᓐᓇᖅᑕᐅᔪᓐᓇᕐᓂᖓ ᐊᑯᓂᐅᓂᖓᓂᑕ.
ᐱᖁᔨᕗᖔᕈᑎ ᐊᔭᐅᕆᒋᕗᖅ ᒐᕙᒪᐅᔪᒥᒃ ᖃᐅᔨᓴᖁᔭᐅᓪᓗᑎᑦ ᖃᐅᔨᔭᐅᓯᒪᔪᑦ−ᑐᙵᕕᒋᔭᐅᓗᑎᑦ ᐊᓯᖏᓐᓂᖔᖅ ᐊᑐᖅᑕᐅᔪᖃᖃᑦᑕᕐᓗᓂ ᓄᓇᕗᒻᒥ ᐃᓄᐃᑦ ᓴᐳᑎᓯᒪᖁᓪᓗᒋᑦ, ᓂᕆᑎᑕᐅᖃᑦᑕᖁᓪᓗᒋᑦ ᐃᓚᒌᑦ ᐊᒻᒪᓗ ᑲᓇᑕᒥ ᐱᖁᔭᕐᔪᐊᕐᒥ ᓴᐳᔾᔭᐅᓯᒪᔪᑦ ᐊᖑᓇᓱᐊᕐᓂᕐᒧᑦ ᐱᔪᓐᓇᐅᑎᒥᓂᒃ ᐊᑐᕈᓐᓇᕐᓗᑎᑦ. ᐱᒻᒪᕆᐅᒻᒪᑦ ᐅᖃᐅᓯᕆᓗᒍ ᐱᖁᔭᖅ ᒪᓕᑦᑕᐅᙲᓐᓇᕈᓐᓇᕐᓂᖓ ᑎᓕᓯᔾᔪᑏᑦ ᐊᑐᖅᑕᐅᖃᑦᑕᕐᓂᑰᒻᒪᑕ ᐊᒻᒪᓗ ᐅᖓᕙᕆᐊᖅᑕᐅᖃᑦᑕᕐᓂᑰᓪᓗᑎᑦ ᐅᐊᑦᑎᐊᕈ ᓴᐳᔾᔭᐅᖁᓪᓗᒋᑦ ᖁᑭᐅᑎᓖᑦ ᐱᖁᔭᕐᒥᒃ ᒪᓕᑦᑐᑎᑦ ᐱᓯᒪᑦᑎᓲᑦ ᓄᑖᕐᒥᒃ ᖁᑭᐅᑎᖃᕆᐊᖃᙱᒍᑎᓄᑦ ᒐᕙᒪᒃᑯᑦ ᐊᑐᕆᐊᓯᓚᐅᙱᓐᓂᖏᓐᓂᒃ ᓂᐅᕕᐊᕆᔭᐅᓗᑎᑦ ᖁᑭᐅᑏᑦ ᐊᑐᖃᑦᑕᖁᔭᐅᒍᓐᓂᕐᓂᖏᓐᓄᑦ ᐱᓕᕆᐊᖓᓂᒃ.
ᐃᑲᔪᖅᑐᓯᓐᓈᖅᑐᒋᑦ ᒐᕙᒪᑐᖃᒃᑯᑦ ᐱᓇᓱᐊᒐᖏᑦ ᑲᒪᒋᔭᖃᖅᑎᓪᓗᒋᑦ ᖁᑭᐅᑎᓂᒃ ᐊᑐᖅᑐᑎᑦ ᐱᕋᔭᖃᑦᑕᓲᑦ ᐊᒻᒪᓗ ᖁᑭᐅᑎᓂᒃ ᐊᑐᖅᑐᑎᑦ ᐋᓐᓂᖅᓯᓲᑦ, ᓄᓇᕗᑦ ᑐᙵᕕᒃ ᑎᒥᖓ ᐊᔭᐅᕇᓐᓇᐅᔭᖅᑐᑦ ᓱᑲᑦᑐᒥᒃ ᓴᒃᑯᓕᖅᓱᕋᒃᓴᑦ ᖁᑭᐅᑏᑦ ᐊᑐᖅᑕᐅᔭᕆᐊᖃᓪᓚᕿᒻᒪᑦ ᓄᓇᕗᒻᒥ ᐃᖅᓯᓇᖅᑐᓄᑦ ᐆᒪᔪᕐᓄᑦ ᓴᐳᑎᓯᒪᖁᓪᓗᒋᑦ (ᐆᑦᑑᑎᒋᓪᓗᒍ, ᓇᓄᐃᑦ, ᐊᖦᖤᐃᑦ), ᐊᖑᓇᓱᖁᓪᓗᒋᑦ ᓱᑲᑦᑐᒥᒃ ᓅᖃᑦᑕᓲᑦ ᓂᕐᔪᑎᓂᒃ (ᐆᑦᑑᑎᒋᓗᒋᑦ, ᐊᒪᕈᐃᑦ, ᓇᑦᑏᑦ), ᐊᒻᒪᓗ ᓂᕿᖃᑦᑎᐊᙱᓐᓂᐊᓘᕙᑦᑐᖅ ᑲᒪᒋᔭᐅᖁᓪᓗᒍ. ᑲᑎᒪᔩᑦ ᐅᖃᐅᓯᖃᓚᖅᑐᑦ ᐃᓱᒫᓘᑎᒻᒪᕆᒻᒥᒃ, ᐊᓯᔾᔨᖅᑕᐅᙱᓪᓗᑎᑦ, ᐃᓄᐃᑦ ᐱᕋᔭᐅᓂᕋᖅᑕᐅᓕᕈᓐᓇᖅᑐᑦ ᓂᕿᑖᕋᓱᐊᖅᑎᓪᓗᒋᑦ ᓂᕐᔪᑎᓂᒃ ᐊᒻᒪᓗ ᐊᓯᐅᔨᓗᑎᑦ ᖁᑭᐅᑎᖏᓐᓂᒃ ᓈᒻᒪᑦᑐᒃᑯᑦ ᐊᑭᓕᖅᓱᖅᑕᐅᙱᓪᓗᑎᑦ.
“ᒐᕙᒪᑐᖃᒃᑯᑦ ᖁᑭᐅᑎᓄᑦ ᐱᖁᔭᖓ ᐃᓱᒪᒃᓴᖅᓯᐅᕈᑎᖃᖅᓯᒪᔭᕆᐊᓖᑦ ᐃᓅᓯᕆᔭᖏᓐᓂᒃ ᐃᓄᐃᑦ ᓄᓇᕗᒻᒥ. ᐊᓯᔾᔨᖅᑕᐅᙱᒃᑯᓂ ᐱᖁᔭᒃᓴᖅ C-21, ᐃᓄᐃᑦ ᐅᓗᕆᐊᓇᖅᑐᒨᕈᓐᓇᖅᑐᑦ ᐱᕋᔭᓐᓂᕐᒧᑦ ᐃᖅᑲᖅᑐᕋᒃᓴᓕᐊᕆᔭᐅᓗᑎᑦ ᐊᑐᕋᓗᐊᖅᑎᓪᓗᒋᑦ ᐱᖁᔭᕐᔪᐊᕐᒥᒃ ᓴᐳᔾᔭᐅᓯᒪᔪᒥᒃ ᐊᖑᓇᓱᒍᓐᓇᐅᑎᓂ ᐱᔪᓐᓇᐅᑎᖏᓐᓂᒃ. ᓄᓇᕗᑦ ᑐᙵᕕᒃ ᑎᒥᖓ ᐊᑯᓂᐅᓂᖅᓴᐅᖁᔨᔪᑦ ᐱᖁᔭᖅ ᑕᒪᓐᓇ ᐊᑐᖅᑕᐅᙲᓐᓇᕐᓗᓂ ᖁᑭᐅᑎᓅᖓᔪᖅ, ᓄᓇᖃᖅᑳᖅᓯᒪᔪᑦ ᑖᔅᓱᒥᖓ ᒪᓕᙲᓐᓇᐃᓐᓇᕐᓗᑎᑦ ᐊᑐᕈᓐᓇᖁᓪᓗᒋᑦ ᖁᑭᐅᑏᑦ ᐊᑐᖃᑦᑕᖁᔭᐅᒍᓐᓃᖅᑐᑦ
ᐅᖓᕙᕆᐊᖅᑕᐅᓗᓂ ᒪᓕᙲᓐᓇᕈᓐᓇᕐᓂᖏᑦ ᐱᖁᔭᕐᒥᒃ, ᐊᒻᒪᓗ ᐋᖅᑭᒍᑎᓕᐅᕐᓗᑎᑦ ᓴᐳᔾᔨᔪᓂᒃ ᐃᓄᐃᑦ ᐱᔪᓐᓇᐅᑎᖏᓐᓂᒃ, ᓂᕿᖃᑦᑎᐊᕈᓐᓇᕐᓂᖏᓐᓂᒃ, ᐊᒻᒪᓗ ᐊᑦᑕᓇᖅᑐᒨᖅᑕᐃᓕᒪᔭᕆᐊᖃᕐᓂᖏᓐᓂᒃ,” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᐹᓪ ᐃᕐᖓᐅᑦ.
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒃᑲᐃᔪᓐᓇᖅᑐᑦ
ᕗᕉᑎ ᓚᕌᒃ
ᑐᑭᒧᐊᑦᑎᑦᑎᔨᐅᑲᐃᓐᓇᖅᑐᖅ ᑐᓴᐅᒪᔪᓕᕆᔨᒃᑯᓐᓄᑦ
ᓄᓇᕗᑦ ᑐᙵᕕᒃ ᑎᒥᖓ
