(March 25, 2026 – Nuuk, Akkukitok) Ukkua Nunavut Tunngavik Timingat (NTI-kut) Katimayiit katimaniaktot tavani Nuuk, Akkukitumi, ublumiuliktitlugo tahapkua nunakjuat hilakjuami pikataoyomavalialiktitlugit tahamani unnakpalialiktitlugo Ukkiuktaktok.
”Pimagioyok tahamna ihomagilugo tamaita hapkua Inuit huli ilihimayagiakaktot hakkugiktumik happuniakatigigiakaktot ikkayoktigiklutik humilikak tahamani Inuit Nunaatni. Tahamna Ukkiuktaktok niovigaghaongitok. Tahapkua umitjat ingilgayagingitaat, uyagaghiokviongitok, uvalunin ikalukhiokviongitok. Tahamna Ukkiuktaktok pihimayavut pihimainakniaktavut angilgakvigigaptitku.” Ukallaktok una NTI-kut Angayokangat, Paul Irngaut.
Tohakvigilgaakhutjuk ukkua NTI-kut Maniliokutaitnik Ukkautyiyiovlutik Katimayigalaat Unipkagiyaitnik, ukkua Katimayiit pigiaktitihimayot kaffinik manilikitjutinik.
Una manighaghanik ikkayohiakutighanik $100,000 angiktaoyok ihuaghaotighanik Ighivaotaghamik tatvani Inuit Nunnaitni Katimayiit Kanatami innigiyaoniaktok Inuinakmit tahamani Kanatami Katimakjuakaaklutik Iqalungni July 2026-mi.
“Havakvikakluni una Ighivaotaoniaktok tahamani Kanatami piyunautauniaktok angiyomik Hivuliktionikmik uktutighamik Kanatamiutauluni Inuinak ublumiuliktitlugo aghugungnaktitlugo hilakjuami tatvalu Ukkiuktaktumi maligagiyait allangukpalialiktitlugit. Ikkayotigilugo una Havakviat nallaomatiaktok ukkua NTI-kut kavamalikinikut, ikkayoknikut tatvalu humilikak hilakjuamiut hivuliotiyomayaitnik tatva hakkugighivaligiakalikmata Inuit ataniktotait tatvalu hakkugighivaliklugit NTI-kut takkughaukatakningat tahamani Ukkiuktaktumi ihomaliokutaitnik” ukkalaktok una Hadjanuak Togligiyaolaktok Angayokamik, Adamie Itorcheak.
Ukkua Katimayiit angikhimayat una 20%-mik akkitokpaliutighat ukkua Nunavunmi Angunahuaktiit Ikkayohiakutaitnik Manighakvighait tamaat kititlugit $2,409,221. Una NHSP havagiyaoyol ikkayotaotkovlugo manighaitnik Inuknun Nunavumi angunahuakutaitnun. Ikkayotaoyok nikkailiokutaovluni tatvalu attokaohimakutaovluni Inuit illiitkuhiktotaitnik akkiliktotaovluni tammayaghaitnik angunahuakutinik (mikkiiyunik angiyuniklo), Kayangnaipkutighanik atoktaghaitnik, tatvalu nunaliitni angunahuakutighatinik Inuit attiliokataohimayot tatvani Nunavumi Angikutatni tatvalu munagiyaovlutik Aviktoghimayoni Inuit Katuyikatigit-kunit kivgaktokhutjuk ukkua NTI-kut.
Kingulikpaak ukkua Katimayiit angighimaliktat una angiklilakutighat tahaffuma Uqqujjait Innarnut innutkuakhiotait illaliotiniaktat huli 690-nik Inuit innikninguktunik attiliokataohimayonik tatvani Nunavunmi Angiktutatni, innuhimayut akungani January 1 1959-mi December 31 1961-mi, aolagutiluni April 1, 2026-mi. Tatvalu huli tatkikhiot nungutagangat akkitokpalikniaktok $250 ataohikmi tatkikhiotimi ikkayohiakutait hunavaluit niovikviitni akkitokpalianginaktitlugit aipagugaikpat (COLA) .
-30-
Pivalialikiyiit Tohakvighaat
Brodie Larocque
Hadjakaffuk Ataniolaktok Tohaktitilikiyiitkuni
Nunavut Tunngavik Timingat
