ᓴᒃᑯᑕᐅᑲᐅᑎᒋᔭᕆᐊᓕᒃ
(ᐋᒡᒌᓯ 28, 2025 – ᑭᙵᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓᑕ ᑲᑎᒪᔨᖏᑦ ᑲᑎᒪᓚᐅᖅᑐᑦ ᑭᙵᕐᓂ ᑕᒫᓂ ᐱᓇᓱᐊᕈᓯᕐᒥ, ᓯᕗᒧᐊᑦᑎᑦᓯᓪᓗᑎᑦ ᐊᒥᓱᓂᒃ ᐱᒻᒪᕆᓂᒃ ᑲᒪᒋᔭᕐᒥᓂᒃ, ᐊᖏᖅᑕᐅᓪᓗᓂᓗ ᓄᓇᕗᒻᒥ ᐃᓄᒻᒪᕇᑦ ᐃᒡᓗᖃᖅᑎᑕᐅᓂᖏᑦᑕ ᐊᑐᐊᒐᖓ, ᓴᓂᕐᕚᖑᓂᖏᑦ ᒐᕙᒪᑐᖃᒃᑯᓐᓂ ᓄᓇᖃᖅᑳᖅᓯᒪᔪᑦ ᐃᒡᓗᖃᖅᑎᑕᐅᓂᖏᖕᓄᑦ ᑮᓇᐅᔭᑦ, ᐊᒻᒪᓗ ᐋᖅᑭᒃᑕᐅᓂᖓᓂᒃ ᐃᓛᒃᑰᖓᔪᖅ ᖃᑭᒍᑎᒃᓴᓕᐅᙱᑦᑐᖅ ᐊᐅᓚᑦᑎᔾᔪᓯᖅ ᐋᖅᑭᒃᓯᒪᓂᖓᓄᑦ ᐊᖅᑯᓴᕆᐊᕐᒧᑦ.
ᑮᓇᐅᔭᖅᑎᒍᑦ ᐊᑐᖅᑕᒥᓂᐅᔪᓂᑦ ᓴᖅᑭᔮᑦᑎᑦᑎᑦᑎᐊᕐᔫᒥᓂᖅ
ᑲᑎᒪᔩᑦ ᕿᒥᕐᕈᓚᐅᕐᒥᔪᑦ ᐊᒻᒪᓗ ᑲᔪᓯᑎᑦᑎᓪᓗᑎᑦ 2024-2025−ᒧᑦ ᑕᒻᒪᖅᓯᒪᔪᕐᓂᐊᖅᑕᐅᓯᒪᔪᑦ ᑮᓇᐅᔭᑦ ᐅᓂᒃᑳᖏᓐᓂᒃ. ᓄᓇᕗᑦ ᑐᙵᕕᒃ ᑎᒥᖓ ᓴᓗᒪᔪᑯᓘᒻᒪᑕ ᑕᒻᒪᖅᓯᒪᔪᕐᓂᐊᖅᑕᐅᓪᓗᑎᑦ ᐃᓱᒪᓕᐅᕈᑕᐅᓚᐅᖅᑐᑦ ᑎᒥᖓᑕ ᐃᓗᐊᓂ ᐊᐅᓚᑦᑎᒍᑎᖏᑦ ᐃᓱᒫᓘᑕᐅᙱᑦᑐᑎᑦ. ᐃᓚᒋᔭᐅᔪᑦ ᓇᓗᓇᐃᖅᓯᓚᐅᖅᑐᑦ ᐃᓕᓴᖅᓯᓪᓗᑎᑦ 46%−ᓂᒃ ᐊᒥᓱᕈᕆᐊᖅᓯᒪᓕᕐᒪᑕ ᐱᓕᕆᐊᕐᓄᑦ ᑮᓇᐅᔭᑦ ᐊᑐᖅᑕᐅᔪᒥᓃᑦ, ᑮᓇᐅᔭᓂᑦ ᐊᑐᖅᑐᒻᒪᕆᐅᓯᒪᓪᓗᑎᑦ ᐃᓄᒃᑐᑦ ᐊᑐᖅᑕᐅᒃᑲᓐᓂᓕᕐᓂᖓᓄᑦ, ᓄᓇᓕᓐᓂ ᐱᖁᑎᕐᔪᐊᓄᑦ, ᐃᒡᓗᓕᐅᕐᓂᕐᒧᑦ, ᐃᓄᒻᒪᕇᑦ ᐋᓐᓂᐊᖅᑕᓕᒪᓂᖏᖕᓄᑦ ᖃᐅᔨᓵᕐᒧᑦ, ᓯᓚᑦᑐᖅᓴᕐᕕᒻᒥ ᐃᓕᓐᓂᐊᖅᑐᓄᑦ ᐃᑲᔫᑏᑦ, ᐳᕙᒡᓗᒃᑐᑦ ᐸᖅᑭᔭᐅᓂᖏᖕᓄᑦ, ᐊᒻᒪᓗ ᐃᒻᒥᓃᖅᑕᐃᓕᒪᑎᑦᑎᓂᕐᒧᑦ ᐱᓕᕆᐊᖃᕈᓘᔭᕈᑕᐅᔪᓄᑦ ᐊᑐᖅᑕᒥᓂᐅᓪᓗᑎᑦ ᑮᓇᐅᔭᑦ.
ᐊᕐᕌᒍᑕᒫᑦ ᑕᒪᒃᑯᐊ ᑮᓇᐅᔭᑦ ᑐᓂᐅᖅᑳᖑᓂᖏᑦ ᓄᓇᕗᒻᒥ ᐸᐸᑦᓯᔨᒃᑯᓐᓂ ᑎᑭᓯᒪᓕᖅᑐᑦ $92.9 ᒥᓕᐊᓐ ᑮᓇᐅᔭᑦ, ᒪᕐᕈᐊᖅᑎᒃᑲᓐᓂᒻᒪᕆᐅᓯᒪᓕᖅᑐᓂ ᐅᖓᑖᓄᑦ ᑕᐃᒃᑯᐊ $44.5 ᒥᓕᐊᓐ ᑮᓇᐅᔭᑦ ᐊᑐᖅᑕᐅᓚᐅᖅᓯᒪᓪᓗᑎᑦ ᐊᕐᕌᒎᓚᐅᖅᑐᒥ. ᑖᒃᑯᓇᓂ, $16.99 ᒥᓕᐊᓐ ᑮᓇᐅᔭᑦ ᓇᓗᓇᐃᖅᑕᐅᓯᒪᕗᑦ ᐊᑐᖅᑕᐅᓂᒃᓴᖏᖕᓂᒃ, ᑭᓯᐊᓂᓕ ᓱᓕ ᐱᔭᐅᓛᙳᐊᑐᐃᓐᓇᖅᑐᑎᑦ ᐱᔭᐅᓚᐅᙱᑦᑐᑦ. ᑲᑎᒪᔩᑦ ᐱᓚᐅᕐᒥᔪᑦ ᐅᑎᕐᕕᐅᔾᔪᑎᖏᖕᓂᒃ $56.4 ᒥᓕᐊᓐ ᑮᓇᐅᔭᑦ ᐋᔩᕋᕐᓂᕐᒧᑦ ᐊᑐᖅᑐᐊᕈᑏᑦ ᐊᒻᒪᓗ ᑐᓂᖁᔭᐅᓪᓗᑎᑦ ᑕᒪᒃᑯᐊ ᑮᓇᐅᔭᑦ ᓄᑖᖑᔪᒧᑦ ᐋᖅᑭᒃᑕᐅᕋᑖᖅᑐᖅ ᓄᓇᕗᒻᒥ ᐃᓄᒻᒪᕇᑦ ᐃᒡᓗᓕᐅᖅᑕᐅᓂᖏᖕᓄᑦ ᑮᓇᐅᔭᑦ ᖃᐅᔨᒪᓇᑦᑎᐊᖁᓪᓗᒍ ᐊᑯᓂᐅᔪᒧᑦ ᐊᑑᑕᐅᑦᑎᐊᕈᓐᓇᕐᓂᐊᕐᒪᑦ ᐃᓄᒻᒪᕆᖕᓄᑦ.
ᓄᓇᕗᒻᒥ ᐃᓄᒻᒪᕇᑦ ᐃᒡᓗᓕᐅᖅᑕᐅᓂᖏᖕᓄᑦ ᑮᓇᐅᔭᑦ
ᐋᖅᑭᒃᑕᐅᓚᐅᖅᑎᓪᓗᒍ ᓄᓇᕗᑦ ᐃᓄᒻᒪᕇᑦ ᐃᒡᓗᓕᐅᖅᑕᐅᓂᖏᑦᑕ ᑮᓇᐅᔭᖃᕐᕕᖓ ᔫᓂ 2024-ᒥ, ᑲᑎᒪᔩᑦ ᐊᑐᓕᓚᐅᖅᓯᒪᔪᑦ ᐊᑐᐊᒐᓕᐊᕆᔭᐅᒋᐊᙵᕈᑎᒥᒃ ᑐᑭᒧᐊᑦᑎᑕᐅᖁᓪᓗᒍ ᐊᑯᓂᐅᔪᒧᑦ ᐊᐅᓚᑎᑕᐅᓂᖓ. ᑮᓇᐅᔭᖃᕐᕕᒃ ᑮᓇᐅᔭᖃᖅᑎᑕᐅᒋᐊᙵᖅᑎᑕᐅᕗᖅ $135 ᒥᓕᐊᓐᓂᒃ ᑮᓇᐅᔭᓂᑦ, ᑲᑎᑕᐅᓪᓗᓂ $63 ᒥᓕᐊᓐ ᑮᓇᐅᔭᑦ ᐋᔩᕋᕐᓂᕐᒧᑦ ᐊᑐᖅᑐᐊᖅᑕᑦ ᐅᑎᕐᕕᐅᓂᖏᑦ ᐊᒻᒪᓗ ᕿᑐᕐᖏᐅᕈᑎᖏᑦ, ᖄᖓᒍᒃᑲᓐᓂᖅ $72 ᒥᓕᐊᓐ ᑮᓇᐅᔭᑦ, ᓄᓇᕗᑦ ᑐᙵᕕᒃ ᑎᒥᖓᑕ ᐱᓂᐊᖅᑕᖓ ᑮᓇᐅᔭᖅᑐᕈᑎᒃᓴᑦ 2022-ᒥ ᐃᓄᒻᒪᕇᑦ ᐃᒡᓗᖃᖅᑎᑕᐅᓂᖏᖕᓄᑦ ᑮᓇᐅᔭᖃᕐᕕᖓᓂ.
ᓄᓇᕗᑦ ᑐᙵᕕᒃ ᑎᒥᖓᑕ ᐃᓄᒻᒪᕇᑦ ᐃᒡᓗᖃᖅᑎᑕᐅᓂᖏᖕᓄᑦ ᑮᓇᐅᔭᑦ ᖃᓄᖅᑑᕈᑕᐅᓯᒪᕗᖅ ᐊᒻᒪᓗ ᐃᓱᒪᓕᐊᒥᓂᖅ ᐊᑐᖅᑕᐅᒍᓐᓇᖅᑐᓂ ᐋᖅᑭᒍᑎᒋᔭᐅᒐᔭᕐᓗᒍ ᑮᓇᐅᔭᖃᖅᑎᑕᐅᓂᖓᑕ ᐋᖅᑭᒍᑎᒋᔭᐅᓂᖓ ᐃᒡᓗᓕᐅᕐᓂᕐᒧᑦ ᓄᓇᕗᒻᒥ. ᖃᐅᔨᒪᓇᑦᑎᐊᖅᑎᑦᑎᒍᑕᐅᒐᓱᐊᖅᑐᖅ ᒪᑭᒪᔪᓐᓇᕐᓂᖏᑦ ᐊᒻᒪᓗ ᐊᑭᑐᓗᐊᕐᔭᐃᖅᓯᒪᓂᖏᑦ ᐸᕐᓇᒃᑕᐅᓯᒪᔪᑦ ᐃᒡᓗᓕᐅᖅᑕᐅᒐᔭᖅᑐᑦ ᐊᑭᑐᔪᒃᑯᑦ ᐊᐅᓚᑦᑎᒍᑎᓄᑦ ᐋᖅᑭᐅᒪᐃᓐᓇᕈᑎᓄᑦ ᐊᑭᖏᑦ ᐊᕐᕌᒍᑕᒫᑦ ᐃᑲᔫᓯᐊᖅᑖᖃᑦᑕᕋᔭᕐᓗᓂ ᑮᓇᐅᔭᖃᕐᕕᒻᒥ.
ᑮᓇᐅᔭᖃᕐᕕᒃ ᓄᑖᕐᒥᒃ ᐃᓄᒻᒪᕇᑦ ᐃᒡᓗᓕᕆᔭᐅᓂᖏᖕᓄᑦ ᑎᒥᖓ ᓄᑖᕐᒧᑦ ᐃᓱᒪᖅᓱᕈᓐᓇᕐᓂᖅᓴᐅᑎᑦᑎᒐᔭᖅᑐᑦ ᐋᖅᑮᓗᑎᑦ ᐊᑭᑐᓗᐊᙱᑦᑐᓂᑦ ᐃᒡᓗᒨᖅᓯᔾᔪᑏᑦ ᐊᑭᖏᓐᓂᒃ ᐃᒡᓗᓄᑦ ᓴᓇᔭᐅᓯᒪᔪᑦ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ ᐊᐅᓪᓛᕐᕕᐅᓗᑎᑦ ᑎᒥᒧᑦ.
ᑲᑎᒪᔩᑦ ᐊᑦᑏᓚᐅᖅᑐᑦ ᓄᑖᕐᒥᒃ ᑎᒥᐅᔪᒥᒃ ᐃᒡᓗᕗᑦ. ᐋᖅᑮᓪᓗᑎᑦ ᑮᓇᐅᔭᓂᒃ ᐊᒻᒪᓗ ᐃᒡᓗᓕᕆᓂᕐᒧᑦ ᑎᒥᐅᔪᒥᒃ ᒪᕐᕉᓐᓂᒃ ᑲᒪᒋᔭᖃᓗᐊᕐᓂᐊᕐᓂᕋᖅᑐᑎᑦ ᒪᓕᑦᑐᒍ ᐊᖏᕐᕋᑦᓴᓕᐅᓚᐅᖅᑕ. ᑐᙵᕕᒋᔭᐅᓪᓗᐊᕐᓂᖓ ᐃᒡᓗᕗᑦ ᐋᖅᑮᒐᔭᕐᓗᑎᑦ “ᑕᑎᒋᔭᐅᙱᓪᓗᒍ” ᐃᒡᓗᓕᕆᓂᕐᒨᖓᔪᓂᒃ, ᐃᓄᓐᓄᑦ ᐊᑐᖅᑕᐅᖃᑦᑕᕐᓗᓂ ᐊᒻᒪᓗ ᓴᓇᔭᐅᓯᒪᓗᓂ ᐃᓄᓐᓄᑦ, ᑐᕌᖓᓂᖃᙱᓪᓗᒍ ᐃᖅᑲᓇᐃᔭᕐᓂᕐᒧᑦ, ᑕᑎᖃᙱᓐᓂᖅᓴᐅᒍᑕᐅᓂᐊᕐᒪᑦ ᒐᕙᒪᑐᖃᒃᑯᑦ, ᓄᓇᕗᑦ ᐊᒻᒪᓗ ᐊᓯᖏᑦ ᐃᖅᑲᓇᐃᔭᖅᑏᑦ ᐃᒡᓗᖏᑦ ᐱᓕᕆᐊᕐᓄᑦ.
ᓄᓇᓕᐸᐅᔭᕐᓃᑦᑐᑦ, ᐅᖓᓯᑦᑐᒦᑦᑐᑦ ᐊᒻᒪᓗ ᐅᑭᐅᖅᑕᖅᑐᒦᑦᑐᓄᑦ ᑮᓇᐅᔭᖃᕐᕕᖓ
ᑲᑎᒪᔩᑦ ᐊᖏᖅᓯᓚᐅᖅᑐᑦ ᓴᓂᕐᕚᖑᓂᖏᑦ $98 ᒥᓕᐊᓐ ᑮᓇᐅᔭᑦ ᓄᓇᓕᐸᐅᔭᕐᒥ ᐅᖓᓯᑦᑐᒦᑦᑐᓪᓗ ᐅᑭᐅᖅᑕᖅᑐᒥᓗ ᑮᓇᐅᔭᑦ ᓄᓇᕗᑦ ᑐᙵᕕᒃ ᑎᒥᖓᓄᑦ ᐃᑲᔪᖅᑐᐃᔾᔪᑎᓂᒃ ᐃᒡᓗᓕᐅᖁᓪᓗᒋᑦ. ᓯᕗᓪᓕᐅᔾᔭᐅᖁᔭᐅᓚᐅᖅᑐᑦ ᐊᑦᑕᕐᓇᙱᑦᑐᓂᒃ ᐃᒡᓗᖃᖅᑎᑕᐅᓂᖏᑦ ᐊᕐᓇᐃᑦ ᓄᑕᖅᑲᓪᓗ ᕿᒫᔪᑦ ᐋᓐᓂᖅᑎᖅᑕᐅᑎᓪᓗᒋᑦ, ᐃᓐᓇᒻᒪᕇᑦ ᒪᒃᑯᑦᑐᓪᓗ ᐊᒃᓱᕈᕐᓇᖅᑐᒃᑰᓗᐊᖅᑎᓪᓗᒋᑦ. ᓄᓇᕗᑦ ᑐᙵᕕᒃ ᑎᒥᖓ ᐃᖅᑲᓇᐃᔭᖃᑎᖃᐃᓐᓇᕐᓂᐊᖅᑐᑦ ᓄᓇᕗᑦ ᒐᕙᒪᖏᖕᓂ ᐊᒻᒪᓗ ᑲᓇᑕᑉ ᒐᕙᒪᖏᖕᓂ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᑦ ᑲᑎᒪᕕᖓᓂ ᑲᒪᒋᔭᖃᖁᓪᓗᒋᑦ ᐊᖏᕐᕋᖃᙱᓐᓂᐅᕙᑦᑐᒥ ᐊᒻᒪᓗ ᓄᓇᕗᒻᒥ ᐱᓕᕆᖃᑎᒌᑦᑐᑦ ᑲᑎᒪᔨᕋᓛᖏᑦ ᐃᒡᓗᓕᕆᓂᕐᒧᑦ ᐅᐸᓗᖓᐃᔭᐃᓂᐊᕐᒪᑕ ᐊᑐᓕᖅᑎᑕᐅᓂᐅᔭᕆᐊᓕᓐᓂᒃ.
ᐊᖏᕐᕋᖅᑖᕐᓂᖅ ᑮᓇᐅᔭᖃᕐᕕᖓ
ᑲᑎᒪᔩᑦ ᑮᓇᐅᔭᓂᒃ ᐊᑐᕐᓗᓂ ᐸᕐᓇᐅᑎᒥᒃ ᐊᖏᖅᓯᓚᐅᖅᑐᑦ ᐃᒪᓐᓇᓂᑦ $17 ᒥᓕᐊᓐ ᑮᓇᐅᔭᑦ ᒐᕙᒪᑐᖃᒃᑯᑦ ᐊᖏᕐᕋᕐᓂᖅ ᑮᓇᐅᔭᑦ ᑎᓴᒪᑦ ᐊᕐᕌᒎᓂᐊᖅᑐᓂᑦ. ᓴᙵᑎᑦᑎᓂᐊᖅᑐᖅ ᓄᓇᕗᑦ ᑐᙵᕕᒃ ᑎᒥᖓᓂᒃ ᐊᒻᒪᓗ ᐊᕕᑦᑐᖅᓯᒪᔪᑦ ᐃᓄᐃᑦ ᑲᑐᔾᔨᖃᑎᒌᖏᖕᓂᒃ ᒪᑭᒪᓗᑎᑦ ᐃᓚᐅᖃᑕᐅᖃᑦᑕᕐᓂᐊᕐᒪᑕ ᐱᖓᓱᑦ ᒐᕙᒪᐃᑦ ᑲᑐᔾᔨᖃᑎᖐᓪᓗ ᑲᑎᒪᕕᖓᓂ ᑲᒪᒋᔭᖃᕐᓗᑎᑦ ᐊᖏᕐᕋᖃᙱᓐᓂᕐᒥᒃ, ᐃᑲᔪᖅᑐᐃᓗᑎᑦ ᓄᓇᓕᐸᐅᔭᕐᒥᐅᑦ ᓄᐃᒻᒪᕆᖏᑦᑕ ᑲᑐᔾᔨᖃᑎᒌᖏᖕᓂᒃ ᐱᔨᑦᑎᖅᑐᑦ ᐃᓄᒻᒪᕆᖕᓂᒃ ᐊᖏᕐᕋᖃᙱᑦᑎᓪᓗᒋᑦ ᑲᓇᑕᑉ ᓂᒋᐊᑕ ᓄᓇᓕᐸᐅᔭᖏᓐᓂᒃ ᐊᒻᒪᓗ ᓇᓕᒧᓕᖅᑎᑦᑎᓗᑎᑦ ᑮᓇᐅᔭᓂᒃ ᓄᓇᕗᑦ ᒐᕙᒪᖏᑕ ᐃᓄᓕᕆᔨᒃᑯᖏᑦ ᑲᒪᒋᔭᐅᖁᓪᓗᒍ ᐊᖏᕐᕋᖃᙱᓐᓂᖅ ᓄᓇᕗᒻᒥ.
ᐊᖅᑯᓴᕆᐊᖅ ᒪᒥᓴᕐᕕᒃ
ᑲᑎᒪᔩᑦ ᐊᖏᖅᓯᓚᐅᕐᒥᔪᑦ ᐋᖅᑭᒃᑕᐅᓂᖓᓂᒃ ᐊᖅᑯᓴᕆᐊᖅ, ᓄᑖᖅ ᐃᓛᒃᑰᖓᔪᖅ, ᖃᑭᒍᑎᒃᓴᓕᐅᙱᑦᑐᖅ ᑎᒥᐅᔪᖅ ᓄᓇᕗᑦ ᑐᙵᕕᒃ ᑎᒥᖓ ᑖᒃᑯᑑᓗᓂ ᐃᓚᒋᔭᐅᒐᔭᖅᑐᓂ. ᑕᒪᓐᓇ ᐃᓱᒪᓕᐅᕈᑕᐅᓂᖓ ᒪᓕᑦᑐᖅ ᓄᓇᕗᑦ ᒐᕙᒪᖏᑦᑕ 2023-ᒥ ᐊᖏᖅᓯᔪᒥᓂᐅᓂᖓᓂᒃ ᐊᒻᒪᓗ 2025-ᒥ ᐃᑲᔪᖅᑐᐃᓂᖃᕐᓂᕆᔭᖓᓂᒃ ᓄᓇᕗᑦ ᑐᙵᕕᒃ ᑎᒥᖓᓄᑦ ᐊᑎᓕᐅᖅᑕᐅᓕᕐᓗᓂ ᑲᑐᔾᔨᖃᑎᒌᖑᔪᖅ. ᐋᖅᑭᒃᑕᐅᓂᖓ ᐊᖅᑯᓴᕆᐊᖅ ᐊᑯᓂᐅᔪᒧᑦ ᑲᒪᒋᔭᖃᕈᑕᐅᓂᐊᕐᓂᕋᖅᓯᒪᓂᖓᓂᒃ ᐊᐅᓚᑦᑎᓗᑎᑦ ᐃᓄᒻᒪᕆᖕᓄᑦ−ᓯᕗᒃᑲᖅᑖᖑᔪᖅ ᐋᙵᔮᕐᓇᖅᑐᓂᒃ ᐊᔪᕈᑎᓕᓐᓄᑦ ᐸᓂᖅᓰᕕᒃ ᐊᒻᒪᓗ ᐋᓐᓂᓗᐊᖅᓯᒪᔪᑦ ᒪᒥᓴᕐᓂᖏᑦ ᑐᙵᕕᖃᕋᔭᖅᑐᑎᑦ ᐃᓕᖅᑯᓯᕐᒥᒃ ᐊᒻᒪᓗ ᐃᓄᒃᑑᕐᓂᕐᒥᒃ.
ᐊᐅᓚᑦᑎᒍᓯᐅᖁᔭᐅᔪᖅ ᐋᖅᑭᒃᓯᒪᓂᖓ ᐃᓛᒃᑰᖓᔫᓂᖅᑐᓂ ᑲᑎᒪᔨᐅᔪᑦ, ᖃᐅᔨᒪᑦᑎᐊᕈᑕᐅᓂᐊᕐᒪᑦ ᑭᒃᑯᓕᒫᑦ ᑭᒡᒐᖅᑐᖅᑕᐅᓂᐊᕐᓂᖏᓐᓂᒃ ᐊᒻᒪᓗ ᓇᓕᒧᓐᓂᖃᕐᓗᑎᑦ ᐱᐅᓛᒃᑯᑦ ᐃᓕᖅᑯᓯᕆᔭᐅᓲᑦ ᐊᑐᖅᑕᐅᓂᐊᖅᑐᑎᑦ ᑕᐃᑲᓃᑦᑐᑦ 2025 ᑐᑭᓯᐅᒪᓂᖅ ᐊᐅᓚᑦᑎᓂᕐᒥᒃ ᐊᖅᑯᓴᕆᐊᕐᒧᑦ ᑐᓴᕆᐊᕐᕕᖃᕐᓂᕐᒧᑦ ᐅᓂᒃᑳᕐᒥ.
ᑲᓇᑕᒥ ᐃᓕᓐᓂᐊᕐᕖᑦ ᓂᕿᖃᖅᑎᑕᐅᓂᖏᓐᓄᑦ ᐱᓕᕆᐊᖅ ᑮᓇᐅᔭᖃᖅᑎᑕᐅᓂᖏᑦ
ᑲᑎᒪᔩᑦ ᐊᖏᖅᓯᓚᐅᕐᒥᔪᑦ ᓴᓂᕐᕙᐃᖁᔭᐅᓂᖏᓐᓂᒃ $5.9 ᒥᓕᐊᓐᓂᒃ ᑮᓇᐅᔭᓂᒃ ᐃᓕᓐᓂᐊᕐᕕᒻᒥ ᓂᕿᖃᖅᑎᑦᑎᓂᕐᒧᑦ ᐱᓕᕆᐊᖅ ᑮᓇᐅᔭᖃᕐᕕᖓ ᑮᓇᐅᔭᓕᕆᓐᓇᑉ ᐊᕐᕌᒍᖏᓐᓄᑦ 2024-2026 ᖃᐅᔨᒪᓇᑦᑎᐊᖁᓪᓗᒋᑦ ᐃᓕᓐᓂᐊᕐᕖᑦ ᓄᓇᕗᓕᒫᕐᒥ ᐊᐅᓚᑦᑏᓐᓇᕈᓐᓇᕐᓂᐊᕐᒪᑕ ᓂᕿᖃᖅᑎᑦᑎᓂᕐᒧᑦ ᐱᓕᕆᐊᕐᒥᓂᒃ ᐊᕐᕌᒍᓂᐊᖅᑐᒥ.
ᑭᙵᕐᓃᑦᑎᓪᓗᒋᑦ, ᓄᓇᕗᑦ ᑐᙵᕕᒃ ᑎᒥᖓ ᐱᓕᕆᖃᑎᖃᓚᐅᖅᑐᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᖕᓂᒃ ᓄᓇᓕᒻᒥᐅᑦ ᓇᓪᓕᐅᓐᓂᖅᓯᐅᖃᑎᒋᔭᐅᓪᓗᑎᑦ ᐊᒻᒪᓗ ᓂᕆᕕᔾᔪᐊᖅᑎᑦᑎᓪᓗᑎᑦ ᓇᓪᓕᐅᓐᓂᖅᓯᐅᕈᑕᐅᓪᓗᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ 50−ᖓᖕᓂ ᓇᓪᓕᐅᑎᑎᓪᓗᒋᑦ. ᐃᒪᓐᓇᐸᓗᑦ 300 ᐃᓄᐃᑦ ᑲᑎᓚᐅᖅᑐᑦ ᐲᑕ ᐱᑦᓯᐅᓛᖅ ᐱᙳᐊᕐᕕᖓᓂ ᓂᕆᖃᑎᒌᑦᑐᑎᑦ ᐃᓄᐃᑦ ᓂᕿᖏᓐᓂᒃ, ᓂᔾᔭᐅᓯᔭᖅᑐᖃᖅᑐᓂ, ᐱᙳᐊᖅᑐᑎᑦ/ᐱᓂᑭᓴᐅᑎᓪᓗᑎᑦ ᐊᒻᒪᓗ ᐃᓄᒃᑎᑐᑦ ᓱᓗᕕᑦᑐᑎᑦ. ᓄᓇᕗᑦ ᑐᙵᕕᒃ ᑎᒥᖓ ᖁᕕᐊᓲᑎᓖᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᖕᓂ ᑖᔅᓱᒥᖓ ᐱᕚᓪᓕᖅᓯᒪᔭᑯᓗᐊᓂᒃ ᓇᓪᓕᐅᓐᓂᖅᓯᐅᕐᓂᖃᖅᑎᓪᓗᒋᑦ, ᐊᒻᒪᓗ ᖁᔭᓐᓇᒦᖅᑐᑎᑦ ᑭᙵᕐᒥᐅᓂᑦ ᑐᙵᓱᐊᑎᑦᑎᑦᑎᐊᖃᑦᑕᓚᐅᕐᓂᖏᖕᓄᑦ.
-30-
ᐱᕙᓪᓕᐊᔪᓕᕆᔨᓄᑦ ᖃᐅᔨᒃᑲᕋᒃᓴᖅ:
ᐃᕙᓗᐊᕐᔪᒃ ᒥᐅᕆᑦ
ᑐᑭᒧᐊᑦᑎᑦᑎᔨ ᑐᓴᐅᒪᔪᓕᕆᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
