(March 26, 2026 – Nuuk, Akkukitok) Ukkua Katimayiit tatvani Nunavut Tunngavik Timingat (NTI-kut) katimayut ukkautigivlutjuk tahamna kavamatokatkut hikkuktitjutinik maligalioktat ikpigiyaoniakmat Inuinait angunahuaktioyonik piyunaotaitnik tatvalu kayangnaipkutigiyaitnik manikami.
Ukkua Kartimayiit ukkaotigiyait hapkua Inuit ihomalutigiyaitnik tahapkuninga nutanik kavamatokatkut hikkuktitjutinik, ilihimayaat una Maligaghak Bill C-21, atoktaoliktok December 15, 2025-mi, nutkaktitaoyot amigaitpiaktunik avatkumayunik 2,500-nik hannayaohimayunik tahapkuninga “anguyaotaokataktunik” hikkuktitjutinik. Ukkua Katimayiit angikhimayat una pigiaktitjutaohimayok toghiktotaoyok Kavamatokatkunik hivuvaktitkuvlutjuk una hikuktitjutinik maligaliokhimaliktatnik tahamani Nunavunmi nutkangallakuvlutjuk talimanik ukkiunik kanikuvlutjuk una kigligiyat October 30, 2026-mi, tatvalu huli atoghimaakuvlutjuk tahamna Nunakakaktunut angmaunayaoyok pitjutigivlugu hapkua Inuit atogiakakmatjuk tahamna angunahuaknikut piyunaotigiyatik happuniakhimalutjuklu katangutitik hikkuktitjutit maligatnit.
Una pigiaktitjutigiyat pikuvlutjuk ukkua kavamatokatkut naunaiyaitkuvlugit ahianik atogaghaitnik Nunavunmiut Inuit atoktakhaitnik munagitiakutighaitnik, nikkikhakhioknikut tatvalu atokhimaakuvlugit tahapkuninga maligakjuanik munagitjutinik angunahuaknikut piyunaotaitnik. Pimagiongmiyok tatva tahapkua Maligaoyut atoktaovakhimayot tatvalu kiglighait kangiktitaovakhutik kinguani munaginahuaghugit hapkua hikkuktitjutinik nanminikaktot laisikaktot pihimatjutighaitnik tahapkuninga atokuyaongitunik hikkuktitjutinik kihiani tahapkua kavamatokatkut angmakhitinagit tahapkuninga niovgutighamingnik tahapkuninga atokuyaongitunik hikuktitjutinik Inukniit.
Ikkayokhiotiyugaloit tahapkua kavamatokatkut atokuyaitnik malikanik pitailitjutaongmata hikkiktitjutinik ihuinakutaokataktonik, NTI-kut aghukutiginaktaat ikkayoktoivlutik tahapkuninga kilaminuak kaggikataktunik hikkuktitjutinik atoktaoyagiakakmagikmata tahamani Nunavunmi angunahuaktit happuniakutigingmatjuk tahapkuninga irhinaktunik angutighanik ( nannuitnik, aghaitnik), tatvalu angunahuakutaongmata tahapkuninga kayumiktunik angutighanik (ammakut, nattiit), tatvalu hapkua hikuktitjutit angunahuakutaovlutik kaaktailitjutaongmata. Ukkua Katimayiit ihomalotikakpiaktot, tatva tahamna maligak allanguktitaongitpat, Inuit hikkuktitjutikaktot angunahuakutimingnik hallaktaoyungnaktot appighuivikmit ihuinaakhimayugiyaolutik angunahuagaluaktitlugit aghaaktaolutiklu hikkuktitjutimingnik ikkayohiaktitaohimaitumik.
“Tahapkua kavamatokatkut hikuktitjutinik maligait pitkjutaoyagiakaktot ihomagitialugit aokataktaitnik hapkua Inuinait tahamani Nunavunmi. Allangungitpat una Maligaghak C-21, Inuit hallaktaoyungnaktot ihuinakutinik attutiagaluakhutik tahapkuninga maligakjuanik munagitjutaoyunik anguniaknikut piyunaotaitnik. NTI-kut toghiktotat una hivuvakuvlutjuk una hikuktitjutit maligaat atollikuyaoyok, huli tahapkuninga Nunakakaktot attoinaotighatinik tahapkuninga nutkaktitaoniaktot angiyut hikuktitjutit tahapkua hivuvaktaoniakata maligaoyut hikuktitjutinik, ihuaghakuvlugitlu tahapkua happuniakutighat Inuit piyunaotaitnik, nikkailiuktaititjutighanik, tatvalu kayangnaipkutinik,” ukallaktok una NTI-kut Angayokangat Paul Irngaut.
-30-
Pivalialikinikut Tohakvighat
Brodie Larocque
Hadjakaffuk Ataniolaktok Tohaktitilikiyiitkuni
Nunavut Tunngavik Timingat
