ᓴᒃᑯᑕᐅᑲᐅᑎᒋᔭᕆᐊᓕᒃ
(ᒫᑦᓯ 25, 2026 – ᓅᒃ, ᑲᓛᖡᑦ ᓄᓈᑦ) ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᑲᑎᒪᔪᑦ ᑕᒫᓂ ᐱᓇᓱᐊᕈᓯᑦᑎᓐᓂ ᓅᒃ, ᑲᓛᖡᑦ ᓄᓈᓐᓂ, ᓄᓇᕐᔪᐊᕐᒥ ᒐᕙᒪᐃᑦ ᐱᔪᒪᓂᖃᕐᓂᖅᓴᐅᔪᒪᓕᖅᑎᓪᓗᒋᑦ ᐅᖅᑰᓇᖅᓯᕙᓪᓕᐊᔪᒥᒃ ᐅᑭᐅᖅᑕᖅᑐᒥ.
“ᐱᒻᒪᕆᐅᕗᖅ ᐃᓄᐃᑦ ᑕᑯᒃᓴᐅᑎᑦᑏᓐᓇᕈᑎᒃ ᓴᙱᔪᒥᒃ ᐃᓕᒌᓐᓂᖏᓐᓂᒃ ᐃᓄᐃᑦ ᓄᓈᓐᓂ. ᐅᑭᐅᖅᑕᖅᑐᖅ ᓂᐅᕕᐊᒃᓴᐅᙱᒻᒪᑦ. ᐅᓯᑲᑦᑕᕐᕕᐅᙱᑦᑐᓂ, ᐅᔭᕋᓐᓂᐊᕐᕕᐅᙱᑦᑐᓂ, ᐅᕝᕙᓘᓐᓃᑦ ᐃᖃᓗᒐᓱᐊᕐᓂᕐᒧᑦ ᑰᑕᖃᕐᕕᐅᙱᑦᑐᓂ. ᐅᑭᐅᖅᑕᖅᑐᖅ ᐊᖏᕐᕋᕆᒐᑦᑎᒍᑦ ᐊᒻᒪᓗ ᐊᖏᕐᕋᕇᓐᓇᕐᓂᐊᖅᑐᑎᒍᑦ.” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ, ᐹᓪ ᐃᕐᖓᐅᑦ.
ᒪᓕᑦᑐᒋᑦ ᑐᓴᕆᐊᖅᑎᑕᐅᓯᒪᓂᖏᑦ ᓄᓇᕗᑦ ᑐᙵᕕᒃ ᑎᒥᖓᑕ ᑮᓇᐅᔭᓕᐅᕋᓱᐊᕐᓂᕐᒧᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᑕ ᐅᓂᒃᑳᖓ, ᑲᑎᒪᔩᑦ ᐊᒥᓱᓂᒃ ᑮᓇᐅᔭᓕᕆᓂᕐᒧᑦ ᐱᖁᔨᕗᖔᕈᑎᓕᐅᓚᐅᖅᑐᑦ.
ᑮᓇᐅᔭᓂᒃ ᐃᑲᔫᑎᓕᐅᓚᐅᕐᒥᔪᑦ $100,000 ᐊᖏᖅᑕᐅᓪᓗᓂ ᐋᖅᑭᒃᑕᐅᖁᓪᓗᒍ ᐃᒃᓯᕙᐅᑕᖓ ᐃᓄᐃᑦ ᓯᓚᕐᔪᐊᕐᒥᐅᑦ ᑲᑎᒪᔨᖏᑦ ᑲᓇᑕᒥ ᐃᓐᓄᒃᑕᐅᓯᒪᓛᖅᑐᓂ ᐃᓄᒻᒧᑦ ᑲᓇᑕᒥ ᑲᑎᒪᕕᔾᔪᐊᓚᐅᖅᑎᓪᓗᒋᑦ ᐃᖃᓗᓐᓂ ᔪᓚᐃᖑᔪᔪᒥ 2026.
“ᐃᒃᓯᕙᐅᑕᐅᑉ ᐊᓪᓚᕝᕕᖓ ᑲᓇᑕᒦᑎᑦᑐᒍᑦ ᑕᑯᒃᓴᐅᑎᑦᑎᕗᖅ ᐊᒃᓱᒻᒪᕆᐊᓗᒃ ᓯᕗᓕᖅᑎᐅᔪᓐᓇᕐᓂᖏᓐᓂᒃ ᑲᓇᑕᒥᐅᑦ ᐃᓄᐃᑦ ᐊᒃᓱᒻᒪᕆᐊᓗᒃ ᓄᓇᕐᔪᐊᕐᒥ ᐊᒻᒪᓗ ᐅᑭᐅᖅᑕᖅᑐᒥ ᐊᑐᐊᒐᖓ ᐊᓯᔾᔨᖅᐸᓪᓕᐊᓂᖏᓐᓂᒃ. ᐃᑲᔪᖅᑐᐃᓪᓗᑕ ᐊᓪᓚᕝᕕᒻᒥ ᓇᓕᒧᓐᓂᖃᖅᑐᖅ ᓄᓇᕗᑦ ᑐᙵᕕᒃ ᑎᒥᖓᑕ ᒐᕙᒪᐅᖃᑎᒌᑦᑐᓕᕆᓂᖓᓂᒃ, ᐊᔭᐅᕆᑎᓪᓗᒋᑦ, ᐊᒻᒪᓗ ᓄᓇᕐᔪᐊᕐᒥ ᓯᕗᓪᓕᐅᑎᑕᐅᔭᕆᐊᓖᑦ ᐃᓄᐃᑦ ᓇᒻᒥᓂᖅᓱᕈᒪᓂᖏᓐᓂᒃ ᐅᖃᐅᑕᐅᒃᑲᓐᓂᖅᑐᖅ ᐊᒻᒪᓗ ᓴᙵᑦᑎᕆᓪᓗᓂ ᓄᓇᕗᑦ ᑐᙵᕕᒃ ᑎᒥᖓ ᓄᓇᕐᔪᐊᑉ ᐅᑭᐅᖅᑕᖅᑐᖓᓄᑦ ᐃᓱᒪᓕᐅᕈᓐᓇᕐᓂᖏᓐᓂᒃ” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᑉ ᑐᖏᓕᐊ, ᐋᑕᒥ ᐃᑦᑐᐊᑦᓯᐊᖅ.
ᑲᑎᒪᔩᑦ ᐊᖏᖅᓯᓚᐅᖅᑐᑦ 20% ᐊᒥᓱᕈᕆᐊᖁᔭᐅᓂᖏᓐᓂᒃ ᓄᓇᕗᒻᒥ ᐊᓯᕙᖅᑏᑦ ᐃᑲᔪᖅᑐᖅᑕᐅᓂᖏᖕᓄᑦ ᐱᓕᕆᐊᖓᓄᑦ ᑲᑎᓕᒫᖅᑐᒋᑦ ᐃᒪᓐᓇᐅᓪᓗᑎᑦ $2,409,221. ᓄᓇᕗᒻᒥ ᐊᖑᓇᓱᒃᑏᑦ ᐃᑲᔫᑎᖏᑦ ᐱᓕᕆᐊᖅ ᐱᓕᕆᐊᖑᕗᖅ ᐋᖅᑭᒃᓱᖅᑕᐅᓯᒪᔪᖅ ᐃᑲᔪᖅᑐᖅᑕᐅᖁᓪᓗᒋᑦ ᐃᓄᐃᑦ ᓄᓇᕗᒻᒥ ᑮᓇᐅᔭᖅᑎᒍᑦ ᐃᑲᔫᓯᐊᖅᑖᖅᑎᑦᑐᒋᑦ ᐱᖅᑯᓯᑐᖃᖅᑎᒍᑦ ᐊᓯᕙᕐᓂᐅᕙᑦᑐᑦ. ᐃᑲᔪᖅᑐᖅ ᐊᔪᖅᓴᓗᐊᕐᔭᐃᑎᑦᑐᒋᑦ ᐊᒻᒪᓗ ᐸᐸᑦᑎᓪᓗᑎᑦ ᐃᓄᐃᑦ ᐃᓕᖅᑯᓯᖓᓂ ᑮᓇᐅᔭᖅᑎᒍᑦ ᐃᑲᔪᖅᑕᐅᓪᓗᑎᑦ ᓱᓇᒃᑯᑖᖃᖁᓪᓗᒋᑦ (ᒥᑭᔪᑦ ᐊᒻᒪᓗ ᐊᖏᔪᑦ), ᐊᑦᑕᕐᓇᖅᑕᐃᓕᒪᔾᔪᑎᑖᕐᓗᑎᑦ, ᐊᒻᒪᓗ ᓄᓇᓕᒻᒥᐅᓄᑦ ᐊᓯᕙᖅᑐᖃᖃᑦᑕᕐᓗᓂ ᐃᓄᓐᓄᑦ ᐊᑎᓕᐅᖅᑕᐅᖃᑕᐅᓯᒪᔪᓄᑦ ᓄᓇᕗᑦ ᐊᖏᕈᑎᖓᓄᑦ ᐊᒻᒪᓗ ᐊᐅᓚᑕᐅᔪᖅ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑎᒍᑦ ᑭᒡᒐᖅᑐᖅᑕᐅᓪᓗᑎᑦ ᓄᓇᕗᑦ ᑐᙵᕕᒃ ᑎᒥᖓ.
ᑭᖑᓪᓕᖅᐹᒥᒃ ᑲᑎᒪᔩᑦ ᐊᖏᖅᓯᓚᐅᖅᑐᑦ ᐊᒥᓲᓂᖅᓴᓄᑦ ᐊᑐᖅᑕᐅᔪᓐᓇᕐᓂᖓᓂᒃ ᐅᖅᑯᐃᔾᔭᐃᑦ ᐃᓐᓇᕐᓄᑦ ᐊᑭᓕᐅᑏᑦ ᐱᓕᕆᐊᖓ ᐃᓚᔭᐅᔪᓐᓇᖅᓯᓗᓂ ᑖᒃᑯᓂᖓᒃᑲᓐᓂᖅ 690−ᒃᑲᓐᓂᕐᓂᒃ ᐃᓄᓐᓂᒃ ᐃᓐᓇᒻᒪᕆᓐᓂᒃ ᐊᑎᓕᐅᖅᑕᐅᖃᑕᐅᓯᒪᔪᑦ ᑖᒃᑯᑎᒎᓇᖅ ᓄᓇᕗᑦ ᐊᖏᕈᑎᖓᑎᒍᑦ, ᐃᓅᓚᐅᖅᓯᒪᔪᑦ ᐊᑯᕐᖓᖏᓐᓂ 1 ᔮᓐᓄᐊᕆ 1959 ᐊᒻᒪᓗ 31 ᑎᓰᕝᕙ 1961, ᐱᒋᐊᕐᓗᒍ ᐄᐳᕈᓪ 1, 2026 ᐱᔪᓐᓇᖅᓯᖁᓪᓗᒋᑦ. ᐊᒻᒪᓗᒃᑲᓐᓂᖅ ᑕᖅᑭᑕᒫᑦ ᐃᑲᔫᑎᖏᑦ ᐊᒥᓱᕈᕆᐊᖅᑕᐅᓂᐊᖅᑐᑦ $250 ᑕᖅᑭᒧᑦ ᑕᖅᑭᑕᒫᑦ ᐃᑲᔫᑏᑦ ᐊᒥᓱᕈᕆᐊᖅᑐᑦ ᐃᓅᓂᕐᒧᑦ ᐊᑭᖏᑦ ᒪᓕᑦᑐᒋᑦ ᐃᑲᔫᑕᐅᓂᐊᖅᑐᑦ ᐊᕐᕌᒍᑕᒫᑦ.
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒃᑲᐃᔪᓐᓇᖅᑐᑦ
ᕗᕉᑎ ᓚᕌᒃ
ᑐᑭᒧᐊᑦᑎᑦᑎᔨᐅᑲᐃᓐᓇᖅᑐᖅ ᑐᓴᐅᒪᔪᓕᕆᔨᒃᑯᓐᓄᑦ
ᓄᓇᕗᑦ ᑐᙵᕕᒃ ᑎᒥᖓ
