(ᒪᑦᓯ 31, 2021 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃᑯᑦ (ᑐᙵᕕᒃ) ᐊᖓᔪᖅᑳᖓᑦ ᐊᓗᑭ ᑰᑦᑎᖅ ᖁᕕᐊᓱᒃᐳᖅ ᐊᐃᒃᐹᒍᑦ ᓄᓇᕗᑦ ᒐᕙᒪᒃᑯᖏᑦ ᐃᖅᑲᓇᐃᔭᕐᑎᓂᒃ ᖃᐅᔨᓴᕈᑎᖃᓐᓂᖏᓐᓄᒃ ᑕᒪᐃᓐᓂ ᓄᓇᕗᑦ ᒐᕙᒪᒃᑯᖏᓐᓂ ᐊᒻᒪ ᑲᓇᑕᐅᑉ ᒐᕙᒪᒃᑯᖏᑦ ᓄᓇᕗᖕᒥ.
ᓄᓇᕗᑦ ᒐᕙᒪᒃᑯᖏᑦ ᐃᖅᑲᓇᐃᔭᕐᑎᓂᒃ ᖃᐅᔨᓴᕈᑎᖃᕈᒪᓯᒪᓂᖏᑦ ᐅᑯᓇᖔᖅᑐᑦ ᐋᖅᑭᖃᑎᒌᒍᑕᐅᓯᒪᔪᓂᒃ 2015-ᒥ ᐃᖅᑲᖅᑐᐃᕕᒃᑰᑎᑦᑎᒍᑕᐅᓯᒪᔪᓂᒃ ᒐᕙᒪᑐᖃᒃᑯᓐᓂᒃ ᑲᒪᒋᔭᕆᐊᓕᖕᒥᓂᒃ ᑲᒪᓯᒪᙱᓐᓂᖏᓐᓄᑦ ᓄᓇᕗᑦ ᐊᖏᕈᑎᖏᓐᓂᒃ. ᖃᐅᔨᓴᕈᑕᐅᓯᒪᔪᑦ ᓄᓇᕗᑦ ᒐᕙᒪᒃᑯᖏᑕ ᐃᖅᑲᓇᐃᔭᕐᑎᓂᒃ ᖃᐅᔨᓴᕈᑎᖃᓐᓂᖏᑦ ᐊᑑᑎᖃᑦᑎᑕᐅᓂᐊᕐᑐᑦ ᒐᕙᒪᒃᑯᓐᓂᑦ ᐊᒻᒪ ᐃᓄᐃᑦ ᑎᒥᖁᑎᖏᓐᓂᒃ ᐅᓄᕐᓯᒋᐊᕐᑎᑕᐅᖁᓪᓗᒋᑦ ᐃᓄᐃᑦ ᐃᖅᑲᓇᐃᔭᕐᑐᑦ ᒐᕙᒪᒃᑯᓐᓂ ᓈᓚᐅᖅᑯᑦᑎᓂᕐᓴᐅᒋᐊᕐᑐᓂᒃ ᓄᓇᕗᖕᒥ ᐃᓄᐃᑦ ᐃᓄᒋᐊᓐᓂᕐᓴᐅᓂᖏᑦ ᒪᓕᓪᓗᒋᑦ, ᑕᐃᒪᓐᓇ ᐱᖁᔭᐅᓯᒪᖕᒪᑕ ᐃᓛᒃᑯᑦ 23-ᒥ ᓄᓇᕗᑦ ᐊᖏᕈᑎᖏᓐᓂ.
“ᓄᓇᕗᑦ ᒐᕙᒪᒃᑯᖏᑦ ᐃᖅᑲᓇᐃᔭᕐᑎᓂᒃ ᖃᐅᔨᓴᕈᑎᖃᓐᓂᖏᑦ ᐃᒃᐱᒋᔭᖃᓗᐊᕐᐳᑦ ᐱᔪᒥᒋᓗᐊᕐᑕᑎᓐᓂᒃ ᐃᖅᑲᓇᐃᔭᕐᕕᐅᓪᓗᑕ − ᐃᓕᓐᓂᐊᕐᓂᓕᕆᓂᖅ, ᐱᓕᒻᒪᒃᓴᐃᓂ, ᐱᔭᕐᓂᙱᒍᑕᐅᕙᒃᑐᑦ, ᐃᓄᐃᑦ ᐃᖅᑲᓇᐃᔭᕐᑎᑕᐅᓂᒃᓴᖏᓐᓄᑦ ᐸᕐᓇᒍᑎᑦ, ᐅᖃᐅᓯᓕᕆᓂᖅ ᐊᒻᒪ ᐃᓄᐃᑦ ᐃᓕᖅᑯᑎᖏᑦ, ᐃᖅᑲᓇᐃᔭᕐᑎᑖᕐᓂᕐᒧᑦ ᑲᒪᔾᔪᑕᐅᓲᓄᑦ ᐊᒻᒪ ᐃᑲᔪᕐᓯᒍᑎᐅᓲᑦ. ᓈᓴᐃᒍᑕᐅᓯᒪᔪᑦ ᓄᐊᑕᐅᔪᑦ ᑕᕝᕘᓇ ᖃᐅᔨᓴᕐᓂᒃᑯᑦ ᐱᓯᒪᔭᐅᔭᕆᐊᖃᓐᓂᐊᕐᑐᑦ ᐃᓄᐃᑦ ᐃᖅᑲᓇᐃᔭᕐᑎᑕᐅᔪᑦ ᐅᓄᕐᓂᖏᑦ ᒪᓕᓐᓂᖃᑦᑎᐊᖁᓪᓗᒋᑦ ᐃᓄᐃᑦ ᐃᓄᒋᐊᓐᓂᕐᓴᐅᓂᖏᓐᓄᑦ. ᖃᐅᔨᒪᒐᑦᑕ ᐃᓄᐃᑦ ᐱᔨᑦᑎᕐᑕᐅᑎᓪᓗᒋᑦ ᐊᒻᒪ ᑭᒡᒐᑐᖅᑕᐅᑎᓪᓗᒋᑦ ᐃᓅᖃᑎᒥᓄᒃ ᐱᐅᓂᕐᓴᒃᑯᑦ ᑲᒪᒋᔭᐅᔾᔪᑎᖃᕐᐸᖕᒪᑕ ᐊᒻᒪ ᐱᔨᑦᑎᕐᑕᐅᒍᑎᖏᑦ ᑕᑯᔭᕗᑦ ᐱᐅᓂᕐᓴᒻᒪᕆᐅᕙᖕᒪᑕ.”. ᐅᖃᖅᑐᖅ ᑰᑦᑎᖅ.
ᑖᒃᑯᐊ ᖃᐅᔨᓴᕈᑏᑦ ᑭᒃᑯᖕᒪᖔᑖ ᖃᐅᔨᒪᔭᐅᓇᑎᒃ ᖃᐅᔨᓴᕈᑕᐅᓛᕐᑐᖅ ᐃᐱᕆ 6-ᒥᑦ ᔫᓂ 1, 2021-ᒧᑦ. ᑕᒪᐃᑕ ᒐᕙᒪᒃᑯᓐᓄᑦ ᐃᖅᑲᓇᐃᔭᕐᑏᑦ ᑎᓕᐅᕐᑕᐅᕗᑦ ᐱᖃᑕᐅᖁᔭᐅᓪᓗᑎᐅᒃ ᖃᐅᔨᓴᕐᑕᐅᒍᑎᑎᒍᑦ ᐃᖅᑲᓇᐃᔭᕐᓇᐃᑦ ᐃᖃᕐᕋᑦ ᐊᑐᕐᓗᒋᑦ.
ᖃᐅᔨᓴᕈᑎᓂᒃ ᖃᐅᔨᔭᐅᔪᑦ ᐊᒻᒪ ᐅᔾᔨᕐᑐᕐᑕᐅᑎᐊᕐᓂᖏᑦ ᐱᓪᓗᒋᑦ ᓄᓇᕗᖕᒥ ᐃᓄᐃᑦ ᓴᓇᔨᐅᔪᑦ ᒥᒃᓵᓅᖓᔪᑦ ᐊᑐᐃᓐᓇᐅᕗᑦ ᑐᙵᕕᒃᑯᑦ ᖃᕆᑕᐅᔭᒃᑯᑦ ᐃᑭᐊᕐᕆᕕᖓᓂ: https://nilfa.tunngavik.com/
ᑐᑭᓯᒋᐊᒃᑲᓐᓂᕈᓐᓇᕐᐳᑎᑦ ᐅᕗᖓ:
ᓇᐅᓪᓚᕐᒃ ᕙᓚᐅᕆᑎ
ᑐᑭᒧᐊᒃᑎᑦᑎᔨ ᑐᓴᐅᒪᖃᑦᑕᐅᑎᓕᕆᔨᒃᑯᓐᓄᑦ ᐱᓕᒻᒪᒃᓴᔪᖅ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᓕᕆᐊᖃᙱᑦᑐᖅ: 1-888-646-0006
